Read gen Zakarìa 6 Bible Online

Zakarìa 6 - gen bible

Zakarìa 6

¹Mù gbà kɔ ŋùmè yì ji eye mù kpɔ àhùakèkevi ènè. Wo zɔ̃ to gàjɛ̃ be èto èvè dòmè gbãnà.

²Wo bla èsɔ jɛ̃wo ɖo àhùakèkevi cucugbã tɔ̀a be ŋùkɔ̀. Èsɔ yìbɔwo lè èvègɔ̃a be ŋùkɔ̀,

³èsɔ ɣewo lè ètɔ̃gɔ̃a be ŋùkɔ̀ eye èsɔ ŋuti ŋùãtã ŋùãtãwo ye lè àhùkèke ènègɔ̃a be ŋùkɔ̀.

⁴Mù biɔ àtikplɔtɔ kè le pò nupo na mù a be: “Àpetɔ nyè, gɔ̃mèsèse kɛ ye lè woa si ò?”

⁵E ɖo e ŋuti na mù be: “Wo le nyi xixea be àya ènèawo. Wo lè Tɔhonɔ̀ gbɔ sã, tètè boo lè ànyigbã a gbɔ eye fifìa wo jo.”

⁶Àhùakèke kè ye èsɔ yìbɔwo le dɔ̃a jè èmɔ̃ tùtà èvègo. Èsɔ ɣewo le èwèɖoxɔ̀pe be èmɔ̃. Èsɔ ŋùãtã ŋùãtãwo tùtà àpùgo.

⁷Èsɔ jɛ̃wo zɔ̃ va ŋùkɔ̀. Wo le ji ŋutɔ la ɖìsà to ànyigbã ji. Tɔhonɔ̀ gblɔ̃ na wo be: “Mì yì ɖìsà to ànyigbã ji.” Ènu kèa ye wo wɔ̀.

⁸Nène a, Tɔhonɔ̀ yɔ mù eye be gblɔ̃ na mù be: “Kpɔɖa: èsɔ kèwo le èvègo be èmɔ̃awo la sɔ àpe Gbɔ̃gbɔ̃ a ɖiɖi ɖo àgo ŋua kpata ji.”

⁹Tɔhonɔ̀ do ègbè kèa àsi na mù be:

¹⁰“Lɔ̃ xɔ̀ ènunana kèwo ye Hɛ̀ldayì, Tobìa kudo Yèdayà wo hɛ̃ so àmè kèwo yì gàtɔnugbeawo va na wòa. Wo so Babɛ̀l va trolo. Egbèa ke ye wò la yì Sèfanìa be èvi Yosìas gbɔ, fikè ye wo lèa.

¹¹Wò la sɔ sìka kudo klòsalò sɔ wɔ̀ jègbà eye wò la sɔ ɛ̀ yì cɔ̃ èta na Yòsadàk be èvi, hũbonɔ gã Yesùa.

¹²Wò la gblɔ̃ na ɛ̀ be: Tɔhonɔ̀ ŋusɛ̃kpatatɔa be àŋɛ̀a ye nyi be: “Ŋusù ɖe kè wo yɔna be 'Gɛrmà' lè fikèa. Àgbè la dri lè fikè be lèa, e ye la gbìgbɔ̀ tù mawuxɔ nyèa.

¹³Ɛ̃ɛ, e ye la gbìgbɔ̀ tù ì. E la do èfìɔ be àwùwo. E la nɔ̀ ànyi ɖo èfìɔzìkpe ji sɔ kplɔ̀ dùkɔ̃a. Hũbonɔ ɖèka la nɔ̀ àhàdamè na ɛ̀, eye wo la nɔ sè woa nɔ̀nɔwo gɔ̃mè gà sia gàmè.

¹⁴Jègbàa la nɔ̀ Tɔhonɔ̀ be mawuxɔa mè, lè Hɛ̀ldayì, Tobìa kudo Yèdayà wo be ŋùɖo mè kudo Sèfanìa be èvi Yosìas be àdɔ̀mè nyuɛ̃ wɔ̀wɔ mè.”

¹⁵Àmè kèwo lè àzɔ̀ge booawo la va trɔ tù Tɔhonɔ̀ be mawuxɔa. Nène a, mì la nya ɛ̀ be Tɔhonɔ̀ ŋusɛ̃kpatatɔa ŋutɔ ye dɔ̃ mù ɖoɖa mìa gbɔ. Ekèa la va e mè ne mì le sètonu na Tɔhonɔ̀ mìabe Mawu nyàwoa.