Read gen Zakarìa 8 Bible Online

Zakarìa 8 - gen bible

Zakarìa 8

¹Tɔhonɔ̀ ŋusɛ̃kpatatɔa gblɔ̃ ènyà kèa na mù:

²“Ènyè Tɔhonɔ̀, mù ɖo lɔ̃lɔ̃ tɔ̀xɛ ɖe na Yèruzàlɛm. Lɔ̃lɔ̃ kèa na àpe èjì le le èzò vlàvlà.

³Ekèa ŋuti ye mù trɔ va Ziɔ̀n. Ɛ̃ɛ, mù gbà trɔ va ɖo nɔ̀pe ɖo Yèruzàlɛm. Wo la yɔ Yèruzàlɛm be “Èdù lè ègbè ji”, eye wo la yɔ Tɔhonɔ̀ ŋusɛ̃kpatatɔa be ètoa be 'Èto kɔ̀kɔ̀ɛ'.

⁴Tɔgbe kukuiwo kudo nyagã kukuiwo la trɔ gbɔ̀ va nɔ̀ ànyi lè Yèruzàlɛm be àgbowo nu, wo la nɔ tɔ̃ èkpò ɖo woabe èpèwo ŋuti.

⁵Èdùgbowo nu la ɖɔ kudo ɖèviwo, ɖèkajɛviwo kudo tùgbèjɛviwo, eye wo la nɔ gble lè funu.”

⁶Tɔhonɔ̀ ŋusɛ̃kpatatɔa gblɔ̃ be: “Ekèa teŋu nyi ènu màjɔ̀ gbèɖe na Izràɛlvi kèwo ci àgbèa, vɔ̀ ènyè Tɔhonɔ̀ ŋusɛ̃kpatatɔa, mù la kpɔ ɛ̀ sìgbè ènu màjɔ̀ gbèɖe nènea?

⁷Ɛ̃ɛ, mù le gblɔ̃ ɛ̀ be mù la hlùɛ̃ dùkɔ̃ nyèa gã, la kplɔ̀ ɛ̀ so èwèzɛ̃pe kudo èwèɖoxɔ̀pe be èdùwo mè va.

⁸Mù la kplɔ̀ wo gbɔ̀ va ne woa va nɔ̀ Yèruzàlɛm. Wo la nyi àpe dùkɔ̃, eye mù la nyi ànùkua Mawu kè lè jɔ̀jɔɛa na wo.”

⁹Tɔhonɔ̀ ŋusɛ̃kpatatɔa gblɔ̃ be: “Wàlɛbɛ kè mì le do dodoeawo be èkpe ègũ sɔ tù mawuxɔa, gblɔ̃ɖɛtɔwo fìã àjɔ̀gbè. Eye fifìa, mì gbà dojì kpe è, ɖo ne gàmèa sùa, mì la gbà sè àjɔ̀gbè fìãfiã ŋuawo ke.

¹⁰Sãa, àmè ɖekpe mu tuna èfɛ̃ ɖo èdɔ kè àmè wɔ̀a ta ò eye èlãwo be èdɔwɔ̀wɔ mu hɛ̃nà àlè ɖe va na ò. Fifìa, kù ɖo kɛ̃tɔwo ŋuti, àmè ɖe mu gbà le zɔ̃ èmɔ̃ lè èjì ɖèɖe mè ò. Nyàwo be nyi be mù dà àgbètɔwo ɖo woa nɔ̀nɔwo ŋuti.

¹¹Vɔ̀ fifìa, ènyè Tɔhonɔ̀ ŋusɛ̃kpatatɔa, mù le gblɔ̃ be nyè mu la gbà wɔ̀ kudo àmè kèwo kpɔ̀tɔ̀ ci àgbè lè dùkɔ̃ kèa mèa sìgbè sãa nène ò.

¹²Mù la ɖùɖù ŋutifafa ɖo ànyigbã ji, vɛ̃-gblewo la na vɛ̃ kusɛ̃sɛ̃, ànyigbã la na àgblèmènukuwo jiŋùkusi la na èji la jà. Mù la na nyɔna kèawo kpata àmè kèwo kpɔ̀tɔ̀ ci àgbè lè àpe dùkɔ̃a mèa.

¹³Izràɛl kudo Yudà be fìɔdu, mì lè sìgbè dùkɔ̃ kè wo sɛ̃kpɛ̃ na sãa nène lè dùkɔ̃ kpɔ̀tɛawo dòmè. Vɔ̀ fifìa, mù hlùɛ̃ mì gã. Mì la nɔ̀ sìgbè dùkɔ̃ kè wo tu sì na a nène. Mì mu gbà nɔ vɔ̃ ke ò, mì nɔ dojì kpò!”

¹⁴Ènyà kè Tɔhonɔ̀ ŋusɛ̃kpatatɔa gblɔ̃a ye nyi be: “Wàlɛbɛ kè mìa tɔgbewo do àdɔ̀mèze na mù a, mù ɖo è be ma wɔ̀ ènu bàɖà kudo mì, eye, nyè mu trɔ va ɖoɖo kèa ji ò.

¹⁵Fifìa ya nyè ŋutɔ mù ɖo è be ma wɔ̀ ènyuɛ̃ na mì, Yèruzàlɛm be dùkɔ̃a kudo Yudà be fìɔdua kpata. Mì mu gbà vɔ̃ ò.

¹⁶Ɖoɖo kèwo ji mì la zɔ̃ ɖoa ye nyi be: Mìa nɔ sò jɔ̀jɔɛ kè hɛ̃nà ŋuti fàfa va na a, lè kòjoɖopewo!

¹⁷Mì mu gbà nɔ ɖo sùsu vuɛ̃wo ɖo mìa nɔ̀nɔwo ŋuti ò. Mì nɔ gbe àjè ŋùgbèdodowo wɔ̀wɔ. Mù crì nɔ̀nɔmè bàɖà kèawo kpata. Ènyè Tɔhonɔ̀ ye le gblɔ̃ ɛ̀.”

¹⁸Tɔhonɔ̀ ŋusɛ̃kpatatɔa gblɔ̃ na mù be:

¹⁹“Ènubabla kèwo mì wɔ̀nà lè wètri ènègɔ̃a mè lè èpèa mèa, lè wètri àtɔ̃gɔ̃, adrɛ̃gɔ̃ kudo èwogɔ̃a mèawo trɔ zũ jìjɔɛ kudo èglotùtu be àzãwo na Yudà be dùkɔ̃a fifì. “Nène a, mì lɔ̃ nyàwo kudo ŋuti fàfa!”

²⁰Tɔhonɔ̀ ŋusɛ̃kpatatɔa be ènyà ye nyi ekèa: “Ɛ̃ɛ, dùkɔ̃ kèwo nyi àmèjro so èdù vòvòvòwo mèa, la trɔ gbɔ̀ va Yèruzàlɛm.

²¹Èdù ɖe mètɔwo la gblɔ̃ na èdù bu mètɔwo be: “Mì va, ne mia yì fã yɔ Tɔhonɔ̀ ŋusɛ̃kpatatɔa gbà biɔ yebe àmè gbɔ nɔ̀nɔ.” Wo la ɖo e ŋuti be: “Mia cã mi la yì”.

²²Ɛ̃ɛ dùkɔ̃ kèwo ɖo ŋusɛ̃a, la sùgbɔ va Yèruzàlɛm eye wo la va fãkue sɔ biɔ àpe àmè gbɔ nɔ̀nɔ.

²³Mù la gblɔ̃ ɛ̀: lè hùe ŋua nua, àmèjro èwo kèwo le do ègbè vòvòvòwoa, la kù ɖo Yudàvi ɖèka be àwù ŋuti eye wo la gblɔ̃ na ɛ̀ be: “Mi le ji la yì kudo wò. Nyàwo mi sè be Mawu lè kudo mì.”