Read gen Zakarìa 9 Bible Online

Zakarìa 9 - gen bible

Zakarìa 9

¹Tɔhonɔ̀ be gbèfãɖèɖe be ènyà. Tɔhonɔ̀ be ènyà yì kɔ̀ ɖo Hadràk be àgowo ji, eye e yì sò nɔ̀pe ɖo Dàmaskò. Nyàwoa, mu nyi Izràɛl be kɔ̀tawo kpò gbɔ ye Tɔhonɔ̀ kpɔna ò, vɔ̀ àgbètɔwo kpata gbɔ.

²E pò nupo na Hàmatò, kè gogo Dàmaskòa e gbà pò na Tirò kudo Sidɔ̀n, tèpe kèwo ye àmèwo bi lè ŋutɔa cã.

³Tirò mètɔwo tù àgbògbò pòhla èdùa. Wo bɔ̀ klòsalò sìgbè èmɔ̃-dòmè-kɔ nène. Eye wo bɔ̀ sìka sìgbè èmɔ̃ ji be bàba nène.

⁴Vɔ̀, Tɔhonɔ̀ sù la hlà wo lè woa si. E la mù àgbògbòa ɖo àpù mè ke, eye èzò la bì èdùa.

⁵Ne wo le kpɔ ekèa, vɔ̃vɔ̃ la jè Àskalɔ̀n be èdùa ji, Gazà la hũhũ ku vɔ̃vɔ̃, Ekrɔ̀n cã, ɖo Tirò mu la gbà nɔ̀ ŋùgbe na ɛ̀ ke ò. Èfìɔa mu la gbà nɔ̀ Gazà eye àgbètɔ ɖekpe mu la gbà nɔ̀ Àskalɔ̀n ò.

⁶Èdùkɔ̃ vòvòvòwo ye la nɔ̀ Asdɔ̀d[4]. Tɔhonɔ̀ gblɔ̃ be: “Nène a ye mù la crɔ̃ Filistìtɔwo be ègòyiyi.

⁷Mù la ɖè èlã kè mè èhũ lèa kudo èlã kè wo sɔ savɔ na vòduwoa lè ènu mè na wo. Àmè kèwo la ci àgbè lè wɔa dòmèawo la nyi tɔ̀ nyè sìgbè Yudà be kɔ̀ta ɖe ye wo nyi nène. Ekrɔ̀n be àmèwo la ɖo àpe dùkɔ̃ mè sìgbè àlekè Yebusìtɔwo wɔ̀ ɛ̀ sãa nène.

⁸Mù la nɔ ɖia àpe ànyigbã a ne ma hlùɛ̃ ɛ̀ lè kɛ̃tɔ kèwo la sitè ɖo e ŋutia si, ne wo gbà trɔ va ŋutɔ cãa. Èfìɔ ɖekpe mu la gbà so àzɔ̀ge va la ɖiki dùkɔ̃ nyèa ke ò. Nyàwo be nyi be fifìa, mù le le ŋùku ɖo e ŋuti.”

⁹Ɖuwè kudo àpo ŋusɛ̃ keŋu, Ziɔ̀n dùkɔ̃! Ɛ̃ɛ, do jìjɔɛ be àpa, Yèruzàlɛm! Kpɔɖa! Èfìɔ wòa gbãnà gbɔ wò. E nyi àmè bɔ̀bɔɛ gbà lè jɔ̀jɔɛ, e nyi èjiɖùtɔ. E lia èsɔ àkɛtɛ ji gbãnà, èsɔ àkɛtɛ-nɔ be èvi ji.

¹⁰E la gũ àhùakèkeviwo lè Efràyim eye e la gũ èsɔwo lè Yèruzàlɛm. E la ŋɛ̃ àŋùdàti kèwo wo sɔ wɔ̀nà àhùa. E la gbìgbɔ̀ hɛ̃ ŋuti fàfa va dùkɔ̃wo dòmè. E la nyi èjè-pù kudo àpù gãa gbàkudo Efratà be ètɔ̀a be àpetɔ kaka yì ànyigbã be vɔ̀vɔnu.

¹¹Tɔhonɔ̀ gblɔ̃ be: “Hà ɖo zòɖùɖu kè mù wɔ̀ kudo mì eye mù ɖokpe e ji kudo èhũ kè wo sò ɖɛa ŋutia, mù la ɖègà àmè kèwo wo le do èsìdo kè mè pu kpakplaa mè.

¹²Mìa gàmènɔ̀tɔ kèwo si ŋùɖo lè drìa, mì trɔ va mìabe èdù kè wo tɔ̃ èkpa trɔ dɔa mè! Egbèa ke ye mù le ɖè gblɔ̃ na mì be mù la trɔ sɔ ènu kè lè mìa sia be tèpe èvè na mì.

¹³Mù la le Yudà be ànyigbã sìgbè lekè wo lena àŋùdàtia nène. Efràyim ye la nyi àŋùtia. Yèruzàlɛm, mù la ɖo èvi wòwo la yì wɔ̀ àhùa kudo Grisktɔwo. Mù la sɔ wo sìgbè àhùawɔ̀tɔ be èwui nène.”

¹⁴Nène a, ye Tɔhonɔ̀ la ze lè woabe èta mè, eye yebe èwuia la zrò yì sìgbè bìɖà nène. Tɔhonɔ̀ Mawu la ku àhùa-kpɛ̃, e la so àpùgo la zɔ̃ va kudo èji jàja sɛ̃sɛ̃wo.

¹⁵Tɔhonɔ̀ ŋusɛ̃kpatatɔa la nyi àkpoxɔ̀nu na yebe dùkɔ̃a mètɔwo. Wo la crɔ̃ ènu eye wo la tùkù rɔbàtukpewo. Wo la kɔ̀ woabe kɛ̃tɔwo be èhũ kɔ̀ ɖo ànyi sìgbè vɛ̃ ye le srà nène. Wo la na be la kɔ̀ sìgbè vɔsalãwo be èhũ kè lè ènunana be kogòwo mè àlo sìgbè èhũ kè wo kɔ̀nà ɖo vɔsakpea be ètomè yì jiawo ji nène.

¹⁶Eye gbè ŋua gbèa, Tɔhonɔ̀, woabe Mawu a la hlùɛ̃ wo gã, sìgbè àlekè àlɛ̃kplɔ̀tɔ hlùɛ̃nà yebe èlãwo gã nène. Sìgbè èkpe xɔ̀asì kèwo nɔ̀nà èfìɔkuku ŋuti nènea, wo la klɛ̃ lè yebe ànyigbã ji.

¹⁷Wo la ɖo jɔ̀gbè nyuɛ̃ tututu! Wo la nyakpɔ nyuɛ̃ ɖe! Èlì la na ŋusɛ̃ ɖèkajɛviwo eye vɛ̃ yeye la do ŋusɛ̃ lãmè na tùgbɛ̀jɛviwo.