Read gen Malakìa 1 Bible Online

Malakìa 1 - gen bible

Malakìa 1

¹Ekèa ye nyi ènyà kè Tɔhonɔ̀ gblɔ̃ na Izràɛl be dùkɔ̃a, to Malakìa ji.

²Tɔhonɔ̀ gblɔ̃ be: “Mù lɔ̃ mì!” Vɔ̀a, mìawo yaa, mì le gblɔ̃ be: “Leke ye wò ɖè lɔ̃lɔ̃ wòa fiɔ mi ɖo ò?” Tɔhonɔ̀ le gblɔ̃ be: “Mu nyi Esaò be nɔ̀vi ye Yakɔb nyi òa? Gãkea, mù lɔ̃ Yakɔb.

³Eye mù crì Esaò ya. Mù trɔ yebe ètowo zũ zògbèwo, eye mù sɔ yebe ècrɔ̃nuwo do àsì na zògbè ji gbètewo”.

⁴Ne Edɔ̀mtɔwo gblɔ̃ be: “Wo gbã mi, gãkea, mi la gbà trɔ tù miabe èdùgbãgbãwoa!”, Tɔhonɔ̀ ŋusɛ̃kpatatɔa gblɔ̃ be: “Woawo yaa, wo ne tù! Vɔ̀a, ènyè yaa, mù la gbà gbã ènu! Wo la ɖo nyikɔ na wo be: 'Èvuɛ̃jɔ̀-nyigbã' ku 'Dùkɔ̃ kè Tɔhonɔ̀ kãna ŋùmè na, kaka sɔ yìa'.

⁵Mì la kpɔ wo ku mìabe ŋùkuviwo, eye mì la gblɔ̃ be: “Tɔhonɔ̀ lòlò! Yebe ŋusɛ̃ trì àkɔa ze, to lè Izràɛl, yì èdù-ta”.

⁶Èvi dona bùbu ètɔa ŋuti, eye sumɔ̃vi dona bùbu àpetɔa ŋuti. Tɔhonɔ̀ ŋusɛ̃kpatatɔa le gblɔ̃ na mì, hũbonɔ kèwo le dovlo yebe nyikɔa be: “Ne mù nyi ètɔ na mìa, fikɛ bùbu kè mì ɖo na mù a lè ò? Eye ne mù nyi àpetɔ na mìa, fikɛ ye sisi kè mì ɖo la ɖo na mù a lè ò? Gãkea, mì le gblɔ̃ be: 'Leke mi dovlo nyikɔ wò ɖo ò?'

⁷Mì le hɛ̃ ènuɖùɖu mà-kɔ̀mà-kɔ̀wo va vɔsakpe nyè ji, vɔ̀a le gblɔ̃ be: 'Leke mi le dovlo nyikɔ wò ɖo ò?' Ɛ̃ɛ, wàlɛbɛ kè mì le gblɔ̃ be: 'Tɔhonɔ̀ be vɔsakpea mu ɖì ènu ɖe òa' ye!

⁸Ne mì sɔ èlã ŋùkuvi gbãgbãnɔ̀ va savɔ na mù a, mu nyi èvuɛ̃ ye òa? Ne mì sɔ èlã kplibɔ, ku ekè le le èdɔ̀a savɔa, mu nyi èvuɛ̃ ye òa? Mì sɔ ɛ̀ na mìabe èdùjikpɔtɔ, kpɔɖa be e la jɔ̀jì na ɛ̀ mà a. E la kpɔ jijɔ̀ɛ so mìa ŋutia?” Àhùadù Tɔhonɔ̀a ye le biɔ ènyà kèa sè.

⁹“Ekèa ŋutia, mì jè àgbàgba, mìa ɖè kuku na Tɔhonɔ̀, be ne ku ŋuzĩzĩ na mi. Mìabe àlɔ̀wo ye wɔ̀ ènu kèa. Ne e so mìa gbɔa ɖe, Tɔhonɔ̀ la xɔ̀ ɛ̀a? Àhùadù Tɔhonɔ̀a ye gblɔ̃ ɛ̀.

¹⁰Àmè ɖe mu lè mìa dòmè kè la teŋu tu àgboa, àleke be mì mu gbà nɔ dozò ɖo vɔsakpe nyèa ji gbalo òa? Nyè mu le kpɔ jìjɔɛ ɖekpe so mìa ŋuti ò. Àhùadù Tɔhonɔ̀a ye gblɔ̃ ɛ̀. Ekèa ŋuti nyè mu la xɔ̀ ènunana ɖekpe so mìa si ò.

¹¹Ɖoa, so èwèzɛ̃pe sɔ yì èwèɖoxɔ̀pea, dùkɔ̃wo jèsi lekè nyikɔ nyè lòlò ɖoa. Lè tèpe ɖekpekpea, wo sɔna lifi sanavɔ na nyikɔ nyè, eye wo wɔ̀nà vɔsa kè ŋuti kɔ̀a, ɖoa, nyikɔ nyèa lòlò, lè dùkɔ̃wo dòmè.” Àhùadù Tɔhonɔ̀a ye gblɔ̃ ɛ̀.

¹²Vɔ̀a, mìawo yaa, mì le dovlo è, wàlɛbɛ kè mì le gblɔ̃ be: “Tɔhonɔ̀ be vɔsakpe ŋuti mu kɔ̀ ò, eye, yebe ènuɖùɖua le nyɔŋu”.

¹³Tɔhonɔ̀, Ŋusɛ̃kpatatɔa be: “Mì gbà le gblɔ̃ be: 'E tìkɔ̀ na àmè', eye mì le crì ì. Mì le hɛ̃ èlã fìfĩwo, èlã kplibɔwo, àlo èlã dɔ̀nɔ̀wo va le savɔ. Eye mì be ma xɔ̀ wo lè mìa sia?

¹⁴Hèlu na àmèflùtɔ kè nya be èlã-su lè yèbe èlãkpa mè, be fìã àjɔ̀gbè, vɔ̀, jo va sɔ èlã dɔ̀nɔ̀ savɔ na Tɔhonɔ̀a! Ɖoa, èfìɔ gã ye mù nyi, eye vɔ̃vɔ̃ lè nyikɔ nyèa ŋuti, lè dùkɔ̃wo dòmè.” Àhùadù Tɔhonɔ̀a ye gblɔ̃ ɛ̀.