Read gen Malakìa 2 Bible Online

Malakìa 2 - gen bible

Malakìa 2

¹Mìa hũbonɔwo yaa, ekèa ye kã mì:

²Àhùadù Tohonɔ̀a gblɔ̃ be: “Ne mì gbe ètoɖoɖo, eye, mì mu sɔ ɛ̀ ɖo mìa ɖokoewo ji, be yèwo la nɔ na mù gogo òa, mù la do kpɛ̃sɛ̃ mìa dòmè, eye mù la trɔ mìabe nyɔnawo sɔ wɔ̀ kpɛ̃sɛ̃. Ɛ̃ɛ, mù la sɛ̃kpɛ̃ na mìabe sìtuwo, ɖoa, mìa dòmètɔ ɖekpe mu le sɔ ɛ̀ ɖo ye ɖokoe ji ò.

³Kpɔɖa, mù la kã ŋùmè na mìabe jìjimèviwo, eye mù la kɔ̀ ɖiɖɔɛ ɖo ŋùmè na mì. Mù la kɔ̀ mìabe àzãɖùɖuwo be vɔ̀sawo be ègbeɖiɖɔ ɖo ŋùmè na mì, eye wo la lɔ ɛ̀ ku mì.

⁴Mì la sɔ nya be mù do èse na mì, ne ma sɔ le èzò kè mù ɖù ku Levì be jìjimèviwoa, ɖotè.” Àhùadù Tɔhonɔ̀a ye gblɔ̃ ɛ̀.

⁵Èzò kè mù ɖù ku ìa, nyi àgbè ku ŋuti fàfa tɔ̀. Eye, mù sɔ wo kè è, àleke be bèa ɖo bùbu na mù; eye e sina nyikɔ nyè cã nyàwo.

⁶Ènufiɔfiɔ kè tona so yebe ènu mèa nyi nyàwo, eye àjè mu va yebe ènuyiwo nu kpɔ ò.

⁷Ɛ̃ɛ, hũbonɔ be ènu ye lena nyàwototo ɖotè, eye àmèwo va kplana ènunya so yebe ènu mè, ɖoa, àhùadù Tɔhonɔ̀a be àmèdɔ̃dɔ̃ ye be nyi.

⁸Gãke, mìawo yaa, mì trã èmɔ̃. Mìabe ènufiɔfiɔ na àmè sùgbɔ bu, eye mì gble Levì be jìjimèviwo be èzò kè mù ɖù ku mìa.

⁹Ekè mì mu le zɔ̃ ɖo ɖoɖo nyèwo ji ò, eye mì dɔ̃na àmè ɖewo ji, lè mìabe ènyà sòsowo mèa, nyè ca mù le ɖìgbɔ mì, lè dùkɔ̃a keŋu be ŋùmè, eye mù la na, wo la crì mì.

¹⁰Mu nyi ètɔ ɖèka be èviwo mi nyi òa? Mu nyi Mawu ɖèka ye wɔ̀ mia? Nukɛ ŋuti ye mì mu le wɔ̀ ànùkua ɖo mìa nɔ̀nɔwo ŋuti ò, sɔ le dovlo zòɖùɖu kè Mawu wɔ̀ ku mia tɔgbewo ò?

¹¹Yudàviwo gblekɔ̀ na woabe ègbèɖoɖo. Wo wɔ̀ ènu nyɔŋuwo lè Yèruzàlɛm ku Izràɛl-nyigbã ji. Ɛ̃ɛ, Yudàviwo dovlo kɔ̀kɔ̀ɛpe kè ŋuti Tɔhonɔ̀ mu lɔ̃nànu lè òa, eye wo yì ɖè èdù bumètɔwo be vòdu be nyɔ̃nùvi.

¹²Tɔhonɔ̀ ne crɔ̃ àmè ɖekpekpe àmè kè ye wɔ̀ ènu kèa lè Yakɔb be xòmèa dòmè. Ne e gbà nyi xɔ̀namètɔ kè xɔ̀nà ènyà ɖo Yakɔb be àxuedo a nu ò, ne e gbà nyi àmè kè hɛ̃nà vɔsa va na àhùadù Tɔhonɔ̀ ò, àmè ɖekpekpe!

¹³Ènu kè mì gbà wɔ̀nàa ye nyi ekèa: mì sɔna àvifãfã ku àlenana cɔ̃na Tɔhonɔ̀ be vɔsakpea, ɖoa, mu gbà lena ŋùku ɖo mìabe ènu nana ŋuti ò, eye mu gbà kpɔna jìjɔɛ so ènu kè so mìa simèa ŋuti, ne bèa xɔ̀ ɛ̀ ò.

¹⁴Eye mì le gblɔ̃ be: “Nukɛ ŋuti ye ò?” Ɛ̃ɛ, Tɔhonɔ̀ nyi ɖaseɖùtɔ lè èwò ku àpo ɖèkajɛ mè be èsrɔ̃ kè wò mu wɔ̀ ànùkua ku òa dòmè. Èmɔzɔ̃-havi kè wò ɖùzò kua ye be nyi, gãke, wò mu le wɔ̀ ànùkua ku ì ò.

¹⁵Mu nyi àmè ɖèka ye mì trɔ zũ, ku gbɔ̃gbɔ̃ ɖèka òa?[1] Gbɔ̃gbɔ̃ ɖèka kèa, nukɛ ye be la teŋu ji, sɔ wu jìjimèvi kèwo la so Mawu gbɔa ò? Ekèa ŋutia, mì kpɔ nyuɛ̃ ɖe lè mìabe gbɔ̃gbɔ̃ mè, be àmè ɖe mu gbà dokpò ànùkua wɔ̀wɔ na yebe ɖèkajɛmè-srɔ̃ ò.

¹⁶Tɔhonɔ̀, Izràɛl be Mawu a gblɔ̃ be yè crì èsrɔ̃ gbegbe ku àmè kè sɔ àdãwɔ̀wɔ be èvuɛ̃ cɔ̃ yebe àwù jia. Ekèa ŋutia, àhùadù Tɔhonɔ̀a ye gblɔ̃ be: “Mì kpɔ nyuɛ̃ ɖe lè mìabe gbɔ̃gbɔ̃ mè, be mì mu gbà dokpò ànùkua wɔ̀wɔ na mìabe ɖèkajɛ mè be èsrɔ̃ ò.”

¹⁷Mì le do nupo na Tɔhonɔ̀ ku mìabe ènyà gbɔ̃gblɔ̃wo. Mì le biɔ sè be: “Leke mi le do nupo na ɛ̀ ɖo ò?” Mì le do nupo na ɛ̀, ne mì le gblɔ̃ be: “Àmè sia àmè kè le wɔ̀ èvuɛ̃a, jènà ŋùmè na Tɔhonɔ̀. Nène meawo be ènu ye jɔ̀nàjì na ɛ̀.” Àlo, “Fikɛ ye Mawu kè wɔ̀nà jɔ̀jɔɛa lè ò?”