Read gen 1Màkàbeòwo 1 Bible Online

1Màkàbeòwo 1 - gen bible

1Màkàbeòwo 1

¹E va jɔ̀ be Àlɛ̀ksãdrò, kè nyi Fìlipò, Màkèdonia ŋusù ɖe ke to jo lè Kitimtɔwo be ànyigbã ji be èvi a ye ɖu Darius, Pɛrsìatɔwo ku Midiatɔwo be èfiɔ a ji, eye be va ɖùfìɔ ɖo e tèpe, lè Grɛs be èfìɔɖùpewo ji gbɔ̀xue,

²tɔ àhùa sùgbɔ wɔ̀wɔ̀ ji, sɔ ɖo àlɔ̀ àgbògbò-dù sùgbɔ ji, eye be crɔ̃ àgo ŋuawo ji be èfiɔwo keŋu.

³E yì ŋùkɔ̀, kaka ɖo xixe a be nukpòpewo, eye be lɔ xixemè-dùwo be ènuwo sùgbɔ jo. Kè ànyigbã ji be èdùwo nɔ̀ ànyi kpoo lè ŋùkɔ̀ na ɛ̀ a, yebe èji hɔ̃ glèglèglè, eye be tɛ̃ ku ègòyiyi.

⁴E bɔ̀ àhùakɔ̃ sɛ̃ŋu ɖe ɖɛ, eye be zĩ èduwo ji, zĩ èfìɔɖùpewo ku èdù-nyigbãwo ji, eye woa kpata, wo tuna ètaci na ɛ̀.

⁵Ekè a yomè a, e jè èdɔ̀, ci àba ji, eye be nyã be ye la ku.

⁶E yɔ yebe àhùakplɔ̀tɔ ɖìnyi kèwo wo hɛ̃ ku ì, so yebe ɖèkajɛ mèa, eye be mã yebe èfìɔɖùpea na wo gbɔ̀xue bea trɔ ŋùgbe.

⁷Àlɛ̀ksãdrò ɖùfìɔ èpè woèvè gbɔ̀xue ku.

⁸Yebe àhùakplɔ̀tɔ ɖìnyi ɖe sia ɖe ɖo ye ɖokoe èfìɔ lè ànyigbã a be tèpe kè be lè a.

⁹Le yebe èku yomè a, woa kpata, wo va ɖùfiɔ, eye woabe èviwo ɖùfìɔ, jè woa yomè, èpè dìdi ɖewo. Wo wɔ̀ ènu bàɖà sùgbɔ, lè ànyigbã a ji.

¹⁰Woabe tɔgbe yɔvi ɖeka nyi jɔ̀jɔmè vi drã ɖe: Ãtiokus Èpìfanìo kè nyi èfìɔ Ãtiokus be èvi a. Kè wo le è ɖɛ, àwòbatɔ̀ ɖo Roma vɔ̀a, e va trɔ zũ èfiɔ le Grɛkwo be èfìɔɖùɖu be èpè èkà-tɔ̃ ci woeàdrɛ̃gɔ̃a mè.

¹¹Lè àzã ŋuawo mèa, yàkàmè ɖewo hɔ̃ so Izràɛl, eye wo flu àmè sùgbɔ, le gblɔ̃ na wo be: “Mi la ɖùzò ku dùkɔ̃ kèwo ye trɔ do miawo, ɖoa, so kaka gà kè mè mi klã jo lè woa ŋutia, èvuɛ̃ ɖèɖe kpò ye le jɔ̀ ɖo mi a ji.”

¹²Ènyà kè a jè ŋùmè na wo,

¹³eye àmè sùgbɔ lè dùkɔ̃ a dòmè yì èfìɔ a gbɔ; eye èfìɔ a ɖè èmɔ̃ na wo be wo anɔ wɔ̀ ɖo dùkɔ̃ ŋuawo be èkɔ̀nyìnyiwo ji,

¹⁴sɔ zɔ̃ ɖo woabe èkɔ̀dowo ji. E yomè a wo tù èkãmètète be tèpe ɖe ɖo Yèruzàlɛ̀m,

¹⁵wo nɔ̀tè èvo sòso, trɔ lè Zòɖùɖu Kɔ̀kɔ̀ɛ a yomè, yì le do èha ku vòdu sɛ̃tɔwo, sɔ woa ɖokoewo sà do ènu nyràku wɔ̀wɔ mè.

¹⁶Eke e kpɔ be yebe èfìɔɖùɖu a va likè vɔ̀ a, Ãtiokus ɖo è ɖo ètà mè, be ye a trɔ zũ Ejiptè be èfìɔ, ne yè a ɖùfìɔ ɖo fìɔdu èvèawo nu.

¹⁷Kè be ɖo Ejiptè-dùa mè ku àhùakɔ̃ gã ɖe kudo àhùakèkeviwo gbàku àtiglinyiwo gbàkudo àhùa-tɔ̀jihũwo zãa,

¹⁸e kpe àhùa ku Ptolomèo, Ejiptè be èfìɔa. Ptolemèo si yì ŋùgbe, gble gbàdagbã sùgbɔ kèwo xɔ̀ àbì a ɖɛ.

¹⁹Ãtiokus xɔ̀ Ejiptè be àgbògbò-dùwo, eye be lɔ Ejiptè be ènu xɔ̀ àsìwo jo.

²⁰Kè be ɖù Ejiptè ji vɔ̀a, e trɔ gbɔ̀ lè èpè èkà-tɔ̃ takpo ci-ètɔ̃gɔ̃a mè, eye be gbà sɔ àhùakɔ̃ gã ɖe lia èto yì kpà ŋùkɔ̀ Izràɛl ku Yèruzàlɛ̀m.

²¹Kè be ɖo kɔ̀kɔ̀ɛpea àmè mà-bùtɔ̀a, e sɔ sìka vɔsakplɔ̃a, kàlĩgbɛ̃ti ku yebe ŋutinuwo kpata,

²²èkplɔ̃ kè ji wo sɔna vɔsa ɖo Tɔhonɔ̀ be ŋùkɔ̀ lè a, èsìkɔ̀ɖɛ-gbãwo, sìka gànuwo, sìka zòkakpoviwo, ènucɔ̃vɔa, àcɛ̀ be sìka sepòpowo, *asawo. E ɖè sìka-nu kèwo kpata wo sɔ ɖo àcɔ na mawuxɔ̀a be ŋùkɔ̀ keŋu jo.

²³E lɔ klòsalò, sìka, ènu xɔ̀asiwo eye be ɖo àlɔ̀ àdɔ̀kùnu wawla kèwo ŋuti be kè ɖoawo cã ji.

²⁴Kè be lɔ̃ ènuwo keŋu vɔ̀a, e jo yì yebe èdu mè. E wù àmè hãnyà-hãnyà, eye be gblɔ̃ bùsu-nyà ŋutɔ.

²⁵Èfũ lòlo gãa ɖe nɔ̀ Izràɛl be èdua be àfi ɖe kpekpe.

²⁶Egawo ku àmè sisĩwo na àle, ɖèkajɛwo ku tùgbɛ̀jɛwo jo gbɔjɔ, eye nyɔnùwo be nyɔnyɔ yrɔ̀.

²⁷Esrɔ̃ɖètɔ yeyewo to àlenahà ɖoɖa, eye nyɔnù yèyeawo nɔ̀ anyi lè woabe èxɔ̀dɔ̃mè, le lòfũ.

²⁸Ànyigbã hũhũ ɖo èdùamètɔwo be èvùɛ̃wo ŋuti, eye wo sɔ ŋùkpɛ̃ wɔ̀ àvɔ, ta na Yakɔb be àhuedo bliboa.

²⁹Èpè èvè yomèa, èfìɔa dɔ̃ ètacijɔ̀tɔ ɖoɖa Yudà be èdùwo mè; e va Yèruzàlɛ̀m ku àhùakɔ̃ gã kpànyà ɖe.

³⁰E gblɔ̃ àjè be ŋutifafa-nyà na èdùa mètɔwo, eye wo xɔ̀ ɛ̀ sè. E yomèa, e lũ ɖo èdùa ji, lè àvò mè, eye be wɔ̀ evùɛ̃ gã ɖe ku ì, eye àmè sùgbɔ crɔ̃ lè Izràɛl.

³¹E hlà èdùa mè be ènuwo jo, tɔ ɛ̀ èzò, e gbã àxuewo ku èglìkpawo.

³²Wo le nyɔnùwo ku àjiviwo àhùale eye wo sɔ èlãhawo sɔ wɔ̀ woa tɔ̀wo.

³³Ekèa yomèa wo gbìgbɔ̀ tù David be èdùa ku èglìkpa gã ɖe kè yì èjia, kudo *àcrɔmɔ̃ kàkòwo. Ekèawo ye va nyi woabe àgbògbòdù.

³⁴Wo sɔ jɔ̀jɔ̀mè gbegble, àmè mà-ɖo xɔ̀sèwo, àmè mà-ɖo èsewo ɖo woa mè, eye wo le kpɔ ŋusɛ̃ lè funua.

³⁵Wo sɔ àhùawɔ̀nuwo ku ènuɖùɖu bɔ̀ ɖɛ, ɖo funua, fɔ̀ ènu kèwo wo lɔ lè Yèruzàlɛ̀ma kɔ̀ ɖo funu, eye be nyi èmɔ̃trenu gã ɖe.

³⁶Ekèa va trɔ zũ àfɔ̀klɛ̃ na kɔ̀kɔ̀ɛpea, ku èvùɛ̃ be èkɛ̃tɔ na Izràɛl, lè hùe ɖekpekpe hùe nu.

³⁷Wo kɔ̀ ɖemanya be èhũ ɖɛ, trɔdo kɔ̀kɔ̀ɛpea eye wo gble èkɔ̀do na tèpe kɔ̀kɔ̀ɛa.

³⁸Wo na Yèruzàlɛ̀m be èdùa mètɔwo si jo, eye èdùa trɔ zũ èdù bu mètɔwo be nɔ̀pe, e va nyi èdù bu na ye ŋutɔ, yebe jìjìmèviwo, eye ye ŋutɔ be èvi jìjiwo gble è ɖɛ.

³⁹Yebe kɔ̀kɔ̀ɛpea gbã gudugudu sìgbè leke zògbè nɔnàa nène, yebe èwè-ɖuzãwo trɔ zũ èfũlòlo-zã, yebe jɛ̃gbɔ̃zãgbewo trɔ zũ ènu kòkòe, yebe gogo trɔ zũ èvlodonu.

⁴⁰Leke yebe gogo lòlò ɖoa, nènea ke ye yebe ègbɔɖìɖia cã lèa yeŋu, eye leke yebe ŋùkpɛ̃ lòlò ɖoa, va xɔ̀ leke yebe gã nyinyia ɖìnyi ɖoa tèpe.

⁴¹Èfìɔ Ãtiokus do èse lè yebe èfìɔɖùpe bliboa mè be yèbe dùkɔ̃a kpata ne wɔ̀ ɖèka,

⁴²eye kɔ̀ta ɖe sia ɖe ne gbe yebe èkɔnyinyi. Dùkɔ̃ kèwo sɛ̃nà vòduawo kpata zɔ̃ ɖo èfìɔ be ɖoɖoawo-ji.

⁴³Izràɛlvi sùgbɔ lɔ̃ ɖo yebe sɛ̃sɛ̃a ji. Wo wɔ̀nà vɔsa na legbawo eye wo dona vlo jɛ̃gbɔ̃zã a.

⁴⁴Efìɔa gbà ŋlɔ̃ xoma, sɔ dɔ̃ àŋɛ̀dotɔwo ɖoɖa Yèruzàlɛ̀m ku Yudà be èduwo mè, le ɖè èse to na wo be, wo ne zɔ̃ ɖo èdù bu mè tɔwo be èkɔ̀dowo ji, lè woa de.

⁴⁵E le biɔ so woa si be, wo ne gũ ènumèmè vɔsa, èènu nana vɔsa ku èsìkɔ̀ɖɛ lè kɔ̀kɔ̀ɛpea, ne wo a dovlo jɛ̃gbɔ̃zãa ku àzãɖùɖuwo,

⁴⁶wo a dovlo sɛ̃pea ku ènu kɔ̀kɔ̀ɛawo,

⁴⁷wo ali vɔsakpewo, àdowo, kpeliwo ku vòduxuewo ne wo asɔ èhãwo ku èɖilãwo[1] sɔ savɔ.

⁴⁸Woabe ŋusùviwo mu ɖo la gbà sò èvo ò, eye wo ɖo la nɔ wɔ̀ àfɛ̃nu buwo, ku èɖinu vòvò buwo, la sɔ nɔ dovlo woa ɖokoewo.

⁴⁹Wo ɖo la nɔ wɔ̀ ènu ɖekpekpe, la sɔ ŋlɔbe Mose be Èsea, ne wo trɔ èkɔ̀doawo keŋu.

⁵⁰Amè ɖekpekpe àmè kè mu la wɔ̀ ɖo èfìɔa be ègbèɖèɖea ji ò a, wo la wù ì.

⁵¹Efìɔa ŋlɔ̃ ènyà keawo, sɔ do èse na yebe èdù mè nɔ̀tɔwo kpata. E cã èsejikpɔtɔwo na dùkɔ̃a keŋu, eye be ɖè ègbè na Yudà be èdùwo keŋu be wo ne wɔ̀ vɔsa lè èdù ɖe sia ɖe mè.

⁵²Yudàvi sùgbɔ gble Mose be Èsea ɖɛ, nɔ̀ èfìɔa be àmèwo ŋuti, eye wo wɔ̀ ènu bàɖà lè èdùa mè,

⁵³àleke be, Izràɛlvi kèwo le wɔ̀ ànùkua na Mose be Èsea, wo si, yì wla ɖo bèbèpewo keŋu.

⁵⁴Wètri Kislɛv be ŋùkèkè woèatɔ̃gɔ̃a gbè, lè èpè àlɔ̀ ɖèka èkà ci-àtɔ̃gɔ̃a (145) mèa, èfìɔa tù cɔcrɔ̃ be èŋunyɔ̃nu ɖo Tɔhonɔ̀ be ènumèmè vɔsakpea ji, eye wo li vɔsakpewo ɖo Yudà be èduwo mè trɔ do.

⁵⁵Wo tɔna-zò lifĩ, lè àxuewo be àgbowo nu ku lè àblɔwo mè.

⁵⁶Ne wo gbe kè ɖo Mose be Esèa be Xoma ɖe ŋuti kpòa, wo zɛ̃nà ɛ̀, eye wo sɔna ɛ̀ ɖo èzò mè.

⁵⁷Ne wo kè ɖo Nubabla àlo Zòɖùɖu be Xomaa ɖè ŋuti, lè àmè ɖe gbɔ, eye ne àmè ɖe le zɔ̃ ɖo Èsea jia, èfìɔ be èdùsea crɔ̃na àmèa.

⁵⁸Wètri sia wètria, ne wo le Izràɛlvi ɖe, be le dà èfìɔ be èsea jia, wo wɔ̀nà ànyrà ku ì.

⁵⁹Wètri sia wètri be ŋùkèkè wuìvɔàtɔ̃gɔ̃a gbèa[2], wo wɔ̀nà vɔsa lè vɔsakpe kè wo li ɖo Mawu be ènumèmè be vɔsakpea jia ji.

⁶⁰Zɔ̃ ɖo èfìɔa be èdùsea jia, wo wùnà nyɔnù kèwo na wo sò èvo na woabe ŋusùviwoa.

⁶¹Wo dona èkà woabe èvi lè ànɔ nuwo ɖo èkɔ̀ na wo, nènea ke ye wo wùnà woabe xòmètɔwo ku àmè kèwo ye sò èvo na ɖèvia.

⁶²Gãkea, àmè sùgbɔ nɔ̀tè goŋu-goŋu, lè Izràɛlviwo dòmè, eye wo ɖo ŋusɛ̃ kè na be wo mu ɖù ènu màkɔ̀-màkɔ ò.

⁶³Wo lɔ̃ be yèwo aku bohũ, sɔ wu be yèwo aɖù ènu màkɔ̀-màkɔ, la sɔ do vlo ènubàbla, àlo, zòɖùɖu kɔ̀kɔ̀ɛa. eye wo ku cã.

⁶⁴Ekèa na be àdɔ̀mèze gãa ɖe be ŋùkèkèwo nɔ̀ Izràɛl be èdùa ji.