Read gen 1Màkàbeòwo 12 Bible Online

1Màkàbeòwo 12 - gen bible

1Màkàbeòwo 12

¹Kè Yònatàn kpɔ be ènuwo le zɔ̃ na yè nyuɛ̃ ɖea, e cã àmè ɖewo, eye be dɔ̃ wo ɖoɖa Romà. Àmè kèawo gbìgbɔ̀ yì tɛ ègbè ɖo woabe èxlɔ̃wɔ̀wɔ ku Romàtɔwo ji, eye wo gbìgbɔ̀ wɔ̀ èkàdodoa yeye.

²E gbà ŋlɔ̀ xoma ku susu ŋua ke ɖoɖa Spartà ku èdù buwo.

³Àmè dɔ̃dɔ̃awo yì Romà, eye wo ɖo àɖàŋùɖoha be bɔ̀bɔ̀pea, wo pò nupo, gblɔ̃ be: “Mawunɔ gã, Yònatàn ku Yudàviwo be dùkɔ̃a dɔ̃ mi ɖoɖa be mia va gbìgbɔ̀ tɛ ègbè ɖo èxlɔ̃wɔ̀wɔ̀ ku ègbè nɔ̀-du be èkàdodo kè lè mia ku mì dòmèa ji, ne mia gbìgbɔ̀ wɔ̀ ɛ̀ yeye, sìgbè leke be nɔ̀ ànyi va yì, lè mìa ku wo dòmè sãa nène.”

⁴Àɖàŋùɖohaa na wo ɖase xomawo be wo asɔ na èdù ɖe sia ɖe kè mè wo la toa be àcɛ̀kpàtɔwo, ne wo akplɔ̀, wo lè ŋutifafa mè, sɔ ɖota Yudà-nyigbã ji.

⁵Xoma kè Yònatàn ŋlɔ̃ ɖoɖa Spartiatɔwoa ye nyi ekèa:

⁶“Yònatàn, Mawunɔ Gãa, Yudàtɔwo be Àɖàŋùɖoha, mawunɔwo ku Yudàtɔwo be dùkɔ̃ bliboa le do ègbè ɖoɖa woa nɔ̀vi Spartiatɔwo.

⁷E dìdì fifìa, Areio kè nyi mìabe èfìɔ sãa, ɖo xoma ɖoɖa Mawunɔ Gã Onia. Xoma kèa le gblɔ̃ be mì nyi mia nɔ̀viwo, sìgbè leke xoma ŋua kè wo gbìgbɔ̀ ŋlɔ̃, ye mù sɔ le kpe ɖo ekèa ŋutia le ɖè è fiɔa nène.

⁸Ònia xɔ̀ àmèdɔ̃dɔ̃a ku bùbu, eye be xɔ̀ xoma kè mè wo le gblɔ̃ ègbèlèdu ku èxlɔ̃wɔ̀wɔ̀ be ènyà lèa.

⁹Miawo yaa, to e gbɔ be mi mu hiã èkàdodo kèawo ò, ɖoa, Xoma Kɔ̀kɔ̀ɛ kèwo ye lè mia siawo nyi miabe ŋusɛ̃ cãa,

¹⁰mi tèkpɔ, dɔ̃ àmè ɖe ɖoɖa, ne be agbìgbɔ̀ wɔ̀ ègbèlèdu ku èxlɔ̃wɔ̀wɔ̀, be èkàdodoa yeye, ne mi mu gbà nyi àmè mà-nyãwo na mì ò. Epè sùgbɔ ye ekèa va yì, so hùe kè nu, mì dɔ̃ àmèwo ɖoɖa mia.

¹¹Ne mi gbe le ɖù àzã, àlo, mi le wɔ̀ vɔsa ɖekpekpe na Mawu kpòa, mi ɖonaŋù mì, wè sia wè, sìgbè leke be jè, eye be nyɔ̃ be nɔ̀viwo ne wɔ̀a nène.

¹²Ne mìabe nyikɔ le yì èjia, miawo yaa, mi kpɔna jìjɔ̀ɛ.

¹³Enu sùgbɔ jɔ̀ ɖo mia ji, eye mi wɔ̀ àhùa sùgbɔ, ɖoa, èfìɔ kèwo trɔ do miawo ɖè àhùa kpe na mi.

¹⁴Mi mu jro la sɔ àhùa kèawo be ènyà, sɔ do nupo na mìa ku àmè bu kèwo ye lè èkàdodo mè ku mia, kudo miabe èxɔlɔ̃wo ò.

¹⁵Miabe àlɔ̀do so Mawu gbɔ, lè Jiŋùkusi, eye be hlùɛ̃ mi so miabe èkɛ̃tɔwo si, sɔ ɖìgbɔ wo.

¹⁶Fifìa, mi cã Numènio, Ãtiokus be èvia, ku Ãtipatɛ, Yazɔ̀n be èvia, eye mi dɔ̃ wo ɖoɖa Romatɔwo gbɔ, ne wo agbìgbɔ̀ yì wɔ̀ ègbèlèdu ku èxlɔ̃ be èkàdodo kè nɔ̀ mia ku Romatɔwo dòmè sãa yeye.

¹⁷Mi gbà gblɔ̃ na wo be wo ne va mìa gbɔ, wo a dogbè na mì, eye wo asɔ miabe xoma kè gbìgbɔ̀ le fɔ̃ ègbèlèdu ku nɔ̀vilɔ̃lɔ̃ be èkàdodo lè miawo ku mìawo dòmèa ɖotèa, sɔ do àsi na mì.

¹⁸Ekèa ŋutia, e la jɔ̀jì, na mi, be mì aɖo ènyà kèa ŋuti na mi.”

¹⁹Xoma kè wo ŋlɔ̃ ɖoɖa Òniaa be gbìgbɔ̀ ŋlɔ̀ ye nyi ekèa:

²⁰“Areios, Spartiatɔwo be èfìɔa, le dogbè ɖoɖa Mawunɔ Gã Ònia.

²¹E va va emè be wo fɔ̀ ènuŋɔ̀ŋlɔ̃ kèa, lè xoma ɖe mè be Spartiatɔwo ku Yudàtɔwo nyi nɔ̀viwo, eye wo nyi Abràham be hɛ̃nuviwo.

²²Fifì kè mi nyã ènu kèaa, e la nyi ènu nyuɛ̃ ɖe, be mì aŋlɔ̃ ènu, sɔ pò nupo so mìa ɖokoewo ŋuti na mi.

²³Miawo yaa, mi sɔ̀gbè, le ɖo e ŋuti na mì be: mìabe èlãhawo ku mìabe ènunɔ̀amèsiwo nyi miatɔ̀, eye miabe èlãhawo ku ènunɔ̀amèsiwo cã nyi mìatɔ̀. Ekèa ŋutia, mi le ɖè ègbè be wo ne gblɔ̃ ènyà kèa na mì.”

²⁴Yònatàn sè be Demètrio be àhùagawo trɔ gbɔ̀ ku àhùakɔ̃ gã ɖe kè sùgbɔ wu sã tɔ̀a, la va wɔ̀ àhùa ku yè.

²⁵E jè èmɔ̃, ɖota Yèruzàlɛ̀m, eye be yì dogò wo lè Hamat be èdùa gbɔ lɔ̀ge, ɖoa, mu ɖè èmɔ̃ na wo be wo ne gɛ̃ ɖo yèbe èdùa mè ò.

²⁶E dɔ̃ bèkpɔɛwo ɖoɖa woabe àsàɖa mè. Bèkpɔɛawo trɔ gbɔ̀ va, eye wo gblɔ̃ na ɛ̀ be èkɛ̃tɔawo sɔ̀gbè la va jè woa ji, èzã mè.

²⁷Kè èwè ɖoxɔ̀a, Yònatàn ɖè ègbè na ye tɔ̀wo be wo ne nɔ̀ ŋùzɔ̃, àhùawɔ̀nuwo ne sɔ̀gbè, lè àlɔ̀ gbɔ, ne wo a nɔ̀ klalò, ne wo a kpe àhùa lè èzã bliboa mè. E ɖo ɖìatɔwo cã trɔ do àsàɖa a.

²⁸Kè wo sè be Yònatàn ku ye tɔ̀wo sɔ̀gbè na àhùa wɔ̀wɔ̀ a, èkɛ̃tɔawo vɔ̃, eye kè àdìka le sò wo a, wo sì èzòwo, lè woabe àsàɖa a mè.

²⁹Vɔ̀ a, kaka na fɔfɔ̃ mè a, Yònatàn ku ye tɔ̀wo mu nyã be wo jo ò, ɖo a, wo kpɔ̀tɔ̀ le kpɔ èzòawo.

³⁰Yònatàn zrò jè woa yomè, vɔ̀ a, mu teŋu xe wo ò, ɖo a, wo sò Èlèterò be ètɔ̀sàsra a vɔ̀.

³¹Yònatàn trɔ kpà ŋùkɔ̀ Arabiatɔ kèwo wo yɔna be Zàbàdeàtɔwo a. E ɖù woa ji, eye be fɔ̀ woabe àhùalenuwo.

³²Ekè be hɔ̃ àsàɖa a, e va Dàmaskò, eye be sã to ènuto a kpata mè.

³³Simɔ̀n cã, to èdù a mè, kaka yì ɖo Àskàlɔn ku àgbògbò kèwo gogo èawo mè. E yomè a, e xa yebe èmɔ̃ a tùtà Yopà, eye be ɖo àlɔ̀ e ji, ɖo èsɔ̀.

³⁴Ɖoa, e va sè ekèa mè be èdùa mètɔwo ji be yèwoa sɔ àgbògbò be èdù kèa na Dèmètrio be gbàdagbãwo. E ɖo ɖìatɔwo be nɔ̀pe ɖo funua, ne woa nɔ kpɔ èdùa ji.

³⁵Kè Yònatàn trɔ gbɔ̀ va Yèruzàlɛ̀m a, e bɔ̀ dùkɔ̃ a be àmè sĩsĩwo, eye be ɖo è ku wo, be yèwo a tù àgbògbò ɖo Yudà-nyigbã ji,

³⁶yèwo a gbìgbɔ̀ kɔ Yèruzàlɛ̀m be èglìkpa a yìji, yèwo a ɖo èglì, sɔ sò gbàdagbãwo be tèpe a ku èdù a dòmè. E ji be Dèmètriò be gbàdagbãwo ne sò jo lè èdù a ŋuti keŋu-keŋu, ne wo mu gbà teŋu plè nu, àlo, wo a sà ènu ɖekpe ò.

³⁷Èdù a mètɔwo keŋu bɔ̀, wɔ̀ èdɔ ɖodu, sɔ tù Yèruzàlɛ̀m be èdu a. Wo ɖo la jrà, àgbògbò a be akpa kè mù lè èwèzɛ̃pe be àbùɖìɖi a gbɔ a ɖo, eye wo la gbìgbɔ̀ tù èkɔ kè wo yɔna be Càfènatà a.

³⁸Simɔ̀n ya gbìgbɔ̀ tù Adìda be èdùa, lè Bàlì-nyigbã a ji. E do è àgbògbò eye be do àgbo ku lɔkèwo e nu.

³⁹Trifɔ̀n ji la ɖùfìɔ lè Sèlèsirìa be ànyigbã ji, ne wo a ɖo jègbà èta na ɛ̀, wàlɛbɛ kè be la crɔ̃ Ãtiokus yomè a.

⁴⁰Vɔ̀ a, e le vɔ̃ be Yònatàn la xe èmɔ̃ na yè, eye be la wɔ̀ àhùa ku yè. Ekè a ŋuti a, e le ji èmɔ̃ kè nu be la to, la le è, la wù ì a. Ènu kè a ŋuti ye be jè èmɔ̃ tùtà Bait-Sèan.

⁴¹Yònatàn cã jè èmɔ̃, la yì dogò è, eye be lè ŋùkɔ̀ na gbàdagbã hotu èwì (40000) kèwo xɔ̀ tùtùɖo sɛ̃ŋu na àhùa wɔwɔ a, va yì kɔ̀ ɖo Bait-Sèan.

⁴²Ekè Trifɔ̀n kpɔ àhùakɔ̃ gã kè kplɔ̀ Yònatan va a, mu gbà ji be yè a zã àkpasɛ̃sɛ̃ ɖo Yònatan ŋuti ò.

⁴³E xɔ̀ è ku bùbu, sɔ ɛ̀ fiɔ yebe èxɔlɔ̃wo kpata, sɔ ènu nanawo na ɛ̀, eye be ɖè ègbè na èxɔlɔ̃awo kpata ku yebe àhùakɔ̃wo be wo ne sè ègbè na Yònatàn, sìgbè leke wo sènà ɛ̀ na yeè ŋutɔ a nène.

⁴⁴E biɔ Yònatàn be: “Nukɛ ŋuti wò do nupo na àhùakɔ̃ blibo ɖèka leke a, wàlɛbɛ kè àjrè be ènyà ɖekpe mu lè nyè ku wò dòmè ò?

⁴⁵Ye ŋuti a, gbìgbɔ̀ trɔ wo ɖoɖa àxomè; wò ŋutɔ cã ŋusuti kui èvè ɖewo, ne wo a kplɔ̀ wò do, ne mi a yì Tòlèmàis. Mù la sɔ èdù kè a ku àgbògbò buwo, kudo àhùakɔ̃wo gbàkudo fìɔha-dɔwɔ̀tɔ kèwo kpata gbà kpɔ̀tɔ̀ lè wɔ̀dɔ lè woa mè a do àsi na wò. Ekè a ŋuti ye mù va fikè a ɖo. E yomè a, mù la trɔ jo.”

⁴⁶Yònatàn xɔ̀ ènyà kè Trifɔ̀n gblɔ̃ na ɛ̀ a ji sè, eye be ɖo yebe àhùakɔ̃ a ɖoɖa, eye àhùakɔ̃ a trɔ jo yì Yudà-nyigbã ji.

⁴⁷E gble gbãdãgbã hotu ɖèka èkà wìvɔàtɔ̃ (3000) ɖo ye ɖokoe gbɔ. E ɖè woa dòmètɔ hotu ɖèka (2000), ɖoɖa Gàlìleà. Gbàdagbã èkàwìvɔàtɔ̃ (1000) kpɔ̀tɛawo kplɔ̀ ɛ̀ do.

⁴⁸Vɔ̀ a, kè Yònatàn gbe gɛ̃ ɖo Tòlèmàis be èdù a mè kpò a, èdù a mètɔwo tu àgboawo. Wo jè Yònatàn ji, le è, eye wo wù àmè kèwo kpata gɛ̃ ɖo èdù a mè ku ì a.

⁴⁹Trifɔ̀n dɔ̃ gbàdagbã àfɔ̀zɔ̃tɔwo ku èsɔdotɔwo ɖoɖa Gàlìleà ku ànyigbã gbàjà be èdùwo mè, ne wo a yì wù Yònatà be gbàdagbãwo kpata.

⁵⁰Yònatàn be gbàdagbãwo sè e mè be wo le mawunɔ gã a ku àmè kèwo kplɔ̀ ɛ̀ doawo. Gãke a, wo le do ŋusɛ̃ woa nɔ̀nɔ̀ɛwo, wo kpli àbɔ, eye wo zɔ̃, kpà ŋùkɔ̀ àhùa a.

⁵¹Kè àmè kèwo ye le tĩ woa yomèawo kpɔ be wo le wɔ̀ àvũ, kaka yì èku mè a, wo trɔ lè woa yomè.

⁵²Yudàtɔwo be gbàdagbãwo kpata trɔ gbò va Yudà-nyigbã ji, àgbè-àgbè, lè lãmèsɛ̃ mè. Wo fã Yònatàn ku yebe gbàdagbã kèwo kplɔ̀ ɛ̀ doawo, eye àɖìka sò àmè ɖo wo ŋutɔ. Izràɛl blibo a nɔ̀ èfũlòlo gã ɖe mè.

⁵³Vòdu sumɔtɔwo be dùkɔ̃ kèwo kpata trɔ do woawo jè àgbàgba be yèwo a crɔ̃ Yudàtɔwo. Wo gblɔ̃nà be: “Kplɔ̀tɔ, àlo, èga ɖekpe mu gbà lè Yudàtɔwo si, la xɔ̀ na wo ò. Mi a ɖè àhùa kpe na wo, ne mi a crɔ̃ wo gbidi, ne àmè ɖekpe mu gbà ɖoŋù wo gbèɖe ke ò.”