Read gen 1Màkàbeòwo 13 Bible Online

1Màkàbeòwo 13 - gen bible

1Màkàbeòwo 13

¹Simɔ̀n sè be Trifɔ̀n bɔ̀ àhùakɔ̃ gã ɖè, be yè a tùtà Yudà-du a mè, ne yè a gbã ɛ̀.

²Kè be kpɔ be dùkɔ̃ a le vɔ̃, eye be le pò tìtìtì a, e lia èto, yì Yèruzàlɛ̀m, bɔ̀ dùkɔ̃ a,

³eye be na jìdo dùkɔ̃ a, gblɔ̃ na wo be: “Mì nyã ènu kè kpata nyè ku nɔ̀vi nyèwo kudo ètɔ nyè be àxue a, mi wɔ̀ ɖo èseawo ku kɔ̀kɔ̀ɛpe a ta, sɔ kpe ɖo àvũ ku èhìã kèwo tù miawo keŋu nyuɛ̃ ɖe.

⁴Ènu kèawo ŋuti, nɔ̀vi nyèwo kpata ku ɖo Izràɛl ta ɖo, eye nyè ya, mù ci àkòŋùgò.

⁵Mu nyi fifì kè àfɔ̀ku lè àgbo-mɔ̃nu na mi kè a, ye mù la va susu be ma hlùɛ̃ àpe àgbè gã ò. Àgbè nyè a mu xɔ̀ àsì wu nɔ̀vi nyèwo tɔ̀wo ò.

⁶Vɔ̀, bòhũa, mù la biɔhlɔ̃ na dùkɔ̃ nyè, na Kɔ̀kɔ̀ɛpe a, na mìa srɔ̃wo ku mìabe èviwo, ɖoa, dùkɔ̃wo kpata bɔ̀, sɔ àmè cìcri ɖo nu, be yèwo la crɔ̃ mi”.

⁷Kè dùkɔ̃a sè ènyà kèawoa, yebe àyè gbà fɔ̃ ɖotè,

⁸eye wo ɖo e ŋuti ku àpa be: “Èwò ye nyi miabe èga, lè Yudà ku Yònatàn, fòfo wòawo tèpe.

⁹Nɔ̀ ŋùkɔ̀ na miabe àhùa wɔ̀wɔ̀ a, eye mi la wɔ̀ ènu sia ènu kè wò la gblɔ̃ na mi a.”

¹⁰E bɔ̀ àhùàwɔ̀tɔwo kpata, e ɖèbla wu Yèruzàlɛ̀m be èglì-kpawo tùtu nu, eye be na wo do ŋusɛ̃ èglì a trɔ do keŋu.

¹¹E dɔ̃ Yònatàn, Àbsàlɔm be èvi a ɖoɖa Yopa, àhùakɔ̃ gã ɖe kplɔ̀ ɛ̀ do. Yonatan nyà èdù a mènɔ̀tɔwo to lè e mè, eye be xɔ̀ ànyi nɔ̀ ɖo funu a.

¹²Trifɔ̀n so Tòlèmais ku àhùakɔ̃ gã ɖe, va ɖo Yudà be èdù mè, eye be le Yònatàn, kplɔ̀ ɛ̀ jo.

¹³Simɔ̀n va do àsàɖa ɖo Adida be èdù a mè, kpà ŋùkɔ̀ ànyigbã gbàjàa.

¹⁴Kè be sè be Simɔ̀n va xɔ̀ fòfoa tèpe, eye be le jràɖo la ɖè àhùa kpe na ɛ̀ a, Trifɔ̀n dɔ̃ àmè ɖoɖa ɛ̀, be wo ne gblɔ̃ na ɛ̀ be:

¹⁵“Fòfo wò Yonatan be èdɔ kè be wɔ̀nà a ɖo na ɛ̀ be ne nɔ jɔ̀ èci, lè èdù a si, ɖoɖa èfìɔ be àdɔ̀kùnuwo mè. Kè mu wɔ̀ ɛ̀ ò a ŋuti ye mi le è ɖɛ ɖo.

¹⁶Fifì a, sɔ klòsàlògà be tàlɛ̃tò 100/kavetakpo ku yebe viwo dòmètɔ èvè ɖoɖa, sìgbè àwòba be àmèwo nène, àleke be, ne wo ɖè àsi lè e ŋuti a, mu gbà jè àgla ɖo mia ŋuti ò. Ekè a yomè a, mi la ɖè àsi lè e ŋuti'.

¹⁷Simɔ̀n nyã àyè kè lè nupo kè a mè, gãke a, e dɔ̃ be wo ne yi ji èci ku ɖèviawo, àleke be yè mu gbà dɔ̃ dùkɔ̃ a be àdɔ̀mèze gã ɖe va yè ɖokoe ji ò.

¹⁸Wo la va nɔ gblɔ̃: “Kè nyè mu sɔ èci a ku ɖèviawo ɖoɖa ò a ŋuti ye Yònatàn crɔ̃ ɖo”.

¹⁹Yònatàn sɔ dèviawo ku èci tàlɛ̃tò 100/èkàvètapo ɖoɖa, vɔ̀ a, Trifɔn flù ì, eye mu ɖè àsi lè Yònatàn ŋuti ò.

²⁰Ekè a yomè a, Trifɔ̀n jè èmɔ̃ la yì xɔ ɖo àlɔ̀ ènuto a kpata ji, ne be a gbã ɛ̀ keŋu-keŋu. E xa, yì to Àdora be èmɔ̃ a, vɔ̀ a, Simɔ̀n ku yebe àhùakɔ̃ a mu trɔ lè woa yomè ò. Wo xa wo to àfi sia àfi.

²¹Wàlɛbɛ ŋua, gbàdagbã kèwo lè xa Yèruzàlɛ̀m be àgbògbò a dɔ̃ àmè ɖoɖa Trifɔ̀n, le biɔ ɛ̀ veve ɖe be ne to zògbè ji be èmɔ̃ a, va kpe ɖo yèwo ŋuti, vɔ̀ a, vevetɔ a, ne ɖo ènu dùɖu ɖoɖa yèwo.

²²Trifɔ̀n jrà yebe àhùakɔ̃ èsɔdotɔwo kpata ɖo, ne be a yì funu a; vɔ̀ a èsìwɔ̀ kpànyà jà, èzã ŋua mè, eye mu teŋu yì funu a ò. E jo, eye be ɖota Galad-nyigbã ji.

²³Ekè be gogo Baskama, e wù Yònatàn, eye wo ɖì ì ɖo funu a.

²⁴E yomè a, Trifɔ̀n trɔ yì yebe èdù mè.

²⁵Simɔ̀n dɔ̃ àmè, wo yì lɔ nɔ̀via Yònatàn be èpuwo, eye be ɖì wo ɖo tɔgbeawo be yɔ̀do mè lè Modin, woabe èdù mè.

²⁶Izràɛl blibo a lòfù ŋùkèkè sùgbɔ, so wɔ̀ ècɔ gã ɖe na ɛ̀.

²⁷Simɔ̀n gbìgbɔ̀ li ètɔa ku fɔ̀foawo be yɔ̀do a, àleke be wo ne nɔ kpɔ ɛ̀ lè dìdipe. Wo sɔ èkpe kè ŋuti wo lì, be zrɔ̃ a wɔ̀ ŋùkɔ̀ ku ŋùgbe na ɛ̀.

²⁸E tù koŋuji ènè be èkpe gã, kè be ètamè wɔ̀ cɔ̃kuĩ a adrɛ̃, èɖe le èɖe gbɔ, na ètɔa, na ènɔ̀a, ku na fòfoa ènèawo.

²⁹E wɔ̀ àcɔ be sɔti yìji gãwo, trɔ do wo, eye be na wo ta àhùawɔ̀nuwo ku àpùjihũwo ɖo sɔtiawo be èkpe a mè, ne be a nyi ŋùkuɖojinu kòkòɖàbì, àleke be àmè kèwo kpata tona àpù ji va yì a, wo a nɔ̀ kpɔ ɛ̀.

³⁰Yɔ̀do kè a kè Simɔ̀n na wo tù ɖo Modìn be èdù mè a gbà lè, kaka va na egbè.

³¹Wàlɛbɛ ŋua, Trifɔ̀n wɔ̀nà àyèmènu ɖoɖa èfìɔ Ãtiokus kè gbà nyi ɖèvi a gbɔ, eye be wù ì.

³²E ɖùfiɔ ɖo e tèpe, sɔ Asia be èfìɔkuku a ɖɔ, eye be hɛ̃ àhovì gãwo va èdù a ji.

³³Simɔ̀n gbìgbɔ̀ tù Yùdea be àgbògbòdùwo, e tù èmɔjikpɔxɔ̀ kàkòwo, tɔ̃ èglìkpa sɛ̃ŋu kɔkɔ kèwo nu àgbo ku lɔkèwo lèa trɔ do wo. E bɔ̀ ènuɖùɖu ɖɛ, ɖo àgbògbò kèawo mè.

³⁴E yomè a, Simɔ̀n dɔ̃ àmè be wo ne yì biɔ Dèmètrio be ne ɖè ètaci be àgbã a jo lè èdù a ji, ɖoa, Trifɔ̀n mu wɔ̀ ènu bu, sɔ wu ènu xàxla lè èdùwo mè ò.

³⁵Efìɔ Demètrio ɖo ènu kè simɔ̀n biɔ a ŋuti ɖoɖa ɛ̀ ku ènyà keawo be:

³⁶“Efìɔ Dèmètrio le ŋlɔ̃ xoma kè a ɖoɖa Simɔ̀n, mawunɔ gã a, èfìɔwo be èxlɔ̃ a, ɖoɖa àmè sìsĩwo ku Yudàtɔwo be dùkɔ̃ a kpata.

³⁷Mi xɔ̀ sìka-jègbã ku bùbu be sìka-dekpa kèwo mì sɔ ɖoɖa mi a. Mi sɔ̀gbè, la ɖo èkpe ŋutifafa blibo be èkàdodo ji ku mì, eye mi a ŋlɔ̃ do àsi na miabe fìɔha-dɔwɔ̀tɔwo be wo ne ɖè ètaci tutu ɖewo ji kpɔ̀tɔ̀ na mì.

³⁸Mi le ɖo èkpe ɖoɖo kèwo kpata mi wɔ̀ ɖo mìa ŋuti a ji, eye àgbògbò kèwo mì tùawo nyi mìa tɔ̀.

³⁹Mi sɔ àgɔ̀ kèwo mì jè, ku èvùɛ̃ kèwo mì wɔ̀, kaka va na egbè a kè mì. Mì mu la gbà tu ètaci tɔ̀xɛ kè mì tuna na èfìɔ a ke ò. Ne wo gbà jɔ̀nà ètaci bu lè mìa si, lè Yèruzàlɛ̀m a, wo mu la gbà nɔ biɔ mì ke ò.

⁴⁰Ne mìa dòmètɔ ɖewo la teŋu ɖo miabe èfìɔjikpɔtɔwo be àhùakɔ̃ a mè a, wo ne na nyikɔ, àleke be ŋutifafa ne nɔ̀ mia dòmè.”

⁴¹Lè èpè 170/èkà ènè ci èwogɔ̃ a mè a, wo ɖè dùkɔ̃ kèwo sɛ̃nà vòduawo be èkɔ̀kùti jo lè Izràɛl be dùkɔ̃ a ji,

⁴²eye Izràɛl be dùkɔ̃ a tɔ àzãhɛ̃hlɛ̃ na yebe èdùnyàwo ku èkàdodo be ènubablawo kudo ènyà kè a be: “Lè Simɔ̀n, Mawunɔ gã ɖìnyi, àhùaga gã ku Yudàviwo be Èga be èpè cucugbãa mè.”

⁴³Le ŋùkèkè ŋuawo mè a, Simɔ̀n be àhùakɔ̃ a va xɔ̀ ànyi nɔ̀, kpà ŋùkɔ̀ Gèzɛr be èdù a, eye be jè e ji, so àfiwo kpata. E li àcrɔmɔ̃ kè wo nana be zɔ̃nà, so tèpe ɖe, yì tèpe bu a, wo tùtù ì ɖo èdù a ŋuti, wo gbã èdù a be èmɔ̃ji kpɔxɔ̀ ɖèka, eye wo xɔ̀ ɛ̀.

⁴⁴Amè kèwo lè àcrɔmɔ̃ jiawo tìkpo jè àblɔ a mè, ekè a na be àdìka sò àmè kã àmèwo hlɛ̃, ɖo èdù nu.

⁴⁵Èdù a mètɔwo, woa srɔ̃wo ku woabe èviwo lia èdù a be èglìkpa a ji, zɛ̃ woabe àwùwo, le do àpa sɛ̃sɛ̃ ɖe ɖoɖa Simɔ̀n be ne drɛ̃ yebe ɖùsi-lɔ̀ ɖoɖa yèwo.

⁴⁶Wo le gblɔ̃ be: “Mù gbà wɔ̀ ku mi, sɔ zɔ̃ ɖo leke mi nyrãku ɖo a ji ò, vɔ̀ a, wɔ̀ ɖo àpo àdɔ̀mè nyuɛ̃ wɔ̀wɔ ji.”

⁴⁷Simɔ̀n kɔ̀ àdɔ̀mè, eye be na àhùa a tɔtè. Gãke a, e nyà wo to lè èdù amè. E ɖè legbawo to, lè àxue kèwo mè wo lè a, eye be sɔ wo kɔ̀nùgbè, kɔ̀ àxueawo ŋuti. E yomè a, ye ku yebe gbàdagbãwo ɖo èdù a mè ku àyosòhawo, sɛ̃sɛ̃hàwo ku kafuhàwo.

⁴⁸E ɖè ènu mà-kɔ̀ mà-kɔ̀ ɖe sia ɖe to lè èdù a mè, eye be sɔ ŋusù kèwo wɔ̀nà ɖo Èse jia sɔ ɖo èdù a nu. E do àgbògbò èdù a, eye be na, wo tù àxue na ɛ̀ ɖo e mè.

⁴⁹Ekè àmè kèwo wo xa ɖo Yèruzàlɛ̀m be Àgbògbò a mèawo mu teŋu le to, le yì, le gbɔ̀, la plè ènu, la sà, lè ènuto mè ò a, àdɔ̀ wù woa dòmètɔ sùgbɔ, eye wo ku.

⁵⁰Wo do àpa ɖoɖa Simɔ̀n be ne lɔ̃, ne be a xɔ̀ yèwo be ɖùsi-lɔ̀, eye Simɔ̀n lɔ̃, wɔ̀ ŋutifafa ku wo. E nyà wo to le tèpe kè a; e na wo ɖè legba be èɖiwo to, eye be kɔ̀ Àgbògbò a ŋuti.

⁵¹Lè èpè èkà ènè ci woeɖèkagɔ̃a (171) be wètri èvègɔ̃ a be ŋùkèkè wìvɔ ètɔ̃gɔ̃a (23) gbè a, Yudàviwo gɛ̃ ɖo e mè, ku àbòbo lele; wo le ɖekpawo ɖo àsi, lè àɖòɖowo, àtòmpàniwo ku èhɛwo be ègbèɖìɖi mè, lè àyosòsowo ku èhàjìjiwo mè, ɖo a, wo hɔ̃ èkɛ̃tɔ gã ɖèka jo lè Izràɛl-nyigbã ji.

⁵²Simɔ̀n ɖè ègbè be wo ne nɔ ɖù àzã ŋua, èpè sia èpè ku àwuyaya. E na wo gbìgbɔ̀ do àgbògbò Kɔ̀kɔ̀ɛpe a lè èto a ji, eye ye ŋutɔ nɔ̀ funu a ku yebe gbàdagbãwo.

⁵³Kè Simɔ̀n kpɔ be Yòhanès, èvia trɔ zũ ŋusùti nyàwoa, e sɔ ɛ̀ ɖo àhùakɔ̃wo kpata nu. E sò àxue ɖo Gezɛr.