Read gen 1Màkàbeòwo 15 Bible Online

1Màkàbeòwo 15 - gen bible

1Màkàbeòwo 15

¹Ãtiokus, Dèmètriò be èvi a, ŋlɔ̃ xoma so ètɔ̀dòmèkɔ̃ɛwo ji, ɖoɖa Simɔ̀n, mawunɔ gã kè nyi Yudàtɔwo be cãmì a ku dùkɔ̃ blibo a.

²Ènyà kèwo ye lè xoma a mèawo ye nyi ekèawo: “Èfìɔ Ãtiokus le dogbè na Simɔ̀n, mawunɔ gã kè nyi cãmì a, ku na Yudàtɔwo be dùkɔ̃ a.

³Ekè ènukpòtoe wɔ̀tɔwo sɔ àkpasɛ̃sɛ̃ xɔ̀ tɔgbe nyèwo be èfìɔdua, mù tù àfɔ̀ tè be ma gbìgbɔ̀ xɔ̀ èfìɔdua, ne ma gbìgbɔ̀ sɔ ɛ̀ ɖo tè, sìgbè lekè be nɔ̀ sãa nène. Ekè a ŋuti, mù xɔ̀ àhùakɔ̃ sùgbɔ, eye mù bla àkpà na èsìji-hùahũwo.

⁴Mù ɖo è be ma va jè àgo lè èdùa mè, ne mà tĩ àmè kèwo gble miabe èdù a, eye wo gbã àpe èfìɔɖùpe a be èdù sùgbɔ a yomè.

⁵Fifì a, mù gbà le ɖo èkpe ètaci kèwo kpata èfìɔ kèwo jè ŋùkɔ̀ na mùawo sɔ kè wò a ji na wò. Mù gbà le sɔ ènu nana bu kèwo kpata, wo jɔ̀nà sɔ nana wòa cã le kè wò.

⁶Mù le ɖè èmɔ̃ na wò be wò ŋutɔ, wò a wɔ̀ àpo èci kè wò la nɔ zã lè àpo èdu mè a.

⁷Yèruzàlɛ̀m ku Kɔ̀kɔ̀ɛpe a mu la gbà nɔ tu ètaci ke ò. Ahùawɔ̀nu kèwo kpata wò ɖo ku àgbògbò kèwo wò tù, eye wò lè woa mè a, wo nyi tɔ̀ wò vɔ̀.

⁸Mù le sɔ èfɛ̃ kèwo kpata lè ŋuti wò, do èfìɔ be àdɔ̀kùnu, lè egbè mè ku èsɔ̀ mè a kè wò, so egbè, kaka yì tɛ̀gbɛ̀do.

⁹Ne mù gbìgbɔ̀ xɔ̀ èfìɔɖùɖu a, mù la na wò ku àpo dùkɔ̃ a, kudo Kɔ̀kɔ̀ɛpe a, bùbu jèsì gãwo, àleke be xixe kplògòdò a la kpɔ mìabe gogo.”

¹⁰Lè èpè 174/èkà ènè ci woènègɔ̃a (174) mèa, Ãtiokus jè èmɔ̃ yì tɔgbeawo be èdù mè, eye àhùkɔ̃ sùgbɔ gble woabe kplɔ̀tɔwo ɖɛ, eye wo va ci Ãtiokus gbɔ, àleke be gbàdagbã vi ɖe kpò ye kpɔ̀tɔ̀ ci Trifɔ̀n gbɔ.

¹¹Ãtiokus jè e yomè, eye Trifɔ̀n si, jo yì Dora, lè àpù ato,

¹²ɖo a e va sè e gɔ̃mè be, kè yebe àhùakɔ̃wo gble yè ɖɛ a, èvùɛ̃wo jè yè yomè,

¹³Ãtiokus va do àsàɖa, kpà ŋùkɔ̀ Dora ku gbàdagbã 120.000/hotu èkà takpo ku èsɔdotɔ 8.000/hotu ènè.

¹⁴E xa èdù a, eye èsìji-hùahũwo bɔ̀ kpli lè ŋùkɔ̀ na ɛ̀. Leke be xa èdùa, lè ànyigbã ku lè àpùa be àgoa jia na be àmè ɖekpe mu teŋu le ɖo èdùa mè, àlo, le to lè e mè ò.

¹⁵Kè Numènius ku àmè kèwo kplɔ̀ ɛ̀ doawo trɔ gbɔ̀ so Romà a, wo hɛ̃ xomawo gbɔ̀ va na èfìɔwo ku èdù sùgbɔwo. Ènyà kè lè xoma amè a ye le nyi:

¹⁶“Lukio, Romàtɔwo be àgbònùgla a le dogbè ɖoɖa èfìɔ Tolomeò.

¹⁷Yudàtɔwo be àmèdɔ̃dɔ̃ kèwo Mawunɔ Gã Simɔ̀n ku Yudàtɔwo be dùkɔ̃ a dɔ̃ ɖoɖa a, va mia gbɔ sìgbè èxlɔ̃wo ku nɔ̀viwo nène, ne mi a gbìgbɔ̀ wɔ̀ èxlɔ̃ wɔ̀wɔ ku ègbèlèdu be èkàdodo.

¹⁸Wo hɛ̃ sìka be àkpoxɔ̀nu gã ɖèka kè be kpɛ̃kpɛ̃mè nyi ènudànu mina èkà-wìvɔàtɔ̃a (1000).

¹⁹Ekè a ŋuti e jɔ̀jì na mi, be mi a ŋlɔ̃ xoma kè a ɖoɖa èdù sùgbɔ be èfìɔwo. Mi le biɔ so woa si be wo mu gbà jige lè woa ŋuti ò. Wo mu gbà wɔ̀ àhùa ku wo, àlo, ku woabe èdùwo ò. Wo mu gbà ɖo èkàdodo mè ku àmè kèwo le wɔ̀ àhùa ku wo ò.

²⁰Mi kpɔ cã be e nyɔ̃ be mi a xɔ̀ àkpoxɔ̀nu kè wo na mi a so woa si.

²¹Ne àhovì be àmè ɖewo si le woa de, va mìa gbɔ a, mì sɔ wo do àsi na Mawunɔ Gã Simɔ̀n, ne be a dɔ̃ èto na wo, sɔ zɔ̃ ɖo woabe èse a ji.

²²Wo sɔ xoma kè a hàti ɖoɖa èfìɔ Dèmètrio, ɖoɖa Atalɛ, ɖoɖa Ariaratɛe ku Arsakɛ̀.

²³Wo gbà sɔ ɖoɖa èdùwo kpata, sìgbè Sàmpsamè nène, sìgbè Spàtiatɔwo nène, sìgbè Delos, Mindos, Sikionè, Karia, Samos, Pàmfilìa, Likìa, Hàlìkàrnasè, Rodɛ̀s, Fàselìs, Kɔs, Sidè, Aradòs, Gòrtinè, Kinidò, Kiprò ku Kìrenè nène.

²⁴Wo gbìgbɔ̀ ŋlɔ̃ xoma kè a hàti ɖèka ɖoɖa Simɔ̀n Mawunɔ Gã a.

²⁵Vɔ̀ a, èfìɔ Ãtiokus gbà do àsàɖa ɖo Dora be èkɔ kè lè èdù a mɔ̃nu a mè, dɔ̃na àhùakɔ̃wo ɖo èdù a ŋuti, wè sia wè, le tù àhùamɔ̃wo. Kè be xa Trifɔ̀n be èdù a, àmè ɖekpe mu gbà teŋu le ɖo èdù a mè, àlo, le to lè e mè ò.

²⁶Simɔ̀n dɔ̃ gbàdagbãwo be àmè cãcã 2.000/hotu ɖèka ɖoɖa èfìɔ Ãtiokus, be wo ne yì do è àlɔ̀, lè àhùa gbe a ji. E gbà sɔ èci, sìka ku àhùawɔ̀nu sùgɔ cã ɖoɖa ɛ̀.

²⁷Èfìɔ Ãtiokus gbe be yè mu la xɔ̀ ènu kèawo ò, vɔ̀ a, e gbà gũ èta na ègbèɖo kèwo keŋu ji be dà àsi ɖo sã xoxo ku Simɔ̀n a, eye be sɔ Simɔ̀n trɔ zũ èkɛ̃tɔ.

²⁸E dɔ̃ Èfìɔ be èxlɔ̃wo dòmètɔ ɖèka, Àtenobiò, ɖoɖa ɛ̀, be ne gblɔ̃ na ɛ̀ be: “Mì ɖo àlɔ̀ Yopà, Gezɛr ku Yèruzàlɛ̀m be Àgbògbò kèwo nyi àpe èfìɔɖùpe be èdùwo a.

²⁹Mì gbã woabe nutowo mè, sɔ wo trɔ zũ zògbè; mì hɛ̃ àhovì gãa ɖe va na èdùa, eye mì ɖù èga ɖo àpe èfìɔdua be nuto sùgbɔwo ji.

³⁰Fifì a, mì la gbìgbɔ̀ trɔ sɔ èdù kèwo mì xɔ̀ a na mù, eye mì la tu tèpe kèwo mì sɔ àkpasɛ̃sɛ̃ xɔ̀, lè Yudà-nyigbã be lipòwo godo a be èfɛ̃wo na mù.

³¹Ne mì gbe a, eŋua, mì la jɔ̀ klòsalò tàlentò 500/èkàwoèvè takpo, ɖo woa tèpe, ku tàlentò 500/èkàwoève takpo bu, ɖo ènu kèwo mì gbleawo ku èdùawo be èfɛ̃awo tèpe. Ne mu nyi nène ò a, mi la ɖè àhùa kpe na mì.”

³²Ke Ãtènobìo, Èfìɔ be Èxlɔ̃ a, va ɖo Yèruzàlɛ̀m, eye be kpɔ Simɔ̀n be nyiɖìɖi ku sìkanu kudo klosàlonu kèwo bɔ lè èkplɔ̃wo ku èdrɔ̃wo ji a, e dãŋù do è. E do èfìɔ a be àŋɛ̀ na Simɔ̀n.

³³Simɔ̀n ɖo e ŋuti ɖoɖa ɛ̀ be: “Mi mu xɔ̀ èdù bu ɖe be ànyigbã ò, eye, mi mu ɖo àlɔ̀ àmè bu ɖe be ènuwo ji ò. Ɖe kpò mi gbìgbɔ̀ xɔ̀ ànyigbã kèwo nyi ècrɔ̃ kè mi ɖù so mia tɔgbewo si, eye miabe èkɛ̃tɔwo xɔ̀, ku àkpasɛ̃sɛ̃, lè mia si, lè hùe ɖe nu.

³⁴Kè mi kpɔ èmɔ̃nu nyuɛ̃ ɖe a, mi sɔ gbìgbɔ̀ xɔ̀ mia tɔgbewo be ècrɔ̃nu a.

³⁵Lè Yopà ku Gèzɛr kèwo wò le biɔ a gomè a, èdù kèawo hɛ̃ èvùɛ̃ sùgbɔ va na miabe dùkɔ̃ a ku na miabe èdù a. Mi la na klòsalò tàlentò 100/èkàvètakpo ɖo woa ta.” Ãtènobìo mu gblɔ̃ ènyà ɖe, sɔ ɖo e ŋuti ò.

³⁶E trɔ jo ku àdã, yì èfìɔ a gbɔ, yì do àŋɛ̀ a na ɛ̀, eye be gblɔ̃ ènu kèwo kpata be kpɔ ku Simɔ̀n be gogo a na èfìɔ à. Efìɔ a do àdɔ̀mèze gã ɖe.

³⁷Trifɔ̀n ɖo èsìji-hũ, si jo yì Ɔ̀rtosìa.

³⁸Efìɔa sɔ Kɛ̀ndebè ɖo Àhùafìɔgã, eye be sɔ ɛ̀ ɖo àpùto be nutomè a nu. E sɔ èsɔdotɔwo ku àfɔ̀zɔ̃tɔwo be àhùakɔ̃wo ɖo yebe kpɔ̀kplɔ gɔ̃mè.

³⁹Èfìɔ a ɖè ègbè na ɛ̀ be, ne do àsàɖa kpa ŋùkɔ̀ Yùdà, ne gbìgbɔ̀ tù Kedrɔ̀n, ne be a gbìgbɔ̀ do ŋusɛ̃ yebe àgbowo, eye be a wɔ̀ àhùa ku dùkɔ̃ a. Efìɔ a ya, so jè Trifɔ̀n yomè.

⁴⁰Kɛ̀ndebè yì Yamnìa, jina ènyà lè dùkɔ̃ a ŋuti, sɔna àhùa ɖona Yudà-nyigbã a ji, kplɔ̀nà àhùalewo gbɔ̀, wùnà àmèwo leke be jro a.

⁴¹E gbìgbɔ̀ tù Kedrɔ̀n, eye be sɔ gbàdagbã èsɔdotɔwo ku àfɔ̀zɔ̃tɔwo be àhùakɔ̃wo ɖo funu a, àleke be wo ne nɔ to, ne wo a nɔ sò Yudà-nyigbã a be èmɔ̃wo, sìgbè leke èfìɔ a ɖè ègbè na wo a nène.