Read gen 1Màkàbeòwo 16 Bible Online

1Màkàbeòwo 16 - gen bible

1Màkàbeòwo 16

¹Yòhanɛs jo so Gazer, yì gblɔ̃ ènu kèwo Kɛ̀ndebè le wɔ̀awo na ètɔa Simɔ̀n.

²Simɔ̀n yɔ èvia àmègãxo èvèawo, Yudà ku Yòhanɛ̀s, eye be gblɔ̃ na wo be: “Nyè ku nɔ̀vi nyèwo, ku ètɔ nyè be àxuedo blibo a, mi wɔ̀ àhùa ku Izràɛl be èkɛ̃tɔwo, so kaka miabe ɖèkajɛ mè, kaka va n a egbè. E va e mè be, zè nenè ɖe a, mi hlùɛ̃ Izràɛl gã.

³Fifì a, mù sĩ. Vɔ̀ a, mìawo ya, to Jiŋkusi be ŋusĩsĩkuku mè a, mì gbà nyi ɖèkajɛwo. Ye ŋuti, a mì la nɔ̀ nyè ku nɔ̀vi nyè tèpe. Mì la yì wɔ̀ àhùa ɖo miabe èdù a ta, eye Jiŋùkusi be hlùɛ̃gã ne nɔ̀ ku mì”.

⁴E xɔ̀ gbàdagbã 20.000/hotu èwo ku èsɔdotɔwo, eye wo zɔ̃, yì kpe àkɔ ku Kɛ̀ndebè. Wo ci Modìn, dɔ̃ èzã mè.

⁵Eye kè wo fɔ̃ ŋùdekɛ̃nyɛ̃ fùtù a, wo zɔ̃ yì ŋùkɔ̀, lè ànyigbã gbajà ji. Funu ye àfɔ̀zɔ̃tɔwo ku èsɔdotɔwo be àhùakɔ̃ gã ɖe va dogò wo lè. Ètɔ̀wɔ̀adã ɖe sò àhùakɔ̃ èvèawo dòmè.

⁶Yòhanɛ̀s ku ye tɔ̀wo tù àfɔ̀ tè, kpà ŋùkɔ̀ woabe èkɛ̃tɔwo. Kè Yòhanɛs kpɔ be yètɔ̀awo le vɔ̃, la sò ètɔ̀ a, e jè ŋùkɔ̀ sò è. Kè gbàdagbãwo kpɔ ekè a, wo sò è, kplɔ̀ è do.

⁷E mã yebe àhùakɔ̃ a, eye be sɔ èsɔdotɔwo ɖo àfɔ̀zɔ̃tɔwo be dòdòmè, ɖo a èkɛ̃tɔwo be èsɔdotɔwo sùgbɔ ŋutɔ.

⁸E na wo ku èkpɛ̃, eye wo ɖù Kɛ̀ndebè ku yebe àhùakɔ̃ a ji. Àmè sùgbɔ xɔ̀ èku-bì, ci àhùa. Àmè kɔ̀tɛawo si jo tùtà àgbògbò a mè.

⁹Yudà, Yòhanɛ̀s be fòfoa xɔ̀ àbì, lè wàlɛbɛ ŋua, vɔ̀ a, Yòhanɛs jè woa yomè kaka yì ɖo Kedrɔ̀n, kè Kɛ̀ndebè gbìgbɔ̀ tù sã a va yì a.

¹⁰Àmè kèwo le siawo yì ɖo èmɔ̃jikpɔxɔ̀ kèwo lè kaka Azoto be àgblèjiawo mè. Yòhanɛ̀s tɔzò wo, eye woa dòmètɔ hotu ɖèka (2000) crɔ̃. Yòhanɛ̀s trɔ yì Yuɖà-nyigbã ji, lè ŋutifafa mè.

¹¹Wo sɔ Tòlòmeò, Abubas be èvi a, ɖo èhùaga kèwo lè Yèrikò be ànyigbã gbajà a ji a nu. Klòsalò ku sìka sùgbɔ lè e si,

¹²ɖo a, e nyi Mawunɔ Gã a be ètoyɔvi.

¹³Ekè a na be yebe èjro ye nyi be yè a nyi èga ɖo èdù a nu, eye be ɖo è be yè a crɔ̃ Simɔ̀n ku yebe èviwo.

¹⁴Gà ŋua mè a, Simɔ̀n ɖìnàsà tona ànyigbã a be èduwo mè, ɖo èdù a kpɔ̀kplɔ be ènyàwo ŋuti. Lè èpè èka-nè ci woeàdrɛ̃gɔ̃a (177) be wètri Sebat kè le nyi wètri woeɖèkagɔ̃a mè a, Simɔ̀n ku èviawo, Màtatìa kudo Yudà ɖì, yì Yerikò.

¹⁵Abubas be èvi a xɔ̀ wo ku àyè, lè àgbògbò vi kè be na wo tù, eye wo yɔna be Dok à mè. E wla yebe susuwo, eye be tɛ ènuɖù-kplɔ̃ gã ɖe na wo. Vɔ̀ a, e wla àmè ɖewo ɖo àgbògbò a mè.

¹⁶Gà kè mè Simɔ̀n ku èviawo mu àhà a, Tòlòmeò ku yebe àmèawo to va, wo sɔ woabe àhùawɔ̀nuwo, wo lũ ɖo Simɔ̀n ji, lè àzãɖùxɔ̀ a mè, eye wo wù ye ku èvia èvèawo kudo yebe sumɔ̃vi ɖewo.

¹⁷Tòlèmeò wɔ̀ ànùkua mà-wɔ̀ be ènu gã ɖe, eye be wɔ̀ èvùɛ̃ ɖo ènyùɛ̃ tèpe.

¹⁸E yomè a, Tòlòmeò ŋlɔ̃ xoma, so ènu kè be wɔ̀ a ŋuti, ɖoɖa èfìɔ Ãtiochus; lè xoma a mè a, e le biɔ be èfìɔ a ne ɖo àhùakɔ̃wo ɖoɖa, sɔ kpe ekèwo lè yè ŋuti a, ne yè a teŋu ɖo àlɔ̀ èdùwo ku àgblèwo ji, sɔ do àsi na ɛ̀.

¹⁹Tòlòmeò gbà dɔ̃ àmè buwo ɖoɖa Gèzɛr, ne wo a crɔ̃ Yòhanɛ̀s. E ŋlɔ̃ xoma ɖoɖa àhùa ŋùkɔ̀nɔ̀tɔwo, le kpe wo be wo a va, ne yè a na wo klòsalò, sìka ku ènu nanawo.

²⁰E gbà dɔ̃ àmè buwo cã, be wo ne yì ɖo àsi Yèruzàlɛ̀m ku Kɔ̀kɔ̀ɛpe a be éto a ji

²¹Gãke a, àmè ɖe xɔ̀ ŋùkɔ̀, eye be yì Gèzɛr, yì sìa Yòhanɛs be wo wù ètɔa ku nɔ̀viawo. Àmè a gblɔ̃ kpe è be: “Tòlòmeò gbà dɔ̃ àmè ɖewo ɖoɖa be wo a wù wò cã”.

²²Kè Yòhanɛ̀s sè ènyà kè a, e do àdɔ̀mèze ŋutɔ, eye be na, wo le ŋusù kèwo wo dɔ̃ ɖoɖa be wo ne wù ì a; e wù wo, ɖo a e nyã be wo va, la wù yè ye.

²³Yòhanɛ̀s be wɔ̀nawo be ŋutinyà kpɔ̀tɛ a, yebe àhùa wɔ̀wɔ̀wo, ènu klìsu kèwo be wɔ̀ a, àgbògbò kèwo be na wo tù a ku yebe èdɔwɔ̀wɔ buwo,

²⁴ènu kèwo keŋu be wɔ̀ a, wo ŋlɔ̃ woa kpata ɖo xoma kè mè wo ŋlɔ̃ èdɔ kèwo keŋu be wɔ̀, wàlɛbɛ kè be nyi Mawunɔ Gã, ɖo ètɔa tèpe a mè.