Read gen 1Màkàbeòwo 2 Bible Online

1Màkàbeòwo 2 - gen bible

1Màkàbeòwo 2

¹Lè hùe ŋua nua, Màtatìa kè nyi Yoyarib be èvi, eye Yoyarib nyi Sìmèɔn be èvi a nyi mawunɔ ɖèka lè Yoyarib be èviwo dòmè. E site, eye be to jo lè Yèruzàlɛ̀m, va ci Modìn.

²E ji ŋusùvi àtɔ̃: Yòhanɛ̀s kè wo ɖo nyikɔ na be Gadia,

³Simèɔn kè wo yɔna be Tàsia,

⁴Yudà kè wo yɔna be Màkàbeòa,

⁵Eleazar kè wo yɔna be Awarana, Yònatàn kè wo yɔna be Afusà.

⁶E kpɔ bùsunu kewo àmèwo le wɔ̀ lè Yudà ku Yèruzàlɛ̀m a,

⁷eye be gblɔ̃ be: “Hèlu na mù! Jɔ̀ ye mù jɔ̀ be ma kpɔ dùkɔ̃ nyè be cɔ̃crɔ̃ ku èdù kɔ̀kɔ̀ɛ a be gbãgbã, eye ma nɔ̀ ànyi ɖo fikè a ɖɛ, wàlɛbɛ kè èdùa ci èkɛ̃tɔwo si, eye Kɔ̀kɔ̀ɛpe a ci èdù bu mètɔwo si à?

⁸Yebe mawuxɔ̀ a va trɔ sìgbè ŋusù mà-tɔ̀ nyikɔ ɖe nène,

⁹wo lɔ yebe ènuzazã kèwo ɖona àcɔ̃ na ɛ̀awo jo, àhùale-nuwo wo le wù yebe vifɛ̃wo, lè yebe àblɔwo mè, eye yebe ɖèkajɛwo le ku ci èkɛ̃tɔ a be èwui nu.

¹⁰Dùkɔ̃ kɛ ye mu sɔ dùkɔ̃ nyè be èfìɔɖùɖu be àkpa ɖe, sɔ wɔ̀ ècrɔ̃nu, eye mu lɔ yebe àhùalènuwo ò?

¹¹Wo lɔ yebe àcɔɖonuwo kpata jo lè e ŋuti, e ye kè nɔ̀ e ɖokoe si sãa, kpɔɖa, e trɔ zũ kluvi!

¹²E ye miabe Kɔ̀kɔɛpe kè nyi miabe àcɔnu ku miabe gogo a, trɔ zũ ènu gbãgbã, xixe mè-dukɔ̃wo dovlo è.

¹³Àlè kɛ ye lè e mè na mi be mi a gbà nɔ̀ àgbè ò?”

¹⁴Matatìa ku yebe èviwo zɛ̃ woabe àwùwo, wo tà kòtòku, eye wo lòfũ ŋutɔ.

¹⁵Èfìɔ be àmèdɔ̃dɔ̃ kèwo be èdɔ ye nyi be woa zĩ àmèwo ji, ne wo agbe xòsèa va Modin, la va zĩ àmèwwo ji, ne wo a wɔ̀ vɔsa na vòduwo.

¹⁶Izràɛlvi sùgbɔ gogo wo, gãkea, Matatìa ku yebe èviwo ya nɔ̀ àzɔ̀ge.

¹⁷Efìɔ be àmèdɔ̃dɔ̃wo kè ènu, gblɔ̃ na Màtatìa be: “Wò nyi àmè gã ɖìnyi ɖe, lè èdù kèa mè, eye èvi wòwo ku nɔ̀vi wòwo gla wò.

¹⁸Ekèa ŋutia, dɔ̃ va, ne wòa nyi àmè cucugbã kè la wɔ̀ ènu kè èfìɔ ɖo ɖɛa, sìgbè leke dùkɔ̃wo kpata ku Yudà ŋusuwo kudo àmè kèwo wo gble ɖɛ ɖo Yèruzàlɛ̀ma wo wɔ̀ ɛa nène. Wò ku èvi wòwo, mì la nɔ̀ èfìɔa be èxlɔ̃wo dòmè; wo la sɔ sìka, klòsalò ku ènu nana sùgbɔwo sɔ do bùbu mìa ŋuti.”

¹⁹Màtatìa ɖo e ŋuti ku ègbè sɛsɛ̃ ɖe be: “Ne èfìɔa be èfìɔɖùpea be dùkɔ̃wo keŋu ɖo èto èfìɔa, eye àmè sia àmè gble tɔgbeawo be ènu sɛ̃sɛ̃wo ɖɛ, jo gblɔ̃ be yèwo akplɔ̀ èfìɔ be ɖoɖo a doa,

²⁰nyè ku èvi nyèwo kudo nɔ̀vi nyèwo yaa, mi la zɔ̃ ɖo mia tɔgbewo be ènubabla, àlo èzò kè Mawu ɖù ku mia tɔgbewoa ji.

²¹Mawu ne na mi màjè kè la wɔ̀ be, mi mu la gble Èsea ɖɛ, ne mi àdòkpo wɔ̀wɔ ɖo e ji ò.

²²Mi mu la wɔ̀ ɖo èfìɔ a be ègbèɖeɖewo ji, la sɔ trã èmɔ̃ yì ɖùsi mè loo, àlo, yì èmìɔ̃ mè, jo lè mia tɔgbewo be sɛ̃sɛ̃ ŋuti ò.”

²³Wàlɛbɛ kè be le wu ènyà kèa nua, Yudàtɔ ɖèka zɔ̃ yì ŋùkɔ̀, lè àmèwo kpata be ŋùmè, la savɔ lè Modin be vɔsakpea ji, sɔ zɔ̃ ɖo èfìɔa be ègbèɖèɖe nu.

²⁴Kè Màtatìa kpɔ ekèaa, ànùkua wɔ̀wɔ le èzɔ̀ lè yebe èjì mè, eye àdɔ̀mèze kè jè a blù lè yebe àyìkuwo mè. E pudù, eye be sò èhlò na àmèa ɖo vɔsakpea ji.

²⁵E wù èfìɔ be àmèdɔ̃dɔ̃ kè zĩna àmèwo ji be wo awɔ̀ vɔsaa, zè ɖèka, eye be mù vosakpea pu ànyi.

²⁶Anùkua kè be ɖo na Mose be èsea be èzò le bì lè e mè, sìgbè leke be bì lè Pinhas mè, ɖo Zimri, Salu be èvia ŋutia nène.

²⁷E yomè a, Màtatìa tɔ àpa dodo ku ègbe sɛ̃sɛ̃ ɖe, to èdùa mè, le gblɔ̃ be: “Amè kèwo kpata wɔ̀nà ànùkua na Mose be Èsea, eye wo le Tɔhonɔ̀ be nubabla, àlo Zòɖùɖua ɖo àsia ne kplɔ̀ mù do!”

²⁸Ekè a yomè a, Màtatìa ku èviawo si jo yì ètowo ji, gble ènu kèwo kpata lè woa si, lè èdùa mèa ɖɛ.

²⁹Gà ŋua mèa, àmè sùgbɔ kèwo jro la nɔ̀ àgbè lè jɔ̀jɔ̀ɛwɔ̀wɔ mè, zɔ̃ ɖo Mose be Èsea jia, wo jo yì zògbè, yì ci funua,

³⁰woa ŋutɔwo, woabe èviwo, woa srɔ̃wo ku woabe èlãhawo, ɖoa, wo le do àyà na wo ŋutɔ.

³¹Efìɔa be àmèwo ku gbàdagbã kèwo lè Yèruzàlɛ̀m, lè David be èdùa mèawo sè be àmè kèwo gbe be yèwo mu la wɔ̀ ɖo èfìɔa be èse ji ò a va yì bè ɖo zògbèa ji.

³²Ahùadu sɛ̃ŋu ɖe jè woa yomè, eye, kè wo xe woa, wo ɖo àsàɖa kpà ŋùkɔ̀ wo, eye wo ɖo è be yèwo aɖè àhùa kpe na wo, jɛ̃gbɔ̃zã gbè.

³³Wo gblɔ̃ ɖoɖa wo be: “E sù nènea! Mì to, ne mì awɔ̀ ɖo èfìɔ be ègbèɖèɖea ji, ne mì a ci àgbè.”

³⁴Wo ɖo e ŋuti be: “Mi mu la to ò, eye mi mu la wɔ̀ ɖo ègbè kè èfìɔa ɖèa ji, ne mi a dà jɛ̃gbɔ̃zã a ji ò.”

³⁵Gbàdagbãwo lũ ɖo woa ji zè ɖèka,

³⁶Yudàviawo mu kpe àkɔ ku wo ò; wo mu dà wo èkpe ò; wo mu tu woabe wawlapewo be èmɔ̃nu ò.

³⁷Wo gblɔ̃ be: “Mia kpata mi aku ɖo miabe jɔ̀jɔ̀ɛ ji. Jiŋùkusi ku ànyigbã nyi ɖàsèfowo na mi be mì le crɔ̃ mi àgɔ̀ ɖe mà-jè.”

³⁸Gbàdãgbãwo jè woa ji, jɛ̃gbɔ̃zã gbè tututu, eye ŋusùawo cã, woa srɔ̃wo cã, woabe èviwo cã, kaka jè woabe èlãhawo cã jia, wo àmè kè la sù àgbètɔ èkàwivɔ àtɔ̃a, wo ku gbè ŋua gbè.

³⁹Kè Màtatìa ku yebe èxlɔ̃wo sè woabe èkua, wo fã wo veve ɖe.

⁴⁰Wo gblɔ̃ na woa nɔ̀nɔ̀ɛwo be: “Ne mia kpata, mi wɔ̀ sìgbè leke mia nɔ̀viawo wɔ̀a nènea, ne mi mu drɛ̃ àvũ ku vòdusɛ̃tɔwo la sɔ hlùɛ̃ miabe àgbè ta ku miabe èkɔdowo ò a, mu la dìdì gbɔ̀xue wo la crɔ̃ mi vɔ̀ jo lè ànyigbã ji ò.”

⁴¹Gbè ŋua gbè kea, wo ɖo èkpe ènyà kèa ji be: “Amè ɖekpekpe àmè kè la sɔ àhùa va kpe mi, lè jɛ̃gbɔ̃zã gbèa, mi la kpe àkɔ ku ì, àleke be mia kpata, mi mu la ku, sìgbè leke mia nɔ̀viwo ku lè woabe xɔ̀namèpewo nène ò.”

⁴²Gà ŋua mèa Hasidim be èhabɔ̀bɔ̀ mètɔ kèwo nyi ŋusù kàlɛ̃tɔwo lè Izràɛl, eye wo mu lɔ̃nà ènu lè Mose be Èsea ŋuti ò, va bɔ̀ ɖo woa ŋuti.

⁴³Amè kèwo kpata ji be yèwo ato lè èvùɛ̃ kèa mèawo sɔ woabe gbɔsùsu ku woabe ŋusɛ̃ va kpe wo.

⁴⁴Wo bɔ̀ àhùakɔ̃ ɖèka, sɔ woabe àdɔ̀mèze kpe àkɔ ku èvùɛ̃wɔ̀tɔwo, ɖù woa ji veve ɖe, sɔ woabe àdãwɔ̀wɔ crɔ̃ jimàxɔ̀sètɔwo. Amè kèawo dòmètɔ kpɔ̀tɛawo si jo yì vòdusɛ̃tɔwo be èdùwo mè.

⁴⁵Màtatìa ku yebe èxlɔ̃wo ɖìsà to èdùa mè, le mù vɔsakpewo pu ànyi.

⁴⁶Wo sɔ àkpa sɛ̃sɛ̃ sò èvo na ɖèvi àtɔ̀tɔ̀nɔ̀ kèwo wo kpɔ lè Izràɛl be ànyigbãa jiawo.

⁴⁷Wo nyà èkɛ̃tɔ àmè mà-bùtɔwo jo, eye ekèa wɔ̀wɔa jè e jina wo bɔ̀bɔ̀ɛ ɖe.

⁴⁸Wo hlùɛ̃ Mose be Èsea lè vòdusɛ̃tɔwo ku woabe èfìɔwo be àhùa wɔ̀wɔ si. Efìɔ kè nyi Mawu be èkɛ̃tɔ ɖekpe be ŋusɛ̃ mu teŋu kpe woa ji ò.

⁴⁹Kè Màtatìa be èkuzã le gogoa, e gblɔ̃ na èviawo be: “Mì kpɔ àleke ègbè-dà àmè ku èvlo dodo lè ɖùfìɔ ɖo fifì be hùenu ji ɖa; e nyi èzĩtɔtɔ be hùenu ku àdɔ̀mèze be wowo.

⁵⁰Evi nyèwo, egbèa miawo ye la sɔ veve do ènu, la hlùɛ̃ Mose be Èsea ta, la sɔ mìabe àgbè na ɖo ènubabla àlo, èzò kè Mawu ɖù ku mia tɔgbewoa ta.

⁵¹Mì ɖoŋù èdɔ kèwo mia tɔgbewo wɔ̀ lè woabe hùenua, ne mì zɔ̃ woabe àfɔ̀topea, mì la kpɔ gogo gã ɖe ku nyiɖìɖi màku-màku be àlè.

⁵²Mu nyi ɖe ye Abràham wɔ̀ ànùkua lè tètèkpɔ mè, eye Mawu bù ì na ɛ̀ be e lè jɔ̀jɔ̀ɛ òà?

⁵³Yosɛf cã wɔ̀ ɖo Èsea ji, wàlɛbɛ kè be xixaa, eye be trɔ zũ Ejiptè be àpetɔ.

⁵⁴Pinhas, mia tɔgbe kè wɔ̀ ànùkua veve ɖea, xɔ̀ mawunɔ̀ kòkòɖàbì be ènubabla, àlo zòɖùɖu lè Mawu be ŋùkɔ̀.

⁵⁵Kè Yosùa wu yebe èdɔdoàsi a nua, e va trɔ zũ kòjoɖotɔ ne bèa kplɔ̀ Izràɛl.

⁵⁶Kè Kalɛb ɖù ɖase ku nyàwo totoa, e xɔ̀ ànyigbã ɖe, so àmèha a si, sɔ ɖùcrɔ̃.

⁵⁷Kè David wɔ̀ ànùkua na Mawua, e xɔ̀ èfìɔ zìkpe, sɔ ɖùcrɔ̃ kaka sɔ yì.

⁵⁸Kè Elia wɔ̀ ànùkua na Mosè be Èsea, wo kɔkɔ ɛ̀ jo yì jiŋùkusi.

⁵⁹Kè Anania, Azarìa, Misaɛl doji ɖo Mawu ŋutia, èzò bìbi be àɖe mu teŋu kpɔ ŋusɛ̃ ɖekpe ɖo woa ji ò.

⁶⁰Kè Daniɛl nyi àmè jɔ̀jɔɛa, wo hlùɛ̃ gã, to lè jàŋùtawo be ènu mè.

⁶¹Mì sè e gɔ̃mè be, so jìjìmè yì jìjìmèa, àmè kèwo kpata dona jì ɖo Mawu ŋutia, wo mu la gbɔjɔ gbèɖe ò.

⁶²Mì mu gbà vɔ̃ èvùɛ̃wɔ̀tɔ be ŋùklɛ̃ do na àmè ò, ɖoa, yebe gogoa ɖota ènu nyìnyɔ̃ ku ŋɔ̃viwo gbɔ.

⁶³Egbèa e le kɔ ye ɖokoe ɖo èji glòjò, gãke èsɔ̀a, wo la ji ì dokpo, ɖoa, e la gbà trɔ yì yebe èkɔ sawɔɛ mè, eye yebe àɖàŋù ɖèɖewo la gũ.

⁶⁴Èvi nyèwo, mì nyi ŋusù àdodoewo, eye mì le Èsea ɖo àsi goŋu-goŋu, ɖoa, e ye la sɔ gogo sɔ ɖɔ mì.

⁶⁵Simèɔn, mìa fòfoa ye nyi ekèa; mù nyã be e nyi àmè kè ɖona àɖàŋù nyuɛ̃a; ne mì le ɖo èto èa, e la nɔ̀ ètɔ tèpe na mì.

⁶⁶Yudà Màkàbeòa, so kaka ɖèvimè ke be nyi kàlɛ̃tɔ; e la nyi mìabe àhùakɔ̃a be kplɔ̀tɔ, eye be la nɔ xɔ̀ ŋùkɔ̀, la nɔ wɔ̀ àhùa ku dùkɔ̃ kèwo nyi mìabe èkɛ̃tɔwoa.

⁶⁷Vɔ̀a mìawo yaa, mì bɔ̀ àmè kèwo keŋu wɔ̀nà ɖo Èsea jia ɖo ŋuti, ne mìa biɔhlɔ̃ ɖo mìabe dùkɔ̃a ta.

⁶⁸Mì wɔ̀ èvɔ̃ɛ ɖo èvɔ̃ɛ kè vòdusɛ̃tɔwo wɔ̀ na mìa tèpe, eye mì le ɖo Èsea mè-nyàwo ŋuti.”

⁶⁹E yomè a, e tusì na wo, eye be jo yì èyɔ̀mè, lè tɔgbeawo gbɔ.

⁷⁰E ku lè èpè èkà ètɔ̃ takpo ciàdɛ̃gɔ̃a (146) mè, eye wo ɖì ì ɖo xòmèa be yɔ̀do mè, lè Modin, eye Izràɛl be dùkɔ̃ bliboa lòfũ, eye wo wɔ̀ ècɔ gã ɖe na ɛ̀.