Read gen 1Màkàbeòwo 3 Bible Online

1Màkàbeòwo 3 - gen bible

1Màkàbeòwo 3

¹Màtatìa be èvi Yudà, kè wo yɔna be Màkàbeo a va nyi xòmè ŋùkɔ̀ nɔ̀tɔ lè ètɔa tèpe.

²Yudà be nɔ̀viwo kpata ku woa tɔ be èhadodowo keŋu do è àlɔ̀, sɔ drɛ̃ àvũ ɖo Izràɛl ta ku jìjɔ̀ɛ.

³E na yebe dùkɔ̃ a be nyikɔ ɖìnyia keke èta, e do ègà-wu, sìgbè àmè jɔ̀ àsu kàkò nène, e bla àkpà ku yebe àhùawɔ̀nuwo, eye be jè àvũa gɔ̃mè, sɔ yebe èwuia le hlùɛ̃ èta na yebe àsàɖaa.

⁴E le wɔ̀ àdã sìgbè jàŋùta nène, e le ɖè ègbè, sìgbè jàŋùtavi lè yebe àdènu yomè nène.

⁵E le tĩ jimàxɔ̀sètɔ kèwo ŋuti be va ke ɖoa, eye be le tɔ èzò àmè kèwo le ɖè èfũ na yebe dùkɔ̃a.

⁶Jimàxɔ̀setɔwo le vɔ̃ ɛ̀, eye wo pòtɛ, àdìka sò jimàxɔ̀sètɔwo kpata, eye be jo dùkɔ̃a ku yebe àlɔ̀.

⁷E na àgbè ve èjè lè ènu mè na èfìɔ sùgbɔ, yebe kãlìnu wɔ̀wɔwo do jìjɔ̀ɛ na Yakɔb. Ne wo le ɖoŋù ìa, wo la nɔ kafu ì, kaka sɔ yì.

⁸E sã lè Yudà be èdùwo mè, eye be crɔ̃ jìmàxɔ̀sètɔwo. E na àdɔ̀mèze trɔ lè Izràɛl yomè.

⁹E xɔ̀ nyikɔ yì kaka ànyigbã be nukpòpewo, eye be bɔ̀ àmè kèwo buawo ɖodu.

¹⁰Apolonio kplɔ̀ vòdusɛ̃tɔwo ku àhùakɔ̃ gãa ɖe so Samaria, ne wo awɔ̀ àhùa ku Izràɛl.

¹¹Kè Yudà sè èa, e to va kpà ŋùkɔ̀ ɛ̀, e ɖù e ji, eye be wu ì. Woa dòmètɔ sùgbɔ jè ànyi xɔ̀ àbì, ci ànyigbã. Àmè kèwo ci àgbèa, si jo.

¹²Yudàviwo lɔ woabe àhùalenuwo. Yudà sɔ Apolonio be èwuia, eye be zãna ɛ̀, gbè sià gbè, lè àhùa gbe ji.

¹³Serɔn, kè nyi Siria be àhùaga gã sè be Yudà bɔ̀ gbàɖagbãwo ku ànùkuamè be àhùadu ɖe ɖo ye ɖokoe ŋuti.

¹⁴Serɔn gblɔ̃ na ye ɖokoe be: “Mù la xɔ̀ nyikɔ, eye mù la ɖo gogo lè èfìɔɖùpe a. Mù la wɔ̀ àhùa ku Yudà kudo yebe àmè kèwo ye crì èfìɔ be ègbèɖèɖe a.”

¹⁵Ekèa ŋutia, e cã jè èmɔ̃, kplɔ̀ jimàxɔ̀sètɔwo be àhùakɔ̃ gã ɖe ɖo ŋuti, ne be ayì biɔ èhlɔ̃ Izràɛlviwo.

¹⁶Kè be gogo Bait-Horɔn be ètokɔ̃ɛa, Yudà kplɔ̀ àmèha vi ɖe kpò va dogò è.

¹⁷Ke Yudà be àmèwo kpɔ àhùadù kè gbãnà, la va dogò woa, wo gblɔ̃ na Yudà be: “Leke mi, àmè kuivè kèa, mi la teŋu kpe àhùa ku àmèha gã, ɖo ŋusɛ̃ kèa ò? Lãmè gbã na mi, eye mi mu kpɔ ɖù ènu ɖe egbèa ò.”

¹⁸Yudà ɖo e ŋuti be: “E jɔ̀nà bɔ̀bɔ̀ɛ ɖe, be àmèha gã ɖe cina àsi na àmè kuivè ɖewo, eye mu ɖì ènu ɖe na Mawu be ne wɔ̀ hlùɛ̃gã to àmè sùgbɔ, àlo, àmè kuivè ɖewo kpò ji ò.

¹⁹Ɖoa, jiɖùɖu lè àhùàgbè ji mu kùnà ɖo àhùakɔ̃ be gbɔsùsu ŋuti o, vɔ̀ bòhũa, ɖo ŋusɛ̃ ke sona Jiŋùkusia ŋuti.

²⁰Amè kèawo ɖɔ ku jajra, kudo jimàxɔ̀sè, gbãnà, la va kpe àkɔ ku mi, be yèwo a crɔ̃ mi, yèwo a crɔ̃ mia srɔ̃ ku miabe èviwo, ne yèwo ahlà miabe ènuwo jo.

²¹Vɔ̀a, miawo yaa, mi la wɔ̀ àhùa, la sɔ hlùɛ̃ miabe àgbèwo ta ku miabe èkɔ̀dowo ta,

²²eye Mawu yaa, la ŋɛ̃ wo lè ŋùkɔ̀ na mi. Ekèa ŋutia, mì mu gbà vɔ̃ wo ò.”

²³Kè e gbe tɔtè nupo pòpo kpòa, e lũ ɖo èkɛ̃tɔwo ji, gbìdì Serɔn ku yebe àhùakɔ̃a, gbã wo gudugudu.

²⁴Wo nyà wo ɖo èdù nu, lè Bait-Horɔn be àbùɖìɖi a mè, kaka yì ɖo ànyigbã gbàjà ji. Àgbètɔ kèwo la sù èkà èwìa (800) ci èku mè, eye àmè kpɔ̀tɛwo si jo yì Fìlistìtɔwo be ànyigbã ji.

²⁵Yudà ku nɔ̀viawo va le ɖo vɔvɔ̃ na dùkɔ̃ kèwo trɔ do woa, eye wo àmèwo le hũhũ lè ŋùkɔ̀ na wo.

²⁶Enu kèwo Yudà le wɔ̀a va ɖo kaka èfìɔa gbɔ, eye dùkɔ̃ ɖe sia ɖe pònà nupo so Yudà be àhùa wɔ̀wɔwo ŋuti.

²⁷Kè Ãtiokus sè ènyà kèawoa, e do àdɔ̀mèze gãa ɖe, eye be na yebe èfìɔɖùpea be àhùakɔ̃wo keŋu bɔ̀, sɔ wɔ̀ àhùadù sɛ̃ŋu ɖe.

²⁸E hũ yebe àdɔ̀kùnuwo jràɖope a, eye be sɔ èpè ɖèka be èdɔwɔ̀ci tu na gbàɖãgbãwo. E ɖè ègbè na wo, be wo ne sɔ̀gbè ɖɛ, na ènu ɖekpekpe kè la teŋu jɔ̀, gà ɖekpekpe gàmèa.

²⁹Efìɔa va kpɔ, gà ŋua mè be ègà le dɛ̃ lè yèbe ègà-drɔ̃wo mè. E kpɔ cã be ègà kè le so àfi kè yè kpà àcɛ̃ lèa be ètaci mèa cã hùe, ɖo màsɔ̀-màsɔ̀ ku èvùɛ̃ kèwo jɔ̀ lè èdùa mè, wàlɛbɛ kè be trɔ èse kèwo lè ànyi sãawoa ŋuti.

³⁰Ãtiokus le vɔ̃ be yè mu la gbà teŋu nɔ zã ègà, la nɔ na ènu àmèwo, sìgbè leke yè wɔ̀nà ɛ̀ sãa nène, sɔ wu èfìɔ kèwo ye jè ŋùkɔ̀ na yèawo kpata ò.

³¹Kè èkèa le titɔ susu mè na ɛ̀ sùgbɔ a, e ɖo èkpe e ji be yè ayì Pɛrsìa be ènutowo mè, la yì jɔ̀ ètaci ne yèa teŋu sɔ kpɔ èci sùgbɔ.

³²E sɔ Lysia kè nyi ŋusu ɖìnyi ɖe, so èfìɔ be xòmè mèa sɔ ɖo èdùa nu, so Efrata be ètɔ̀a nu, kaka va ɖo Ejipte be nutowo mè.

³³E biɔ so e si be ne lebè na yebe èvi Ãtiokus be hɛ̃hɛ̃, kaka na gà kè mè yè la gbɔ̀a.

³⁴E gble yebe àhùakɔ̃wo be mamãmè ku àtiglinyi kèwo be sɔ wèɔnà àhùaawo ɖo e si, eye be ɖè ègbè na ɛ̀, so yebe ɖoɖowo keŋu ŋuti. So Yudà ku Yèruzàlɛ̀m be èdùmètɔwo ŋutia,

³⁵Lisia ɖo la dɔ̃ àhùakɔ̃ ɖèka ɖoɖa, ne wo a crɔ̃ Izràɛl be àhùakɔ̃a ku àmè vi kèwo ye kpɔ̀tɔ̀ lè Yèruzàlɛ̀m be èdùa mèa, àleke be wo atutu tèpe kèa jo lè àmèwo be susu mè.

³⁶E ɖo la sɔ èdù bu mètɔwo ɖo woabe ànyigbãa kpata ji, ne be amã ànyigbãa.

³⁷Efìɔa sɔ àhùakɔ̃a be mamãmè kpɔtɔɛa, eye be jo lè Ãtiokia kè nyi yebe èfìɔɖùpea be èfìɔdùa mè, lè èpè èka-tɔ̃ takpo ci adrɛ̃gɔ̃a (147) mè. E sò Efratà be ètɔ̀a, eye be to àvego be nutowo mè.

³⁸Lisia cã Tòlòmeò kè nyi Dorimène be èvia, ku Nikanɔr kudo Gorjia, àmè ɖo ŋusɛ̃wo lè èfìɔ be èxlɔ̃wo dòmè.

³⁹E dɔ̃ wo ku gbàdagbã hotu èwì (40000), kudo èsɔdotɔ hotu ètɔ̃-kà wìvɔàtɔ̃ (7000), ne wo ayì gbã Yudà be èdua, sɔ zɔ̃ ɖo èfìɔ be ègbèɖèɖea ji.

⁴⁰Kè wo jo ku woabe àhùakɔ̃ bliboa, wo va gogo Emaus be èdùa eye wo ɖo àsàɖa ɖo ànyigbã gbàjàa ji.

⁴¹Kè nuto ŋua mè be àsisàtɔwo sè woabe nyikɔa, wo ji sìka ku klòsalò sùgbɔ kudo àmèvigawo, eye wo va àsàɖaa mè, ne wo aplè Izràɛlviwo jo. Siria ku Fìlistìtɔwo be àhùakɔ̃ ɖe va bɔ̀ ɖo woa ŋuti.

⁴²Yudà ku nɔ̀viawo kpɔ be ènu wɔ̀ àmèa le nyrã ɖo e ji, eye àhùakɔ̃wo va do àsàɖa ɖo yèwo be ànyigbã ji. Wo gbà sè efìɔa be ègbèɖèɖè kè le gblɔ̃ be wo ne crɔ̃ yèwo be dùkɔ̃a gbidigbidia cã.

⁴³Wo gblɔ̃ lè woa nɔ̀nɔɛwo dòmè be: “Mi agbà fɔ̃ miabe dùkɔ̃a, so yebe gbledoa mè, la sɔ ɖo tè, eye mi awɔ̀ àhùa ɖo ye ku miabe Kɔ̀kɔ̀ɛpea ta.”

⁴⁴Wo yɔ dùkɔ̃a bɔ̀, ne wo ajràɖo na àhùa, ne wo afãkùe, wo a blìbɔ̀, sɔ biɔ ŋuzĩzĩ kuku kudo màje.

⁴⁵Yèruzàlɛ̀m ci àhuedo, yebe èviwo dòmètɔ ɖekpe mu le ɖo èdùa mè, àlo, le to lè e mè ò. Wo dovlo kɔ̀kɔ̀ɛpea, àmèjrowo xɔ̀ ànyi nɔ̀ ɖo Àgbògbò a mè, wo sɔ wɔ̀ vòdusɛ̃tɔwo be èdomè. Yɛyì be àpawo dodo lè Yàkobò be èviwo dòmè, èkpɛ̃wo, èkàsãŋùguwo be ègbèɖìɖi nu sò.

⁴⁶Wo bɔ yì Mispa, èdù kè kpà ŋùkɔ̀ Yèruzàlɛ̀ma, ɖoa, sã xoxoa, kuefãpe ɖe lè Mispa na Izràɛlviwo.

⁴⁷Wo ci àdɔ̀, gbè ŋuã gbè, wo tà *kpɛ̃mèvɔ, wo kɔ̀ àfĩ ɖo èta eye wo trɛ̃ woabe àwùwo lè ŋuti, sɔ lòfũ.

⁴⁸Wo vlũ Mose be Èse be Xomaa, ne woa xlɛ̃ ènu kè vòdusɛ̃tɔwo yaa biɔna woabe vòduwo.

⁴⁹Wo hɛ̃ sɛ̃sɛ̃dɔ be àwùwo, nuku yàya cucugbãawo, ènu mamã be àkpa èwogɔ̃a be nanawo va; wo na àmè ɖè ɖovò na Mawu kèwo be àzã sù lè èkpa mè vɔ̀awo to va.

⁵⁰Wo kɔ ègbè yìji ɖoɖa Jiŋùkusi, le gblɔ̃ be: “Nukɛ ye mi la wɔ̀ ku ènu nana kèawo ò? Fikɛ ye mi la kplɔ̀ àmè kèawo yì fifì ò?

⁵¹Wo ɖo àfɔ̀ àpo Kɔ̀kɔ̀ɛpe a ji, eye wo dovlo è; wo do ŋùkpɛ̃ àpo mawunɔwo, eye wo la lòfũ.

⁵²Kpɔɖa fifìa, vɔ̀du sɛ̃tɔwo bla èse, bɔ̀ kplikpli ɖo mia ŋuti be yèwo la crɔ̃ mi, ne yèwo la gũ mi jo lè ànyigbã ji. Wò yaa, wò nyã woabe susuwo ɖo mia ŋuti.

⁵³Leke mi la wɔ̀, la teŋu kpe woa ji, ne wò yaa, wò mu va do mi àlɔ̀ ò?”

⁵⁴Izràɛlviwo ku èkpɛ̃, eye wo kpà àbòbo, do àpa gãa ɖe.

⁵⁵Ekèa yomèa, Yudà ɖo ègawo, na dùkɔ̃a, e ɖo àhùagawo ɖo gbàdagbã èkà-wìvɔ àtɔ̃ nu, ɖo gbàdagbã èkà-èvè takpo (100) nu, ɖo èkà ci-wo nu ku ɖo gbàdagbã èwo nu.

⁵⁶Yudà gblɔ̃ na àmè kèwo le tù woabe àxue, àlo, kèwo sɔ àgɔ̀ nyɔnù, mu dìdì ò, na àmè kèwo tɔ̀ vɛ̃-gblè dède ji, àlo, àmè kèwo le vɔ̃a, e gblɔ̃ na wo be wo ne trɔ yì àxòmè, sɔ zɔ̃ ɖo Mosè be Èsea ji.

⁵⁷E yomèa, àhùakɔ̃a jè èmɔ̃, eye be va do àsàɖa ɖo Emaus be àpùgo.

⁵⁸Yudà gblɔ̃ na wo be: “Mì bla àkpà, na àhùa wɔ̀wɔ̀; mì wɔ̀ kàlĩ, eye mì sɔ̀gbè, ne mì akpe àkɔ ku vòdu sɛ̃tɔ kèwo bɔ̀ be yèwo a crɔ̃ mia ku miabe kɔ̀kɔ̀ɛpea,

⁵⁹ɖoa, e nyɔ̃ na mi, be mi aku lè àhuàgbè ji, wu be mi akpɔ miabe dùkɔ̃a ku miabe Kɔ̀kɔ̀ɛpea be jɔ̀gbèvùɛ̃wo.

⁶⁰Mawu be èjro ne jɔ̀.”