Read gen 1Màkàbeòwo 4 Bible Online

1Màkàbeòwo 4 - gen bible

1Màkàbeòwo 4

¹Gorjia kplɔ̀ gbàdagbã àfɔ̀zɔ̃tɔ hotu èvè èkàwivɔàtɔ̃ ku èsɔdotɔ nyuɛ̃tɔawo èkàwivɔàtɔ̃ bɔ̀, eye àhùakɔ̃ kèa jè èmɔ̃ èzã mè,

²ne wo ateŋu yì to ɖo Yudàviwo be àsàɖa mè, ne wo a jè woa ji, lè àvòmè. Amè kèwo lè Yèruzàlɛm be àgbògbòa mèawo la nɔ fiɔ wo èmɔ̃.

³Kè Yudà sè ènyà kèaa, ye ku yebe kàlĩawo jè èmɔ̃, la yì ɖù èfìɔ be àhùakɔ̃ kè lè Emausa ji,

⁴wàlɛbɛ kè Gorjia ku yebe àhùakɔ̃a mètɔwo mu kpɔ gogo Izràɛlviwo be àsàɖaa ò a.

⁵Kè Gorjia va ɖo Yudà be àsàɖaa mè, èzã mèa, mu kpɔ àmè ɖekpekpe ò. E tɔ Yudàviwo jiji, lè ètowo ji, ɖoa, e gblɔ̃ be: “Wo sè be mi gbànà, eye wo si jo.”

⁶Kè èŋù le kèa, Yudà to lè ànyigbã gbàjàa ji ku gbàdagbã hotu ɖèka èkàwivɔàtɔ̃, vɔ̀a àmè kèawo mu ɖo àgbàja ku èwui nène kè wo jro la ɖoa cã ò.

⁷Wo le kpɔ vòdusɛ̃tɔwo be àsàɖaa ɖoɖa; àmè kèawo sɛ̃ŋu eye wo lè *klìkã. Esɔdotɔ kèwo ye trɔ do èa, woawo keŋu wo nyi àmè kèwo wo tù ɖo àhùa wɔ̀wɔ̀ mè, eye be mã do woa.

⁸Yudà gblɔ̃ na yebe àmèwo be: “Mì mu gbà vɔ̃ leke wo sùgbɔ ɖoa ò, eye leke wo la kpe àkɔ ku mia mu gbà sò àdìka na mì ò.

⁹Mì ɖoŋù leke Mawu hlùɛ̃ mia tɔgbewo gã, lè Keti be Àpùa to, wàlɛbɛ kè Ejipte be èfìɔa nyà wo ɖo èdùnu ku yebe àhùakɔ̃a.

¹⁰Fifìa, mia do àpa, ne mia fã yɔ Mawu lè Jiŋùkusi; ne e ɖo èto mia, e la ɖoŋù èzò kè be ɖù ku mia tɔgbewoa, eye egbèa, e la fɔtɔ àhùakɔ̃ kèa lè miabe ŋùkumè,

¹¹eye dùkɔ̃wo kpata la nyã be àmè ɖe lè kè xɔ̀nà na Izràɛl eye be hlùɛ̃nà ɛ̀ gã.”

¹²Amèjroawo fɔ̃ ŋùkumè yì ji; kè wo kpɔ Yudàviwo zɔ̃ gbànà ɖo woa jia,

¹³wo to lè àsàɖaa mè, ne wo akpe àhùa ku wo. Yudà be àmèwo ku èkpɛ̃,

¹⁴eye wo tɔ àhùaa wɔ̀wɔ. Vòdusɛ̃towo be àhùakɔ̃a mu teŋ kpe Yudàviwo ji ò. Si kpò wo teŋu si jo, tùtà gbajàa ji.

¹⁵Vɔ̀a, àmè kèwo lè ŋùgbe, lè woa dòmèawo kpata ku ci èwui nu. Yudàviwo nyà wo ɖo èdùnu kaka yì ɖo Gèzer, ku Ièdùmèa, Dàgɔn kudo Yamnia be gbàjàa ji; àgbètɔ ku sìgbè àmè hotu ɖèka èkàwìvɔàtɔ̃ nène lè woa dòmè.

¹⁶Kè Yudà trɔ gbɔ̀ so àmèawo yomè ku yebe àhùakɔ̃a, e gblɔ̃ na dùkɔ̃a be:

¹⁷“Mì mu gbà bìa ŋùku ɖo àmɔ̃nyɔ̃nuwo ŋuti ò, ɖoa, àhùa bu gbà le nɔ̀tè kpɔ mi.

¹⁸Gorjia ku yebe àhùakɔ̃a lè ètoa tamè; wo mu dìdì lè mia gbɔ ò. Fifìa, mì kpà ŋùkɔ̀ mìabe èkɛ̃tɔwo, ne mì awɔ̀ àvũ ku wo. E yomè a, mì la vò, la lɔ àmɔ̃nyɔ̃nuwo.

¹⁹Wàlɛbɛ kè Yudà le wu yebe ènyaa nua, wo kpɔ àhùakɔ̃ be àlɔ̀zɛ̃ ɖe le ɖia wo, lè ètoa tàmè.

²⁰Gɔrjia be àmèwo kpɔ be wo nyà yèwo tɔ̀wo ɖo ègbe, eye yèwobe àsàɖa le bìzò. Azizɔ kè wo le kpɔa, cã lè ɖe ènu kè jɔ̀ a fiɔ.

²¹Ekèa ɖo vɔ̃vɔ̃ na wo ŋutɔ. Kè wo kpɔ be Yudà be àhùakɔ̃a cã sɔ̀gbè lè gbajàa ji na àhùa wɔ̀wɔ a,

²²woa kpata, wo si jo yì Fìlistìtɔwo be èdù mè.

²³Yudà trɔ gbɔ̀ va, ne wo ahlà àmɔ̃nyɔ̃nuwo lè àsàɖaa mè. Wo lɔ sìka ku klòsalò be èci sùgbɔ, àvɔ kèwo wo do àho jɛ̃a ku kèwo wo do àho èblɔa, sɔ kpe ɖo àdɔ̀kùnu sùgbɔ buwo ŋuti.

²⁴Kè wo trɔ gbànà, wo le kafu Mawu eye wo le mlã ɛ̀, ɖoa e nyi àdɔ̀mè nyuɛ̃tɔ eye yebe lɔ̃lɔ̃ a lè tɛ̀gbɛ̀ɛ.

²⁵Gbè ŋua gbèa, hlùɛ̃gã gã ɖe va e mè lè Izràɛl.

²⁶Àmèjroawo dòmètɔ kèwo si joawo va gblɔ̃ ènu kè kpata jɔ̀ a na Lisia.

²⁷Ènyà kèawo titɔ ɛ̀, eye èjì ɖè lè pò na ɛ̀, ɖoa ènuawo mu jɔ̀ ɖo Izràɛl ji, sìgbè leke be jro ɖoa nène ò. Enu kè to so e mèa trɔ ŋùgbe do ègbè kè èfìɔa ɖè na ɛ̀a.

²⁸Kè èpè trɔa, Lisia bɔ gbàdagbɔ̃ kèwo sɛ̃ŋu wuawo hotu ègbã ku èsɔdotɔ èkàwivɔàtɔ̃, ne wo awɔ̀ àhùa ku Yudàtɔwo.

²⁹Wo va Ièdùmèa eye wo do àsàɖa ɖo Bait Sur. Yudà zɔ̃ ɖo woa ji ku àgbètɔ hotu àtɔ̃.

³⁰Wàlɛbɛ kè be kpɔ àhùakɔ̃ sɛ̃ŋu ŋua, e fãkùe be: “Mù le mlã wò, Izràɛl be hlùɛ̃tɔ, èwò kè sɔ àpo sumɔ̃vi David be àlɔ̀, sɔ ŋɛ̃ àhùawɔ̀tɔ sɛ̃ŋua be àdã, eye wò sɔ Fìlistìtɔwo be àsàɖa do àsi na Yònatàn, Saulò be èvia ku yebe àdèkplɔ̀vi a.

³¹Bla àhùakɔ̃ kèa ɖo àpo dùkɔ̃ Izràɛl be àlɔ mè; do ŋukpɛ̃ woabe gbàdagbã àfɔ̀zɔ̃tɔ ku èsɔdotɔwo.

³²Do vɔ̃vɔ̃ woa mè; srè woabe àmè mà-bù be ŋusɛ̃a, eye woabe èji màɖua, ne na woa hũhũ.

³³Na woa ci àhùa, lè àmè kèwo lɔ̃ wòawo be èwui nu, eye àmè kèwo kpata jèsi àpo nyikɔa woa nɔ mlã wò ku kafuhàwo.”

³⁴Wo tɔ àhùaa ji, eye kè wo kpe àkɔ ku àkɔa, Lisìa be àhùakɔ̃a be àmè sù hotu èvè èkàwìvɔàtɔ̃ (5000) ci àhùa.

³⁵Kè be kpɔ leke yebe àhùakɔ̃a le kã-hlɛ̃ ɖoa ku leke Yudà be àhùakɔ̃a be kàlĩ wɔ̀wɔ̀a gbà le yì e ji ɖo, eye be gbà kpɔ leke Yudàviwo sɔ̀gbè, la ci àgbè, àlo, la ku kàlĩtɔ̀ ɖoa, Lisia jo yì Ãtiokia, yì xɔ̀ àmèjrowo ɖo yebe àhùakɔ̃a mè, ne wo asùgbɔ sɔ gbìgbɔ̀ trɔ yi Yudea-nyigbã ji.

³⁶Gà ŋua mèa, Yudà ku nɔ̀viawo gblɔ̃ be: “Mì kpɔ ɖa, mi gbã miabe èkɛ̃tɔwo gudugudu; mia lia èto, yì ɖè èɖi kè lè mawuxɔ̀a ŋutia, ne mi akɔ̀ e ŋuti.”

³⁷Ahùakɔ̃ bliboa bɔ̀ kpli eye wo lia Siɔn be ètoa.

³⁸Wo kpɔ leke mawuxɔ̀ ɖɛpoxuea ci àxuedo ɖoa, àmèjroawo dovlo vɔsakpea, wo tɔzɔ̀ hɔ̃truawo; ègbe miɔ̃ ɖo èkpaa mè sìgbè àve mè, àlo, èto ji nène, eye èxɔ̀wo gbã.

³⁹Wo zɛ̃ woabe àwùwo, kɔ̀ àfi ɖo èta, sɔ lòfũ.

⁴⁰Wo cɔ̃ ŋùmè ànyi, eye kè wo ku èkpɛ̃a, wo do àpa ɖoɖa jiŋùkusi.

⁴¹Yudà ɖè ègbe na yebe gbãdãgbãwo dòmètɔ ɖewo be wo ne nɔ wɔ̀ àhùa ku àmè kèwo ye lè àgbògbòa mèawo, kaka na gà kè mè yè la kɔ̀ mawuxɔ̀a ŋuti vɔ̀a.

⁴²E yomèa, e cã mawunɔ mà-ɖoɖi kèwo le ɖo Èsea ŋutia,

⁴³àmè kèawo kɔ̀ mawuxɔ̀a ŋuti; wo fɔ̀ èkpe màkɔ̀-màkɔ̀awo yì dàŋùgbe ɖo tèpe makɔ-makɔ ɖe.

⁴⁴Wo biɔ woa nɔ̀nɔ̀ɛwo be nukɛ yèwo la sɔ ènumèmè vɔsakpe kè wo dovloa wɔ̀ màa.

⁴⁵Susu nyuɛ̃ ɖe va èta mè na wo be yèwo agbã ɛ̀, ne mu gbà va nyi ŋùkpɛ̃ be ènu na yèwo ò, ɖoa, vòdu sɛ̃tɔwo dovlo è. Ekèa ŋutia, wo gbã ɛ̀,

⁴⁶eye wo fɔ̀ èkpeawo yì kɔ̀ ɖo mawuxɔ be ètoa ji, lè tèpe ɖɔ̀huĩ ɖe, sɔ le nɔ̀tè be gblɔ̃ɖɛtɔ ɖe ne va gblɔ̃ lekè wo la wɔ̀ wo ɖoa.

⁴⁷Sɔ zɔ̃ ɖo Èsea jia, wo sɔ èkpe kè wo mu kpà òa, sɔ tù vɔsakpe yeye kè lè sìgbè sãa tɔ̀a pɛpɛpɛ nène.

⁴⁸Wo gbìgbɔ̀ jra Kɔ̀kɔ̀ɛpea ku Nɔ̀pe kɔ̀kɔ̀ɛa mè ɖo; wo kɔ̀ gbàjà jiawo cã ŋuti.

⁴⁹Kè wo wɔ̀ ènuzãzã kɔ̀kɔ̀ɛ buwo vɔ̀a, wo sɔ kãligbɛ̃tia, ànùwɛtrɛ̀wo be vɔsakpea ku èkplɔ̃a ɖo Mawuxɔ̀a mè.

⁵⁰Wo tɔzò lifi ɖo vɔsakpea ji, wo sũ kãlĩgbɛ̃tia be èzò kèwo klɛ̃ lè Nɔ̀pe Kɔ̀kɔ̀ɛa.

⁵¹Wo sɔ kpɔ̃nɔwo dà ɖo èkplɔ̃a ji, wo do èxɔ̀mèsòvɔawo eye wo wu èdɔ kèwo kpata ji wo tɔa.

⁵²Wètri kè wo yɔna be Kislev kè nyi wètri àsiɖèkɛgɔ̃a be ŋùkèkè wivɔàtɔ̃gɔ̃a gbè, lè èpè èkà ètɔ̃ takpo ci ènyigɔ̃a mèa, wo fɔ̃ ŋùdekɛ̃nyɛ̃ fùtùu.

⁵³Sɔ zɔ̃ ɖo Èsea jia, wo savɔ lè ènumèmè vɔsakpe yeye ke wo tùa ji.

⁵⁴Wo kɔ̀ vɔsakpea ŋuti, lè èpèa be hùe kè nu tututu, lè àzã kè gbè tututu vɔ̀dusɛ̃tɔwo dovlo èa ji. Wo jì kafuhàwo, le pò èhũwo, èhɛwo, àɖòɖowo, èkà-sãŋùguwo ku àtòpàniwo.

⁵⁵Dùkɔ̃ bliboa cɔ̃ ŋùmè ànyi, sɔ do ènu gũ na Mawu. Ekèa yomèa, wo na gogo ku mamlã yì Jiŋùkusi, lè Mawu kè na wo jiɖùɖua gbɔ.

⁵⁶Wo ɖù vɔsakpea be ŋutikɔ̀kɔ̀a be àzã, ŋùkèkè ènyi, eye wo wɔ̀ ènumèmè vɔsawo ku jìjɔ̀ɛ gãa ɖe. Wo wɔ̀ ɖèkawɔ̀wɔ ku àkpedo vɔsawo cã.

⁵⁷Wo sɔ sìka-sìhɛ̃ ku sìka be àkplɔ̀wo ɖo àcɔ na Nɔ̀pe kɔ̀kɔ̀ɛa be ŋùkɔ̀, eye wo gbìgbɔ̀ jrà mɔ̃nuawo ku èxɔ̀awo ɖo, eye wo do hɔ̃tru woa nu.

⁵⁸Jìjɔ̀ɛ gã ɖe nɔ̀ dùkɔ̃a dòmè, eye ŋùkpɛ̃ kè vòdusɛ̃tɔwo do woa tutu jo.

⁵⁹Yudà ku nɔ̀viawo kudo Izràɛlviwo be habɔ̀bɔ bliboa ɖo èkpe e ji be wo la sɔ jìjɔ̀ɛ gã ɖe, nɔ ɖù vɔsakpea be ŋutikɔ̀kɔ̀ be àzãa, ŋùkèkè ènyi, lè yebe hùenu, èpè sia èpè, so wètri Kislev be ŋùkèkè wìvɔàtɔ̃gɔ̃a gbè.

⁶⁰Gà ŋua mè ye wo ɖo èglìkpa kɔkɔwo, trɔ do Siɔn be ètoa, eye wo tù èmɔ̃jikpɔxɔ̀ kàkòwo, ne vòdusɛ̃tɔwo mu gbà va dovlo tèpe kèa ke, sìgbè leke wo wɔ̀ɛ sãa nène ò.

⁶¹Yudà ɖo gbàɖagbã be èha ɖèka, ne wo anɔ ɖia funua. E na wo gbìgbɔ̀ tù Bait-Sur be èdùa ku ŋusɛ̃ wu sãa, àleke be dùkɔ̃a ne ɖo àgbògbò ɖe, kpà ŋùkɔ̀ Idùmè be ànyigbãa.