Read gen 1Màkàbeòwo 5 Bible Online

1Màkàbeòwo 5 - gen bible

1Màkàbeòwo 5

¹Kè dùkɔ̃ kèwo trɔ do woa, sè be Yudàviwo gbìgbɔ̀ tù vɔsakpea, eye wo gbìgbɔ̀ jrà Kɔ̀kɔ̀ɛpea ɖo, ɖo leke be lè sãa jia,

²wo do àdɔ̀mèze ŋutɔ, eye wo ɖo èkpe e ji be yèwo la crɔ̃ Yakɔb be jìjìmèvi kèwo lè yèwo dòmèawo. Ekèa ŋuti wo tɔ àmèwo wùwu, eye wo le crɔ̃ wo lè dùkɔ̃a dòmè.

³Yudà kpe àhùa ku Esau be èviwo lè Idùmèa ku Akrabatɛn be èdùwo mè, ɖoa, wo xa Izràɛl. Izràɛl ɖù woa ji veve ɖe ŋutɔ, nyà wo yì ŋùgbe, eye wohlà woabe ènuwo.

⁴E yomè a, e ɖoŋù leke Baian be èviwo nyrãku ɖo a. Wo va nyi èmɔ̃trenu ku àfɔ̀klɛ̃ na dùkɔ̃a, ɖoa, wo trena èmɔ̃ ɖo èmɔ̃wo ji na Izràɛlviwo.

⁵E tu wo ɖo woabe èmɔ̃jikpɔxɔ̀wo mè, e xa wo, zĩ woa ji, eye be sɔ wo ɖo *àhovìnu. E tɔzò woabe èmɔ̃jikpɔxɔ̀awo ku àmè kèwo kpata lè woa mèa.

⁶E yomè a, e yi Amɔ̀n be jìjìmèviwo gbɔ. E dogò àhùakɔ̃ sɛ̃ŋu ɖe ku dùkɔ̃ sùgbɔ ɖe lè funu. Wo yɔna woabe ŋùkɔ̀nɔ̀tɔa be Tìmòteò.

⁷E wɔ̀ àhùa sùgbɔ ku wo, vɔ̀a e ɖù woa ji, eye wo gbã gudugudu.

⁸Exɔ Yazer be èdùa ku èdùvi kèwo lè gɔ̃mè na ɛ̀awo. E yomèa, e trɔ gbɔ̀ va Yudea.

⁹Galad be dùkɔ̃wo bɔ̀ kplikpli ɖo Izràɛlvi kèwo so àxue ɖo woabe ànyigbã jiawo ŋuti, ne wo a crɔ̃ wo jo gbidi. Izràɛlviawo si yì bè ɖo Datema be àgbògbòa mè.

¹⁰Wo ŋlɔ̃ xoma ɖoɖa Yudà ku nɔ̀viawo be: “Dùkɔ̃wo bɔ̀kpli ɖo mia ŋuti, be yèwo a crɔ̃ mi.

¹¹Wo le jràɖo be yèwo axa èmɔ̃jikpɔxɔ̀ kè mè mi bè ɖoa. Tìmòteò ye lè ŋùkɔ̀ na woabe àhùakɔ̃a.

¹²Tɔ̀ wò jɔ̀, va kaba, ne wò axɔ̀ mi lè woa si, ɖo àmè sùgbɔ ci àhùa lè mia dòmè vɔ̀.

¹³Wo wù mia nɔ̀vi kèwo kpata nɔ̀ Tobi be èdùa mèawo. Wo le woa srɔ̃wo ku woabe èviwo jo àhùale. Wo hlà woabe àdɔ̀kùnuwo eye àmè sìgbe èkàwivɔàtɔ̃ nène, crɔ̃ lè tèpe kèa.”

¹⁴Wàlɛbɛ kè wo le hlɛ̃ xoma kèaa, àŋɛ̀dotɔwo buwo gbà so Gàlìlea va ɖo. Woabe àwuwo vũvũ lè èkɔ̀ na wo, eye wo gbà hɛ̃ kèwo ke va.

¹⁵Àŋɛ̀a le gblɔ̃ be: “So Ptolemaio, Tyro ku Sidɔn be èdùwo mèa, wo bla èse ɖo mia ŋuti ku vòdusũmɔ̃tɔwo kèwo nyi àmèjrowo lè Gàlìlea kpata be wo a crɔ̃ mi.”

¹⁶Kè Yudà ku dùkɔ̃a sè ènu kè le jɔ̀ a, wo wɔ̀ bɔ̀bɔ gã ɖe, la sɔ jrò ènu kè wo la wɔ̀a mè kpɔ, ne wo aɖè woa nɔ̀vi kèwo wo le zĩ ɖo ànyi eye wo le kpe àhùa naa.

¹⁷Yudà gblɔ̃ na nɔ̀via Simɔ̀n be: “Wò yaa, cã àmèwo bɔ̀ ɖo ɖokoe wò ŋuti, ne wo ayì hlùɛ̃ nɔ̀vi wò kèwo lè Gàlìlea gã; nyè yaa, nyè ku nɔ̀vi nyè Yònatàn, mi ayì Galaad-nyigbã ji.”

¹⁸E sɔ Yozɛf, Zakaria be èvia ku Azaria, dùkɔ̃a be ŋùkɔ̀nɔ̀tɔa ku àhùakɔ̃a be àmè kpɔtɛawo ne wo anɔ ɖia ŋùgbea.

¹⁹E ɖè ègbè na wo be: “Mì nɔ̀ dùkɔ̃a nu, eye mì mu gbà ɖè àhùa kpe na vòdusɛ̃tɔwo, kaka na gà kè mè mi la trɔ gbɔ̀a ò.”

²⁰Wo sɔ àmè hotu ɖèka èkàwìvɔàtɔ̃ na Simɔ̀n, ne be ayì Gàlìlea, eye wo sɔ àmè hotu ènè na Yudà, ne be ayì Galad-nyigbã ji.

²¹Kè be yì Gàlìleaa, Simɔ̀n kpe àhùa sùgbɔ ku vɔ̀dusɛ̃tɔwo, eye be ɖù woa ji.

²²E nyà wo ɖo èdùnu kaka yì ɖo Ptolemaìo be àgboa nu. Vòdusɛ̃tɔ sìgbè àmè hotu ɖèka èkàwìvɔàtɔ̃ nène ye ci àhùa eye be lɔ woabe àmɔ̃nyɔ̃nuwo jo.

²³E kplɔ̀ Yudàtɔ kèwo lè Gàlìlea ku Arbataawo, woa srɔ̃wo, woabe èviwo ku woabe ènuɖoɖowo keŋu gbɔ̀ va Yudea ku jìjɔ̀ɛ.

²⁴Yudà Màkàbeo ku Yònatàn kè nyi nɔ̀via ya, sò Yɔrdan-tɔ̀ a, eye wo zɔ̃ àzɔ̃li ŋùkèke ètɔ̃, lè zògbèa ji.

²⁵Wo dogo Nabatetɔwo; àmèawo gogo wo àdɔ̀mèfàtɔ̀, eye wo gblɔ̃ ènu kèwo keŋu jɔ̀ ɖo woa nɔ̀viwo ji, lè Galad-nyigbã jia na wo.

²⁶Wo gblɔ̃ na wo be wo xa woa dòmètɔ Yudàvi sùgbɔ ɖo Basora, Alema, Kaspo, Makɛd ku Karmaim. Edù kèawo kpata nyi èdù gãwo, eye àmèawo ci *àkòtò mè.

²⁷Wo gbà gblɔ̃ na wo be wo le àmèwo do ègà, le Galad-nyigbãa be èdù kpɔ̀tɛawo mè, eye èkɛ̃tɔawo ɖo è be, ne èŋù gbe kè kpòa, yèwo la jè àmè kèwo yèwo xà ɖɛawo ji, lè àgbògbò kèawo mè, eye yèwo la crɔ̃ àmèawo keŋu lè ŋùkèkè ɖèka mè, lè àgbògbòawo mè.

²⁸Troloa, Yudà ku yebe àhùakɔ̃a, sò èmɔ̃a to zògbèa ji tùtà Bosora. E ɖo àlɔ̀ èdùa ji, eye de na wo sɔ èwui crɔ̃ ŋusùwo kpata; e lɔ àmɔ̃nyɔ̃nuwo kpata jo, eye be tɔzò èdùa.

²⁹Wo trɔ jo, èzã ŋua mè, eye wo zɔ̃ kaka va ɖo Yudàviwo be àgbògbò kè lè Datemaa.

³⁰Kè èŋù kèa, kè wo kɔ ŋùku yìjia, wo kpɔ àhùkɔ̃ gã ɖe kè wo mu la teŋu hlɛ̃ ò a. Amè kèawo le sɔ àcrɔ̀ɛwo ku èmɔ̃wo ɖo tè, la sɔ ɖo àsi èdù a ji. Ahùaa jè e gɔ̃mè xoxo.

³¹Ke be kpɔ be àhùaa jè e gɔ̃mè vɔ̀, eye èdùa be àbòbo le ɖì kaka yì ɖo jiŋùkusi, ku èkpɛ̃kuku, ku àpaa,

³²Yudà gblɔ̃ na yebe àhùakɔ̃a mètɔwo be: “Mì wɔ̀ àhùa egbèa ɖo mia nɔ̀viwo ta!”

³³E mã yebe àhùakɔ̃a ɖo èhasòsò ètɔ̃ mè, eye wo xa èkɛ̃tɔawo lè ŋùgbedòmè. Wo kukpɛ̃ eye wo fã yɔ Mawu dìdi ɖe.

³⁴Kè Tìmòteò be àhùakɔ̃a kpɔ ɛ̀ jèsi be Màkàbeò ye le kpe àkɔ ku yèwoa, wo si, wàlɛbɛ kè wo gbànàa. Ahùaa gble do wo veve ɖe gbè ŋua gbè, eye àmè sìgbè gbàdagbã hotu ènè nène ci àhuà.

³⁵Ekèa yomèa, Makàbeo trɔ kpà ŋùkɔ̀ Alema be èdùa, ɖo àlò èdùa ji, wù ŋusùwo kpata lè èdùa mè, hlà woabe ènunɔ̀amèsiwo, eye be tɔzò èdùa.

³⁶Kè be jo lè fikèaa, e yì ɖo àlɔ̀ Kasfo, Makɛd, Bosor ku Galad-nyigbã ji be èdù kpɔ̀tɛawo ji.

³⁷Kè ènu kèawo jɔ̀ vɔ̀a, Tìmòteò gbà bɔ̀ àhùakɔ̃ bu, eye wo yì sɔ̀gbè, lè Rafon be ŋùkɔ̀, lè ètɔ̀wɔ̀adãa be àgo ɖea ji.

³⁸Yudà dɔ̃, wo yì sãŋùkuvi kpɔ èkɛ̃tɔwo be àsàɖaa, eye àmèawo trɔ va gblɔ̃ na ɛ̀ be: “Vɔ̀dusɛ̃tɔwo be dùkɔ̃ kèwo kpata pòxla miawo bɔ̀ kpli ɖo Timòteo ŋuti, eye wo wɔ̀ àhùakɔ̃ gãa ɖe,

³⁹wo dà Arabiatɔwo, nè wò anɔ̀ nɔ̀ gbàdagbãowo tèpe, ne wo le kua, eye wo do àsàɖa ɖo ètɔ̀ wɔ̀ adãa be àgo ɖea ji; wo sɔ̀gbè, la lũ ɖo ji wò, ne wo awɔ̀ àhùa.” Yudà so, yì dogò wo;

⁴⁰e kplɔ̀ yebe àhùakɔ̃a yì gogo ètɔ̀a. Tìmòteò gblɔ̃ na yebe àhùakɔ̃a be ègawo be: “Ne e ya, fla ètɔ̀a, jè ŋùkɔ̀ na mia, mi mu la teŋu kpe e ji ò, ɖoa, e la dɔ̃ e ji, wu miawo ya.

⁴¹Vɔ̀a, ne e vɔ̃, eye be ci ètɔ̀a godoa, ne mi sò ètɔ̀a, mi la ɖù e ji.”

⁴²Ekè e va ɖo ètɔ̀a toa, Yudà ɖo dùkɔ̃a be ènuŋlɔ̃tɔwo ɖo ètɔ̀wɔ̀adãa to, eye be do èse na wo be: “Mi mu gbà na àmè ɖekpe ne do àsàɖa ò; àmè sia àmè ne ɖo àhùaa mè.”

⁴³E nɔ̀ ŋùkɔ̀ na àhùakɔ̃a, sò ètɔ̀a, tùtà èkɛ̃tɔawo gbɔ; àhùakɔ̃ bliboa kplɔ̀ ɛ̀ do. Izràɛlviwo ɖù èkɛ̃tɔawo ji bàɖà, eye vòdusɛ̃tɔawo sɔ woabe àhùawɔ̀nuwo dãŋùgbe, si jo, tùta Karnayin be àdoa gbɔ.

⁴⁴Yudà be àhùakɔ̃a xɔ̀ èdùa cucugbãa; e yomèa, wo tɔzò woabe àdo a ku àmè kèwo lè e mèawo. Karnayin be èdùa gbã keŋu-keŋu, eye so gà ŋua mèa, mu gbà nɔ̀ bɔ̀bɔ̀ɛ ɖe, be wo akpe àkɔ ku Yudà ò.

⁴⁵Amè kea bɔ̀ Izràɛlvi kèwo keŋu lè Galad-nyigbã jiawo, so ɖèvi ji, kaka yì àmè gãxowo ji, woa srɔ̃wo, woabe èviwo ku woabe ènu nɔ̀amèsiwo, woa kpata wo nyi àmèha gãa ɖe kè zɔ̃, ɖota Yudà-nyigbã jia.

⁴⁶Wo va ɖo Efrɔn, èdù gã, ɖo ŋusɛ̃ ɖe kè lè èmɔ̃ ji na woa. Wo mu la teŋu kpà to ɖùsi mè, àlo, èmìɔ̃ mè na ɛ̀ ò. E mè kpò wo ɖo la to, va yì.

⁴⁷Eduà mètɔwo gbe be wo mu la va yì ò. Wo tu àgboawo, sɔ èkpe gla wo.

⁴⁸Yudà dɔ̃ wo sɔ àdɔ̀mèfà be ènyà ɖo ŋùkumè na wo be: “Mi la zɔ̃, to mìabe èdùa mè kpò, la yi mia tɔ̀a mè; àmè ɖekpe mu la wɔ̀ èvùɛ̃ ɖekpe na mì ò.” Edùa mètɔwo gbe be yèwo mu la hù èmɔ̃a na wo ò.

⁴⁹Ekèa na be Yudà ɖè ègbè na àhùakɔ̃a be àmè sia àmè ne sɔ̀gbè lè àfi kè be lèa.

⁵⁰Gbàdagbãawo sɔ̀gbè lè woa tèpewo, eye Yudà kpe àhùa na èdùa, gbè ŋua gbè ku èzã blibo kè kplɔ̀ gbè ŋua gbè doa, eye èdùa gɛ̃ jè woa àsi mè.

⁵¹E sɔ èwui crɔ̃ ŋusùwo kpata, gbã èdùa gudu-gudu, lɔ àmɔ̃nyɔ̃nuwo, eye be zɔ̃ àmè ciàhùawo be kuku awo ji, to lè èdùa mè va yi.

⁵²Wo sò Yɔrdan-tɔ̀a, ɖota Ànyigbã Gbaja Gãa kè kpà ŋùkɔ̀ Bait-Seana.

⁵³Yudà le yì, le gbɔ̀, le bɔ̀ àmè kèwo ci ŋùgbèdòmèawo, le do ŋusɛ̃ àmèha a lè èmɔ̃a keŋu ji, kaka na gà kè mè wo va ɖo Yudà-nyigbã jia.

⁵⁴Wo lia Sion-toa ku jìjɔ̀ɛ eye wo wɔ̀ ènumèmè vɔsa, ɖoa, wo gbɔ̀ va lè ŋutifafa mè kè woa dòmètɔ ɖekpe mu crɔ̃ ò.

⁵⁵Wàlɛbɛ kè Yudà ku Yònatàn lè Galad-nyigbã ji, eye nɔ̀via Simɔ̀n lè Gàlìlea, kpà ŋùkɔ̀ Ptolemaoa,

⁵⁶Yozɛf, Zakaria be èvia ku Azarias, àhùakɔ̃a be èga va sè woabe kàlĩnu wɔ̀wɔ̀wo ku àhùa kèwo wo wɔ̀awo,

⁵⁷eye wo gblɔ̃ na woa nɔ̀nɔ̀ɛwo be: “Miawo cã mi a dà nyikɔ ɖo mia ɖokoewo ji, ne mi akpe àhùa ku dùkɔ̃ kèwo trɔ do miawo.”

⁵⁸Wo ɖè ègbè na àhùakɔ̃ kèwo wo le kplɔ̀a eye wo so, zɔ̃ ɖo Yamnia ji.

⁵⁹Gorjia to lè èdùa mè ku yebe gbàdagbãwo, ne àhũaa.

⁶⁰Wo gbã Yozɛf ku Azaria be àhùakɔ̃awo, eye wo nyà wo ɖo èdùnu kaka va ɖo Yudà be èdɛ̃ ji. Amè sìgbè Izràɛlvi hotu ɖèka nène ye ci àhùa gbè ŋua gbè.

⁶¹Ahùaa gble do gbàdagbãwo veve ɖe, gbè ŋua gbè, ɖoa, wo mu ɖo èto Yudà ku nɔ̀viawo ò. Wo susu be yèwo cã, yèwo la wɔ̀ kàlĩnuwo.

⁶²Enyàa ye nyi be wo mu nyi àmè kèwo Mawu na èdɔ be wo ne hlùɛ̃ Izràɛlviwo gãa be hati ò.

⁶³Wo nana gogo Yudà kàlɛ̃tɔa ku nɔ̀viawo ŋutɔ, lè Izràɛl-nyigbã ji ku lè dùkɔ̃ kèwo kpata mè wo sènà woabe nyikɔ lèa.

⁶⁴Amèwo bɔ̀nà do wo, eye wo kafuna wo.

⁶⁵Yudà ku nɔ̀viawo yì kpe àhùa ku Esaw be jìjìmèviwo, lè Apugo be nutowo mè. Wo ɖo àlɔ̀ Hebrɔn be èdùa ku èdù kèwo ye lè e gɔ̃mèawo. E gbã yebe èglìkpawo eye be tɔzò èglìkpaawo be èmɔ̃ji kpɔxɔ̀wo kpata.

⁶⁶E yomèa, e jè èmɔ̃ tutà Fìlistìtɔwo be ànyigbã ji, eye be to Marisa be èdùa mè.

⁶⁷Gbè ŋua gbèa, mawunɔ ɖewo ci àhuà. Wo jro la ɖè è fiɔ be yèwo cã, yèwo nyi kàlĩwo.

⁶⁸E yomèa, Yudà trɔ kpà ŋùkɔ̀ Azoto kè nyi Fìlistìwo be nutomèa. E mù woabe vɔsakpewo, tɔzò woabe vòduwo be legbawo, lɔ àmɔ̃nyɔ̃nuwo lè woabe èdùwo mè, eye be trɔ gbɔ̀ va Yudà-nyigbã ji.