Read gen 1Màkàbeòwo 7 Bible Online

1Màkàbeòwo 7 - gen bible

1Màkàbeòwo 7

¹Le èpè èkà ètɔ̃ takpo ci ɖèkagɔ̃a mèa, Demètrio, Seleko be èvia, si to lè Roma, eye be kplɔ̀ àmè ɖewo ɖo ŋuti, tùtà àpùta-nyigbã be èdù ɖe kè mè be teŋu sɔ ye ɖokoe ɖofìɔ lèa mè.

²Wàlɛbɛ ke be le ɖo tɔgbeawo be èfìɔxomèa, àhùakɔ̃a le Ãtiokus ku Lisia, ne be akplɔ̀ wo va na ɛ̀.

³Kè be sè èa, e gblɔ̃ be: “Nyè mu ji la kpɔ woabe ŋùmè ò.”

⁴Ekèa ŋutia, àhùakɔ̃a wù wo, eye Demètrio nɔ ànyi ɖo yebe àfiɔzìkpea ji.

⁵Ekèa yomèa, Àlkimò kè ji be yè anyi mawunɔ gãa kplɔ̀ ànùkua mà-wɔ̀tɔ mà-ɖo xɔ̀sè kèwo kpata lè Izràɛlawo va e gbɔ.

⁶Wo sɔ ènyà ɖo dùkɔ̃a ŋuti, lè èfìɔa be ŋùkɔ̀ be: “Yudà ku nɔ̀viawo crɔ̃ èxlɔ̃ wòwo keŋu eye wo kãkã mi hlɛ̃, to lè miabe èdùa mè.

⁷Ekèa ŋutia, dɔ̃ ŋusù ànùkuàmè ɖe, ne be ayì kpɔ èhlɔ̃nu kèwo kpata Yudà dã lè mia dòmè, ku lè èfìɔ be gbàgblàmè, àleke be wò àdɔ̃ èto na wo, na woawo ku woabe àlɔ̀dotɔwo kpata.

⁸Efìɔa cã Bakidɛs, kè nyi “èfìɔ be èxlɔ̃wo” dòmètɔ ɖèkaa. E nyi Eufrata be èwèɖoxɔ̀pe be èdù jiɖùtɔ, àmè ɖìnyi ɖe lè èfìɔɖùpea, eye be wɔ̀nà ànùkua na èfìɔa.

⁹Demètrio dɔ̃ ɛ̀ ku Mawu mà-vɔ̃tɔ Àlkimò. Amè kèa, e sɔ mawunɔ gã be èdɔ do àsi na ɛ̀, eye be dɔ̃ ɛ̀ be ne biɔ èhlɔ̃ Izràɛlviwo.

¹⁰Wo jè èmɔ̃ ku àhùakɔ̃ gãa ɖe, eye wo va yì ɖo Yudà be ànyigbã ji. Wo dɔ̃ àmè ɖoɖa Yudà ku nɔ̀viawo, be wo ne yì do àyèmè ŋutifafa be àŋɛ̀ na wo.

¹¹Gãkea, kè Yudàtɔwo kpɔ be wo va ku àhùakɔ̃ sɛ̃ŋu ɖea, wo mu xɔ̀ ènyà kui ɖèka sè, lè woabe nupo pòpo mè ò.

¹²Vɔ̀a, wo cã ènuŋlɔ̃tɔ ɖewo sɔ wɔ̀ àmèha ɖe kè bɔ le Àlkimò ku Bakidɛs gbɔa, ne wo aji ènyàmè soso kè la dɔ̃ àmè sia àmè jia.

¹³Lè Izràɛlviwo dòmèa, àmè kèwo jè ŋùkɔ̀ biɔ ŋutifafaa, wo ye nyi Hasidiwo.

¹⁴Wo gblɔ̃ be: “Mawunɔ kè so Aron be jìjìmèa ye va ku àhùakɔ̃awo. Mu la wɔ̀ ènu bàɖà ku mi ò.”

¹⁵E pò xòmèfà be nupo na wo, eye be kã àtaŋu na wo be: “Mi mu la wɔ̀ èvuɛ̃ ɖekpe ku mì, àlo, ku mìabe èxlɔ̃wo ò.”

¹⁶Wo xɔ̀ e ji sè, vɔ̀ gãkea e na wo le àmè èkàtakpo lè woa dòmè, eye e na wo crɔ̃ wo, lè ŋùkèkè ɖèka mè, zɔ̃ ɖo ènu kè ŋɔ̀ŋlɔ̃ a gblɔ̃a ji be:

¹⁷“Wo sɔ àpo àmè kɔ̀kɔ̀ɛwo be ŋutilã kuku ku woabe èhũa, sɔ kɔ̀ ŋùgbe, trɔ do Yèruzàlɛ̀m, eye àmè ɖekpe mu lè la ɖì wo ò.”

¹⁸Ekèa na be vɔ̃vɔ̃ ku àdìka sò àmè jè dùkɔ̃ bliboa ji, eye wo le gblɔ̃ be: “Nyàwo ku ànùkua mu lè woa mè ò, ɖoa wo gble ènu kè wo bla, àlo, èzò kèwo ɖùa ku àtaŋu kè wo kãa.”

¹⁹Bakidɛs jo lè Yèruzàlɛ̀m, eye be do àsàɖa ɖo Bait-Zɛt. E dɔ̃ wo yì le ŋusu sùgbɔ kèwo va ɖo yebe èha mèawo, kpe ɖo dùkɔ̃a mètɔ ɖewo ŋuti; e sò èhlò na wo, eye be sɔ wo dàŋùgbe ɖo vudo gãa mè.

²⁰E sɔ èdù-nyigbã be àgo ŋua do àsi na Àlkimò, eye e gble àhùakɔ̃ ɖèka ɖɛ na ɛ̀, ne be anɔ do è àlɔ̀; e yomè a, Bakidɛs trɔ va èfìɔa gbɔ.

²¹So gà ŋua mèa, Àlkimò wɔ̀ ènu be la teŋua, ne woa sɔ ɛ̀ ɖo mawunɔ gã,

²²eye àmè kèwo keŋu hɛ̃nà tìtɔ̀-titɔ va dùkɔ̃a dòmèawo va bɔ ɖo e ŋuti. Wo va zeu àmè gãwo ɖo Yudà nyigbãa ji, eye wo hɛ̃ àhovì gãa ɖe va na Izràɛl.

²³Kè Yudà kpɔ be Àlkimò ku yebe èhaviwo be ènudrãwɔ̀wɔ̀ ɖo Izràɛlviwo ŋuti va wu vòdusɛ̃tɔwo tɔ̀a,

²⁴Yudà ɖìsà to Yudà-nyigbãa kpata ji. E biɔ èhlɔ̃ èvùɛ̃wɔ̀tɔawo, eye mu gbà ɖè èmɔ̃ na wo be wo agbà to èdùa mè ò.

²⁵Kè Àlkimò kpɔ be Yudà ku yebe àmèawo va le sɛ̃ŋu wu yè, eye kè be kpɔ̀ ɛ̀ jèsi be yè mu la teŋu kpe àkɔ ku ì ò a, e trɔ yì èfìɔa gbɔ, eye be do hùɛ̀ gãwo do è.

²⁶Efìɔ dɔ̃ Nikanɔr, yebe àhùaga ɖìnyiwo dòmètɔ ɖèka, kè crì Izràɛl, eye be jina èvùɛ̃ na wo veku-vekua, e ɖè ègbe na ɛ̀ be ne crɔ̃ dùkɔ̃a.

²⁷Nikanɔr va ɖo Yèruzàlɛ̀m ku àhùakɔ̃ gãa ɖe; e do àjè be ŋutifafa be àŋɛ̀ ɖoɖa Yudà ku nɔ̀viawo be:

²⁸“Ahùa ɖekpe mu ɖo la gbà nɔ̀ ènyè ku mìa dòmè ò. Amè kuive ɖewo la kplɔ̀ mù va kpɔ mì, ne mi kã nɔ̀vi be àseŋu lè ŋutifafa mè.”

²⁹E va ɖo Yudà gbɔ; wo do ègbè na woa nɔ̀nɔ̀ɛwo èxlɔ̃tɔ̀, co gãkea, èkɛ̃tɔwo sɔ̀gbè ɖɛ, la le Yudà jo.

³⁰Kè Yudà kpɔ be Nikanɔr va ku susu bàɖàwoa, e gbe be yè mu la dogò è ò.

³¹Nikanɔr va sè e gɔ̃mè be wo nyã yebe àyèa, e yì ɖè àhùa kpe na Yudà lè Kafarsalama gbɔ.

³²Nikanɔr be àmè èkà woeve takpo ci àhùa, eye àmè kpɔ̀tɛwo si jo yì David be Edùa mè.

³³Enu kèawo yomèa Nikanɔr yì Sion-Toa-ji, eye mawunɔ ɖewo to so Kɔ̀kɔ̀ɛpea, ku dùkɔ̃a be àmè sĩsĩwo, ne wo a do ŋutifafa be ègbe na ɛ̀, ne wo asɔ ènumèmè vɔsa kè wo sɔ xɔ̀nà èfìɔa fiɔ ɛ̀.

³⁴Vɔ̀a e kò wo, do wo ŋùkpɛ̃, ɖè àlɔmè lè woa ŋuti, dovlo wo ku àmè mà-bu be ènyàwo.

³⁵E kã àtaŋu ku àdɔ̀mèze be: “Ne wo mu sɔ Yudà ku yebe àhùakɔ̃a do àsi na mù, eye, ne nyè mù gbìgbɔ̀ ɖo ŋutifafa ànyi vɔ̀, gbɔ̀xue trɔ va ò a, eŋua, mù la tɔzò àxue kèa.” Eye be to ku àdã.

³⁶Mawunɔawo trɔ ɖo èkpaa mè; wo tɔtè jè ŋùkɔ̀ vɔsakpea ku Mawuxɔ̀a, wo wo àvi, gblɔ̃ be:

³⁷“Ewò, Tɔhonɔ̀ ye cã Axue kèa be, wo ne fã yɔ àpo nyikɔ ɖo e ji, aleke be ne nyi kùefã ku blìbɔ̀blibɔ be àxue.

³⁸Apo èhlɔ̃ biɔbiɔ ne jè ŋusù kèa ku yebe àhùakɔ̃a ji, ne wo a ci èwui nu! Ɖoŋù woabe bùsu-nyàwo, eye mù gbà ku ŋuzĩzĩ na wo, ne woa ci àgbè ò!”

³⁹Nikanɔr to le Yèruzàlɛ̀m, eye e do àsàɖa ɖo Bait-Horɔn, àfi kè Sirìa be àhùakɔ̃ ɖè va bɔ̀ ɖo e ŋuti lè.

⁴⁰Yudà ku gbàdagbã hotu ɖèka èkàwivɔàtɔ̃ do àsàɖa ɖo Àdasà. Yudà fãkùe gblɔ̃ be:

⁴¹“Kè èfìɔa be àŋɛ̀dotɔwo gblɔ̃ busunyàa, àpo àtikplɔtɔ to va crɔ̃ àmè hotu èkà èvè ciwoève èkàwìvɔàtɔ̃ lè woa dòmè.

⁴²Nènea kea, gbã àhùakɔ̃ kèa egbè, lè ŋùkɔ̀ na mi, eye àmè kpɔ̀tɛawo ne nyã be e gblɔ̃ ènyà bàɖà so àpo Kɔ̀kɔ̀ɛpea ŋuti; ɖo kòjo na ɛ̀, sɔ zɔ̃ ɖo yebe èvùɛ̃jɔjɔ ŋuti.”

⁴³Ahùakɔ̃awo tɔ àhùa wɔ̀wɔ ji lè wètri Àdar be ŋùkèkè woètɔ̃gɔ̃a gbè. Wo gbã Nikanɔr be àhùakɔ̃a, eye ye ŋutɔ nyi àmè cucugbã kè ci àhùaa.

⁴⁴Ke Nikanɔr be àhùakɔ̃a gbe kpɔ be Nikanɔr gbe ci àhuà kpɔ̀a, wo sɔ woabe àhùawɔ̀nuwo dà ŋùgbe, eye wo si.

⁴⁵Yudàtɔwo nyà wo ɖo èdùnu, lè ŋùkèkè ɖèka be èmɔ̃ zɔ̃zɔ̃ ji, so Àdasà, kaka sɔ yì Gezɛr be ènutowo mè, wàlɛbɛ kè wo le ku àmè yomètiti be èkpɛ̃woa.

⁴⁶So Yudàtɔwo be kɔpe kèwo kpata trɔ do, lè funua, àmèwo le to, le xa wo bɔ̀. Woa kpata, wo ci èwui nu, eye àmè kui ɖèka tètè mu si lè e nu ò.

⁴⁷Wo cã ŋutilã kuku awo, eye wo hlà àhùalenuwo. Wo sò èta na Nikanɔr eye wo sò yebe ɖùsi-lɔ̀ ke be vlũ, àmè mà-bùtɔ̀a. Wo sɔ wo jo, eye wo ɖè wo ɖo gàglàgbè, ne Yèruzàlɛ̀mtɔwo ne kpɔ.

⁴⁸Dùkɔ̃a kpɔ jìjɔ̀ɛ, eye be ɖù àzã, gbè ŋua gbè, sìgbè yɛyì be àzã gã ɖe gbè nène.

⁴⁹Wo ɖo èkpe àzã ŋua ji be, lè Àdar be ŋùkèkè woètɔ̃gɔ̃a gbèa, wo la nɔ ɖù ì, èpè sia èpè.

⁵⁰Eye Yudà-nyigbãa vò, sɔ na hùenu vi ɖe.