Read gen 2Màkàbeòwo 11 Bible Online

2Màkàbeòwo 11 - gen bible

2Màkàbeòwo 11

¹Lizìas kè nyi èfìɔ a be èdùdɔjikpɔtɔ ku xòmètɔ a, mu kpɔ jijɔ̀ɛ klua ɖo ènu kè jɔ̀ a ŋuti ò. Kè hùenu yì vi ɖe a,

²e bɔ̀ àhùakɔ̃ kè mètɔwo la sù gbàdagbã àfɔ̀zɔ̃tɔ hotu èkà (80000), ku yebe èsɔdotɔwo be àhùakɔ̃ blibo a, eye be so, jè èmɔ̃, la yì kpe àkɔ ku Yudàtɔwo. E ɖo è be yè la sɔ Yèruzàlɛ̀m be èdù a trɔ zũ nɔ̀pe na Grɛkwo.

³E ɖo è be mawuxɔ̀ a la nɔ̀ tu ètaci, sìgbè vòdusũmɔ̃tɔwo be vɔ̀duxɔ̀wo nène, eye àmè kè la nyi mawunɔ gã, lè èpè a mè a, la sɔ ègà, nɔ plè èdɔ a, èpè sia èpè ye.

⁴Mu kãma na Mawu be ŋusɛ̃ a ŋutɔ cã ò, vɔ̀ a, e kã ɖo ye ɖokoe ji, ɖo a, gbàdagbã àfɔ̀zɔ̃tɔwo be hotuwo be hotu hotuwo, lè e si, èsɔdotɔwo be èkàwivɔàtɔ̃wo (1000) ku àtigini èkà-vèwo (80) cã lè e si.

⁵Kè e va ɖo Yudà-nyigbã ji a, e yì Bait-Sur kè nyi àgbògbò ɖe, kè dìdì so Yèruzàlɛ̀m gbɔ, sìgbè èkpeti èwìvɔ ènyi (28) nène, lè àpùgo na Yèruzlɛ̀m. E ɖè àhùa kpe na èdù a.

⁶Kè Yudà Màkàbeò ku ye tɔ̀wo sè be Lizìas xa èdù a be àgbògbòwo a, wo bɔ̀ dùkɔ̃ a, eye woa kpta, wo ɖo ègbè èdu, wo fã yɔ Tɔhonɔ̀ ku àlenana, kudo àdàsì, eye wo blìbɔ̀ na ɛ̀ be ne dɔ̃ àtikplɔtɔ nyuɛ̃ ɖe ɖoɖa, ne be a hlùɛ̃ Izraɛ̀lviwo gã.

⁷E yomè a, Màkàbeò ŋutɔ sɔ àhùawɔ̀nuwo cucugbã a, eye be dozò lãmè na àmè kpɔ̀tɔɛawo, ne wo a kpà ŋùkɔ̀ àfɔ̀ku a, sìgbè leke yè ŋutɔ, yè le wɔ̀ ɛ̀ a nène, ne yèwo a sɔ hlùɛ̃ yèwo nɔ̀viwo gã. Wo so, jè èmɔ̃, ku èzò ɖèka kè le bì lè woa mè a.

⁸Wàlɛbɛ kè wo mu kpɔ dìdì jo lè Yèruzàlɛ̀m gbɔ ò a, èsɔdotɔ ɖe lè àwù ɣe mè, kɔ sìka be àhùawɔ̀nuwo ɖo èji, va ze do wo, eye be va lè ŋùkɔ̀ na woabe àhùakɔ̃ a.

⁹Eye woa kpata, wo do àkpe na Mawu ɖodu, ɖo yebe àdɔ̀mè nyuɛ̃ a ta. Mawu do wo ŋusɛ̃, àleke be, wo sɔ̀gbè, la sɔ àhùawɔ̀nu trɔ̃, mu nyi àgbètɔ ɖèɖe kpò ò, vɔ̀ a, wo a trɔ̃ èlã kèwo be àdãwɔ̀wɔ nu, àmè mu teŋu nɔ̀na ò, eye, wo sɔ̀gbè, la trɔ̃ gàkpo be àgbògbòwo ŋutɔ cã.

¹⁰Wo zɔ̃ yì ŋukɔ̀, eye wo ɖo, na àhùa wɔ̀wɔ, lè àmè kè Tɔhonɔ̀ dɔ̃ ɖoɖa, be ne va wɔ̀ àhùa, le woabe àxàdamè, lè yebe àmè ji kpɔkpɔ mè a, be ŋùmè.

¹¹Wo tìkpo sìgbè jàŋùtawo nène, jè èkɛ̃tɔwo ji, eye wo wù gbàdagbã àfɔ̀zɔ̃tɔ hotu àtɔ̃ èkàwìvɔ àtɔ̃ (11000) ku èsɔdotɔ èkà-èkà (1600), ekè a na be èkɛ̃tɔwo be àhùakɔ̃ mènɔ̀tɔ kpɔ̀tɛawo si jo.

¹²Àmè kèwo siawo dòmètɔ gbogbotɔwo xɔ̀ àbì, eye wo sɔ woabe àhùawɔ̀nuwo dàŋùgbè. Lisìas ŋutɔ cã a, kè be sɔ ŋùkpɛ̃ si jo a, ye na be ci àgbè.

¹³Kè ènunyã mu hùe do Lisìas ò a, e bù àhùa kè be gu a ŋuti kpɔ. E sè e gɔ̃mè be wo mu la teŋu kpe Yudàtɔwo ji bɔ̀bɔ̀ɛ ɖe ò, ɖo a, Mawu Ŋusɛ̃kpatatɔ a le wɔ̀ àhùa na wo. Ekè a ŋuti a, e dɔ̃ àmè ɖoɖa wo,

¹⁴le biɔ be yèwo a ɖù ŋutifafa be èzò kè be ɖoɖowo la sɔ̀, na yèwo kpata a. E gbà fìã àjɔ̀gbè na wo be yè la na èfìɔ a ne kplɔ̀ wo ku èxlɔ̃wɔ̀wɔ be àlɔ̀.

¹⁵Kè e nyi be àmè sia àmè be ènyuɛ̃ ye Màkàbeò jina a, e dà àsi ɖo ɖoɖo kèwo kpata Lisìas hɛ̃ va a ji. Èfìɔ a cã lɔ̃ ɖo ènu kèwo kpata Yudàtɔwo le biɔ, eye Màkàbeò ŋlɔ̃ do àsi na Lisias a ji.

¹⁶Xoma kè Lisias ŋlɔ̃ ɖoɖa Yudàtɔwo a ye nyi ekè a: “Lisias dogbè na Yudàtɔwo be dùkɔ̃ a

¹⁷Mìabe àmèdɔ̃dɔ̃ Yohanɛ̀s ku Àbsàlɔm, sɔ xoma kè a va na mù, eye wo biɔ so àsi nyè be ma sò ènyà mè, so ɖoɖo kèwo wo wɔ̀ ɖo e mè a ŋuti.

¹⁸Mù sɔ ènu ɖoɖo kèwo kpata wo wɔ̀ a, do àsi na èfìɔ a, eye be lɔ̃ ɖo ènu kèwo ji be la teŋu dà àsi ɖo a ji.

¹⁹Ye ŋuti a, ne mì kpɔ̀tɔ̀ le ɖo susu nyuɛ̃wo ɖoɖa jiɖùɖu a gbɔ a, nyè cã, mù la hlùɛ̃do, la na be mìabe dùkɔ̃ a, ne nɔ̀ àgbè nyuɛ̃ ɖe.

²⁰Lè ènyà ɖèka-èvè kpɔ̀tɛawo gomè a, mù sɔ wo do àsi na mìa tèpe nɔ̀tɔwo ku tɔ̀ nyèwo, be wo a le wo kpɔ ku mì.

²¹“Mì a nɔ̀ sɛ̃sɛ̃ ɖe! “Èpè èkà ètɔ̃ takpo ci ènyi (148), lè Dìoskorè be wètri a be ŋùkèkè èwìvɔ-ènègɔ̃ a (24) gbè.

²²Èfìɔ a ŋlɔ̃ xoma ɖoɖa Lisìas, le gblɔ̃ be: “Efiɔ Ãtiokus le dogbè na nɔ̀via Lisìas!

²³So gà kè mè ètɔ nyè jo yì vòduwo gbɔ, lè èkuwo de a, mù jro be àpe èfìɔɖùpe a mètɔwo kpata, wo a nɔ wɔ̀ woabe èdɔwo, kè àmè ɖe mu la do nupo na wo ò a.

²⁴Vɔ̀ a, mù sè be Yudàtɔwo mu le lɔ̃ be yèwo a sɔ Grɛkwo be wɔ̀nà kèwo ètɔ nyè jro be yè a ɖo ɖɛ na àmè sia àmè a, sɔ wɔ̀ yèwo tɔ̀ ò. Yudàtɔwo ji be yèwo a nɔ wɔ̀ ɖo yèwo ŋutɔ, yèwo be èkɔ̀dowo nu, eye wo le biɔ be wo ne ɖè àsi lè yèwo ŋuti, ne yèwo a zɔ̃ ɖo yèwo be èsewo ji.

²⁵Ekè nyè mu ji be tùkaɖa ne nɔ̀ miabe dùkɔ̃ kè a cã mè ò à, mù le ɖè ègbè be wo ne trɔ, sɔ woabe mawuxɔ̀ a na wo, ne wo a ɖè àsi lè Yudàtɔwo ŋuti, àleke be wo a wɔ̀ ɖoɖo na woabe àgbènɔ̀nɔ, sɔ zɔ̃ ɖo leke woa tɔgbewo be èkɔ̀nuwo biɔ a nu.

²⁶Ekè a ŋuti a, gblɔ̃ ɖoɖo kè mù wɔ̀ a na wo, ne wò a na, wo a nyã be ŋutifafa be susuwo ye lè àsi nyè. Ne àgbɔ̃ ne jè èpò na wo, àleke be woabe susu mè ne fa, ne wo a teŋu nɔ wɔ̀ woabe èdɔwo fàa.”

²⁷Xoma kè èfìɔ a ŋlɔ̃ ɖoɖa Yudàtɔwo a ye nyi ekè a: “Èfìɔ Ãtiokus le dogbè ɖoɖa Yudàtɔwo be àmèsĩsĩwo be èsewɔ̀pe ku Yudàtɔ kpɔ̀tɛwo!

²⁸Mù susu be mì fɔ̃ nyuɛ̃ ɖe. Nyè cã mù fɔ̃, lè lãmèsɛ̃ mè.

²⁹Mènèlaòs na, mù nyã be mì ji be yèwo a trɔ yì mìa de, ne mì a yì miabe èdɔwo ji.

³⁰Àmè kèwo kpata la trɔ yì woa de, jè ŋùkɔ̀ na wètri Xãtikè be ŋùkèkè ègbãgɔ̃a (30) gbè a, wo la sɔ àgɔ̀jèjèwo kpata kè wo.

³¹Yudàtɔwo gbà teŋu nɔ zɔ̃ ɖo woabe ènuɖuɖu ku woabe èse buwo ji, sìgbè leke wo wɔ̀nà ɛ̀ sã a ène. Àmè ɖe mu la gbà ɖù blu lè mìa dòmètɔ ɖekpe ji, ɖo àgɔ̀ ɖe kè wo la jè lè mà-nyã mè a ŋuti ke ò.

³²Mù dɔ̃ Mènèlaòs cã ɖoɖa, be ne va fa èjì na mì.

³³“Mì a nɔ̀ sɛ̃sɛ̃ ɖe! Mù ŋlɔ̀ xoma kè a, lè èpè èkà ètɔ̃ takpo ci ènyi (148) be wètri Xãtikè be ŋùkèkè woeàtɔ̃gɔ̃ a (15) gbè”.

³⁴Romatɔwo cã ŋlɔ̃ xoma kè a ɖoɖa Yudàtɔwo be: “Kĩtus Memius, Titus Manilius ku Manius Sergius, Romàtɔwo be àmèdɔ̃dɔ̃wo le dogbè na Yudàtɔwo be dùkɔ̃ a!

³⁵Miawo cã, mi le dà àsi ɖo ènu kèwo kpata ji Lisìas a, Èfìɔ a be Xòmètɔ a, lɔ̃ ɖo na mì a.

³⁶Susu kèwo be ɖo, be yè a sɔ ɖo èfìɔ be ŋùkumè a, mì jè àgbàgba, ne mì a jrò woa mè kpɔ nyuɛ̃ ɖe, ne mì a sɔ mìabe ɖoŋuti a ɖoɖa mi kaba, àleke be mi a teŋu pò nupo so woa ŋuti ku èfìɔ a, lè èmɔ̃ kè la dɔ̃ mìa ji a nu, ɖo a, mi la yì Ãtiokìa, kpoe ɖe.

³⁷Ekè a ŋuti ye be le veve ɖe be mì a ɖo mìa tèpenɔ̀tɔwo ɖoɖa mi kaba, àleke be miawo cã, mi a nyã susu kè lè mì a si a.

³⁸Mì a nɔ̀ sɛ̃sɛ̃ ɖe! Mù ŋlɔ̀ xoma kè a, lè èpè èkà-tɔ̃ takpo ci ènyi (148) be wètri Xãtikè be ŋùkèkè woeàtɔ̃gɔ̃ a (15) gbè”.