Read gen 2Màkàbeòwo 2 Bible Online

2Màkàbeòwo 2 - gen bible

2Màkàbeòwo 2

¹Wo hlɛ̃nà le ŋɔ̃ŋlɔ̃ xoxowo mè be gblɔ̃ɖɛtɔ Yèrèmià ɖe ègbè na àmè kèwo wo le, yì gàtɔwonugbe a be wo ne hɛ̃ èzò ɖo àsi, ne wo a sɔ wla ɖo àfi kè ji wo kã ɖo be e la nɔ bì lè a, eye wo la gbà va kpɔ ɛ̀ lè a, sìgbè leke mi gblɔ̃ ɛ̀ sã a nène.

²Kè gblɔ̃ɖɛtɔ a sɔ Èse a do àsi na àmè kèwo wo le a, e gblɔ̃ na wo be wo mu gbà ŋlɔ̀ Tɔhonɔ̀ be ègbèɖèɖèwo be ò; wo mu gbà ɖè àsi lè woa ɖokoewo ŋuti, ne wo kpɔ sìka ku klòsalò be legbawo ku woabe àcɔɖoɖo a, ne flù wo ò.

³E gbà pò nène a be ètoɖo buwo na wo, eye be glɔ̃ na wo be wo ne tɛ ɖo Èse a ŋuti veve ɖe.

⁴Lè ènuŋlɔ̃ɖɛ kè a mè a, wo le gblɔ̃ be, kè Mawu be ègbèɖèɖe sìa gblɔ̃ɖɛtɔ a, e na wo sɔ Gɔ̀xɔ̀ a ku Nùbabla-Ɖaka a kplɔ̀ ɛ̀ do. E yì èto kè ji Mosè lia, eye be glò ècrɔ̃nu kè Mawu sɔ le na yebe dùkɔ̃a kpɔ a ji.

⁵Kè yèremìa ɖo funu a, e kpɔ àkpã-do gã ɖe. E sɔ Gòxɔ̀ a, Nùbabla-Ɖaka a, ku ègbe hɔ̃hɔ̃ɛ be vɔsakpea ɖo e mè. e yomè a, e tu àkpã-do a nu.

⁶E yomè a, àmè kèwo kplɔ̀ ɛ̀ doawo dòmètɔ ɖewo jro be yèwo a gbìgbɔ̀ trɔ yì funu a, yèwo a do jèsìdo èmɔ̃ a, vɔ̀a, wo mu gbà teŋu jèsi èmɔ̃ a ò.

⁷Ke Yèrèmià sè ènyà kèa, e kã ŋùkumè na wo veve ɖe be: “Tèpe kè a la ci mà-jèsi, kaka va na gà kè mè Mawu la ku ŋuzĩzĩ na yebe dùkɔ̃ a, eye be la gbìgbɔ̀ bɔ̀ wo ɖodu.

⁸Gà ŋua mè ye Tɔhonɔ̀ la gbìgbɔ̀ ɖè ènu kèawo to; Tɔhonɔ̀ be àmègbɔ nɔ̀nɔ ku yebe gogo a la gbà ze, lè Lilikpo a mè, sìgbè leke be ɖè ye ɖokoe fiɔ, le Mosè be hùenu, ku wàlɛbɛ kè Salomon fãkue be Mawu ne kɔ̀ Mawuxɔ̀ a ŋuti ku gogo a”.

⁹Wo gbà gblɔ̃nà leke èfìɔ Salomɔ̀n be nunyã na be e wɔ̀ vɔsa gã ɖe, kè wo tù Mawuxɔ̀ a vɔ̀, eye wo wu yebe ŋutikɔ̀kɔ nu a.

¹⁰Sìgbe leke Mosè fãkùe, eye èzò ɖì so jiŋùkusi, va fiɔ̃ vɔsanuawo nène a, nène a ke ye Salomon cã fãkùe, eye èzò ɖì va fiɔ̃ ènumème vɔsanuawo a cã a yeŋu.

¹¹Mosè gblɔ̃ be: “Kè wo mu ɖù èvuɛ̃ be vɔ̀sa be èlã òa, ŋuti ye èzò ɖì va fiɔ̃ ɛ̀ ɖo.

¹²Nène a ke a, Salomɔ̀n cã ɖù àzã a, ŋùkèkè ènyi.

¹³Wo ŋlɔ̀ ènyà kèawo keŋu ɖo xoma kèawo ku Nèhemìa be ŋùkuɖojinyàwo mè. Wo gbà ŋlɔ̀ lekè Nèhemìa ɖo xomahlɛ̃pe ɖo a, ɖo woa mè. E pòtɛ xoma kèwo mè èfìɔwo ku gblɔ̃ɖɛtɔwo be èxotùnyàwo lè a, ku ènu kèwo David ŋlɔ̃awo kudo xoma kèwo èfìɔwo ŋlɔ̃ so ènunanawo ŋuti a ɖɛ, ɖo e mè.

¹⁴Nène a ke a, Yudà cã pòtɛ xoma kèwo kpata àhùa kèwo wo wɔ̀ ku miawo kãkã a ɖɛ, eye wo lè mia si.

¹⁵Ne mì hiã woa dòmètɔ ɖewo a, mì dɔ̃ àmèwo ɖoɖa mi, ne wo a va xɔ̀ wo, va na mì.”

¹⁶Mi ji la dù Mawuxɔ̀ a be ŋutikɔ̀kɔ be àzã a. Mi le ŋlɔ̃ xoma kèa ɖoɖa mì, ne mìawo cã, mì a ɖù ì.

¹⁷Mawu hlùɛ̃ yebe dùkɔ̃ blibo a gã. E sɔ ècrɔ̃nu a, èfìɔɖùɖu a, mawunɔ be èdɔ a ku leke wo la kɔ̀ àmè ŋuti ɖo, ne wo a wɔ̀ ɛ̀ na Mawu a do àsi na dùkɔ̃ a kpata kè nyi yetɔ̀ a,

¹⁸sɔ zɔ̃ ɖo àjɔ̀gbè kè be fiã lè yebe Èsea mè a ji. Ekè a ŋuti, mi le kpɔ èmɔ̃ be Mawu la ku ŋuzĩzĩ na mi, sɔ̀sɔ̀ɛ ɖe, eye be la gbìgbɔ̀ bɔ̀ miabe dùkɔ̃ kè kã hlɛ̃ ɖo xixe blibo a mè a, ɖo yebe ànyigbã kɔ̀kɔ̀ɛ a ji. Nyàwo ye be nyi be e hlùɛ̃ mi gã xoxo so jɔ̀gbèvùɛ̃ gãwo mè, eye be kɔ̀ yebe Mawuxɔ̀ a ŋuti.”

¹⁹Ènu veve sùgbɔ jɔ̀ lè Yudà Màkàbeò ku nɔ̀viawo be hùenu. Wo lè mawuxɔ̀ gã a ɖì, eye wo gbìgbɔ̀ kɔ̀ vɔsakpea ŋuti.

²⁰Wo wɔ̀ àhùa ku èfìɔ Ãtiokus Epifan ku èvia Epatɔr.

²¹Jiŋùkusi be ŋusɛ̃wo ɖè woa ɖokoe fiɔ, eye wo do àlɔ̀ àmè kèwo hlùɛ̃ Yudàviwo be xɔ̀se ta ku ŋusɛ̃ ku jìdoa, ɖoa, to e gbɔ be wo mu sùgbɔ ò cã a, wo gbìgbɔ̀ wɔ̀ àhùa, sɔ gbìgbɔ̀ xɔ̀ ànyigbã a kpata, eye wo nyà kɛ̃tɔwo be àhùakɔ̃wo jo.

²²Wo gbìgbɔ̀ ɖo àlɔ̀ Mawuxɔ̀ kè xɔ̀ nyikɔ lè xixe bliboa mè a ji, wo gbìgbɔ̀ jo Yèruzàlɛ̀m be èdù a, eye wo gbìgbɔ̀ do Mawu be Èse kè èkɛ̃tɔ a jro la gũ èta na a tè. Tɔhonɔ̀ be xɔ̀mèfà gã a, yebe àdɔ̀mè nyuɛ̃ ku yebe lɔ̃lɔ̃ ye na be wo teŋu wɔ̀ ènu kèawo keŋu.

²³Èxotùnyà nyãtɔ Yazɔ̀n so Kìrenè ŋlɔ̃ ènu kèawo keŋu ɖo xoma àtɔ̃ mè, gãke a, mi la bɔ̀ ènyà kèawo ɖo xoma ɖèka mè.

²⁴Mi va kpɔ be hɛ̃hlɛ̃mè jèsìwo sùgbɔ, eye mu lè bɔ̀bɔ̀ɛ ɖe be àmèwo ne kpla èxotùnyà kèawo ò.

²⁵Ekèa na be mi le ŋùkuvi ɖo ènu kè hiã na àmè kèwo jro la hlɛ̃ èxotùnà kèawo a ŋuti, mi jè àgbàgba be mi a wɔ̀ ɛ̀ bɔ̀bɔ̀ɛ ɖe, na àmè kèwo jro la le wo ɖo èta mè a, eye mi jè àgbàgba be mi a ŋlɔ̃ ènu kèwo la ɖè àlè a na àmè kèwo keŋu la xlɛ̃ ènyà kèawo a.

²⁶Mi, àmè kèwo sɔ ènyà kèawo be babla sɔ ɖo èdɔ a, mu nɔ̀ bɔ̀bɔ̀ɛ ɖe na mi klua ò, vɔ̀ à, àde xaxa ku ŋùzɔ̃ nɔnɔ be èdɔ ye be nyi.

²⁷Eye èdɔ kè a lè sìgbè èdɔ sɛ̃ŋu kè nyi àzãɖùɖu jàjràɖo kè mè àmè kè le jrà àzã a ɖo a jina be ènuwo kèŋu ne jè àmè buwo nu a nène. Àyà kè a ye mi ɖù, ne è mè so nuwo ne jè àmè sùgbɔ nu.

²⁸Mi le ɖè àsi lè èxotùnyà ŋuti-dɔwɔ̀tɔ a ŋuti, ne be a tɛ ègbè ɖo ènyàjɔ̀jɔ̀ ɖe sia ɖe be gbɔ̃gblɔ̃ ji. Miawo ya, ɖe kpò mi la jè àgbàgba, be mi a zɔ̃ ɖo ènyà bɔ̀ɖodu be èsewo ji.

²⁹Ne wo le tù èxɔ̀ yeye a, èxɔ̀tùtu a be èdɔ̀ a kpata kã àmè kè ɖè susu, sɔ ta èxɔ̀ a. Àmè kè la ɖo àcɔ na èxɔ̀ a, eye be la sì àkalo na ɛ̀ a, be èdɔ ye nyi be, ne ji ènu kè jè la ɖo àcɔ na èxɔ̀ a. Leke a ye mi kpɔ èdɔ kè a kè mi wɔ̀ a.

³⁰Àmè kè le wɔ̀ èdɔ so èxotùnyà ŋuti a, ɖo la kpɔ ènyà a mè nyuɛ̃ ɖe, la biɔ ènyà gɔ̃mè se, so èmɔ̃ ɖe sia ɖe nu, eye be ɖo la kù ènyà ɖe sia ɖe mè kpɔ.

³¹Gãke a, àmè kè jro la pò nupo kpò, so ènyà kè jɔ̀ a ŋuti a kpɔ èmɔ̃, la kã èta na ènyà a, la bɔ̀ ɛ̀ ɖodu kpòe ɖe, kè mu hiã, la gblɔ̃ ènuwo kpata ò.

³²Fifìa, mia tɔ èxoa tùtu, kè mi mu la na ènu kè mi gblɔ̃ fifìa, ne dìdì ò. Mu jè be mia wɔ̀ kpɔ̀kplɔ̀sɔyìemè kè la dìdì, vɔ̀ ne èxotùtua ŋutɔ ne kpòkpòe ò.