Read gen 2Màkàbeòwo 5 Bible Online

2Màkàbeòwo 5 - gen bible

2Màkàbeòwo 5

¹Lè hùe ŋua nu lɔ̀ge a, Ãtiokus tɔ jàjràɖo wɔ̀wɔ na àhùa kpekpe èvègɔ̃ a ku Ejiptè.

²Vɔ̀a, e va va e mè be, èsɔdotɔ ɖewo va le ze, lè Yèruzàlɛ̀m be èdù a kpata mè, kaka sìgbè ŋùkèkè èkà (40) nène. Wo le zrò lè àya mè. Wo do àwù gã kè wo sɔ sìka lɔ̃ a, àhùakɔ̃ kèwo le èhùã ɖo àsi, eye wo ɖo, sìgbè wo le yì àhùa nène a.

³Àhùakɔ̃ a be gbàdagbãwo ɖè èwui to, èsɔdotɔawo ɖo ɖo àhùawɔ̀wɔ be ɖoɖo nu. Àhùa kpekpe ku woa nɔ̀nɔ̀ɛwo, leke àkpoxɔ̀nuawo le hùã ɖo a, èhùã gbogbo ɖewo, àŋù kèwo le zrò a, sìka be ègàwù vòvòvò kèwo le klɛ̃ a,

⁴na be èdù a mètɔwo kpata le fãkùe be ènu kè le ze leke a ne hɛ̃ ɖàgbè va.

⁵Wo ɖà àjè gbã ble be Ãtiokus ku. Eye Yàzɔ̀n bɔ̀ gbàdagbã kèwo be hɛ̃hlɛ̃mè la sù àgbètɔ 1.000/èkà wivɔ àtɔ̃ a, sɔ ɖè àhùa kpe na Yèruzàlɛ̀m, lè àvòmè. Kè gbàdagbã kèwo hlùɛ̃nà èglì-kpa a taawo mu teŋu kpe e jiò a, Yazɔ̀n ɖo àlɔ̀ èdùa ji. Mènelà si yì wla ɖo àgbògbò kè lè mawuxɔ̀a be ètoa ji a mè.

⁶Yazɔ̀n wù ye ŋutɔ yebe èdù mètɔwo hànyã-hànyã, ŋuzĩzĩ mà-kutɔ̀. Mu sè e gɔ̃mè be, woa ɖù àmè ŋutɔ be èdù mètɔwo ji a, nyi àfɔ̀ku gã kè wu àfɔ̀ku ɖekpekpe kè be àgbã, àgbètɔ teŋu dro ò. Ɖe kpò be le wɔ̀ na ɛ̀ sìgbè kɛ̃tɔwo ji be le ɖù nène, mu nyi yè ŋutɔ yè nɔ̀viwo ò.

⁷Vɔ̀a, èjiɖùdu a mu teŋu sù e si ò. Ènu kèawo keŋu a, ŋùkpɛ̃ kpò be hɛ̃ va na ɛ̀, eye be gbìgbɔ̀ hũ jo yì ci Amàn-nyigbã ji.

⁸Yebe ènudrã be àgbènɔ̀nɔ a va wu e nu ŋuzĩzĩtɔ̀. Kè Àrabìa be èfìɔ Àreta le è do-gà a, e si to lè ègàkpa a mè, sona èdù ɖe mè, yìnà èdù bu mè. Wo le ji la le è, lè àfi sia àfi, ɖo leke wo crì ì, eye yebe ènu vena àdòmè na àmèwo ɖo a ŋuti. Wo gbà le ji la le è, ɖo a, yebe wɔ̀nawo sà yebe dùkɔ̃ be Ese a ɖù, eye be nyi ye ŋutɔ, nɔ̀viawo be wùtɔ, lè yebe èdù mè. Wo le tĩ e yomè, kaka e va yì ɖo Ejiptè.

⁹E ɖo èhũ so Ejiptè, tùtà Grik-nyigbã ji, ɖoa, e le susu be yè la teŋu bè ɖo Spartiatɔwo kèwo so àfi ɖèka ku Yudàviwo a gbɔ, lè Làkèdèmonè. Ŋusù kè a kè nyà àmè sùgbɔ jo lè woa de a, va ku lè àmèjrowo de.

¹⁰Ŋusù kè a kè gble àmèkpòti sùgbɔ ɖo ànyigbã, eye àmè ɖekpe mu nɔ̀ ànyi la ɖì wo à, àmè ɖekpe mu fã yebe èku, kaka la va wɔ̀ ècɔ na ɛ̀ ò. Mu kpɔ èmɔ̃ ŋutɔ cã lè tɔgbeawo be yɔ̀do mè ò.

¹¹Kè èfìɔ Ãtiokus sè ènu kèwo jɔ̀ lè Yèruzàlɛ̀m a, e susu be Yudà-nyigbã jitɔwo kpata ye jè àgla. E trɔ gbɔ̀ so Ejiptè ku ègbemè-lã be àdã wɔ̀wɔ, eye be ɖè àhùa kpe na èdù a, gbìgbɔ̀ sɔ xɔ̀ ɛ̀.

¹²Eye be ɖè ègbè na yebe gbàdagbãwo be wo ne crɔ̃ àmè kèwo kpata wo la dogò a, ŋuzĩzĩ mà-ku, wo ne sò èhlò na àmè kèwo kpata si bè ɖo àxuewo mè a.

¹³Wo wù ɖèkajɛwo ku àmèsĩsĩwo, wo crɔ̃ nyɔ̃nùwo ku ɖèviwo, wo sò èhlò na tùgbɛ̀jɛwo ku èvi lè ànɔnuwo.

¹⁴Lè ŋùkèkè ètɔ̃ ŋuawo mè a, Yèruzàlɛ̀m be èdù mètɔ hotu èka (80000) crɔ̃. Àmè hotu èwì (40000) ci èhũ mè, eye wo sɔ àmè kèwo sù nène a keawo sà kluviiwo.

¹⁵Sìgbè ekè a mu sù ò nène a, Àtiokus gbà teŋu ɖo mawuxɔ̀ kè kɔ̀ wu, lè ànyigbã blibo a ji a mè. Mènelà kè nyi ye ŋutɔ yebe èdùmè ku yebe èdù be èsewo sàtɔ a, ye fiɔ ɛ̀ èmɔ̃, sɔ yì e mè.

¹⁶Ãtiokus sɔ yebe àlɔ̀ mà-kɔ̀mà-kɔwo fɔ̀ ènu kɔ̀kɔ̀ɛwo, sɔ àlɔ̀ pò-hũ ŋuawo lɔ ènu nana kèwo èfìɔ buwo sɔ ɖo tèpe kɔ̀kɔ̀ɛ kè a, ne woa sɔ do bùbu e ŋuti, eye woa sɔ kɔ yebe gogo be kɛ̃klɛ̃ yì jia.

¹⁷Ãtiokus va ɖɔ ku jajra gã ɖe, àleke be mu sè e gɔ̃mè be Yèruzàlɛ̀mtɔwo be èvùɛ̃ wɔ̀wɔwo do àdɔ̀mèze na Tɔhonɔ̀, na hùenu vi ɖe kpò, ènu kè ŋuti ye Apetɔ Gã a wɔ̀ sìgbè ɖe ye be ɖè èkɔ̀ lè Kɔ̀kɔ̀ɛpe a ŋuti nène ò.

¹⁸Ne ɖe ye Yèruzàlɛ̀mtɔwo mu kè wɔ̀ èvùɛ̃ sùgbɔ ò à, gà kè mè Ãtiokus cã va ɖo a ke kpò be la kè xɔ̀ èba, sìgbè Hèliòdorò kè Sèlekùs dɔ̃ ɖoɖa, be ne va hlɛ̃ maxuxɔ̀ a be àdɔ̀kùnuwo kpɔ a nène, eye ye cã trɔ lè yebe ɖoɖo fùflu a yomè.

¹⁹Vɔ̀ a, mu nyi Kɔ̀kɔ̀ɛpe a ŋuti ye Tɔhonɔ̀ cã yebe dùkɔ̃ a ɖo ò; bòhũ a, yebe dùkɔ̃a ŋuti ye be cã Kɔ̀kɔ̀ɛpe a ɖo.

²⁰Ènu kè a ŋuti ye Kɔ̀kɔ̀ɛpe a cã le mã dùkɔ̃ a be jɔ̀gbèvùɛ̃wo kudo è ɖo. Gãke a, wàlɛbɛ kè dùkɔ̃ a la va kpɔ màje lè Tɔhonɔ̀ be ŋùmè, eye be la va kɔ̀ jɔ̀gbènyuɛ̃ ɖo dùkɔ̃ a ji a, mawuxɔ̀ a cã la ɖù yebe àlè, gbè ɖè gbè. Kè Mawu Ŋusɛ̃kpatatɔ a do àdɔ̀mèze do dùkɔ̃ a, e ɖè èkɔ̀ lè mawuxɔ̀ a ŋuti, eye mu gbà sɔ yebe àlɔ̀ cɔ̃ e ji ò. Gãke a, kè Àpetɔ Kɔ̀kɔ̀ɛ a gbà wɔ̀ ɖèka ku yebe dùkɔ̃ a, mawuxɔ̀ a cã gbà gbɔ̀ va leke be lè sã a ji, ku yebe gogo a.

²¹Kè Ãtiokus lɔ sìka tàlɛ̃tò èkà kà ci àtɔ̃ (1800) to lè mawuxɔ̀ a mè à, e ɖèbla trɔ yì Ãtiokìa. Jajra gbà ɖɔ ɛ̀ ŋutɔ, eye leke be kã ɖo ye ɖokoe ji ɖo a, na be e le susu ŋutɔ cã be yè teŋu wɔ̀ ènu kè yè jro a, sìgbè yè a na, wo a kù àpùji-hũ to ànyigbã pupui ji, àlo, yè a na yèbe gbàdagbãwo, wo a zɔ̃ àfɔ̀ to àpù ji, nène.

²²E gble ènujikpɔtɔ ɖewo ɖɛ, ne wo a nɔ do àyà na Yudà dùkɔ̃ a: lè Yèruzàlɛ̀m be èdù mè a, e ɖo Fìlipò kè so Frijìa-nyigbã ji a. Àmè kè a be èdɛ̃ gbà nyrãku wu àmè kè ɖo è a tɔ̀.

²³Lè Gàrìzim be èto a ji a, e ɖo Ãdrònikò. Ènujikpɔtɔ bu gbà nyi Mènelà, kè sɔna èvùɛ̃jɔ̀jɔ kè wu àmè kpɔ̀tɛawo tɔ̀ a, sɔ tɛna ye ŋutɔ be èdù mèvi, Yudàtɔwo ɖo ànyi a. Leke èfìɔ Àtiokus jina èvùɛ̃ na Yudàtɔwo ɖo a,

²⁴na be e dɔ̃ èdùjikpɔtɔ Àpòlonìo kè lè ŋùkɔ̀ na Mizìatɔwo be àgbãtè gbàdagbãwo a ɖoɖa Yèruzàlɛ̀m ku gbàdagbã hotu woeɖèka (22000). E ɖè ègbè na ɛ̀ be ne sò èhlò na èdù a mè be ŋusù sĩsĩwo kpata, eye ne sɔ nyɔ̃nùwo ku ɖèviwo sɔ sà.

²⁵Kè Àpòlonìo va ɖo Yèruzàlɛ̀m be èdù a mè a, e wɔ̀ sìgbè ŋutifafamè ye be nyi nène. E nɔ̀tè kaka na jɛ̃gbɔ̃zã gbè kè nyi ŋùkèkè kɔ̀kɔ̀ɛ na Yudàviwo a. Gbè ŋua gbè kè Yudàtɔwo mu wɔ̀nà èdɔ ɖekpe ò a, ye be ɖo na yebe gbàdagbãwo be wo ne wɔ̀ àzɔ̃lì zɔ̃zɔ̃ be èkɔ̀nu ku àhùawɔ̀nuwo.

²⁶Lè àvòmè kpò a, e na wo wù àmè kèwo kpata to va, be yèwo a kpɔ ènu a, eye ye ku yebe gbàdagbãwo ɖo àmèwo dòmè, lè èdùa mè, wù àmè sùgbɔ hãnyà-hãnyà.

²⁷Hùe ŋua nu ye Yudà kè wo yɔna be Màkàbeò a ku àmè àsiɖèkɛ buwo ɖè woa ɖokoewo ɖo àsà mè, lè zògbè ji. Ye ŋutɔ ku ye tɔ̀wo nɔ̀ àgbè sìgbè ègbemè-lãwo nène, lè ètowo ji. Wo ɖùnà àmàgbewo ɖèɖe kpò, àleke be wo ne ɖè àsà lè èɖi ɖekpekpe ŋuti.