Read gen 2Màkàbeòwo 7 Bible Online

2Màkàbeòwo 7 - gen bible

2Màkàbeòwo 7

¹E va jɔ̀ gbè ɖèka, be wo le ènɔ̀ ɖeka be èvi ŋusùvi adrɛ̃ ku woa-nɔ̀ a. Èfìɔ a ji be wo a zĩ woa ji, ne wo a ɖù èhã-lã kè be èkɔ̀ Mawu be Èse a do na Yudàtɔwo a. Ekè a ŋuti a, wo le pò wo ku àtàŋù, eye wo le do sɔba na wo.

²Woa dòmètɔ ɖèka kè ènu, eye be gblɔ̃ na èfìɔ a be: be: “Nukɛ wò ji la biɔ, ne wò a sè so mia nu ò? Mi ji be wò a nyã be, mi sɔ̀gbè, la ku, sɔ wu be mi a dà mia tɔgbewo be èsewo ji.”

³Èfìɔ a do àdɔ̀mèze veve ɖe, eye be na be wo a sɔ àlã mè-gàwo ku gàzewo ɖo èzo ji.

⁴Kè èzeawo ku gàzeawo xɔ̀zò nyuɛ̃ ɖe a, e ɖè ègbè be wo ne sò àɖe na àmè kè pò nupo ɖo àmè kpɔ̀tɛawo nu a. Sɔ kpe è a, e na be wo ne sɔ kàkla, xa èɖà be àgbàze a lè èta na ɛ̀. E yomè a, e na wo sò àfɔ̀ na ɛ̀, wo sò àlɔ̀ na ɛ̀, eye wo wɔ̀ ènu kèawo keŋu, lè nɔ̀viawo ku ènɔ̀a be ŋùmè.

⁵Kè wo sò yebe ŋuti-nuwo nène a keŋu vɔ̀ a, e ɖè ègbè be wo ne sɔ ɛ̀ gogo àdòkpo a gbɔ, eye wàlɛbɛ kè be kpɔ̀tɔ̀ le gbɔ̃ a, èfìɔ aɖè ègbè be wo ne sɔ ɛ̀ ɖo èzò nu, lè èlã mè-gà a ji. Kè àmè a be àgbàzè kè le fiɔ̃ a be hɔ̃hɔ̃ɛ le kãkã pòxla èlã mè-gà a, nɔ̀via kpɔ̀tɛawo ku ènɔ̀a, wo le do ŋusɛ̃ woa nɔ̀nɔɛwo, be yèwo a ku ku èjìdo. Wo le gblɔ̃ be:

⁶“Tɔhonɔ̀, miabe Mawu le kpɔ mi, eye, e la ku ŋuzĩzĩ na mi, lè ènu kè le jɔ̀ a mè. Mosè gblɔ̃ ɛ̀, ŋutɔ cã, lè èhàjìji kè mè be le sɔ ènyà ɖo yebe dùkɔ̃a ŋuti lè a mè be: 'E la ku ŋuzĩzĩ na yebe sumɔviwo'.”

⁷Kè àmè cucugbã a ku leke a, wo kplɔ̀ èvègɔ̃ a va, ne wo a do àyà na ye cã. Kè wo xa èta be àgbàze a ku èɖàwo jo na ɛ̀ vɔ̀ a, wo biɔ ɛ̀ sè be: “Wò la ɖù èhã-lã a loo, àlo, wo a flì àta ku àlɔ̀ wòwo ɖèka, ɖèka?”

⁸Vɔ̀ a, e ɖo e ŋuti lè tɔgbeawo be ègbè mè be: “Ào!” Ekè a ŋuti a, wo wɔ̀ àyà do na àmè kèwo wo wɔ̀ na àmè cucugbã a na ye cã ɖèka, ɖèka.

⁹Keŋu gbɔ̀xue be la miɔ̃ ènu a, e gblɔ̃ na èfìɔ a be: “Àmèwùtɔ, wò le ɖè miabe àgbè lè xixe kè a mè. Gãke a, xixe a be èfìɔ a la fɔ̃ mi so èkuwo de, na àgbè mà-vɔ̀, ɖo a, mi le ku ɖo yebe èsewo ta.”

¹⁰Kè wo wù àmè kè a vɔ̀ a, wo wɔ̀ ènu kèawo ke na àmè ètɔ̃gɔ̃ a. Kè wo ɖè ègbè na ɛ̀ be ne ɖè àɖe to a, e ɖè è to, zè ɖèka, eye be drɛ̃ àlɔ̀, kè mu hũhũ ò a.

¹¹E sɔ kãkãɖoji gblɔ̃ be: “Mawu kè lè jiŋùkusi a ye wɔ̀ ŋutinu kèawo na mù. Ànukua kè mù le wɔ̀ na yebe èseawo a ŋuti a, mù lɔ̃ be wo ne sò wo jo, ɖo a mu kã ɖo e ji be e la gbìgbɔ̀ trɔwo na mù.”

¹²Èfìɔ a ŋutɔ ku yebe ŋutimèwo kã yàa, ɖo ɖèkajɛ kè a be èjìdo gãa kè na be le ze sìgbè àmè kè mu sɔ èɖe lè yebe vevesèsèwo mè ò a ŋuti.

¹³Kè be ku vɔ̀ a, wo do àyà na àmè ènègɔ̃ a, ku èhlɔ̃ dãdã be ètamè sɛ̃sɛ̃ kè a ke.

¹⁴Kè be la ku a, e gblɔ̃ na èfìɔ a be: “E nyɔ̃ ŋutɔ be àmè ne ɖo ŋùɖo, wàlɛbɛ kè e nyi be àgbètɔwo ye le wù àmè a! Mawu fìã àjɔ̀gbè be yè la fɔ̃ mi so èkuwo de nyàwo! Vɔ̀ a, èwò èfìɔ yaa, fɔ̃fɔ̃ so èku mu lè na wò ò; àgbè yeye mu lè na wò ò!”

¹⁵E yomè a, wo kplɔ̀ àmè àtɔ̃gɔ̃ a va àyà do na àmè a nu, eye wo do àyà a na ɛ̀.

¹⁶Àmè kè a kè ŋùkuvi ɖo èfìɔ a ji tututu, eye be gblɔ̃ na èfìɔ a be: “Wò ɖo àcɛ̀, la wɔ̀ ènu kè wò jro a, lè àgbètɔwo dòmè, to e gbɔ be wo nyi ènu kuku sìgbè àgbètɔwo ke nène. Gãke a, mù gbà susu be Mawu ɖè èkɔ̀ lè miabe dùkɔ̃ a ŋuti ò!

¹⁷Mù gbà vɔ̃ ò. Wàlɛbɛ kè Mawu la dɔ̃ èto na wò ku àpo jìjìmèviwo a, ye wò la jèsi leke be lòlò ɖo a ku yebe ŋusɛ̃ gã a.”

¹⁸Àmè kè a yomè a, wo kplɔ̀ àmè àdɛ̃gɔ̃ a va. Gbɔ̀xue be la ku a, e gblɔ̃ na èfìɔ a be: “Mù gbà flù ɖokoe wò ò! Èvùɛ̃ ye mi wɔ̀, ye ŋuti mi le ɖù àyà kèawo ɖo. Miabe dùkɔ̃ a jè àgɔ̀ do yebe Mawu. Ekè a ŋuti ye èvùɛ̃ sɛ̃ŋu kèawo le jɔ̀ ɖo mia ji ɖo.

¹⁹Vɔ̀ a, èwò ya a, mù gbà susu be wò la ci ètodɔ̃ mà-xɔ̀ ò, èwò kè teŋu dojì, ɖè àhùa kpe na Mawu ŋutɔ blibo a!”

²⁰Èvinɔ̀ a ya dojì ŋutɔ; e jè na kafu gã a ɖe, eye wo ɖo la nɔ ɖoŋù ì. Lè ŋùkèkè ɖèka pɛ mè a, e nɔ̀tè, eye be kpɔ yebe èvi jìjì adrɛ̃, wo ku lè yebe ŋùku mè, gãke a, e dojì nɔ̀ e nu kàlĩtɔ̀, ɖo a, e dojì ɖo Tɔhonɔ̀ ŋuti.

²¹E tù àfɔ̀ tè, le do ŋusɛ̃ woa dòmètɔ ɖe sia ɖe, lè tɔgbeawo be ègbè mè. E le pò àjìnɔ̀ be nupo kè mè ŋusù be kàlĩwɔ̀wɔ lè a na wo, eye be le gblɔ̃ na wo be:

²²“Nyè mu nyã leke mìabe àgbè jè e gɔ̃mè lè àpe àdɔ̀mè ò. Mu nyi ènyè ye sɔ àgbè do mìa mè ò. Mu nyi ènyè ye wɔ̀ mìabe ŋutilã be àkpa vòvòvòawo ò.

²³Xixe a be Ɖotɔ ye wɔ̀ ènuwo kpata, E ye wɔ̀nà àgbètɔwo, ne wo gbe jɔ̀ kpò a. E la ku ŋuzĩzĩ na mì, la gbìgbɔ̀ gbɔ̀ mì àgbè, kè mì lɔ̃ be yèwo a wɔ̀ ànùkua na yebe Èsewo, kaka sɔ yì èku mè a.”

²⁴Èfìɔ Ãtiokus susu be e le kò yè, eye be xɔ̀sè be e le zũ yè. Ekè a na be e ji la trɔ susu na ŋusùvi àdɔ̀mlɛ̃ kè gbà lè àgbè a, mu nyi to nupo pòpo ɖèɖe kpò mè ò, vɔ̀ a, e fìã àjɔ̀gbè cã na ɛ̀. E gblɔ̃ na ɛ̀ be yè la na be la kpɔ èci, àgbèmè la nyɔ̃ na ɛ̀ ŋutɔ, eye yè la ɖo è Èfìɔ be Èxlɔ̃, ne yè a do èdɔ vevewo àsi na ɛ̀, ne ɖèvi a lɔ̃, ɖè àsi lè tɔgbeawo be èkɔnuwo ŋuti a.

²⁵Vɔ̀a, ɖèkajɛvi a mu sɔ èɖe lè ènyà kè èfìɔ a le gblɔ̃ a mè ò. Èfìɔ a na èvinɔ̀ a dɔ̃ va, be to na ɛ̀ be ne pò nupo na èvia, ne ɖèvi a be sɔ hùenu kè a sɔ hlùɛ̃ ye ɖokoe gã.

²⁶Ekè èfìɔ a pò nupo dìdì ɖe, ne be a sɔ zĩ èvinɔ̀ a ji a, nyɔ̃nù a lɔ̃ be yè a do ègbè èto mè na ɖèkajɛ a.

²⁷E zìɔ̃ ɖo èvia ji, eye be teŋu flù èfìɔ àkpɛ̃nyɛ̃tɔ, èhlɔ̃dãtɔa, gblɔ̃ na èvia, lè tɔgbeawo be ègbè mè be: “Èvi nyè, ku ŋuzĩzĩ na mù. Ɖoŋù be wètri àsiɖèkɛ ye wò nɔ̀ àdɔ̀ nyè mè, eye mù na wò ànɔ̃, èpè ètɔ̃. Mù lebè na wò, mù kpɔ ji wò, nyì wò kaka va na egbè.

²⁸Mù ɖè kuku na wò, èvi nyè, ɖè ŋùkuvi, ne wò a kpɔ èji, wò a kpɔ ànyigbã, glo ènu kèwo kpata lè e ji a kpɔ. Kpɔ ɛ̀ jèsi be Mawu ye wɔ̀ woa kpata, vɔ̀ a, mu sɔ ènu ɖekpe, sɔ wɔ̀ wo ò, eye nène a ke ye be wɔ̀ àgbètɔ cã.

²⁹Ekè a ŋuti a, mù gbà vɔ̃ àmèwùtɔ kè a ò, bohũ a, lɔ̃, ne wò a ku kãlìtɔ̀, sìgbè fòfo wòwo nène. Ne ma gbà teŋu va kpɔ wò ku fòfo wòwo, wàlɛbɛ kè Mawu la ɖè yebe màje fiɔ mi a.”

³⁰Kaka ènɔ̀a la wu ènyà kè be le gblɔ̃ a nu a, ɖèkajɛvi a gblɔ̃ be: “Nukɛ ye mìawo ya, mì gbà le nɔ̀tè kpɔ ò? Nyè mu la ɖo èto èfìɔ a be ègbèɖèɖe ò. Mawu be Èse kèwo be sɔ do àsi na mia Tɔgbewo, to Mosè ji a, ji ye mù la zɔ̃ ɖo.

³¹Eye èwò, èfìɔ Ãtiokus, èwò kè ɖè susu, sɔ ɖo èvùɛ̃ kèwo kpata le jɔ̀ ɖo Yudàtɔwo ji a, wò mu la si lè Mawu be àlɔ̀ mè ò!

³²Miawo ya, mi wɔ̀ èvùɛ̃, ye ŋuti mi ɖo la ɖù àyà fifì ɖo.

³³Mia Apetɔ, Mawu àgbè-àgbè a, le ɖè yebe àdɔ̀mèze fiɔ mi, na hùenu vi ɖe kpò ye, ne be a sɔ dɔ̃ èto na mi, ne be a sɔ na mi kpakpla. Ekè a yomè a, e la jrà mi, àmè kèwo nyi yebe sumɔ̃viwo a ku ye dòmè ɖo.

³⁴Vɔ̀ a èwò, Tɔhonɔ̀ be èkɛ̃tɔ kè nyi àmè vlo wu àmèwo kpata a, mù gbà sɔ jajra sɔ flù ɖokoe wò ò! Èwò kè le do àsi Mawu be èviwo ŋuti a, mù gbà nɔ̀ mɔkpɔkpɔ gbalo mè ò.

³⁵Ɖoa, Mawu ŋusɛ̃kpatatɔ a le kpɔ ènu sia ènu, eye wò mu kpɔ to lè yebe kòjoɖoɖo mè ò

³⁶Kè fòfo nyèwo sè veve, hùenu vi ɖe a, wo ku ɖo ànùkua kè wo le wɔ̀ na Mawu be Zòɖùɖu a ta, gãke a àgbè mà-vɔ ye le nɔ̀tè kpɔ wo. Vɔ̀ a, èwò ya, Mawu la ɖo kòjo na wò, eye be la na wò, ètodɔ̃ jɔ̀jɔ̀ɛ kè jè na àpo àmè mà-bù be ègbè a.

³⁷Mù sɔ̀gbè, sìgbè fòfo nyèwo nène, la sɔ àpe ŋutilã ku àpe àgbè savɔ ɖo tɔgbe nyèwo be èsewo ta. Mù le biɔ so Mawu si be ne ku ŋuzĩzĩ na miabe dùkɔ̃ a, vɔ̀ a, ne dɔ̃ èto na wò, ne do àyà na wò, àleke be ne na, wò ŋutɔ, wò a jèsì ì be ye ɖèka kpò ye nyi Mawu.

³⁸Mi le fãkue be, nyè ku fòfo nyèwo, mia nyi àmè kpɔ̀tɛ kèwo ye le xɔ̀ àdɔ̀mèze kè Ŋusɛ̃kpatatɔ a do, ɖo yebe ènyà jɔ̀jɔ̀ɛ ji, ɖo miabe dùkɔ̃ a kpata ŋuti a be èba.”

³⁹Èfìɔ a kpɔ be ɖèkajɛvi a sɔ ènyà kèawo le wɔ̀ kãlĩsu lè yèbe ŋùmè, eye be do àdɔ̀mèze ŋutɔ. E sɔ àdã gã ɖe, sɛ̃ ètamè, gbà wɔ̀ èhlɔ̃nu ku ɖèkajɛvi a, wu ku àmè kpɔ̀tɛawo.

⁴⁰Gãkea, ɖèkajɛvi a cã wɔ̀ ànùkua, kaka yì èku mè, wàlɛbɛ kè be sɔ yebe jìdo keŋu do Tɔhonɔ̀ be àsi mè a.

⁴¹Mɛmlɛ̃nu a, wo wù èvinɔ̀ a cã, kè wo wù èviawo keŋu vɔ̀ a.

⁴²Mi gblɔ̃ ènyà sùgbɔ, so vɔsa be ènuɖùɖuwo ku ŋɔ̃ji be àyà do na àmèwo ŋuti. Mi a sɛ̃ ɛ̀ ɖo fikè a.