Read gen 2Màkàbeòwo 8 Bible Online

2Màkàbeòwo 8 - gen bible

2Màkàbeòwo 8

¹Yudà Màkàbeò ku yebe ŋutimèwo le ɖo kɔpewo mè, lè bèbemè, le yɔ woabe kɔ̀taviwo be wo ne kplɔ̀ yèwo do. Wo le dɔ̃ àmè kèwo gbà le nɔ̀ ègbè ji na Yudàviwo be xɔ̀sèa. Leke a, wo bɔ̀ ŋusù sìgbè àmè hotu ètɔ̃ (6000) nène.

²Wo le blìbɔ̀ na Tɔhonɔ̀ be ne va hlùɛ̃ yebe dùkɔ̃ kè àmè sia àmè le do àyà na a gã, eye ne bèa ku ŋuzĩzĩ na mawuxɔ̀ a kè vòdu sumɔ̃tɔwo le dovlo a.

³Wo gbà le biɔ Tɔhonɔ̀ be ne kpɔ leke wo gbã Yèruzàlɛ̀m be èdùa ɖa, eye zãa ɖe kèa, wo la tùkù ì ɖo ànyigbã keŋu keŋu. Wo le fã yɔ Tɔhonɔ̀ be, ne ɖo èto èhũ kè wo kɔ̀ ɖɛ, eye be le do àpa be wo ne biɔ èhlɔ̃ a.

⁴Wo gbà le fã yɔ Tɔhonɔ̀, be ne ɖoŋù ɖevi mà-nyã ɖe kèwo wo wù hànyã-hànyã a, ne be a kpe àkɔ ku àmè kèwo zũ Tɔhonɔ̀ awo. Nène a, mawu la ɖè leke be crì èvùɛ̃ ɖo a fiɔ.

⁵Kè Yudà gbe va nɔ̀ ŋùkɔ̀ na àhùakɔ̃ gã ɖe kpò a, vòdu sumɔ̃tɔwo mu gbà teŋu wɔ̀ ènu ɖekpe ku ì ò, ɖo a, Tɔhonɔ̀ be àdɔ̀mèze a va trɔ zũ àdɔ̀mè nyuɛ̃ wɔ̀wɔ.

⁶Yudà yì kɔ̀nà ɖo kɔpe ku èdùwo ji, lè àvò mè, tɔna èzò wo. E nɔ̀nà àfi kè dɔ̃na e ji a, eye kɛ̃tɔwo gbogbo ɖewo sina jo.

⁷Vevetɔ a, èzã mè bɔ̀hũ ye be zãna vìvìti, sɔ ɖènà àhùa kpena na kɔpe ku èdùwo. Eye, leke be ɖùnà ji ɖo a kãkã gbã kpe ɖo àfi sia àfi.

⁸Fìlipò, kè nyi èfìɔ tèpenɔ̀tɔ lè Yèruzàlɛ̀m a kpɔ be Yudà le yì ŋùkɔ̀ vi-vi-vi, eye be le ɖùji, e ji, e ji. E ŋlɔ̃ xoma ɖoɖa Tolèmeò, Sirìa ku Foenikè be èdùjiɖùtɔ a, sɔ lebiɔ ɛ̀ be ne va, yèwo hlùɛ̃ èfìɔ be ènuwo ta.

⁹Tòlòmeo sɔ Nìkànɔr, Pàtroklè kè nyi Èfìɔ be èxlɔ̃ vevewo dòmètɔ ɖèka be èvi a, eye be dɔ̃ ɛ̀ ku àhùakɔ̃ kè la sù àgbètɔ hotu èwoa (20000), so èdù vòvòvòwo mè, ne wo a crɔ̃ Yudàtɔwo be dùkɔ̃ blibo a. E ɖè ègbè na àhùaga Gɔrjìas be ne kplɔ̀ ɛ̀ yì. Gɔrjìas nyi àmè kè sĩ lè àhùa wɔ̀wɔ mè a.

¹⁰Èfìɔ Ãtiokus ɖù sìka tàlɛ̃tò hotu ɖèka (2000) be ètaci be èfɛ̃ do Romàtɔwo. Èfɛ̃ gã kè a nyi àmlɔ̃kɔɛ be èci kè Ãtiokus Èpìfanò be ètɔ ɖù do Romàtɔwo a be kpɔ̀tɛ kè be la tu, ne e sà Yudàtɔ kèwo be la le a.

¹¹E ɖèbla do àŋɛ̀ ɖoɖa èdù kèwo lè àpù-toawo, le yɔ èdù ŋua mètɔwo be àsìsàtɔwo be wo ne va plè Yudàtɔ kèwo nyi kluviwo a. Kluvi èkà-vè ci-èwo (90) be èci ye nyi sìka tàlɛ̃tò ɖèka. Mu susu kpɔ be Mawu Ŋusɛ̃kpatatɔ a ɖo ètodɔ̃ veve ɖe ɖɛ na yè ò.

¹²Yudà sè be Nìkànɔr jè èmɔ̃ gbãnà. Kè be gblɔ̃ ɛ̀ na yebe ŋutimèwo a,

¹³àmè kèwo vɔ̃, eye wo mu dojì ɖo Mawu be jɔ̀jɔ̀ɛwɔ̀wɔ ŋuti ò a si jo yì dìdìpe.

¹⁴Àmè kpɔ̀tɛawo sà enu kèwo kpɔ̀tɔ̀ lè woa si a, eye wo fãkùe yɔ Tɔhonɔ̀ be ne hlùɛ̃ àmè kèwo Nikàmɔr, àmè vlo a sɔ sà ŋutɔ cã gbɔ̀xue àhùa a ne jè e gɔ̃mè a.

¹⁵Ne e va e mè be Tɔhonɔ̀ mu jro la hlùɛ̃ wo gã, ɖo lɔ̃lɔ̃ ŋuti ò a, wo le fã yɔ ɛ̀ be ne hlùɛ̃ yèwo gã, ɖo yebe ànùkua na èzò kè be ɖù ku yèwo togbewo a ŋuti, eye ye ŋutɔ kè nyi gogo be Mawu kɔ̀kɔ̀ɛ a cã yèwo, be yèwo ne nyi yebe dùkɔ̃.

¹⁶Màkàbeò bɔ̀ yebe gbàdagbã kèwo sù àmè hotu ètɔ̃ a (6000). E gblɔ̃ na wo be wo mu gbà ɖè àsi lè woa ɖokoewo ŋuti, ne woa vɔ̃ vòdu sumɔ̃tɔ kèwo lɔ hòo, gbãnà woa gbɔ, ɖo ènyà mà-jɔ̀ màjɔwo ŋuti ò. Wo ɖo la wɔ̀ àhùa kãlĩtɔ̀.

¹⁷Wo ɖo la nɔ ɖoŋù èhlɔ̃dãtɔ be ènu bàɖà kèwo èkɛ̃tɔwo wɔ̀ ɖo mawuxɔ̀ a ŋuti a, wè sia wè, wo ɖo la nɔ ɖoŋù leke wo ɖìgbɔ Yèruzàlɛ̀m be èdù a ɖo a, ku leke wo gũ Yudàtɔwo be èkɔ̀nuwo ɖo a.

¹⁸Yudà gblɔ kpe è be: “Àmè ŋuawo le kã ɖo woabe àhùawɔ̀nuwo ku woabe kãlĩwɔ̀wɔ ji, vɔ̀ a, miawo ya a, mi le sɔ miabe jido dà ɖo Mawu Ŋusɛ̃kpatatɔa ji. E sù kpò be Mawu ne hùã èta, zè ɖèka kpò, ne be a sɔ crɔ àhùakɔ̃ kèwo zɔ̃ gbãnà, la va kpe àkɔ ku mia, àlo, la sɔ crɔ̃ xixe blibo a!”

¹⁹Eye Yudà ɖoŋù zè nène ke woabe Mawu hlùɛ̃ woa tɔgbewo gã a: sìgbè lè Sènakèrib be hùenu, gà kè mè be crɔ̃ kɛ̃tɔ hotu èkà-vè ci woèvè-èkà wìvɔ àtɔ̃a (185000),

²⁰àlo, wàlɛbɛ kè wo kpe àhùa ku Gàlatìatɔwo, lè Babɛ̀l, àfi kè Yudàtɔ hotu ènɛ̀ (8000) kèwo ŋuti Màkèdonìatɔ hotu èvè (4000) kpe ɖo a, eye wàlɛbɛ kè Màkèdonìatɔawo xixa a, àmè hotu ènè (8000) ŋuawo crɔ̃ èkɛ̃tɔ hotu èkàtakpo (120000) gbidi, to àlɔ̀do kè so Jiŋùkusi va na woa mè, eye wo lɔ àmɔ̃nyɔ̃nu sùgbɔ.

²¹Yudà sɔ ènyà kèawo gbìgbɔ̀ do ŋusɛ̃ yebe gbàdagbãwo; e na wo sɔ̀gbè la ku ɖo Mawu be Èse a ku woa dè-nyigbã ta. E mã yebe àhùakɔ̃ a ɖo èhasòso ènè mè.

²²Àmè èkà-gbãvɔ adrɛ̃-takpo (1500) lè èhasòso ɖèka mè, eye be sɔ èhasòsos ɖe sia ɖe ɖo ye ŋutɔ ku nɔ̀viawo Simɔ̀n, Yosɛf ku Yònatàn be kpɔ̀kplɔ gɔ̃mè.

²³E biɔ so Èlèazar si, be ne hlɛ̃ Xoma Kɔ̀kɔ̀ɛ a mè-nyàwo be àkpa ɖe, eye be na ètanyà kè a be: “Ku Mawu be àlɔ̀do.” E yomèa, e nɔ̀ ŋùkɔ̀ na èhasòsò cucugbã a, sɔ ɖè àhùa kpe na Nìkànɔr.

²⁴Kè Ŋusɛ̃kpatatɔ a trɔ va lè Yudàtɔwo ji a, Yudàtɔwo teŋu wù woabe èkɛ̃tɔ hotu ènè èkàwìvɔàtɔ̃ (9000) hànyã-hànyã; wo do àbì Nikànɔr be gbàdagbã sùgbɔ ŋuti, eye wo do àfɔku àmè bu kèwo be àlɔ̀, àlo, àfɔ̀ sò a. Àhùakɔ̃ a mètɔ kpɔ̀tɛawo si jo.

²⁵Wo lɔ èci kè àmè kèwo la plè wo, sɔ wɔ̀ kluviwo a hɛ̃ va a. Wo nyà àmè kèwo le siawo ɖo èdù nu, yì dìdìpe, vɔ̀ a, kè èzã le gogo a, wo trɔ lè woa yomè.

²⁶Gbè ŋua gbè a, le nyi èzãdrɔ̃ gbe na jɛ̃gbɔ̃zã kè la jè e gɔ̃mè, ne èwè ɖo-xɔ̀ a, ekè a na be wo mu gbà nyà àmèawo ɖo èdù nu, sɔ yì ŋùkɔ̀ ò.

²⁷Kè wo fɔ̀ èkɛ̃tɔwo be àhùawɔ̀nuwo, eye wo ɖè ènu xɔ̀ àsìwo lè woabe kukuwo ŋuti vɔ̀ a, wo jè jɛ̃gbɔ̃zã a ɖuɖu gɔ̃mè. Wo sɔ ɖokoe mè yìyi gã ɖe, so kafu Tɔhonɔ̀, eye wo do àkpe na ɛ̀, be e gbà ɖè èmɔ̃ na yèwo be yèwo gbà teŋu kè ɖo yebe ŋuzĩzĩkuku ŋuti.

²⁸Kè wo ɖù jɛ̃gbɔ̃zã a vɔ̀ a, wo mã àmɔ̃nyɔ̀nuwo be àkpa ɖe na àmè kèwo èkɛ̃tɔawo do àyà naawo, na àhòsìwo ku ècɔɛ̀viwo, eye wo mã kpɔ̀tɛ a ku woabe èviwo.

²⁹Kè wo wɔ̀ ekè a vɔ̀ a, woa kpata, wo fã yɔ Tɔhonɔ̀, be ne sɔ yebe àdɔ̀mè nyuɛ̃ a, jrà ye ku yebe sumɔ̃viwo dòmè ɖo gbidi.

³⁰E yomè a, Yudà ku yebe ŋutimèwo va wɔ̀ àhùa ku Tìmòteò ku Bàkidɛs be gbàdagbãwo. Èkɛ̃tɔ kèwo wo wù a wu gbàdagbã hotu èwo (20000), eye wo teŋu ɖo àlɔ̀ àgbògbò gãwo ji. Wo mã woabe àmɔ̀nyɔ̀nu xɔ̀asìawo ɖo àkpa sɔ̀sɔ̀ɛ èvè. Ɖèka nyi woa ŋutɔ, woa tɔ̀. Èvègɔ̃ a nyi àmè kèwo yomè wo tĩawo, ècɔɛ̀viwo ku àhòsìwo, kudo àmè sĩsĩwo tɔ̀.

³¹Wo xɔ̀ èkɛ̃tɔwo be àhùawɔ̀nuwo ɖèka, ɖèka, sɔ pɔ̀tɛ ɖo tèpe kèwo jè a. Wo fɔ̀ ènu kpɔ̀tɛ kèwo wo lɔ a yì Yèruzàlɛ̀m.

³²Wo wù àhùakɔ̃ kèwo va do àlɔ̀ Tìmòteò a be èga a, ɖo a, ŋusù kè a nyi àmè vuɛ̃ ɖe kè do àyà sùgbɔ na Yudàtɔwo a.

³³Wàlɛbɛ kè wo le ɖù àzã ɖo èji kè wo ɖù a ta a, wo tɔzò àmè kèwo tɔzò mawuxɔ̀ a be hɔ̃tru a, àgbè-àgbè. Wo tɔzɔ̀ Kàlìstɛn kè si yì bè ɖo àxue vitukui ɖe mè ku wo a cã. Ekè a nyi Kàlìstɛn be ènu vlo kèwo be wɔ̀awo be èfɛ̃tu.

³⁴Nìkànɔr kè nyi àmè vlowo be àmè vlo a kplɔ̀ àsìsàtɔ kèwo wu àgbètɔ èkàwìvɔàtɔ̃ a (1000) va, ne wo a plè Yudàtɔwo.

³⁵To Tɔhonɔ̀ be àlɔ̀do mè a, àmè kèwo tutu be crìawo ye ɖù e ji. E ɖè yebe àcɔ be àwù nyuɛ̃ a ɖɛ, eye ye ɖèka ɖo ègbe, sìgbè kluvi kè le si a nène. Èta nyɔ̃ ɛ̀ ŋutɔ, eye be si jo lè yebe àhùakɔ̃ kè wo crɔ̃ a gbɔ, teŋu yì ɖo Ãtiokìa.

³⁶Ŋusù kè a susu be yè teŋu sɔ Yèruzàlɛ̀m be èdù mètɔwo sà, ne wo a nyi kluviwo, ne yè a sɔ èci a tu èfɛ̃ kè yè ɖù do Romàtɔwo a. Fifì a, mu ɖo ènu bu la wɔ̀, sɔ wu be ne kè ènu, ne be a ɖè è gblɔ̃ be àmè ɖe mu la teŋu ɖù Yudàtɔwo ji ò, ɖo a, Mawu ye nyi woabe hlùɛ̃tɔ, eye wo zɔ̃nà ɖo Èse kè Mawu ɖo na wo a ji.