Read gen Màteo 1 Bible Online

Màteo 1 - gen bible

Màteo 1

¹Yesù Kristò, kè jɔ̀ so David be hɛ̃nu, eye David jɔ̀ lè Abràham be jìjimèviwo dòmèa, be hɛ̃nu xoma ye nyi ekè:

²Abràham jì Izàk, Izàk jì Yakɔb eye Yakɔb jì Yudà ku nɔ̀viawo;

³Yudà ku èsrɔ̃a Tamà jì Farɛ̀z ku Zara. Farɛ̀z jì Esrɔ̀m eye Esrɔ̀m jì Aram;

⁴Aram jì Aminadàb, Aminadàb jì Nasɔ̀n eye Nasɔ̀n jì Salmɔ̀n;

⁵Salmɔ̀n ku èsrɔ̃a Ràhab jì Boaz, Boaz ku Rut jì Obɛd eye Obɛd jì Jesè;

⁶Jesè jì èfìɔ David eye èfìɔ David jì Salomɔ̀n (lè Uriyà be srɔ̃a be àdɔ̀ mè);

⁷Salomɔ̀n jì Robòam, Robòam ya jì Abìa eye Abìa jì Asà;

⁸Asà jì Yòsafat, eye Yòsafat jì Yòram, Yòram ya jì Ozia;

⁹Ozia jì Yoatam, Yoatam ya jì Àkaz eye Àkaz jì Ezekìas;

¹⁰Ezekìas jì Manasè, Manasè ya jì Amɔ̀n eye Amɔ̀n jì Yosìas;

¹¹Yosìas jì Yekonìa ku nɔ̀viawo wàlɛbɛ kè wo kplɔ̀ Izràɛlviwo yì gàtɔnugbe lè Babɛ̀l.

¹²Ekè wo kplɔ̀ àmèwo yì Babɛ̀l yomèa, Yekonìa jì Salatìɛl eye Salatìɛl jì Zòrobabɛ̀l;

¹³Zòrobabɛ̀l jì Abihud eye Abihud jì Eliakim, Eliakim ya jì Azɔr;

¹⁴Azɔr jì Sadɔk, Sadɔk jì Akim eye Akim jì Elihud;

¹⁵Elihud jì Eleazàr; Eleazàr jì Matàn eye Matàn jì Yakɔb;

¹⁶Yakɔb jì Yozɛ̀f, Maria be èsrɔ̃a. Maria kèa ye nyi Yesù kè wò yɔna be Mɛ̀siaa be ènɔ̀.

¹⁷So Abràham ji va sɛ̃ David jia, mi lè hlɛ̃ jìjimè woènɛ̀. So David ji kaka va sɛ̃ wàlɛbɛ kè wo kplɔ̀ àmèwo yì Babɛ̀l nyigbã jia, e wɔ̀ jìjimè woènɛ̀. So gà kè mè wo kplɔ̀ àmèwo yì gàtɔnugbe kaka va sɛ̃ Kristò be hùenua, e wɔ̀ jìjimè woènɛ̀.

¹⁸Àlekè wo jì Yesù Kristò ɖoa ye nyi ekè. Wàlɛbɛ kè wo sɔ àgɔ̀ ènɔa Maria na Yosɛ̀f ne bèa ɖèa, keŋu gbɔ̀xue wòa va nɔ̀ èdua, Maria fɔ èfu to Gbɔ̃gbɔ̃ Kɔ̀kɔ̀ɛ be èdɔwɔ̀wɔ mè.

¹⁹Yosɛ̀f, Maria be àgɔ̀sɔa nyi ànùkuame. Mu ji la do ŋùkpɛ̃ Maria ò, vɔ̀a, e ɖè sùsu be yèa ɖè àsi lè e ŋuti lè bèbe mè[1].

²⁰Wàlɛbɛ kè be le bù ènu kèa ŋuti kpɔa, Tɔhonɔ̀ be àtikplɔtɔ ɖe ɖè ye ɖokoe fiɔ ɛ̀ lè èdrɔ̃ mè, gblɔ̃ na ɛ̀ be: “Yosɛ̀f, David be jìjimèvi, mù gbà vɔ̃ Maria ɖèɖe ò, ɖo èfu kè be fɔa, Gbɔ̃gbɔ̃ Kɔ̀kɔ̀ɛ be ènu wɔ̀wɔ ye be nyi.

²¹E la jì ŋusùvi eye wò la yɔ ɛ̀ be Yesù[2], ɖo e ye la hlùɛ̃ yebe dùkɔ̃a so yebe ènuvuɛ̃wo mè.”

²²Ènu kèawo keŋu jɔ̀, ne ènyà kè Tɔhonɔ̀ gblɔ̃ to gblɔ̃ɖɛtɔa jia bèa zɔ̃ sù be:

²³“Tùgbɛ̀jɛvi kè lè àlɔ̀ jia la fɔ èfu, e la jì ŋusùvi, eye wo la yɔ ɛ̀ be Èmanuɛ̀l.” (E gɔ̃mè ye nyi be “Mawu lè ku mi.”)

²⁴Kè Yosɛ̀f fɔ̃ so àlɔ̃ mèa, e wɔ̀ ɖo ènu kè Tɔhonɔ̀ be àtikplɔtɔa gblɔ̃ na ɛ̀a ji. E kplɔ̀ èsrɔ̃a Maria va àxomè.

²⁵Vɔ̀a, mu do àsi e ŋuti kaka be jì yebe ŋusùvia ò, eye e ɖo nyikɔ na ɛ̀ be Yesù.