Read gen Màteo 10 Bible Online

Màteo 10 - gen bible

Màteo 10

¹Eye kè Yesù yɔ yebe *nukplavi woèvèawo va ye ɖokoe gbɔa, e na wo ŋusɛ̃ ɖo gbɔ̃gbɔ̃ màkɔ̀màkɔwo ji, ne woa nyà wo to, woa dà èdɔ̀wo ku lãmè-gblegblewo kpata.

²*Àmèdɔ̃dɔ̃ woèvèawo be nyikɔ ye nyi ekèawo: jè ŋùkɔ̀a, Simɔ̀n, kè wo yɔna be Petròa ku Ãdre, nɔ̀viaa. E yomèa Yakobò ku nɔ̀viaa, Yòhanɛ̀s kèwo nyi Zebedeo be èvi-ŋusùwo.

³Sɔ kpe èa, Filipò ku Bartelemeo, Tomà kudo Màteo, èdɛ̃jɔ̀tɔa, Yakobò, Alfeò be èvia, ku Tadeo.

⁴Wu e nua, Simɔ̀n, àvũ drɛ̃tɔ na yebe èdùa ku Yudà Iskariɔt àmè kè xɔ̀kpli na ɛ̀a.

⁵Yesù dɔ̃ àmè woèvè kèawo, e do ègbè kèawo àsi na wo be: “Mì mu gbà yì àgbàlèwo gbɔ ò; mì mu gbà yì ɖo Sàmarìatɔwo be èdù ɖe mè ò.

⁶Vɔ̀a, mì yì Izràɛl be àlɛ̃ bubuawo gbɔ bòhũ.

⁷Eye ne mì le yìa, mì nɔ̀ do àŋɛ̀a be: 'Mawu be èfìɔɖùɖua gogo vɔ̀!'

⁸Mì dà èdɔ̀ na dɔ̀nɔ̀wo; mì fɔ̃ àmè kukuwo; mì na èkpònɔ̀wo be ŋuti ne kɔ̀; mì nyà gbɔ̃gbɔ̃ vuɛ̃wo to. Fàa ye mì xɔ̀. Mì na ɛ̀ fàa.

⁹Mì mu gbà sɔ sìka, àlo klòsalò, àlo ègà ɖo mìabe àkpòwo mè ò.

¹⁰Mì mu gbà sɔ àkpɛtɛ ò; mì mu gbà sɔ àwù bu wu ekè lè èkɔ̀ na mìa ò; mì mu gbà hɛ̃ àfɔ̀kpa àlo èkpò ò. Nyàwo ye be nyi be èdɔwɔ̀tɔ ɖo la ɖù ènu.”

¹¹“Eye èdù sia èdù, àlo kɔpe sia kɔpe kè mè mì la ɖoa, mì biɔ àmè kè sù la xɔ̀ mìa ta. Mì zɛ̃ nènemea gbɔ kaka na gà kè mè mì la jo lè funua.

¹²Ne mì ɖo àxue ɖe mèa, mì do ègbè na àxuea mè tɔwo.

¹³Ne àxue kèa jè a, mìabe ŋuti fàfa ne va e ji. Vɔ̀a ne mu jè òa, mìabe ŋuti fàfa ne gbìgbɔ̀ va na mì.

¹⁴Ne wo mu xɔ̀ mì ò, àlo wo mu ɖo èto mì òa, mì hũhũ mìabe àfɔ̀kɔ kɔ̀ ɖɛ ne mìa jo lè funu.

¹⁵Nyàwo mù le to na mì: lè kòjoɖoɖo zãgbèa, Sodɔ̀mtɔwo ku Gòmɔràtɔwo be ètodɔ̃ la bɔ̀bɔ̀ wu èdù kèa mè tɔwo tɔ̀.”

¹⁶“Kpɔɖa, mù le dɔ̃ mì sìgbè àlɛ̃wo nène ɖoɖa gbètewo dòmè. Ye ŋutia, mì jè àyè sìgbè èdãwo nène; mì fa sìgbè àhɔ̃nɛwo nène.

¹⁷Mì jè àyè, ɖo àgbètɔwo la do mì àsi na kòjoɖotɔwo, eye, wo la pò mì ku àtãŋù lè bɔ̀bɔ̀pewo.

¹⁸Wo la kplɔ̀ mì yì dùjiɖùtɔwo ku èfìɔwo be ŋùkɔ̀, ɖo ŋuti nyè, ne mìa ɖù ɖase lè woa ku àgbàlèwo be ŋùkɔ̀.

¹⁹Wàlɛbɛ kè wo la kplɔ̀ mì yì kòjoɖopea, mì mu gbà nɔ bù ètamè so ènu kè mì la gblɔ̃, àlo àlekè mì la gblɔ̃ ɛ̀ ɖoa ŋuti ò; wo la na mì ènyà kèwo mì la gblɔ̃a lè gà ŋua mè tututu.

²⁰Đo mu nyi mìawo ye la pò nupo ò, vɔ̀a, mìa Tɔ be Gbɔ̃gbɔ̃ a ye la pò nupo lè mìa mè.

²¹Nɔ̀vi la do nɔ̀via àsi na èku, eye ètɔ la do èvia àsi, eye èviwo la sitè ɖo woabe àjìtɔwo ŋuti, eye wo la gblehùɛ do wo na èku.

²²Eye àmèwo kpata la crì mì ɖo ŋuti nyè. Vɔ̀a, àmè kè la dojì kaka yì vɔ̀vɔnua, àmè ŋua la gã.

²³Ne wo tĩ mìa yomè lè èdù ɖe mèa, mì si yì èdù bu mè. Nyàwo mù le to na mì: mì mu la kpɔ to Izràɛl be èdùwo kpata mè keŋu gbɔ̀xue *Àgbètɔ be Èvia la va ò.”

²⁴“*Nukplavi mu wuna yebe ènufiɔtɔ ò, eye sumɔ̃vi cã mu wuna yebe àpetɔ ò.

²⁵E sù be *nukplavi bèa nɔ̀ sìgbè yebe ènufiɔtɔ nène, eye sumɔ̃vi cã sìgbè àpetɔa nène. Ne wo yɔ àxuetɔa be Bɛlzebul-a, àleke ye wo mu la yɔ yebe àxomètɔwo cã wu nène ò?”

²⁶“Ye ŋutia, mì mu gbà vɔ̃ àgbètɔwo ò. Ènu ɖekpe mu la nɔ̀ wawla mè kè wo mu la ɖe sia ò, eye ènu ɖekpe mu la nɔ̀ bèbe mè kè mu la va gàglàgbè ò.

²⁷Ènu kè mù gblɔ̃ na mì lè vìvìti mèa, mì gblɔ̃ ɛ̀ lè kɔ̀kɔ̀ɛ mè, eye ènu kè mù ɖèkpa gblɔ̃ na mìa, mì do àpa gblɔ̃ ɛ̀ le èdù tòpò.

²⁸Mì mu gbà vɔ̃ àmè kèwo wùnà ŋutilã, vɔ̀ wo mu teŋu wù èkla ò. Mì vɔ̃ Mawu bòhũ, ɖo e yaa teŋu wù ŋutilã ku èkla, lè èzò màvɔ mè.

²⁹Àfixèvi èvè be ègà mu sù ènu ɖe ò. Vɔ̀a, woa dòmètɔ ɖèka mu gɛ̃na, ne mu nyi mìa Tɔ be jro ò.

³⁰Eye èɖà kèwo lè èta na mìa ŋutɔ cã nyi ènu hɛ̃hlɛ̃.

³¹Ye ŋutia, mì mu gbà vɔ̃ ò! Đo mì xɔ̀ àsì wu àfixèviwo fuu.”

³²“Àmè ɖekpekpe àmè kè la gblɔ̃ lè àmèwo be ŋùmè be yè nyi nukplavi nyèa, nyè cã mù la gblɔ̃ lè Ètɔ nyè kè lè jiŋùkusia be ŋùmè be e nyi nukplavi nyè.

³³Vɔ̀a, àmè ɖekpekpe àmè kè la gbe ènu lè ŋuti nyè lè àgbètɔwo be ŋùmèa, nyè cã mù la gbe ènu lè nène mèa ŋuti lè Ètɔ nyè kè lè jiŋùkusia be ŋùmè.”

³⁴“Mì mu gbà susu be ŋutifàfa ye mù hɛ̃ va ànyigbã ji ò. Nyè mu hɛ̃ fàfa va ò, èwui ye mù hɛ̃ va.

³⁵Ɛ̃ɛ, mù va ne èvi-ŋusù ne sitè ɖo ètɔa ŋuti; ne èvi-nyɔ̃nù ne sitè ɖo ènɔa ŋuti; ne lɔ̃xoyɔvi nyɔ̃nù ne sitè ɖo lɔ̃xoa ŋuti,

³⁶eye àmè ŋutɔ be àxomètɔwo la nyi yebe kɛ̃tɔwo.

³⁷Àmè kè lɔ̃ ètɔa àlo ènɔa wu mùa, mu la teŋu nyi nukplavi nyè ò. Eye àmè kè lɔ̃ èvia ŋusù àlo èvia nyɔ̃nù wu mùa, mu jè la nyi nukplavi nyè ò.

³⁸Àmè kè mu sɔ yebe àtisògaa, jè yo nyè mè òa, mu jè la nyi nukplavi nyè ò.

³⁹Àmè kè la ji yebe àgbè a, la bu ì; vɔ̀a, àmè kè la bu yebe àgbè ɖo ŋuti nyèa, la gbìgbɔ̀ kpɔ ɛ̀.”

⁴⁰“Àmè kè xɔ̀ mìa, xɔ̀ mù, eye àmè kè xɔ̀ mùa, xɔ̀ àmè kè dɔ̃ mù ɖoɖaa.

⁴¹Àmè kè xɔ̀ Mawu be gblɔ̃ɖɛtɔ, ɖo e nyi Mawu be gblɔ̃ɖɛtɔ ŋutia, la xɔ̀ Mawu be gblɔ̃ɖɛtɔ be àjɔ̀; eye, àmè kè xɔ̀ àmèjɔ̀jɔɛ, ɖo e nyi àmèjɔ̀jɔɛ ŋutia, la xɔ̀ àmèjɔ̀jɔɛ be àjɔ̀.

⁴²Nyàwo mù le to na mì, àmè kè la na èsì fàfa kɔpò ɖèka nukplavi nyèwo dòmètɔ ɖe, ɖo e nyi nukplavi nyè ŋutia, mu la bu yebe àjɔ̀ ò.”