Read gen Màteo 13 Bible Online

Màteo 13 - gen bible

Màteo 13

¹Gbè ŋua gbè kea, Yesù to lè àxuea mè yì nɔ̀ ànyi lè ètɔ̀ to.

²Àmè kèwo va e gbɔa, wo sùgbɔ àlekè be, e ɖo ètɔ̀jihũ ɖe mè, eye be bɔ̀bɔ̀ nɔ̀ ànyi. Àmèawo kpata nɔ̀tè lè ètɔ̀a to.

³E pò nupo sùgbɔ na wo to èlododo mè. E gblɔ̃ na wo be: “Ènukuwutɔ ɖe to gbè ɖèka la yì do ènuku.

⁴Wàlɛbɛ kè be le wu ènukua ɖo àgblèa mèa, èɖewo hlɛ̃ jè èmɔ to, eye xèviwo va cã wo ɖù.

⁵Èɖewo gɛ̃ jè èkpe-nyigbã ji, àfi kè èkɔ mu sùgbɔ lè òa, wo ɖèbla mìɔ̃. Vɔ̀ kè èkɔ mu sùgbɔ lè funu òa,

⁶kè dɔ̃ŋùkusu toa, e fiɔ̃ wo, eye wo pu, ɖo woabe èkè mu yì gũ ò.

⁷Èbuwo hlɛ̃ jè àŋùjawo mè, eye kè wo sĩ gbãnà a, àŋùjawo mìɔ̃ cɔ̃ woa ji.

⁸Vɔ̀a, ènuku buwo jè ànyigbã nyuɛ̃ ji; woawo yaa wo sĩ, sɛ̃ èku nyuɛ̃ ɖe eye ènuku ɖèka sɛ̃ èku èkà èvè takpo; èɖe sɛ̃ èku èkà takpo; eye èbu cã sɛ̃ èku ègbã.

⁹Àmè kè si èto lèa ne sè è.”

¹⁰Yesù be nukplaviwo va e gbɔ, wo biɔ ɛ̀ be: “Nukɛ ŋuti ye wò le pò nupo na wo lè èlododo mè ɖo ò?”

¹¹Yesù ɖoeŋuti na wo be: “Mìawo yaa, wo na be mìa nya Mawu be fìɔdua be àmlìmànuwo, vɔ̀a, wo mu ɖè wo fiɔ woawo ya ò.

¹²Đo, àmè kè si ènu lèa, wo la gbà na ɛ̀ kpe è, eye ènu la nɔ̀ e si fuu. Vɔ̀a, àmè kè mu ɖo ènu ɖe òa, wo la gbà xɔ̀ vi tukui kè lè e sia cã.

¹³Ènu kè ŋuti mù le pò nupo na wo to èlododo mèa yeŋu; ɖo wo le kpɔ ènu, gãke ènu màkpɔtɔwo kpò ye wo nyi. Wo le sè ènu, gãke ènumàsètɔwo kpò ye wo nyi. Nènea ke wo mu ŋɔna jè ènu mè ò.

¹⁴Ne Mawu be gblɔ̃ɖɛtɔ Ezayà be ènyàa bèa zɔ̃ sù be: 'Mì la sè ènu nyuɛ̃ ɖe, vɔ̀a mì mu la ŋɔjè e mè ò; mì la kpɔ ènu nyuɛ̃ ɖe vɔ̀a, mì mu la jèsi ì kpɔ ò.

¹⁵Đo dùkɔ̃ kèa be èjì trì; wo tu woabe ètowo, wo miɔ̃ woabe ŋùkuviwo, ne wo mu gbà kpɔ ènu ò, wo tu woabe ètowo, ne wo mu gbà sè ènu ò. Wo wɔ̀ nènea ɖo wo mu le ji la ŋɔjè ènu mè, ne woa ɖɔ̀lì èdɛ̃, ne ma dà èdɔ̀ na wo ò.'”

¹⁶“Vɔ̀a, mìawo yaa, ènu nyɔ na mì, ɖo mìabe ŋùkuviwo le kpɔ ènu, eye mìabe ètowo le sè ènu.

¹⁷Nyàwo mù le to na mì be Mawu be gblɔ̃ɖɛtɔ sùgbɔ ku àmèjɔ̀jɔɛ sùgbɔ jro be yèwoa kpɔ ènu kèwo mì le kpɔa, vɔ̀a wo mu kpɔ wo ò. Wo ji be yèwoa sè ènu kèwo mì le sè a, vɔ̀a wo mu sè wo ò.”

¹⁸“Fifìa, mì ɖo èto èlo kè mù do na wo so ènukuwutɔa ŋutia be gɔ̃mèɖèɖe.

¹⁹Àmè kèwo sènà fìɔɖùɖua be ènyà, eye wo mu ŋɔna jè e mè òawo, lè sìgbè èmɔ kè to ènuku ɖewo jè a nène. Àmèvuɛ̃a vana eye e hɔ̃nà ènu kè wo wu ɖo woabe èjì mèa jo.

²⁰Àmè buwo lè sìgbè èkpe nyigbã kè ji ènukuawo jè a nène. Wo ɖona èto ènyàa eye wo xɔ̀nà e ji sè zè ɖèka ku jìjɔɛ,

²¹vɔ̀a, wo mu nana èmɔ ènyàa linakè lè woa mè ò. Wo mu lena ènyàa ɖo àsi dìdi ɖe ò. Ne wo le ɖè èfũ na wo, àlo ne wo le tĩ woa yomè ɖo mawunyaa ŋutia, wo trɔna lè ènu kè wo xɔ̀sèa yomè zè ɖèka.

²²Àmè buwo cã xɔ̀nà Mawu be fìɔdua be ènyàa vɔ̀a, xixe kèa mè be tùkaɖawo ku yebe àmèfùflu be àdɔ̀kùnuwo jojro jãna ènyàa, eye mu teŋu wɔ̀nà èdɔ lè woa mè ò. Woawo ye lè sìgbè ènuku kèwo jè àŋùja mèa nène.

²³Vɔ̀a, àmè kèwo xɔ̀ ènukua ɖo ànyigbã nyuɛ̃ jia, wo ye nyi àmè kèwo sè ènyàa, eye wo ŋɔjè e mèa. Wo sɛ̃na èku. Àmè ɖewo nana èku èkà èvè takpo, àmè buwo nana èku èkà takpo, eye àmè buwo cã nana èku ègbã.”

²⁴Yesù gbà do èlo bu na wo be: “Mawu be fìɔdua lè sìgbè àmè kè do ènuku nyuɛ̃wo ɖèɖe ɖo yebe àgblè mèa nène.

²⁵Wàlɛbɛ kè àmèwo le dɔ̃ àlɔ̃a, yebe kɛ̃tɔ va, èzã mè, va do ègbe vuɛ̃wo ɖo àgblèa mè, trɔjo.

²⁶Wàlɛbɛ kè ènukuawo sĩ, tɔ èku sɛ̃sɛ̃ a, wo kpɔ be ègbe vuɛ̃wo cã lè woa dòmè.

²⁷Àmè kè tɔ̀ ye nyi àgblèa be sumɔ̃viwo va e gbɔ, to na ɛ̀ be: 'Àpetɔ, mu nyi ènuku nyuɛ̃wo ɖèɖe ye wò do ɖo àpo àgblèa mèa? Fikɛ ye ègbe vuɛ̃wo so va to ɖo woa mè ò?'

²⁸E ɖoeŋuti na wo be: 'Èkɛ̃tɔ be ènu wɔ̀wɔ ye be nyi.' Vɔ̀a, sumɔ̃viawo biɔ ɛ̀ be: 'Wò ji be mia yì gã ègbe vuɛ̃awoa?'

²⁹E gbe na wo be: 'Aò! Đo ne mì le gã ègbe vuɛ̃awoa, mì teŋu va yì gã ènuku nyuɛ̃awo cã.

³⁰Mì tàsi wo ne woa sĩ ɖodu. Ne ènukuyàya be hùenu ɖoa, mù la to na ènukuyàtɔwo be: mì ɖè ègbe vuɛ̃awo jo cucugbã, ne mìa bla wo èta èta, eye woa tɔ wo èzò. Vɔ̀a, mì lɔ ènuku nyuɛ̃awo ɖo àpe àvà ji.'”

³¹Yesù gbà do èlo na wo be: “Mawu be fìɔdua lè sìgbè lokòku nène. Ŋusù ɖe sɔ àtiku kèa do ɖo yebe àgblè mè.

³²Àtiku ŋua wlì wu àtikuwo kpata, vɔ̀a, kè be sĩa, yebe àtia yì èji wu àtiwo kpata, eye àyamè xèviwo va wɔ̀nà àtɔ̃wo ɖo yebe àlɔ̀zɛ̃wo mè.”

³³Yesù do èlo bu na wo be: “Mawu be fìɔdua lè sìgbè *mawɛhuãnu[22] kè nyɔ̃nù ɖe sɔ do èwɔ jijenu ètɔ̃ mè, àlekè be èmaa kpata huãa nène.”

³⁴Yesù gblɔ̃ ènu kèawo keŋu na àmèhaawo to èlododo mè, eye mu gblɔ̃ ènu ɖekpe na wo kè mu nyi lè èlododo mè ò,

³⁵ne ènyà kè Mawu be gblɔ̃ɖɛtɔa gblɔ̃ ɖɛa bèa zɔ̃ sù be: “Mù la kè ènu, la pò ènu na wo to èlododo mè; mù la gblɔ̃ ènu kèwo lè wawla so wàlɛbɛ kè wo ɖo xixea ànyia na wo.”

³⁶Wàlɛbɛ ŋua, ekè Yesù tàsi àmèhaa, e yì àxomè. Yebe nukplaviwo va e gbɔ, gblɔ̃ na ɛ̀ be: “Đè èlo kè wò do so ègbe vuɛ̃ a ŋutia gɔ̃mè na mi.”

³⁷Eye Yesù ɖoeŋuti na wo be: “Àmè kè do ènuku nyuɛ̃a, ye nyi *Àgbètɔ be Èvia.

³⁸Àgblèa ye nyi xixea. Nuku nyuɛ̃awo ye nyi Mawu be fìɔdua be èviwo. Ègbe vuɛ̃awo ye nyi àmè vuɛ̃ a be èviwo.

³⁹Èkɛ̃tɔ kè do ègbe vuɛ̃woa, ye nyi Àbòsam. Ènukuyàya hùenua, ye nyi xixea be vɔ̀vɔnu. Ènukuyàtɔawo ye nyi Mawu be àtikplɔtɔwo.

⁴⁰Ye ŋutia, sìgbè àlekè wo blana ègbe vuɛ̃wo, tɔna wo èzòa, nènea ke ye be la nyi lè xixea be vɔ̀vɔnua yeŋu.

⁴¹*Àgbètɔ be Èvia la dɔ̃ yebe àtikplɔtɔwo ɖoɖa, eye wo la va cã àmè kèwo kplɔ̀nà àmè ɖo ènuvuɛ̃ mèa kpata ku ènuvuɛ̃wɔ̀tɔwo jo lè yebe fìɔdua mè.

⁴²Wo la lɔ wo kɔ̀ ɖo èzò mè. Funua ye àvi fãfã ku àɖuklui ɖùɖu la nɔ̀.

⁴³Wàlɛbɛ ŋua, àmè jɔ̀jɔɛwo, la nɔ klɛ̃ sìgbè èwè nène, lè woa Tɔ be fìɔdua mè. Àmè kè si èto lèa, ne sè è.”

⁴⁴“Mawu be fìɔdua lè sìgbè àdɔ̀kùnu kè wo sɔ wla ɖo àgblè ɖe mè, eye ŋusù ɖe va kè ɖo e ŋuti, gbà sɔ ɛ̀ wlaa nène. Èjì jɔ̀ ɛ̀ ŋutɔ eye, lè yebe jìjɔ̀ɛ a mèa, e yì sà ènu kèwo keŋu lè e siawo, sɔ ègà kè be kpɔa, va plè àgblèa.”

⁴⁵“Wo gbà sɔ Mawu be fìɔdua sɔ̀ ku ŋusù àjɔdotɔ ɖe kè le ji jònu nyuɛ̃woa.

⁴⁶Kè ŋusù kèa kè ɖo jònu xɔ̀ àsìa ŋutia, e sà ènu kèwo keŋu lè e sia sɔ plè jònua.”

⁴⁷“Wo gbà sɔ Mawu be fìɔdua sɔ̀ ku èɖɔ kè wo dà ɖo ètɔ̀ mè, eye e le èlãvi hamè hamèwoa.

⁴⁸Eye wàlɛbɛ kè e ɖɔa, wo dɔ̃ ɛ̀ va àgo, wo nɔ̀ ànyi, eye wo cã èlã nyuɛ̃awo ɖo àjàfiwo mè, vɔ̀ wo lɔ màɖù màɖuawo kɔ̀ ŋùgbe.

⁴⁹Nènea ke ye e la nyi lè xixea be vɔ̀vɔnu. Mawu be àtikplɔtɔwo la va eye wo la cã àmè jɔ̀jɔɛwo lè àmè màjɔ̀ màjɔwo dòmè.

⁵⁰Wo la lɔ àmè vuɛ̃awo kɔ̀ ɖo èzò màvɔ mè. Funu ye àvi fãfã ku àɖuklui ɖùɖu la nɔ̀.”

⁵¹Yesù biɔ yebe nukplaviwo be: “Mì ŋɔjè ènu kèawo kpata mèa?” Wo ɖo e ŋuti na ɛ̀ be: “Ɛ̃ɛ.”

⁵²Vɔ̀a, Yesù gblɔ̃ na wo be: “Èsefiɔtɔ ɖekpekpe kè trɔzũ Mawu be fìɔɖùɖua be nukplavia, lè sìgbè àxuetɔ ɖe kè ɖènà ènu yeyewo ku ènu xoxowo to lè yebe àdɔ̀kùnuwo mèa nène.”

⁵³Kè Yesù do èlo kèawo vɔ̀a, e jo lè funu,

⁵⁴va yì èdù kè mè be sĩ lèa mè. E tɔ ènufiɔfiɔ àmèwo lè bɔ̀bɔ̀pe kè lè funua, àleke be àmè kèwo le sè a, wo kã yàa, eye wo gblɔ̃ be: “Fikɛ be yì ji ènunya ŋua so ò? Fikɛ ye be yì ji ŋusɛ̃ kè be sɔ lè wɔ̀ ŋùdãdɔ ŋuawo so ò?

⁵⁵Mu nyi àtikpàtɔa be èvia yeŋuã? Mu nyi Maria ye nyi ènɔa òa? Mu nyi nɔ̀via ŋusùwo ye nyi Yakobò ku Yosɛ̀f kudo Simɔ̀n gbàkudo Yudà òa?

⁵⁶Nɔ̀via nyɔ̃nùwo cã mu lè mia dòmè òa? Fikɛ ŋutɔ ye be yì ji ŋusɛ̃ ŋua so ò?”

⁵⁷Eye e nyi àfɔ̀klɛ̃nu na wo. Vɔ̀a, Yesù gblɔ̃ na wo be: “Gblɔ̃ɖɛtɔa, ye ŋutɔ be èdù mè ku ye ŋutɔ be àxomè kpò ye bùbu mu nɔ̀nà e ŋuti lè ò.”

⁵⁸Yesù mu wɔ̀ nùkunu sùgbɔ lè funua ò, ɖo woabe màxɔ̀sè ŋuti.