Read gen Màteo 14 Bible Online

Màteo 14 - gen bible

Màteo 14

¹Wàlɛbɛ ŋuaa, ekè Herod le ɖùfìɔ lè Galileaa, e sè ènu kèwo Yesù le wɔ̀a,

²eye e to na yebe sumɔ̃viwo be: “Ŋusù kèa ye nyi Yòhanɛ̀s Mawusilènamètɔa. E ye fɔ̃ so èku, ènu kèa ŋuti be ɖo ŋusɛ̃ le wɔ̀ ŋùdãdɔ kèawo.”

³Jè ŋùkɔ̀a, Herod le Yòhanɛ̀s, bla ɛ̀, sɔ ɛ̀ do ègàkpa mè, ɖo Herodia, nɔ̀via Filipò be èsrɔ̃ ŋuti.

⁴Đo a, Yòhanɛ̀s gblɔ̃ na Herod be: “Mu sɔ̀gbè be wòa xɔ̀ nɔ̀vi wò be èsrɔ̃ ɖè ò.”

⁵Herod le ji la wù Yòhanɛ̀s vɔ̀a, e le vɔ̃, ɖo dùkɔ̃a sɔ ɛ̀ sìgbè Mawu be gblɔ̃ɖɛtɔ nène.

⁶Vɔ̀a, e va va e mè be Herod le ɖù yebe jìgbèzã, gbè ɖèka, eye Herodia be èvi nyɔ̃nù va ɖu èwè lè àmèkpekpeawo be ŋùkɔ̀. Yebe èwèɖuɖua nya kpɔkpɔ na Herod ŋutɔ,

⁷eye, be fìã àjɔ̀gbè na nyɔ̃nùvia, kã àtãŋu na ɛ̀ be, ènu ɖekpekpe kè be la biɔ yèa, yè la na ɛ̀.

⁸Nènea ye, nyɔ̃nùvia be ènɔ̀ pò ètoɖo na nyɔ̃nùvia, eye nyɔ̃nùvia gblɔ̃ na Herod be: “Na mù Yòhanɛ̀s Mawusilènamètɔa be èta ɖo àgbã gbɛjɛ mè, lè fikèa fifì jɛ̃.”

⁹Àkpɔ̃ ɖɔ èfìɔa, vɔ̀a, ɖo àtãŋu kè be kãa ku àjɔ̀gbè kè be fìã lè àmè kèwo be kpeawo be ŋùmè ŋutia, e na ègbè

¹⁰be, woa yì ègàkpaa mè, ne woa sò Yòhanɛ̀s be èta.

¹¹Wo sò Yòhanɛ̀s be èta ɖo àgbã gbɛjɛ mè va na nyɔ̃nùvia, eye, be sɔ ètaa yì na ènɔaa.

¹²* Yòhanɛ̀s be nukplaviwo va sɔ Yòhanɛ̀s be àmèkpòtia yì ɖì. E yomèa, wo yì gblɔ̃ ènu kè jɔ̀ a na Yesù.

¹³Kè Yesù sè ènyà kèa, e ɖo ètɔ̀jihũ, yì tèpe ɖe kè àmè mu lè òa, lè àsà mè. Vɔ̀a, àmèwo sè, eye wo nya àfi kè be le yìa, eye wo zɔ̃ àfɔ̀ so woabe èdùwo mè, jè e yomè.

¹⁴Kè Yesù to lè ètɔ̀jihũa mèa, e kpɔ àmèha gãɖe, eye woabe ènu wɔ̀ ŋuzĩzĩ na ɛ̀. E dà èdɔ̀ na dɔ̀nɔ̀kplibɔ kèwo lè woa dòmèa.

¹⁵Kè wètrɔ ɖoa, Yesù be nukplaviwo va e gbɔ. Wo to na ɛ̀ be: “Àfi kè mi lèa, mu sɔ̀ lè èdù ɖe gbɔ ò. Èzã cã lè do. Đo àmèawo ɖoɖa kɔpewo mè, ne woa yì ji ènu ɖe ɖù.”

¹⁶Vɔ̀a, Yesù ɖoeŋuti na wo be: “Mu lè veve ɖe be woa jo ò. Mìa ŋutɔwo mì na wo ènu ne woa ɖù.”

¹⁷Vɔ̀a, wo gblɔ̃ na ɛ̀ be: “Kpɔ̃nɔ àtɔ̃ ku tɔ̀mèlã èvè kpò ye lè mia si lè fikèa.”

¹⁸Yesù gblɔ̃ na wo be: “Mì sɔ wo va na mù.”

¹⁹E ɖè ègbè na àmèawo be woa nɔ̀ ànyi ɖo ègbeawo ji. E sɔ kpɔ̃nɔ àtɔ̃awo ku tɔ̀mèlã èvèawo; eye e kɔ ŋùmè yì ji, pòɖɛ̀ ɖo woa ji. E yomèa, e kã kpɔ̃nɔawo, sɔ wo na yebe nukplaviwo ne woa ma na wo.

²⁰Àmè sia àmè ɖù ènu ɖɔpò; eye ènu ɖùɖua gbà kpɔ̀tɔ̀. Wo cã ènu ɖùɖu kè kpɔ̀tɔ̀a, eye e ɖɔ àjàfi woèvè.

²¹Àmè kèwo ɖù ènuawo la nɔ̀ sìgbè ŋusù hotu èvè èkà èwì vɔ àtɔ̃ nène; gãke wo mu hlɛ̃ nyɔ̃nùwo ku ɖèviwo ɖo e mè ò.

²²Ekèa yomè troloa, Yesù zĩ yebe nukplaviwo ji be wo ne ɖo ètɔ̀jihũa mè, jè ŋùkɔ̀ na yè, yì àgo ɖèa ji, wàlɛbɛ kè yè la nɔ̀ ɖo àmèhaa.

²³Kè be ɖo àmèawo vɔ̀a, e yì èto ɖe ji, lè àsàmè, ne bèa fãkue. Èzã do, eye ye ɖèka pɛɛ ci funua.

²⁴Ètɔ̀jihũa ɖo ètɔ̀a be dòdòmè vɔ̀, eye àsrɔ̀kewo lè nyàmà ɛ̀, ɖo wo le kpe àya.

²⁵Lè fɔ̃fɔ̃ mèa, Yesù zɔ̃ to ètɔ̀a ji, tùtà yebe nukplaviwo gbɔ.

²⁶Kè yebe nukplaviwo kpɔ be e le zɔ̃ lè ètɔ̀a jia, vɔ̃vɔ̃ ɖo wo, eye wo tɔ àpa dodo be: “Ŋùãlì ye.”

²⁷Vɔ̀a, Yesù gblɔ̃ na wo be: “Àgbɔ̃ ne jèpò na mì. Mì mu gbà vɔ̃ ò, ènyè ye.”

²⁸Petrò ɖoeŋuti na ɛ̀ be: “Àpetɔ, ne èwò ye à, na ne ma zɔ̃ ètɔ̀a ji va gbɔ wò.”

²⁹Yesù gblɔ̃ na ɛ̀ be: “Va!” Petrò to lè ètɔ̀jihũa mè, tɔ zɔ̃zɔ̃ lè ètɔ̀a ji, le yì Yesù gbɔ.

³⁰Vɔ̀a, kè be kpɔ be àya gbà le pò sɛ̃sɛ̃ɖe kpe èa, vɔ̃vɔ̃ ɖo è, eye be tɔ nyɔ̀nyrɔ̃. E do àpa be: “Àpetɔ, hlùɛ̃ mù gã!”

³¹Troloa, Yesù vlũ àlɔ̀ ɖoɖa Petrò, le è, gblɔ̃ na ɛ̀ be: “Èwò xɔ̀sèvitɔ, nukɛ ŋuti ye wò do àɖìkà ɖo ò?”

³²Kè Yesù ku Petrò ɖo èhũa mèa, àyaa tɔtè.

³³Àmè kèwo lè ètɔ̀jihũa mèa, wo va jè èklò blìbɔ̀ na Yesù, wo gblɔ̃ na ɛ̀ be: “Mawu be Èvi ye wò nyi nyàwo.”

³⁴Kè wo jè àgo ɖèa jia, wo va Genezarɛtè be ànyigbã ji.

³⁵Kè àmè kèwo lè funua kpɔ ɛ̀ jèsia, wo do àŋɛ̀ ɖoɖa àmè kèwo keŋu lè àgo ŋua jia, eye wo kplɔ̀ dɔ̀nɔ̀wo kpata va na ɛ̀.

³⁶Wo ɖè kuku na ɛ̀ be, bèa na dɔ̀nɔ̀wo, woa tɔ àsi yebe àwù be ètomè kpò; eye, àmè nène kèwo tɔ ɛ̀ àsiawo gã.