Read gen Màteo 15 Bible Online

Màteo 15 - gen bible

Màteo 15

¹Wàlɛbɛ ŋuaa, Farizìwo ku Èsefiɔtɔwo so Yèruzàlɛm va Yesù gbɔ. Wo biɔ ɛ̀ be:

²“Nukɛ ŋuti ye àpo nukplaviwo mu zɔ̃nà ɖo tɔgbewo be èkɔ̀dowo[23] ji ò? Đo wo mu klɔna àsi gbɔ̀xue ɖùnà ènu ò.”

³Yesù ɖoeŋuti na wo be: “Nukɛ ŋuti ye mìawo yaa mì dànà lè Mawu be èsewo ji, vɔ̀ wɔ̀nà ènu kèwo mìabe èkɔ̀nuwo ɖoa ò?

⁴Đo Mawu gblɔ̃ be: 'Bù ètɔ wò ku ènɔ̀ wò', eye ne 'Àmè ɖe sɛ̃kpɛ̃ na ètɔa àlo ènɔaa, e jè na èku.'

⁵Vɔ̀a, mìawo yaa, mì gblɔ̃nà be ne àmè ɖe gblɔ̃ na ètɔa àlo ènɔa be: 'Àlɔ̀do kè mù ɖo la na wòa, mù sɔ ɛ̀ ɖo ànyi na Mawu a',

⁶mu gbà lè veve ɖe be àmè ŋua bèa do àlɔ̀ ètɔa ò. Eye nènea, mì crìnà Mawu be èseawo, eye mì sɔ mìa tɔgbewo be èkɔ̀dowo ɖona woa tèpe.

⁷Mì, àyèmènuwɔ̀tɔ kèawo! Ènyà kè Ezayà gblɔ̃ ɖɛ so mìa ŋutia zɔ̃ sù be:

⁸'Dùkɔ̃ kèa le kafu mù ku ènu kpò, vɔ̀a, yebe èjì lè boo lè gbɔ nyè.

⁹Wo be yèwo le sɛ̃ mù vɔ̀a, ènu gbalo kpò wo le wɔ̀, ɖo, àgbètɔwo be *èse ye nyi ènu kè wo le fiɔa.'”

¹⁰Yesù yɔ àmèhaa, gblɔ̃ na ɛ̀ be: “Mì ɖo èto ne mìa ŋɔjè e mè.

¹¹Mu nyi ènu kè yì ènu mèa, ye pònàɖi àmè ò, vɔ̀a, ènu kè tona so àmè be ènu mèa ye pònàɖi ì.”

¹²Eŋuã yomèa, Yesù be nukplaviwo tètè gogo è, eye wo gblɔ̃ na ɛ̀ be: “Wò nya be ènyà kè wò gblɔ̃a, ve àdɔ̀mè na Farizìwoa?”

¹³Yesù ɖoeŋuti na wo be: “Àti sia àti kè Ètɔ nyè kè lè jiŋùkusia mu do òa, wo la hɔ̃ ɛ̀ jo.

¹⁴Mì tàsi wo, ŋùvìnɔ̀wo ye wo nyi, eye wo gbà le kplɔ̀ ŋùvìnɔ̀wo. Ne ŋùvìnɔ̀ ɖe le kplɔ̀ ŋùvìnɔ̀ bua, wo àmè èvèawo kpata, wo la gɛ̃ jè èdo mè.”

¹⁵Eye Petrò gblɔ̃ na ɛ̀ be: “Đè èlododo kèa gɔ̃mè na mi.”

¹⁶Eye Yesù gblɔ̃ be: “Mìawo cã mì gbà dã ènu kèa gɔ̃mè sèsea?

¹⁷Mì mu nya be ènu ɖekpekpe kè ɖo ènu mèa, yìnà pòdo mè, eye wo dènà ɛ̀ lè kpagodo òa?

¹⁸Vɔ̀a, ènu kè tona so ènu mèa, èjì mè ye be sona, e ye pònàɖi àmè.

¹⁹Đo èjì mè ye susu vuɛ̃wo sona, èhlɔ̃dãdãwo, *àhasìwɔ̀wɔwo, àmèsrɔ̃ jijiwo, èfĩfìfiwo, àjè ɖaseɖùɖuwo, àmèzũzũwo.

²⁰Ekèawo ye nyi ènu kèwo pònàɖi àmèa, vɔ̀a ènu ɖùɖu àsimàklɔa, mu pònàɖi àmè ò.”

²¹Yesù jo lè funua, yì Tirò ku Sidɔ̀n be àgowo ji.

²²Kanàn be nyɔ̃nù ɖe so àgo ŋua ji va Yesù gbɔ. E tɔ àpa dodo be: “Àpetɔ, *David be Èvi, ku ŋuzĩzĩ na mù, ɖo, èvi nyè nyɔ̃nùvi, le sè veve eye be le ɖù àyà ŋutɔ so gbɔ̃gbɔ̃ vuɛ̃ si mè.”

²³Vɔ̀a, Yesù mu kè ènu do e mè na nyɔ̃nùa ò. Yebe nukplaviwo gblɔ̃ na ɛ̀ be: “Nyà nyɔ̃nùa jo, ɖo e le do àpa lè mia yomè wu nu.”

²⁴Yesù ɖoeŋuti be: “Izràɛl be ègbɔ bubuwo gbɔ ye wo dɔ̃ mù ɖoɖa.”

²⁵Vɔ̀a, nyɔ̃nùa va jè èklò ɖo Yesù be ŋùkɔ̀, eye be gblɔ̃ be: “Àpetɔ, do mù àlɔ̀.”

²⁶Yesù ɖoeŋuti na ɛ̀ be: “Mu jè be woa sɔ ɖèviwo be ènu ɖùɖu na àvũwo ò.”

²⁷Eye nyɔ̃nùa gblɔ̃ be: “Nyàwo ye Àpetɔ, gãke àvũviwo ɖùnà ènu ɖùɖu kèwo hlɛ̃na so woabe àpetɔwo be èkplɔ̃ jia.”

²⁸Wàlɛbɛ ŋua, Yesù ɖoeŋuti na ɛ̀ be: “Oò! Nyɔ̃nù, xɔ̀sè wòa lòlò! Ènu kè wò jro a, ne va e mè na wò.” Nyɔ̃nùa be èvia gã trolo, lè gà ŋua mè ke.

²⁹Yesù jo lè funu, yì Galilea be ètɔ̀a to. E lia èto ɖe ji, eye be nɔ̀ ànyi.

³⁰Àmè sùgbɔ va e gbɔ. Wo kplɔ̀ àmè kèwo nyi kpòtɛ̃wo, ŋùvìnɔ̀wo, àmumuiwo, dɔ̀nɔ̀kplibɔwo ku dɔ̀nɔ̀ buwo cã bɔ̀ ɖo woa ɖokoewo ŋuti va, eye wo sɔ wo ɖo Yesù be ŋùkɔ̀. Yesù dà èdɔ̀ na woa kpata.

³¹Kè àmèawo kpɔ be àmumuiwo cã le pò nupo nyuɛ̃ ɖe, dɔ̀nɔ̀kplibɔwo gã, kpòtɛ̃wo le zɔ̃, eye ŋùvìnɔ̀wo cã le kpɔ ènua, wo na gogo Izràɛl be Mawu a.

³²Yesù yɔ yebe nukplaviwo, gblɔ̃ na wo be: “Àmè kèawo be ènu wɔ̀ ŋuzĩzĩ na mù, ɖo so ŋùkèkè ètɔ̃ sɔ̃ŋu ye wo lè ku mù. Vɔ̀a, wo mu ɖo ènu ɖekpe la ɖù ò. Nyè mu jro la ɖo wo ɖoɖa, ènu màɖù ò: gbàfà[24] teŋu pò wo lè èmɔ ji.”

³³Yebe nukplaviwo gblɔ̃ na ɛ̀ be: “Fikɛ mi la kpɔ ènu ɖùɖu lè, lè zògbè kèa ji fifì, ne bèa sù àmè gbogbo kèawo nu, ne woa ɖù la ɖɔpò ò?”

³⁴Eye, Yesù gblɔ̃ na wo be: “Kpɔ̃nɔ nenè ye lè mìa si ò?” Eye wo to na ɛ̀ be: “Kpɔ̃nɔ adrɛ̃ ku èlãvi wuiwli ɖewo ye lè mia si.”

³⁵Yesù ɖè ègbè be àmèhaa ne nɔ̀ ànyi.

³⁶E sɔ kpɔ̃nɔ adrɛ̃awo ku èlãviawo, eye e do àkpe na Mawu. E yomèa, e kã wo, sɔ wo na yebe nukplaviwo, eye nukplaviawo ma wo na àmèawo.

³⁷Àmè sia àmè ɖù ènu, ɖɔpò, eye Yesù be nukplaviwo va lɔ ènu kèwo àmèawo ɖù kpɔ̀tɔ̀a ɖo àjàfi adrɛ̃ mè, eye àjàfiawo ɖɔ.

³⁸Àmè kèwo ɖù ènua, lè nyi ŋusù hotu èvè, vɔ̀a, wo mu hlɛ̃ nyɔ̃nùwo ku ɖèviwo ò.

³⁹E yomèa, Yesù ɖo àmèhaa ɖoɖa, eye be ɖo ètɔ̀jihũ ɖe mè yì Magadàn [25] be àgowo ji.