Read gen Màteo 16 Bible Online

Màteo 16 - gen bible

Màteo 16

¹Eye Farizìwo ku Sadusìwo va e gbɔ ne woa tè è kpɔ. Wo biɔ ɛ̀ be, bèa ɖè ŋùdã jèsì ɖe kè so Mawu gbɔa fiɔ yèwo.

²Vɔ̀a, Yesù ɖoeŋuti na wo be: “Ne fìɛ̃si ɖo, eye xixea mè ci hɛ̀ɛa, mì gblɔ̃nà be: 'Xixea mè la kɔ̀ èsɔ̀ kè gbãnà a.'

³Nènea ke ye ne èŋù kè, eye xixea mè bìa, gbà cɔ̃a, mì gblɔ̃nà be: 'Èji la jà egbè, ɖo jiŋùkusi bìa, gbà ɖɔ ku lilikpowo.' Ne xixea mè la nɔ̀ ɖo ɖe a, mì kpɔna ɛ̀, eye mì nyana ɛ̀. Vɔ̀a, ne mì kpɔ hùenu kè mè mi lèa be jèsìwoa, mì mu teŋu nyana wo ò[26].

⁴Egbè be jìjimè vuɛ̃, màwɔ̀ ànùkua kè le ji ŋùdã jèsìa mu la kpɔ jèsì bu sɔ wu Yonà[27] be jèsìa ò.” Kè Yesù gblɔ̃ ènyà kèa, e gble wo ɖɛ eye be jo.

⁵Ekè nukplaviawo yì ètɔ̀a be àgo ɖèa jia, wo mu ɖoŋù sɔ kpɔ̃nɔ ɖo àsi ò.

⁶Yesù gblɔ̃ na wo be: “Mì kpɔ nyuɛ̃ ɖe, ne mìa jè àyè na Farizìwo ku Sadusìwo be *mawɛhuãnu.”

⁷Wo gblɔ̃ lè woa nɔ̀nɔwo dòmè be: “Kpɔ̃nɔ kè mi mu ɖoŋù sɔ òa ye ŋuti be le gblɔ̃ ènyà kèa na mi ɖo.”

⁸Yesù nya ènu kè wo le gblɔ̃ lè woa nɔ̀nɔwo dòmèa, eye, be to na wo be: “Mìa xɔ̀sèvitɔ kèawo! Nukɛ ŋuti mì le gblɔ̃ lè mìa nɔ̀nɔwo dòmè be: kpɔ̃nɔ kè mi mu sɔ òa, ŋuti ye ò?

⁹Mì mu kpɔ ŋɔjè e mè hàɖe òa? Mì mu ɖo ŋùkuvi kpɔ̃nɔ àtɔ̃ kè ŋusù hotu èvè èkà èwì vɔ àtɔ̃awo ɖùa, ku àjàfi nenè kè mè mì cã ènu ɖùkpɔ̀tɔ̀awo ɖo òa?

¹⁰Mì mu gbà ɖo ŋùkuvi kpɔ̃nɔ adrɛ̃ kè ŋusù hotu èvèawo ɖùa, ku àjàfi nène kè mè mì cã ɖùkpɔ̀tɔ̀awo ɖo òa?

¹¹Àleke wɔ̀ mì mu ŋɔjè e mè be, mu nyi kpɔ̃nɔ ŋuti ye mù le pò nupo na mì so ò? Ɛ̃ɛ, mù be, mìa jè àyè na Farizìwo ku Sadusìwo be isìa[28].”

¹²Wàlɛbɛ ŋua ye wo ŋɔjè e mè be mu nyi kpɔ̃nɔ be *mawɛhuãnu ŋuti be le pò nupo so ò, vɔ̀ bòhũa, Farizìwo ku Sadusìwo be ènufiɔfiɔ ŋuti ye.

¹³Kè Yesù va Kayizarèa be àgo kè nyi Filipò tɔ̀a jia, e biɔ yebe nukplaviwo be: “Àmè kɛ ye àmèwo gblɔ̃nà be *Àgbètɔ be Èvia nyi ò?”

¹⁴Wo ɖoeŋuti na ɛ̀ be: “Àmè ɖewo gblɔ̃nà be, Yòhanɛ̀s Mawusilènamètɔa ye wò nyi, àmè buwo gblɔ̃nà be, Èli ye wò nyi, eye àmè ɖewo cã gblɔ̃nà be, Yeremìa àlo Mawu be gblɔ̃ɖɛtɔwo dòmè tɔ bu ye wò nyi.”

¹⁵Eye Yesù biɔ wo be: “Mìawo ya ɖe, àmè kɛ ye mì gblɔ̃nà be mù nyi ò?”

¹⁶Simɔ̀n Petrò ɖoeŋuti be: “Èwò ye nyi Mɛ̀sia, Mawu àgbè-àgbè a be Èvi.”

¹⁷Eye Yesù gblɔ̃ na ɛ̀ be: “Sìtume ye wò nyi Simɔ̀n, Yòhanɛ̀s be èvi, ɖo mu nyi ŋutilã ku èhũ ye ɖè ènu kèa fiɔ wò ò, vɔ̀a, Ètɔ nyè kè lè jiŋùkusia ye.

¹⁸Eye nyè cã mù le to na wò be, Petrò, nyikɔ wòa be gɔ̃mè ye nyi Àkpã, eye àkpã kèa ji ye mù la li èhabɔ̀bɔ nyèa ɖo, eye èkuwode be ŋusɛ̃ mu la teŋu ɖù ji wò ò.

¹⁹Mù la sɔ Mawu be fìɔdua be sãfewo do àsi na wò, eye ènu ɖekpekpe kè wò la bla lè ànyigbã jia, wo la bla ɛ̀ lè jiŋùkusi, eye ènu ɖekpekpe kè wò la tu lè ànyigbã jia, wo la tu ì lè jiŋùkusi.”

²⁰E yomèa, e do *èse na yebe nukplaviawo be, wo mu gbà gblɔ̃ na àmè ɖekpe be èyè, ye nyi Mɛ̀siaa ò.

²¹Sɔ so gà ŋua mèa, Yesù tɔ gbɔ̃gblɔ̃ na yebe nukplaviwo be yè ɖo la yì Yèruzàlɛm, la kpe èfũ sùgbɔ so èdùmèmègãwo, * mawunɔ gãwo ku èsefiɔtɔwo si. Wo la wù yè, eye lè ŋùkèkè ètɔ̃gɔ̃a gbèa, Mawu la fɔ̃ yè so èku.

²²Wàlɛbɛ ŋua, Petrò kplɔ̀ Yesù yì àzɔ̀ge, gbe ènyà na ɛ̀ be: “Mawu mu gbà jro ò, Àpetɔ, ekèa mu la kpe wò ò.”

²³Vɔ̀a, e trɔ, eye e to na Petrò be: “Bu lè gbɔ nyè, Satànà, wò le nyi àfɔ̀klɛ̃ na mù, ɖo mu nyi Mawu be ènuwo ye wò susu ò, vɔ̀a ènu kèwo nyi àgbètɔwo tɔ̀a ye.”

²⁴Wàlɛbɛ ŋua, Yesù gblɔ̃ na yebe nukplaviwo be: “Ne àmè ɖe jro la jè yo nyè mèa, ne gbe ye ɖokoe, ne sɔ yebe àtisòga, ne bèa kpàsà mù do.

²⁵Đo àmè ɖekpekpe kè jro la hlùɛ̃ yebe àgbè a, la bu ì, eye àmè ɖekpekpe kè la bu yebe àgbè ɖo ŋuti nyèa, la kpɔ ɛ̀.

²⁶Àlè kɛ ye e la ɖè na àgbètɔ, ne xixe kplògòdòa nyi ye tɔ̀, vɔ̀a, be bu yebe klaa ò? Àlo nukɛ ye àgbètɔ la sɔ ɖɔ̀lì yebe klaa ò?

²⁷Đo *Àgbètɔ be Èvia la va lè Ètɔa be gogo mè ku yebe àtikplɔtɔwo, eye wàlɛbɛ ŋua, e la na àjɔ̀ àmè sia àmè sìgbè àlekè yebe èdɔwo zɔ̃ ɖoa nène.

²⁸Nyàwo mù le to na mì, àmè ɖewo lè mìa dòmè lè fikèa fifì, ekèwo mu la ɖɔ èku kpɔ, kaka wo la kpɔ Àgbètɔ be Èvia gbãnà lè yebe èfìɔɖùɖua mè ò.”