Read gen Màteo 2 Bible Online

Màteo 2 - gen bible

Màteo 2

¹Wo jì Yesù lè Bɛtlɛhɛ̀m, lè Yudeà nyigbã ji lè èfìɔ Herod be hùenu. Wàlɛbɛ ŋua, ènunyatɔ kèwo kùnà ènu mè to wètriviwo jia, ɖewo so èwèzɛ̃pe va Yèruzàlɛm.

²Wo biɔ sè be: “Fikɛ Yudàviwo be èfìɔ kè wo jìa lè ò? Đo mi kpɔ wètrivi kè ɖè yebe jìji fiɔa, lè èwèzɛ̃pe, eye mi va be mia jè *èɖɛ̀ na ɛ̀.”

³Ekè èfìɔ Herod sè ènyà kèa, àgbɔ̃ ci ji na ɛ̀, eye be ci ji na Yèruzàlɛmtɔwo kpata.

⁴E yɔ * mawunɔ gãwo ku èsefiɔtɔwo kpata bɔ̀, biɔ wo be: “Fikɛ wo ɖo la jì Mɛ̀siaa lè ò?”

⁵Wo ɖoeŋuti na ɛ̀ be: “Wo la jì ì lè Bɛtlɛhɛ̀m lè Yudeà nyigbã ji. Đo, Mawu be gblɔ̃ɖɛtɔa gblɔ̃ be:

⁶''Èwò Bɛtlɛhɛ̀m, èdù kè lè Yudeà nyigbã jia, wò mu nyi èdù kè hùe wu lè Yudeà be èdù gãwo dòmè ò, ɖo èwò mè ye èfìɔvi kè la kplɔ̀ Izràɛl dùkɔ̃ nyèa la to so.''”

⁷Kè e lè nènea, Herod yɔ ènunyatɔawo lè wawla mè, biɔ wo gà kè mè tututu wètrivia ze a.

⁸E yomèa, e dɔ̃ ènunyatɔawo ɖoɖa Bɛtlɛhɛ̀m, gblɔ̃ na wo be: “Mì yì ji ɖèvia nyuɛ̃ ɖe. Ne mì kpɔ ɛ̀ a, mì va to è na mù, ne ènyè cã ma yì jè *èɖɛ̀ na ɛ̀.”

⁹Ekè wo sè èfìɔa be ènyà vɔ̀a, wo jè èmɔ eye, wètrivi kè to lè èwèzɛ̃pe sãa, va lè ŋùkɔ̀ na wo le yì. Vɔ̀a, kè wètrivia ɖo àxue kè mè ɖèvia lèa be tamèa, e tɔtè.

¹⁰Kè wo kpɔ wètrivia, èjì jɔ̀ wo ŋutɔ.

¹¹Eye ekè wo ɖo àxuea mèa, wo kpɔ vifɛ̃a ku ènɔa Maria, eye wo jè èklò, jè *èɖɛ̀ na ɛ̀. Eye ekè wo hũ woabe fòtrowoa[3], wo sɔ àgbãmèkãnuwo na ɛ̀: sìka ku lifi kudo àbɛyɛ[4].

¹²E yomèa, Mawu ɖo àfɔ̀ àfɔ̀ ji na wo lè èdrɔ̃ mè be wo mu gbà trɔyì Herod gbɔ ò, eye wo to èmɔ bu jo yì woa de.

¹³Kè ènunyatɔ ŋuawo jo vɔ̀a, Tɔhonɔ̀ be àtikplɔtɔa to ɖo Yosɛ̀f ji lè àlɔ̃ mè, gblɔ̃ na ɛ̀ be: “Sitè, kplɔ̀ ɖèvia ku ènɔa ne mìa si yì Ejiptè. Nɔ̀ funu kaka na gà kè mè mù la to na wò be wòa trɔvaa, ɖo Herod la ji be yèa wù ɖèvia.”

¹⁴Yosɛ̀f sitè lè èzã ŋua mè, kplɔ̀ ɖèvia ku ènɔa eye wo si yì Ejiptè.

¹⁵E nɔ̀ funu kaka na gà kè mè Herod kua. Ekèa jɔ̀ ne ènyà kè Tɔhonɔ̀ gblɔ̃ to gblɔ̃ɖɛtɔa jia ne zɔ̃ sù be: “Ejiptè ye mù yɔ èvi nyè ŋusùa so.”

¹⁶Kè Herod kpɔ be ènunyatɔawo flù yèa, e bijì ŋutɔ. E kpɔ gà kè mè ènunyatɔawo to na ɛ̀ be wo jì ɖèvia, eye e ɖè ègbè be woa wù ŋusùvi kèwo ɖo èpè èvè ku kèwo mu kpɔ ɖo èpè èvè òa kpata lè Bɛtlɛhɛ̀m ku yebe àgowo ji.

¹⁷Nènea ye ènu kè Mawu be gblɔ̃ɖɛtɔ Yeremìa gblɔ̃a zɔ̃ sù be:

¹⁸“Àbòbo ɖì lè Ramà. Wo sè àvifãfã ku àlenanawo. Raxɛl ye le fã àvi ɖo yebe èviwo ta, eye, mu le ji be woa ɖo àsi àkɔ na yè ò, ɖo yebe viwo dɛ̃.”

¹⁹Kè Herod ku yomèa, Mawu be àtikplɔtɔ ɖe ɖè ye ɖokoe fiɔ Yosɛ̀f lè èdrɔ̃ mè lè Ejiptè.

²⁰E gblɔ̃ na ɛ̀ be: “Sitè, kplɔ̀ ɖèvia ku ènɔa ne mìa trɔyì Izràɛl nyigbã ji ɖo àmè kèwo le ji la wù ìawo ku vɔ̀.”

²¹Yosɛ̀f sitè nyàwo, jè èmɔ; e kplɔ̀ ɖèvia ku ènɔa, yì Izràɛl nyigbã ji.

²²Vɔ̀a, kè be sè be Arkelaɔ̀s ye wo ɖo èfìɔ ɖo ètɔa Herod tèpe lè Yudeà, e vɔ̃ funu yìyi. Ekè Mawu fiɔ ɛ̀ ènu kè be ɖo la wɔ̀a to èdrɔ̃ mèa, e jo yì Galilea nyigbã ji.

²³E va yì nɔ̀ èdù kè wo yɔna be Nazarɛta mè, ne ènu kè Mawu be gblɔ̃ɖɛtɔwo ŋlɔ̀ ɖɛa ne zɔ̃ sù be: “Wo la yɔ ɛ̀ be Nazarɛttɔ̀.”