Read gen Màteo 21 Bible Online

Màteo 21 - gen bible

Màteo 21

¹Wàlɛbɛ kè wo gogo Yèruzàlɛm, eye wo va ɖo Bɛtfagè, lè àmìti-toa[32] jia, Yesù dɔ̃ *nukplavi èvè,

²gblɔ̃ na wo be: “Mì yì kɔpe kè lè ŋùkɔ̀ na mìa mè, ne mì ɖo funu troloa, mì la kpɔ èsɔ-àkɛtɛ ɖe lè èkà mè, eye èvia lè e gbɔ; mì tu èkà na wo ne mìa kplɔ̀ wo va na mù.

³Eye ne àmè ɖe gblɔ̃ ènyà ɖe na mìa, mì ɖoeŋuti na ɛ̀ be: 'Àpetɔa ye le hiã wo', eye e la tàsi wo na mì.”

⁴Ekèa jɔ̀ ne ènyà kè gblɔ̃ɖɛtɔa gblɔ̃a ne zɔ̃ sù be:

⁵“Mì to na Yèruzàlɛmtɔwo be: 'Kpɔɖa, èfìɔ wòa gbãnà gbɔ wò, e ɖɔ ku fàfa, eye be lè èsɔ-àkɛtɛ kè nyi èdɔwɔ̀lã be èvi ji.'”

⁶Yesù be nukplaviwo yì, eye wo wɔ̀ ènuawo kpata sìgbè àlekè Yesù gblɔ̃ na woa nène.

⁷Wo kplɔ̀ èsɔ-àkɛtɛa ku èvia va, eye wo ɖè woabe àwùwo ɖo woa ji, eye Yesù nɔ̀ ànyi ɖo e ji.

⁸Àmè sùgbɔ ɖo woabe àwùwo, ɖo èmɔa ji. Àmè ɖewo sò àtiwo be àlɔ̀zɛ̃wo ɖo èmɔa ji.

⁹Eye àmèha kèwo lè ŋùkɔ̀ na Yesùa, ku kèwo lè ŋùgbedòmè na ɛ̀a, wo le do àpa, gblɔ̃ be: “Hozanà na *David be Via! Sìtu ɖèɖe ye e nyi na àmè kè gbãnà lè Tɔhonɔ̀ be nyikɔ mèa! Gogo na Mawu lè jiŋùkusi hũi!”

¹⁰Kè Yesù ɖo Yèruzàlɛm-a, èdù-amètɔ̀wo keŋu tɔ̀zĩ le gblɔ̃ be: “Àmè kɛ ye nyi àmè kèa ò?”

¹¹Eye àmèhawo ɖoeŋuti be: “Yesù, Mawu be gblɔ̃ɖɛtɔ kè so Nazarɛ̀t lè Galilea nyigbã jia ye.”

¹²Eye Yesù ɖo mawuxɔa mè. E nyà àmè kèwo keŋu le sà ènu ku àmè kèwo le plè ènu lè mawuxɔa mèawo to. E mù ègàɖɔ̀lìtɔwo be èkplɔ̃wo, ku àmè kèwo le sà àhɔ̃nɛa be àzìkpewo.

¹³Eye, e gblɔ̃ na wo be: “Wo ŋlɔ̀ ɛ̀ ɖɛ be: 'Àxue nyèa, wo la yɔ ɛ̀ be kuefãpe.' Vɔ̀a, mìawo ya mì sɔ ɛ̀ wɔ̀ fĩãfìwo be do.”

¹⁴Ŋùvìnɔ̀wo ku kpòtɛ̃wo va Yesù gbɔ lè mawuxɔa mè, eye e dà èdɔ̀ na wo.

¹⁵Kè * mawunɔ gãwo ku èsefiɔtɔwo kpɔ ŋùdãdɔ kèwo Yesù le wɔ̀ lè mawuxɔa mè ku àpa kè ɖèviwo le do be: “Gogo na *David be Via”, wo do àdɔ̀mèze.

¹⁶Eye wo gblɔ̃ na ɛ̀ be: “Wò sè ènyà kèwo wo le gblɔ̃a?” Eye Yesù gblɔ̃ na wo be “Ɛ̃ɛ, mì mu hlɛ̃ kpɔ be: 'Vifɛ̃wo ku kèwo lè ànɔnuawo be ènu ye wò ɖènà kafuhawo so' òa?”

¹⁷Kè Yesù gblɔ̃ ènyà kèawo vɔ̀a, e gble wo ɖo funu, to lè èdùa mè, yì Betanìa eye be ci funua dɔ̃.

¹⁸Ŋùdekɛ̃nyɛ mè, wàlɛbɛ kè e trɔ le yì èdùa mèa, àdɔ̀ wù ì.

¹⁹E kpɔ vòti ɖe lè èmɔ to, eye e zɔ̃ gogo è, vɔ̀a, mu kpɔ ènu ɖekpe lè e ji sɔ wu àmàkpawo ɖèɖe ò. E gblɔ̃ na ɛ̀ be: “Wò mu la gbà sɛ̃ èku gbèɖe ò.” Eye vòtia yrɔ̀ lè funu zè ɖèka.

²⁰Nukplaviawo kpɔ ènu kè jɔ̀ a, eye, e kpaca wo. Wo biɔ Yesù be: “Nukɛ ŋuti ye èvòtia ku trolo ɖo ò?”

²¹Yesù ɖoeŋuti na wo be: “Nyàwo mù le to na mì, ne mì ɖo xɔ̀sè eye mì mu dona àɖìka òa, mu nyi ènu kè mù wɔ̀ ɖo èvòti kèa ŋutia, kpò ye mì la wɔ̀ ò, vɔ̀a, ne mì to na èto kèa be: 'Hɔ̃ jo lè fikèa, ne wòa yì jè àpù mè' cã a, e la va e mè.

²²Eye ènu ɖekpekpe kè mì la biɔ lè kuefã mè, ku xɔ̀sèa, wo la na mì.”

²³Wàlɛbɛ kè Yesù ɖo mawuxɔa mè, le fiɔ ènu àmè woa, * mawunɔ gãwo ku èdùmèmègãwo va e gbɔ. Wo biɔ ɛ̀ be: “Àcɛ̀ kɛ wò ɖo sɔ le wɔ̀ ènu kèawo ò? Àmè kɛ ye na wò àcɛ̀ ŋua ò?”

²⁴Eye Yesù ɖoeŋuti na wo be: “Nyè cã mù la biɔ mì ènyà ɖèka pɛɛ. Ne mì ɖoeŋuti na mùa, nyè cã mù la gblɔ̃ àcɛ̀ kè mù sɔ le wɔ̀ ènu kèawoa na mì.

²⁵Yòhanɛ̀s be Mawusi lèlea fikɛ ye be so ò? Jiŋùkusia, àlo àgbètɔwo gbɔ?” Eye wo le ènyà kpɔ lè woa nɔ̀nɔwo dòmè be: “Ne mi gblɔ̃ be: 'Jiŋùkusi ye à', e la to na mi be: 'Nukɛ ŋuti ye mi mu xɔ̀ Yòhanɛ̀s be àŋɛ̀a ji sè ò?'

²⁶Vɔ̀a, ne mi ɖoeŋuti na ɛ̀ be: 'Àgbètɔwo gbɔ ye à', àmèhaa ma lɔ̃ na mi ò, ɖo, wo bùnà Yòhanɛ̀s be e nyi Mawu be gblɔ̃ɖɛtɔ.”

²⁷Eye wo ɖoeŋuti na Yesù be: “Mi mu nya ò.” Yesù cã gblɔ̃ na wo be: “Nyè cã nyè mu la gblɔ̃ àmè kè na mù àcɛ̀ kè mù sɔ le wɔ̀ ènu kèawo na mì ò.”

²⁸“Nukɛ mì kpɔ so ènyà kèa ŋuti ò? Ŋusù ɖe ɖo èvi-ŋusù èvè. E va cucugbã tɔ̀a gbɔ gbè ɖèka, gblɔ̃ na ɛ̀ be: 'Èvi nyè, wò la yì wɔ̀ èdɔ lè vɛ̃-gble nyèa mè egbè.'

²⁹Đèvi a ɖoeŋuti na ɛ̀ be: 'Nyè mu le ji la yì ò.' Kè e wɔ̀ èzã ɖe a, e bù e ŋuti kpɔ, eye e yì wɔ̀ èdɔ lè àgblèa mè.

³⁰E yomèa, ŋusùa gbà gblɔ̃ ènyà ŋua ke na èvia èvègɔ̃a. E ya ɖoeŋuti na ètɔa be: 'Àpetɔ, mù la yì', vɔ̀a mu yì ò.

³¹Lè èvi èvèawo dòmèa, àmè kɛ ye wɔ̀ ètɔa be jro ò?” Wo ɖoeŋuti na ɛ̀ be: “Èvi cucugbã tɔ̀a ye.” Eye Yesù gblɔ̃ na wo be: “Nyàwo mù le to na mì: èdɛ̃jɔ̀tɔwo ku *àhasìwɔ̀tɔwo la jè ŋùkɔ̀ na mì yì Mawu be fìɔdua mè.

³²Đo, Yòhanɛ̀s va mìa gbɔ, fiɔ mì àlekè mì ɖo la wɔ̀ ènu jɔ̀jɔɛ ɖoa, vɔ̀a, mì mu xɔ̀ e ji sè ò. Vɔ̀a, èdɛ̃jɔ̀tɔwo ku *àhasìwɔ̀tɔwo ya, xɔ̀ yebe àŋɛ̀a ji sè, eye wo trɔ lè woabe èvuɛ̃wo yomè. Mì kpɔ ènu kèawo, gãke mu wɔ̀ ènu ɖe na mì ne mìa cã mìa xɔ̀ yebe àŋɛ̀a ji sè, la trɔ lè mìabe ènuvuɛ̃wo yomè ò.”

³³“Mì ɖo èto èlododo bu. Ŋusù àxuetɔ ɖe dà vɛ̃-gble. E tɔ̃ èkpa trɔ do è. Eye be kù vɛ̃fiɔ̃-do ɖo àgblèa mè, e tù àgblèjikpɔxɔ̀ ɖo e mè. E sɔ àgblèa do àsi na vɛ̃-gbledàtɔwo, eye be jo yì èmɔ ji.

³⁴Gà kè mè vɛ̃kusɛ̃sɛ̃ gbãgbã be hùenu va ɖoa, e dɔ̃ yebe sumɔ̃viwo ɖoɖa vɛ̃gblèdàtɔawo gbɔ, ne woa xɔ̀ èkusɛ̃sɛ̃ kèwo nyi yè tɔ̀awo va na yè.

³⁵Vɛ̃gblèdàtɔawo le sumɔ̃viawo, pò àmè ɖèka, wù àmè èvègɔ̃a, pò èkpe àmè ètɔ̃gɔ̃a.

³⁶Àgblètɔa gbà dɔ̃ sumɔ̃vi bu kèwo sùgbɔ wu àmè cucugbã tɔ̀awo ɖoɖa, vɔ̀a, vɛ̃gblèdàtɔawo gbà wɔ̀ nènea ku wo.

³⁷Eye memlɛ̃nua, àgblètɔa dɔ̃ ye ŋutɔ be èvi ɖoɖa, ɖo, e le gblɔ̃ lè ye ɖokoe mè be: 'Wo la ɖo bùbu na èvi nyèa ya.'

³⁸Vɔ̀a, kè vɛ̃gblèdàtɔawo kpɔ èvia a, wo gblɔ̃ lè woa nɔ̀nɔwo dòmè be: 'Ècrɔ̃ɖùtɔa ye nyi ekè; mì va ne mia wù ì, ne vɛ̃-gblea bèa trɔ zũ mia tɔ.'

³⁹Eye wo jè e ji, dɔ̃ ɛ̀ yì vɛ̃-gblea godo, eye wo wù ì.”

⁴⁰“Fifìa, ne vɛ̃gblètɔa vaa ɖe, nukɛ ye be la wɔ̀ ku vɛ̃gblèdàtɔawo ò?”

⁴¹Wo ɖoeŋuti na ɛ̀ be: “E la na àmè vuɛ̃ ŋuawo la crɔ̃ ŋɔjitɔ̀. Eye e la sɔ yebe vɛ̃-gblea do àsi na àgblèdàtɔ bu kèwo la nɔ̀ na ɛ̀ èkusɛ̃sɛ̃ kèwo nyi ye tɔ̀a ɖo àmè hùenu.”

⁴²E yomèa, Yesù gblɔ̃ na wo be: “Mì mu kpɔ ènyà kèa hlɛ̃ lè ŋɔ̀ŋlɔ̃awo mè kpɔ òa? 'Èkpe kè èxɔ̀tùtɔwo gbea, ye va trɔ zũ koŋùjikpea? Ekèa nyi Tɔhonɔ̀ be ènuwɔ̀wɔ eye e wɔ̀ ŋùdã na mi ŋutɔ!'”

⁴³“Ye ŋutia, mù le to na mì be: Mawu la ɖè mì to lè yebe fìɔdua mè, la sɔ kɔ̀ta kèwo be wɔ̀na sɔ̀gbèa, ɖo e mè. [

⁴⁴Àmè kè la jè èkpe kèa jia, la gbã hãnya-hãnya, eye àmè kè ji èkpea la jè a, e la tù ì kpɔɖɔ-kpɔɖɔ.]”

⁴⁵Kè mawunɔ gãwo ku Farizìwo sè Yesù be èlododo ŋua woa, wo ŋɔjè e mè nyuɛ̃ ɖe be yèwo ŋuti ye be le do èloawo so.

⁴⁶Eye wo le ji la le è, vɔ̀a wo le vɔ̃ àmèha, ɖo dùkɔ̃a kpɔ be Mawu be gblɔ̃ɖɛtɔ ye be nyi.