Read gen Màteo 22 Bible Online

Màteo 22 - gen bible

Màteo 22

¹Yesù gbà do èlo sɔ fiɔ ènu àmèwo. E gblɔ̃ na wo be:

²“Wo teŋu sɔ Mawu be fìɔdua sɔ̀ ku èfìɔ ɖe kè le ɖù nyɔ̃nù kpekpe be àzã na èvia.

³Èfìɔ dɔ̃ yebe sumɔ̃viwo be woa yì yɔ àmè kèwo be sìa ɖɛ be wo ne va ɖù àzã ku yèawo va. Vɔ̀a, wo gbe.

⁴E gbà dɔ̃ yebe sumɔ̃vi buwo ɖoɖa be: 'Mì to na àmè kèwo mù sìa ɖɛawo be, ènu ɖùɖuawo sɔ̀gbè vɔ̀. Mù wù ènyì-su nyèwo ku èlã nyè kèwo do àmìa, eye, ènuwo keŋu sɔ̀gbè vɔ̀. Mì va ɖù àzã.'

⁵Vɔ̀a, àmè kèwo be sìa ɖɛawo mu kãma na ènu kèawo ò, eye àmè sia àmè yì ènu kè bìa ŋùku na ɛ̀ gbe. Àmè ɖewo yì àgblè, èɖewo yì àsì,

⁶eye èɖewo cã le sumɔ̃viawo, wɔ̀ ènu bàɖà ku wo eye wo wù wo.

⁷Èfìɔa bijì ŋutɔ, eye, e dɔ̃ yebe gbãdãgbãwo ɖoɖa, eye wo yì crɔ̃ èhlɔ̃dãtɔ ŋuawo, tɔ èzò woabe èdù.

⁸Wàlɛbɛ ŋua, e gblɔ̃ na yebe sumɔ̃viawo be: 'Ènu sia ènu sɔ̀gbè, vɔ̀a, àmè kèwo mù sìa ɖɛawo mu jè be woa kpe wo ò.

⁹Ye ŋutia, mì yì èmɔzɛ̃kpliwo nu, ne mìa yɔ àmè kèwo keŋu mì la kpɔawo, ne woa va ɖù àzã.'

¹⁰Eye sumɔ̃vi ŋuawo to yì èmɔwo ji, eye wo kplɔ̀ àmè kèwo keŋu wo kpɔa va. Àmè vuɛ̃wo ku àmè nyuɛ̃wo, eye àmèwo ɖɔ nyɔ̃nù kpepea.

¹¹E yomèa, èfìɔa ɖo èxɔ̀a mè, be yèa kpɔ àmè kpekpeawo. E kpɔ ŋusù ɖe lè funu ekè mu do nyɔ̃nù kpekpe be àwù òa.

¹²Èfìɔa gblɔ̃ na ɛ̀ be: 'Èxlɔ̃ nyè, àleke wɔ̀ ye wò va fikèa vɔ̀a, wò mu do nyɔ̃nù kpekpe be àwù ò?' Vɔ̀a, ŋusùa mu kè ènu ò.

¹³Èfìɔa to na sumɔ̃viawo be: 'Mì bla àfɔ̀wo ku àlɔ̀wo na ɛ̀, ne mìa sɔ ɛ̀ dà ɖo vìvìti mè lè xixenu. Funu ye àvi fãfã ku àɖùklui ɖùɖu la nɔ̀.'

¹⁴Đo wo yɔ àmè sùgbɔ, vɔ̀a àmè vi ɖe kpò ye wo cã.”

¹⁵Wàlɛbɛ ŋua, Farizìwo to yì bla èse ɖo Yesù ŋuti. Wo le ji èmɔ kè nu wo la biɔ ɛ̀ ènyà lè, ne woa teŋu le è lè yebe nupo pòpo mèa.

¹⁶Wo dɔ̃ woabe nukplaviwo ku Herod be èhamènɔ̀tɔwo ɖoɖa Yesù gbɔ, eye, wo yì gblɔ̃ na ɛ̀ be: “Ènufiɔtɔ, mi nya be nyàwototɔ ye wò nyi, eye wò fiɔna Mawu be èmɔa lè nyàwo mè. Wò mu kãmana na àmè ɖe ò, ɖo wò mu sina àmè be ŋùmè ò.

¹⁷Ye ŋutia, gblɔ̃ àlekè wò susu ɖoa na mi! E sɔ̀gbè be woa tu ètaci na Romà fìɔgã Kayizaròa, àlo mu sɔ̀gbè ò?”

¹⁸Vɔ̀a, ekè Yesù nya woabe susu vuɛ̃woa, e gblɔ̃ na wo be: “Mì àyèmènuwɔ̀tɔ kèawo! Nukɛ ŋuti ye mì le tè mù kpɔ ɖo ò?

¹⁹Mì sɔ ègà kè wo sɔ tuna ètacia ɖèka fiɔ mù.” Eye wo sɔ klòsalò-ga ɖèka fiɔ ɛ̀.

²⁰Yesù gblɔ̃ na wo be: “Àmè kɛ be tata ye lè e ji ò? Àmè kɛ be ŋɔ̀ŋlɔ̃ ye nyi ekèa ò?”

²¹Wo ɖoeŋuti na ɛ̀ be: “Romà fìɔgã Kayizarò tɔ̀ ye.” Eye Yesù gblɔ̃ na wo be: “Mì sɔ ènu kè nyi Kayizarò tɔ̀a na Kayizarò, eye ènu kè nyi Mawu tɔ̀a, na Mawu.”

²²Ènyà ŋuawo kpaca wo ŋutɔ, eye wo tàsi ì ɖɛ, eye wo jo.

²³Gbè ŋua gbè kea, Sadusìwo va Yesù gbɔ. — Sadusìwo ye gblɔ̃nà be fɔ̃fɔ̃ so èku ɖe mu lè ò. — Wo biɔ ɛ̀ be:

²⁴“Ènufiɔtɔ, Mosè gblɔ̃ be: 'Ne ŋusù ɖe, ɖè èsrɔ̃, eye mu jì èvi ò, vɔ̀ be kua, nɔ̀via la ɖè àhòsìa, la jì èvi sɔ do xòmè na àmè kè kua.'

²⁵E va jɔ̀ be, nɔ̀vi ŋusù adrɛ̃ ɖewo nɔ̀ mia dòmè. Àmè cucugbã tɔ̀a ɖè èsrɔ̃ vɔ̀a, mu jì èvi ɖekpe gbɔ̀xue ku ò, eye, nɔ̀via ɖè àhòsìa.

²⁶Ènu kèa jɔ̀ ɖo àmè èvègɔ̃a ji, gbà jɔ̀ ɖo àmè ètɔ̃gɔ̃a cã ji, kaka yì jè àmè adrɛ̃gɔ̃ a ji.

²⁷Kè ŋusùawo keŋu ku yomèa, nyɔ̃nùa cã va ku.

²⁸Fifìa, gà kè mè àmè kukuwo la fɔ̃a, àmè kɛ be èsrɔ̃ ye nyɔ̃nùa la nyi lè àmè adrɛ̃awo dòmè ò? Đo woawo keŋu ɖè è kpɔ.”

²⁹Yesù ɖoeŋuti na wo be: “Mì le trã èmɔ, ɖo mì mu nya ŋɔ̀ŋlɔ̃awo kaka la va nya Mawu be ŋusɛ̃ cã ò.

³⁰Đo le fɔ̃fɔ̃ so èku zã gbèa, èsrɔ̃ ɖèɖe àlo nyɔ̃nù nana ɖe cã mu la nɔ̀ ànyi ò. Wo la nɔ̀ sìgbè Mawu be àtikplɔtɔwo nène lè jiŋùkusi.

³¹Vɔ̀a, ènu kè Mawu gblɔ̃ so àmè kukuwo be fɔ̃fɔ̃ ŋutia, mì mu hlɛ̃ ɛ̀ kpɔ lè mawunya mè be:

³²'Ènyè ye nyi, Abràham be Mawu, Izàk be Mawu, Yakɔb be Mawu.' Mawu mu nyi àmè kukuwo be Mawu ò, vɔ̀a àmè àgbè-àgbèwo be Mawu ye be nyi.”

³³Kè wo sè ènyà kèa, àmèhaa kpata kã yàa ɖo Yesù be ènufiɔfiɔ kèa ŋuti.

³⁴Kè Farizìwo sè be Yesù do-gà ènu na Sadusìwoa, wo bɔ̀.

³⁵Eye èsefiɔtɔ ɖèka lè woa dòmè le ji la tè Yesù kpɔ. E biɔ ɛ̀ be:

³⁶“Ènufiɔtɔ, *èse kɛ ye wu èsewo kpata ò?”

³⁷Yesù ɖoeŋuti na ɛ̀ be: “'Wò la lɔ̃ Tɔhonɔ̀ Mawu wò ku àpo èjì keŋu, kudo àpo èkla keŋu, gbàkudo àpo susu keŋu.'

³⁸Ekèa ye nyi *èse cucugbãa eye be wu èsewo kpataa.

³⁹Èse èvègɔ̃ kè sɔ̀ ku ìa, ye nyi ekèa: 'Wò la lɔ̃ èhawòvi sìgbè wò ŋutɔ ɖokoe wò nène.'

⁴⁰Èse èvè kèawo ji ye wo tù Mosè be èsea, ku Mawu be gblɔ̃ɖɛtɔwo be ènufiɔfiɔwo kpata ɖo.”

⁴¹Kè Farizìwo bɔ̀a, Yesù biɔ wo sè be:

⁴²“Nukɛ ye mì susu so *Mɛ̀sià a ŋuti ò?” Àmè kɛ be èvi ye be nyi ò? Wo ɖo e ŋuti be: “*David be èvi ye.”

⁴³Vɔ̀ a, Yesù gblɔ̃ na wo be: “Ne *David be èvi ye be nyi a, àleke wɔ̀ ye Gbɔ̃gbɔ̃ a na David yɔ ɛ̀ be: 'Tɔhonɔ̀ ò?' Đo David gblɔ̃ be:

⁴⁴'Tɔhonɔ̀ gblɔ̃ na Tɔhonɔ̀ nyè be: nɔ̀ ànyi ɖo àpe ɖùsi mè, kaka ne ma sɔ àpo èkɛ̃tɔwo ɖo àfɔ̀ wòwo gɔ̃mè.'”

⁴⁵“Ne David ŋutɔ yɔ ɛ̀ be: Tɔhonɔ̀ a, àleke ye e gbà teŋu nyi David be èvi ɖo ò?”

⁴⁶Vɔ̀ a, àmè ɖekpe mu teŋu ɖo ènyà ɖekpe ŋuti na ɛ̀ ò; eye, so gbè ŋua gbè a àmè ɖe mu gbà dojì biɔ ɛ̀ ènyà ɖe ò.