Read gen Màteo 23 Bible Online

Màteo 23 - gen bible

Màteo 23

¹Wàlɛbɛ ŋua Yesù pò nupo na àmèhaa ku yebe nukplaviwo, gblɔ̃ be:

²“Èsefiɔtɔ ku Farizìwo be èdɔ ye nyi be woa ɖè Mosè be èsea gɔ̃mè.

³Ye ŋutia, mì sè ètonu na wo; ènu ɖekpekpe kè wo la gblɔ̃ na mìa, mì wɔ̀ ɛ̀, vɔ̀a, mì mu gbà ɖì wo ò, ɖo wo gblɔ̃nà, vɔ̀a, wo mu wɔ̀nà ɖo e ji ò.

⁴Đo wo drona àgbã kpɛ̃kpɛ̃wo ɖo àbɔta na àmèwo, vɔ̀a woawo ŋutɔ mu lɔ̃nà be yèwoa sɔ àlɔ̀vi tɔ wo ò.

⁵Wo wɔ̀nà woabe èdɔwo keŋu ne àmèwo ne kpɔ yèwo, wo blana Yudàviwo be tilà[33] gbàjàwo, eye wo pònà to gã vlàyà na woabe àwùwo.

⁶Ne wo kpe wo yì ènuɖùpea, wo jina la nɔ̀ bùbutèpewo, eye wo jina la nɔ̀ àzìkpe jè ŋùmèwo ji, lè bɔ̀bɔ̀pewo.

⁷Wo jina be woa do ègbè na yèwo lè àfi kè àmèwo sùgbɔ lèa. Wo jina be àmèwo ne yɔ yèwo be 'Ènufiɔtɔ'[34].

⁸Vɔ̀a, mìawo yaa, mì mu gbà lɔ̃ be àmè ɖe ne yɔ mì be, 'Ènufiɔtɔ' ò, ɖo nɔ̀viwo mì nyi, eye àmè ɖèka ye nyi mìabe ènufiɔtɔ.

⁹Mì mu gbà yɔ àmè ɖe be 'Ètɔ' lè ànyigbã ji ò, ɖo Mawu kè lè jiŋùkusia ɖèka ye nyi mìa Tɔ.

¹⁰Mì mu gbà lɔ̃ be àmè ɖe ne yɔ mì be 'Kplɔ̀tɔ' cã ò, ɖo *Mɛ̀sia ɖèka ye nyi mìabe kplɔ̀tɔ.

¹¹Vɔ̀a, àmè kè nyi ètatɔ lè mìa dòmèa, ɖo la nyi mìabe sumɔ̃vi.

¹²Àmè ɖekpekpe kè la kɔ ye ɖokoe yì jia, wo la bɔ̀bɔ̀ ɛ̀ ɖo ànyi, eye àmè ɖekpekpe kè la bɔ̀bɔ̀ ye ɖokoea, wo la kɔ ɛ̀ yì ji.”

¹³“Hèlu na mì èsefiɔtɔwo ku Farizìwo, mì àyèmènuwɔ̀tɔwo! Đo mì le tu Mawu be fìɔdua do àmèwo. Mìa ŋutɔwo mì mu le ɖo e mè ò. Mì mu le na èmɔ àmè kèwo le ji la ɖo e mèawo cã ò.” [

¹⁴“Hèlu na mì, èsefiɔtɔwo ku Farizìwo, mì àyèmènuwɔ̀tɔwo, ɖo mì hlànà àhòsìwo be ènuwo, eye mì wɔ̀nà àyè-kuefã dìdìwo. Ye ŋutia, wo la gblehùɛ do mì veve ɖe[35].]”

¹⁵“Hèlu na mì, èsefiɔtɔwo ku Farizìwo, mì àyèmènuwɔ̀tɔwo, ɖo mì sãnà àpù ku ànyigbã ji, ne mìa sɔ dɔ̃ àmè ɖèka va mìabe sɛ̃sɛ̃a mè, eye ne mì kpɔ nènemea, mì wɔ̀nà be àmè ŋua ne trɔ zũ àmè kè jè na èzò mèa, zè èvè wu mìa ŋutɔwo.”

¹⁶“Hèlu na mì èmɔfiɔtɔ ŋùvìnɔ̀wo! Mì gblɔ̃nà be: 'Ne àmè ɖe tà mawuxɔa, sɔ fìã àjɔ̀gbèa, mu nyi ènu ɖekpe ò. Vɔ̀a, ne àmè ɖe tà kɔ̀kɔ̀ɛpe be sìkawo sɔ fìã àjɔ̀gbèa, àmè ŋua ɖo la wɔ ɖo àjɔ̀gbèa ji.'

¹⁷Mìa sùkunɔ̀, ŋùvìnɔ̀wo! Nukɛ ye lè veve ɖe wu ò? Sìka kèwo lè kɔ̀kɔ̀ɛpea ye loo, àlo mawuxɔ kè na be sìkaa zũ ènu kɔ̀kɔ̀ɛa ye?

¹⁸Mì gbà gblɔ̃nà be: 'Ne àmè ɖe tà Mawu be *vɔsakpe sɔ kã àtãŋua, mu wɔ̀ ènu ɖe ò. Vɔ̀a, àmè kè tà vɔsa kè lè vɔsakpea jia ɖo la na yebe àjɔ̀.'

¹⁹Mìa ŋùvìnɔ̀wo! Nukɛ ye lè veve ɖe wu ò? Ènu nana a ye loo, àlo *vɔsakpe kè na be ènu nana a nyi ènu kɔ̀kɔ̀ɛa ye?

²⁰Ye ŋutia, àmè kè tà vɔsakpea, tà vɔsakpea ku ènu kèwo keŋu lè e jia.

²¹Eye àmè kè tà kɔ̀kɔ̀ɛpea, tà ɛ̀ ku àmè kè nɔ̀nà e mèa.

²²Àmè kè tà jiŋùkusia, tà Mawu be fìɔzìkpea ku Mawu kè nɔ̀nà ànyi ɖo e jia.”

²³“Hèlu na mì èsefiɔtɔwo ku Farizìwo, mì àyèmènuwɔ̀tɔwo! Đo mì nana mìabe àgblèmènukuwo, sìgbè ènu hɔ̃hɔ̃ɛwo nène be àkpa èwogɔ̃a Mawu. Vɔ̀a, mì ɖènà èkɔ̀ lè ènu kèwo nyi vevetɔ lè èsea mèa ŋuti: jɔ̀jɔɛwɔ̀wɔ, ŋuzĩzĩkuku, ku ànùkuawɔ̀wɔ. Ènu kèawo ye e jè be mìa wɔ̀ cucugbãa, vɔ̀a, mì mu ɖo la dokpò kpɔ̀tɛawo cã wɔ̀wɔ ò.

²⁴Mìa èmɔfiɔtɔ ŋùvìnɔ̀wo! Mì sìɔ̃nà àhà sɔ ɖènà ènuzòzro wuiwli sìgbè tɔ̀bɔ̀suwo nène to, vɔ̀a mì mì nà èsɔ-kponɔ̀!”

²⁵“Hèlu na mì èsefiɔtɔwo ku Farizìwo, mì àyèmènuwɔ̀tɔwo! Đo mì klɔna kɔpò ku àgbã be ŋuti, vɔ̀a, woa mè ɖɔ ku ènu kèwo mì fĩ ku ènu kèwo mì tro àbɔ na àmèwo, xɔ̀ lè woa sia.

²⁶Farizì ŋùvìnɔ̀! Klɔ kɔpòa mè gbɔ̀xue, eŋuã, yebe ŋuti cã la kɔ̀.”

²⁷“Hèlu na mì èsefiɔtɔwo ku Farizìwo, mì àyèmènuwɔ̀tɔwo! Đo, mì lè sìgbè èyɔ̀do kèwo wo sì àkalo ɣe do a nène, ekèwo be ŋuti le ze nyuɛ̃ ɖe, vɔ̀a, woa mè ɖɔ ku àmè kuku be puwo, ku èɖinuwo.

²⁸Nènea ye mìa ŋutɔwo cã mì lè. Đo mì zena sìgbè àmè jɔ̀jɔɛwo nène lè àgbètɔwo be ŋùkumè, vɔ̀a, mìabe èjì mè ɖɔ ku àyèmènuwɔ̀wɔ kudo ènuvuɛ̃.”

²⁹“Hèlu na mì èsefiɔtɔwo ku Farizìwo, mì àyèmènuwɔ̀tɔwo! Đo mì jrànà Mawu be gblɔ̃ɖɛtɔwo be èyɔ̀dowo ɖo, mì ɖona àcɔ na àmè jɔ̀jɔɛwo be ɖìpewo,

³⁰eye mì gblɔ̃nà be: 'Ne mi kè jɔ̀ lè mia tɔgbewo be hùenua, mi mu la nɔ̀ èsebla mè ku mia tɔgbewo, la kɔ̀ Mawu be gblɔ̃ɖɛtɔwo be èhũ ɖo ànyi ò.'

³¹Mìa ŋutɔwo ye le ɖù ɖase ɖo mìa ɖokoewo ŋuti be, mì nyi àmè kèwo wù Mawu be gblɔ̃ɖɛtɔwo be jìjimèviwo.

³²Ye ŋutia, mì wu mìa tɔgbewo be ènuvuɛ̃wɔ̀wɔwo nu.

³³Mì, èdãwo, mì, jàkpàtàwo, àleke mì la teŋu wɔ̀, la si lè hùɛgbledo kè dɔ̃nà àmè yì èzò màvɔ mèa nu ò?

³⁴Ye ŋutia, mì ɖo èto ne mìa sè: mù la dɔ̃ Mawu be gblɔ̃ɖɛtɔwo, ènunyatɔwo ku èsefiɔtɔwo ɖoɖa mì. Mì la wù èɖewo lè woa dòmè. Mì la ka èɖewo ɖo àtisòga ŋuti. Mì la pò èɖewo ku àtãŋù lè mìabe bɔ̀bɔ̀pewo. Mì la nɔ tĩ woa yomè so èdù ɖe mè, yì èdù bu mè.

³⁵Ne èhũ mà-nyãɖe ɖe sia ɖe kè kɔ̀ ɖo ànyigbã ji a, so àmèjɔ̀jɔɛ Abɛ̀l be èhũ ji, kaka va Zakarìa, Barakìa be èvi-ŋusù be èhũ ji, àmè kè wo wù lè kɔ̀kɔ̀ɛpe a ku vɔsakpe a dòmè a, ne nɔ̀ mìa ji.

³⁶Nyàwo ye mù le to na mì, ènu kèawo keŋu la va jìjimè kèawo ji.”

³⁷“Yèruzàlɛmtɔwo, O, Yèruzàlɛmtɔwo! Mì, àmè kèwo wùnà Mawu be gblɔ̃ɖɛtɔwo, dànà èkpe sɔ wùnà àmè kèwo Mawu dɔ̃ ɖoɖa mìa! Zè nenè ye mù jro, la bɔ̀ mì ɖo gbɔ nyè, sìgbè àlekè kòklonɔ bɔ̀nà èviawo ɖo yebe àwàwo gɔ̃mèa nène, vɔ̀ mì mu jro ò?

³⁸Kpɔɖa, àmè sia àmè la gble mìabe mawuxɔa ɖɛ na mì, eye, e la nɔ̀ gbalo.

³⁹Đo mù le to na mì be, so fifìa, mì mu la gbà kpɔ mù ò, kaka va na gà kè mè mì la gblɔ̃ be: 'Sìtu ɖèɖe ye e nyi na àmè kè gbãnà lè Tɔhonɔ̀ be nyikɔ mèa!'”