Read gen Màteo 25 Bible Online

Màteo 25 - gen bible

Màteo 25

¹“Eŋuã, Mawu be fìɔdua lè sìgbè tùgbɛ̀jɛ èwo kèwo sɔ woabe kãligbɛ̃wo la yì dogò nyɔ̃nùkpetɔa nène.

²Àmè àtɔ̃ lè tùgbɛ̀jɛawo dòmè nyi sùkunɔ̀wo, eye àmè àtɔ̃ nyi ènunyatɔwo.

³Tùgbɛ̀jɛ sùkunɔ̀awo sɔ woabe kãligbɛ̃wo, vɔ̀a wo mu hɛ̃ àmì ɖo àsi ò.

⁴Vɔ̀a ènunyatɔawo ya hɛ̃ àmì ɖo ègòwo mè bɔ̀ ɖo woabe kãligbɛ̃awo ŋuti.

⁵Kè nyɔ̃nùkpetɔa ci ŋùgbea, àlɔ̃ sɔ̃ wo eye woa kpata wo dɔ̃ àlɔ̃.

⁶Lè èzã dòmèa, àpa ɖì be: 'Nyɔ̃nùkpetɔa gbãnà, mì to yì do gò è!'

⁷Tùgbɛ̀jɛawo keŋu sitè, jrà woabe kãligbɛ̃wo ɖo.

⁸Sùkunɔ̀awo gblɔ̃ na ènunyatɔawo be: 'Mì na mi mìabe àmìa vi ɖe, ɖo miabe kãligbɛ̃awo le ci.'

⁹Vɔ̀a, ènunyatɔawo ɖoeŋuti na wo be: 'Aò, àmì kè lè mia sia mu la teŋu sù mi, la gbà sù na mìa cã ò. Mì yì àmìsàtɔwo gbɔ, ne mìawo cã mìa jè è.'

¹⁰Wàlɛbɛ kè wo yì àmìa jè gbea, nyɔ̃nùkpetɔa va, eye tùgbɛ̀jɛvi ènunyatɔ àtɔ̃ kèwo sɔ̀gbèawo ɖo nyɔ̃nùkpepea ku ì, eye wo tu èhɔ̃a, do ègà e mè.

¹¹E yomèa, tùgbɛ̀jɛ sùkunɔ̀ àtɔ̃awo cã gbɔ̀ va, eye wo gblɔ̃ be: 'Àpetɔ! Àpetɔ! Hũ èhɔ̃a na mi.'

¹²Vɔ̀a, nyɔ̃nùkpetɔa gblɔ̃ be: 'Nyàwo mù le to na mì, nyè mu jèsi mì ò.'

¹³Ye ŋutia, mì nɔ̀ ŋùzɔ̃, ɖo mì mu nya àzã, àlo gà pòpoa ò.”

¹⁴“Eŋuã, Mawu be fìɔdua la nɔ̀ sìgbè: ŋusù ɖe kè sɔ yebe àdɔ̀kùnuwo do àsi na yebe sumɔ̃viwo, eye be yì èdù màsɔɛ ɖe mèa nène.

¹⁵Ŋusùa nya woa dòmètɔ ɖè sia ɖè be ŋutete, eye, e sɔ sìka-ga àtɔ̃ na àmè cucugbãa, sɔ sìka-ga èvè na àmè èvègɔ̃a, sɔ sìka-ga ɖèka na àmè ètɔ̃gɔ̃a, eye be jo.

¹⁶Àmè kè xɔ̀ sìka-ga àtɔ̃a, sɔ wo do àjɔ. Eye be gbà kpɔ sìka-ga àtɔ̃ buwo kpe è.

¹⁷Àmè kè xɔ̀ sìka-ga èvèa cã kpɔ sìka-ga èvè buwo kpe è.

¹⁸Vɔ̀a, àmè kè xɔ̀ sìka-ga ɖèkaa, yì kù èdo, wla àpetɔa be sìka-gaa ɖo e mè.”

¹⁹“Kè e dìdì vi ɖe yomèa, woa àpetɔa gbɔ. E yɔ wo, eye wo wɔ̀ àkɔ̃ŋùta so lekè wo zã ègàa ɖoa ŋuti.

²⁰Àmè kè xɔ̀ sìka-ga àtɔ̃a va; e gblɔ̃ be: 'Àpetɔ, sìka-ga àtɔ̃ ye wò sɔ do àsi na mù; mù gbà kpɔ àtɔ̃ buwo kpe è.'

²¹Àpetɔa gblɔ̃ na ɛ̀ be: 'Ènu nyuɛ̃ ye wò wɔ̀, sumɔ̃vi nyuɛ̃, ànùkuame ye wò nyi. Mù sɔ wò ɖo ènu vi ɖe nu, eye wò wɔ̀ ɛ̀ nyuɛ̃ ɖe. Fifìa, mù la sɔ wò ɖo ènu sùgbɔ nu. Ye ŋutia, va jɔ̀jì ku àpetɔ wò.'

²²Àmè kè xɔ̀ sìka-ga èvèa, gblɔ̃ be: 'Àpetɔ, sìka-ga èvè ye wò sɔ na mù. Kpɔɖa, mù gbà kpɔ èvè buwo kpe è.'

²³Àpetɔa gblɔ̃ na ɛ̀ be: 'Ènu nyuɛ̃ ye wò wɔ̀, sumɔ̃vi nyuɛ̃, ànùkuame ye wò nyi. Mù sɔ wò ɖo ènu vi ɖe nu eye wò wɔ̀ ɛ̀ nyuɛ̃ ɖe. Fifìa, mù la sɔ wò ɖo ènu sùgbɔ nu. Ye ŋutia, va jɔ̀jì ku Àpetɔ wò.'

²⁴Àmè kè xɔ̀ sìka-ga ɖèkaa cã va gblɔ̃ na àpetɔa be: 'Àpetɔ, mù nya be àmè sɛ̃ŋu ye wò nyi, eye àfi kè wò mu do ènu ɖo òa, ye wò ɖènà ènu lè. Àfi kè wò mu hlɛ̃ ènu ɖo òa, ye wò bɔ̀nà ènu lè.

²⁵Ye ŋutia, vɔ̃vɔ̃ ɖo mù, eye mù yì kù èdo sɔ sìka-ga kè wò sɔ na mùa wla ɖo e mè. Àpo sìka-gaa ye nyi èkea; xɔ̀ ɛ̀.'

²⁶Vɔ̀a, àpetɔa ɖoeŋuti na ɛ̀ be: 'Sumɔvi vuɛ̃, kuviɔ̃tɔ ye wò nyi. Wò nya nyuɛ̃ ɖe be àfi kè nyè mu do ènu ɖo òa ye mù ɖènà ènu lè, eye mù bɔ̀nà ènu lè àfi kè nyè mu hlɛ̃ ènu ɖo òa.

²⁷Nukɛ ŋuti ye wò mu sɔ ègà nyèa ɖo ègà jràɖope, ne mù gbɔ̀a ma xɔ̀ ɛ̀ ku yebe àlè ò.

²⁸Mì xɔ̀ sìka-gaa lè e si, ne mìa sɔ ɛ̀ na àmè kè si sìka-ga èwo lèa.

²⁹Đo àmè kè si ènu lèa, wo la gbà na ɛ̀ kpe è, eye e la sùgbɔ lè e si. Vɔ̀a, àmè kè si ènu mu lè òa, wo la xɔ̀ vi kè lè e sia ŋutɔ cã.

³⁰Mì sɔ sumɔ̃vi yàkàme kèa dãŋùgbe ɖo xixenu, lè vìvìti mè, àfikè àvi fãfã ku àɖuklui ɖùɖu la nɔ̀a.'”

³¹“Gà kè mè *Àgbètɔ be Èvia la trɔva ku gogo lè Mawu be àtikplɔtɔwo kpata dòmèa, e la nɔ̀ ànyi lè yebe gogo be fìɔzìkpea ji,

³²eye, wo la bɔ̀ dùkɔ̃wo kpata ɖo yebe ŋùkɔ̀. E la ma wo ɖo èvè sìgbè àlekè ègbɔkplɔ̀tɔ ɖènà àlɛ̃wo ɖo vò lè gbɔgbɔɛwo gbɔa nène.

³³E la sɔ àlɛ̃awo ɖo yebe ɖùsi mè, eye gbɔgbɔɛawo ɖo yebe èmìɔ̃ mè.

³⁴Eye, èfìɔa la to na àmè kèwo lè yebe ɖùsi mèawo be: 'Mì va, mì, Ètɔ nyè be sìtuviwo. Mì va nɔ̀ Mawu be fìɔdu kè wo jrà ɖo ɖɛ na mì so xixea be gɔ̃mèjèjea mè.

³⁵Đo àdɔ̀ wù mù, eye mì na mù ènu ɖùɖu. Sìkɔ tì mù, eye mì na mù èsì. Mù nyi àmèjro, eye mì xɔ̀ mù ɖo àxomè.

³⁶Mù lè àma, eye mì tà àvɔ na mù. Mù jè èdɔ̀, eye mì va ji mù kpɔ. Mù nɔ̀ ègàkpa mè, eye mì va kpɔ mù.'

³⁷Eye àmèjɔ̀jɔɛawo la ɖoeŋuti na ɛ̀ be: 'Tɔhonɔ̀, gà kɛ mè ye àdɔ̀ wù wò, eye mi na wò ènu ɖùɖu ò? Gà kɛ mè sìkɔ tì wò, eye mi na wò èsì ò?

³⁸Gà kɛ mè wò nyi àmèjro, eye mi xɔ̀ wò ɖo àxomè ò? Gà kɛ mè ye wò lè àma, eye mi tà àvɔ na wò ò?

³⁹Gà kɛ mè wò jè èdɔ̀, àlo wò lè ègàkpa mè eye mi va ji wò kpɔ ò?'

⁴⁰Eye èfìɔa la ɖoeŋuti na wo be: 'Nyàwo mù le to na mì, gà ɖekpekpe gàmè kè mì wɔ̀ ènu kèawo na nɔ̀vi nyè kè hùe wuawo dòmètɔ ɖèkaa, ènyè ye mì wɔ̀ ɛ̀ na.'”

⁴¹“E yomèa, e la gblɔ̃ na àmè kèwo lè yebe èmìɔ̃ mèawo be: 'Mì dɔ̃ yì lè gbɔ nyè, mì, àmè kèwo Mawu sɛ̃kpɛ̃ naawo. Mì yì èzò màvɔ kè Mawu do ɖɛ na Àbòsam ku yebe àtikplɔtɔwoa mè.

⁴²Đo àdɔ̀ wù mù, eye mì mu na mù ènu ɖùɖu ò. Sìkɔ tì mù, eye mì mu na mù èsì ò.

⁴³Mù nyi àmèjro, eye mì mu xɔ̀ mù ɖo àxomè ò. Mù lè àma, eye mì mu tà àvɔ na mù ò. Mù jè èdɔ̀, nɔ̀ ègàkpa mè eye mì mu va ji mù kpɔ ò.'

⁴⁴Wàlɛbɛ ŋuaa, woawo cã wo la biɔ ɛ̀ be: 'Tɔhonɔ̀, gà kɛ mè ye mi kpɔ wò, àdɔ̀ wù wò, àlo sìkɔ tì wò ò? Gà kɛ mè wò nyi àmèjro ò? Gà kɛ mè mi kpɔ wò lè àma ò? Gà kɛ mè mi kpɔ wò, wò jè èdɔ̀, wò lè ègàkpa mè, eye mi mu do wò àlɔ̀ ò?'

⁴⁵Vɔ̀a, e la ɖoeŋuti na wo be: 'Nyàwo mù le to na mì, gà ɖekpekpe gàmè kè mì mu wɔ̀ ènu kèawo na àmè kèwo hùe wùawo dòmètɔ ɖèka òa, ènyè ye mì mu wɔ̀ ɛ̀ na ò.'

⁴⁶Eye wo la sɔ àmè vuɛ̃ ŋuawo do èzò màvɔ mè; vɔ̀a, àmèjɔ̀jɔɛawo la ɖota àgbè màvɔa mè.”