Read gen Màteo 26 Bible Online

Màteo 26 - gen bible

Màteo 26

¹Kè Yesù gblɔ̃ ènyà kèawo keŋu vɔ̀a, e gblɔ̃ na yebe nukplaviwo be: “Mì nya be lè ŋùkèkè èvè yomèa, wo la ɖù Toŋutivayì be àzãa.

²Wo la sɔ *Àgbètɔ be Èvia do àsi ne woa ka ɛ̀ ɖo àtisòga ŋuti.”

³Wàlɛbɛ ŋua, * mawunɔ gãwo ku èdùmèmègãwo bɔ̀ lè mawunɔ gã kè wo yɔna be Kayafà be èfìɔsa mè,

⁴eye wo pò ɖodu be, yèwo la le Yesù ku àyè, la wù ì.

⁵Wo gblɔ̃ be: “Mu gbà nyi lè àzãa gbè, ne àmèhaa bèa tɔ̀zĩ ò.”

⁶Yesù va Betanìa, lè Simɔ̀n èkpònɔ̀a[38] be àxomè.

⁷Nyɔ̃nù ɖe va e gbɔ, hɛ̃ àmì huɛ̃ titi, xɔ̀ ci ɖe kè lè àlùbatrò be ègòvi mèa ɖo àsi. Nyɔ̃nùa kɔ̀ àmì huɛ̃ titia ɖo èta na Yesù, wàlɛbɛ kè be le ɖù ènua.

⁸Kè Yesù be nukplaviwo kpɔ ènu kèa, àdɔ̀mè ve wo ŋutɔ eye wo gblɔ̃ be: “Ènu gugu kɛ ye nyi ekèa ò?

⁹Đo wo teŋu sà àmì huɛ̃ titi kèa èci sùgbɔ, la sɔ yebe ègàa ma na wɔ̀amènɔ̀wo.”

¹⁰Kè Yesù nya ɛ̀a, e gblɔ̃ na wo be: “Nukɛ ŋuti ye mì le do nupo na nyɔ̃nù kèa ɖo ò? Ènu nyuɛ̃ ye be wɔ̀ na mù.

¹¹Đo wɔ̀amènɔ̀wo la nɔ̀ ku mì tɛ̀gbɛ̀. Vɔ̀a ènyè yaa, nyè mu la nɔ̀ ku mì, kaka sɔ yì ò.

¹²Đo ekè e kɔ̀ àmì huɛ̃ titi kèa ɖo ŋuti nyèa, e wɔ̀ ɛ̀ na àpe ɖìɖi.

¹³Nyàwo mù le to na mì: àfi sia àfi kè wo la do àŋɛ̀nyuɛ̃ kèa lè, lè xixe kplògòdòa mèa, wo la gblɔ̃ ènu kè nyɔ̃nù kèa wɔ̀a cã lè yebe ŋùɖo mè.”

¹⁴Eŋuã yomèa, àmè kè tɔ̀ Yudà Iskariɔt lè Yesù be *nukplavi woèvèawo dòmèa, yì kpɔ * mawunɔ gãwo,

¹⁵eye e gblɔ̃ na wo be: “Nukɛ ye mì la na mù, ne mù sɔ Yesù do àsi na mì ò?” Wo hlɛ̃ klòsalò-ga ègbã sɔ na ɛ̀.

¹⁶Sò gà ŋua mèa, Yudà le ji gà kè mè la nyɔ ne bèa sɔ Yesù do àsì na woa.

¹⁷Lè *kpɔ̃nɔ àkpiti be ŋùkèkè cucugbã gbèa, nukplaviawo va gblɔ̃ na Yesù be: “Fikɛ ye wò jro be mia jràɖo ɖɛ na wò, ne wòa ɖù Toŋutivayì-lɛ̃via lè ò?”

¹⁸Eye e gblɔ̃ be: “Mì yì èdùa mè, lè ŋusù kèa leke gbɔ. Mì to na ɛ̀ be: 'Ènufiɔtɔa be: àzã nyè lili vɔ̀, gbɔ̀ wò ye mù la ɖù *Toŋutivayì be àzã ku *nukplavi nyèwo lè.'”

¹⁹Nukplaviawo wɔ̀ ènu kè Yesù gblɔ̃ na woa, eye wo ɖà Toŋutivayì be ènu ɖùɖua.

²⁰Eye ekè fìɛ̃si ɖoa, Yesù ku nukplavi woèvèawo nɔ̀ ànyi la ɖù ènu.

²¹Wàlɛbɛ kè wo le ɖù ènua, Yesù gblɔ̃ be: “Nyàwo mù le to na mì. Àmè ɖèka lè mìa dòmè la do mù àsi.”

²²Nènea, àkpɔ̃ ɖɔ wo ŋutɔ, eye woa dòmètɔ ɖè sia ɖè le biɔ ɛ̀ be: “Àpetɔ, ènyè ye à?”

²³Yesù ɖoeŋuti na wo be: “Àmè kè do àsi àgbãa mè ku mùa ye nyi àmè kè la do mù àsia

²⁴*Àgbètɔ be Èvia le yì, sìgbè àlekè wo ŋlɔ̀ ɛ̀ ɖɛ ɖo e ŋutia nène. Vɔ̀a hèlu na àmè ŋua kè la do Àgbètɔ be Èvia àsia. E la nyɔ na nènemea wu, be wo mu gbà jì ì klua ò.”

²⁵Eye Yudà, àmè kè do è àsia gblɔ̃ be: “Àpetɔ, ènyè ye à?” E gblɔ̃ na ɛ̀ be: “Èwò ye gblɔ̃ ɛ̀.”

²⁶Wàlɛbɛ kè wo le ɖù ènua, Yesù sɔ kpɔ̃nɔ eye ekè e do àkpe na Mawu vɔ̀a, e kã ɛ̀, eye e sɔ ɛ̀ na yebe nukplaviawo. E gblɔ̃ na wo be: “Mì xɔ̀ ne mìa ɖù ì. Ekèa ye nyi àpe ŋutilã.”

²⁷E yomèa, e sɔ kogòa, eye, ekè e do àkpe na Mawu vɔ̀a, e sɔ ɛ̀ na wo, gblɔ̃ be: “Mìa kpata mì nù ì,

²⁸ɖo, ekèa ye nyi àpe èhũ, *zòɖùɖu be hũ kè wo kɔ̀ ɖɛ ɖo àmè sùgbɔ ta, sɔ na èvuɛ̃ be kèkea.

²⁹Mù le to na mì: so ekèa yomèa, nyè mu gbà la nù vɛ̃ kèa, kaka sɔ na àzã ŋua gbè, ekè mù la gbà nù ì ku mì lè Ètɔ nyè be fìɔdua mè ò.”

³⁰Eye ekè wo jì àkpedohàwo vɔ̀a, wo to yì àmìti-toa ji.

³¹Wàlɛbɛ ŋua, Yesù gblɔ̃ na wo be: “Mìa kpata mì la kpɔ àfɔ̀klɛ̃ lè èzã kèa mè ɖo ŋuti nyè. Đo wo ŋlɔ̀ ɛ̀ ɖɛ be: 'Mù la pò àlɛ̃kplɔ̀tɔa, eye àlɛ̃haa la kãhlɛ̃.'

³²Vɔ̀a ne mù fɔ̃ so èkua, mù la jè ŋùkɔ̀ na mì yì Galilea.”

³³Petrò ɖoeŋuti na ɛ̀ be: “Ne àmèwo keŋu la kpɔ àfɔ̀klɛ̃ ɖo ŋuti wò cã, nyè yaa, nyè mu la kpɔ ɛ̀ gbèɖe ò.”

³⁴Yesù gblɔ̃ na ɛ̀ be: “Nyàwo mù le to na wò be, lè èzã kèa mè ŋutɔ cã a, gbɔ̀xue kòklo la ku àtɔa, wò la gbe zè ètɔ̃ be yè mu jèsi mù ò.”

³⁵Vɔ̀a, Petrò gblɔ̃ na ɛ̀ be: “Ne e hiã be ma ku ku wò cã a, nyè mu la gbe wò ò.” Nukplavi kpɔ̀tɛawo kpata cã gblɔ̃ nènea.

³⁶Eŋuã yomèa, Yesù ku yebe nukplaviawo va tèpe ɖe kè wo yɔna be Gecemanìa, eye e gblɔ̃ na wo be: “Mì nɔ̀ fikèa ne ma yì fãkue lè funu ma va.”

³⁷E kplɔ̀ Petrò ku Zebedeo be èvi ŋusù èvèawo ɖo ŋuti. Àkpɔ̃ ɖɔ ɛ̀ eye e ci siayi[39]

³⁸E gblɔ̃ na wo be: “Èkla nyè ɖɔ ku àkpɔ̃ sìgbè ma ku nène; mì nɔ̀ fikèa, ne mìa nɔ̀ ŋùtè[40] ku mù.”

³⁹Eye, e zɔ̃ yì ŋùkɔ̀ vi ɖe, sɔ ŋùmè cɔ̃ ànyi. E fãkue gblɔ̃ be: “Ètɔ nyè, ne e la teŋu nya wɔ̀wɔa, na ne kogò[41] kèa ne to ŋuti nyè va yì. Mu gbà nyi àpe èjro ò, vɔ̀a ne nyi àpo èjro.”

⁴⁰E yomèa, e trɔva yebe nukplavi ètɔ̃awo gbɔ, eye e kpɔ wo lè àlɔ̃ mè. E to na Petrò be: “Eŋuãa, mì mu teŋu nɔ̀ ŋùtè gàpòpo ɖèka tètè ku mù òa?

⁴¹Mì nɔ̀ ŋùzɔ̃, ne mìa nɔ fãkue, ne mì mu gbà jè tètèkpɔ mè ò. Gbɔ̃gbɔ̃ a ɖo èjro nyuɛ̃, vɔ̀a ŋutilãa gbɔjɔ.”

⁴²E gbà yì fãkue lè àzɔ̀ge zè èvègɔ̃a, be: “Ètɔ nyè, ne kogò kèa mu teŋu to ŋuti nyè, ekè nyè mu la nù ì òa, e ŋua àpo èjro ne nyi wɔ̀wɔ!”

⁴³E yomèa, Yesù gbà trɔva yebe nukplaviawo gbɔ, gbà kpɔ wo lè àlɔ̃ mè ke, ɖo, woabe ŋùkuviwo kpata ci kàɖì.

⁴⁴E gble wo ɖɛ, eye be gbà yì àzɔ̀ge. E fãkue zè ètɔ̃gɔ̃a, eye be gbà gblɔ̃ ènyà ŋuawo ke.

⁴⁵E yomèa, e trɔva nukplaviawo gbɔ, gblɔ̃ na wo be: “Mì gbà le dɔ̃ àlɔ̃ eye mì jo le gbɔ̃jɛ̃a? Gà kè mè wo la sɔ Àgbètɔ be Èvia do àsi na ènuvuɛ̃wɔ̀tɔwoa sù vɔ̀.

⁴⁶Mì sitè, ne mia jo. Kpɔɖa, àmè kè la do mù àsia va ɖo vɔ̀!”

⁴⁷Eye wàlɛbɛ kè e kpɔ̀tɔ̀ le pò nupoa, kpɔɖa Yudà kè nyi nukplavi woèvèawo dòmètɔ ɖèkaa, va ɖo. Àmè sùgbɔ kpàsà ɛ̀ do. Wo hɛ̃ èwui ku èkpò. Mawunɔ gãwo ku Yudàviwo be èdùmèmègãwo ye dɔ̃ wo ɖoɖa.

⁴⁸Àmè kè le do Yesù àsia na wo jèsì ɖe be: “Àmè kè mù la kisì na a ye, mì le è.”

⁴⁹Kè e gogo Yesù zè ɖèkaa, e gblɔ̃ na ɛ̀ be: “Mù do ègbè na wò Ènufiɔtɔ!” Eye e kisì na ɛ̀.

⁵⁰Yesù gblɔ̃ na ɛ̀ be: “Èxlɔ̃ nyè wɔ̀ ènu kè ŋuti wò va ɖoa.” Eye àmè kèwo kpàsà Yudà doawo jè Yesù ji, le è.

⁵¹Eye kpɔɖa àmè kèwo lè ku Yesùa, dòmètɔ ɖèka ɖè yebe èwui to lè àku mè. E dà èwuia mawunɔ gãa be sumɔ̃vi, kpà èto na ɛ̀.

⁵²Wàlɛbɛ ŋua, Yesù gblɔ̃ na ɛ̀ be: “Gbìgbɔ̀ èwui wòa ɖo ye tèpe, ɖo àmè kèwo keŋu sɔna èwuia, èwui kè wo la sɔ wù wo.

⁵³Wò susu be nyè mu la teŋu biɔ Ètɔ nyè, ne bèa ɖo àtikplɔtɔ kèwo la wu àhùakɔ̃ woèvèa ɖoɖa mù òa.

⁵⁴Vɔ̀a, ne mù wɔ̀ nènea, àleke ye ènu kèwo wo ŋlɔ̀ ɖɛ ɖo mawunya xoma a mèa la zɔ̃ sù ɖo be ekèawo ɖo la jɔ̀ ò?”

⁵⁵Eye Yesù gblɔ̃ na àmèhawo be: “Fìãfìtɔ ye mù nyi, ye mì sɔ èwui ku èkpò la va le mùa? Gbè sia gbèa, mù nɔ̀nà mawuxɔa mè, fiɔna ènu, gãke mì mu le mù ò.

⁵⁶Vɔ̀a, ekèa jɔ̀ ne gblɔ̃ɖɛtɔwo be ŋɔ̀ŋlɔ̃awo ne zɔ̃ sù.” Eye nukplaviawo kpata gble è ɖɛ, si jo.

⁵⁷Àmè kèwo le Yesùa, kplɔ̀ ɛ̀ yì mawunɔ gã Kayafà gbɔ, lè àfi kè èsefiɔtɔwo ku èdùmèmègãwo bɔ̀ lèa.

⁵⁸Petrò kpàsà Yesù do, vɔ̀a mu gogo è ò. E nɔ̀ àzɔ̀ge kaka yì mawunɔ gãa be àxomè, nɔ̀ ànyi ku sumɔ̃viwo, ne bèa teŋu nya àlekè ènuwo la vɔ̀ ɖoa.

⁵⁹Vɔ̀a, Mawunɔ gãwo ku àmè kèwo lè èdùnyagbɔ̃gblɔ̃ be kòjoɖotɔwo be èhabɔ̀bɔ[42] mèawo kpata le ji àmè kè la ɖù àjè ɖase ɖo Yesù ŋuti ne woa teŋu sò èku kòjo na ɛ̀a.

⁶⁰Àmè sùgbɔ va ɖù àjè ɖase ɖo e ŋuti, vɔ̀a, ènyà kèwo wo gblɔ̃ so e ŋutiawo mu sù ne woa sò èku kòjo na ɛ̀ ò. Mɛmlɛ̃ nua, àmè èvè ɖewo va ɖo, gblɔ̃ be:

⁶¹“Àmè kèa gblɔ̃ be: 'Mù teŋu gbã mawuxɔa, eye mù la gbìgbɔ̀ tù ì lè ŋùkèkè ètɔ̃ mè.'”

⁶²Mawunɔ gãa sitè, biɔ ɛ̀ be: “Ènu kè àmè kèawo gblɔ̃ so ŋuti wòa yeŋu. Wò ɖo ènu ɖe la sɔ ɖo e ŋuti na woa?”

⁶³Vɔ̀a, Yesù bɔ̀nu. Eye mawunɔ gãa gblɔ̃ na ɛ̀ be: “Mù le biɔ wò lè Mawu àgbè-àgbè a be nyikɔ mè be, ne èwò ye nyi *Mɛ̀sia, Mawu be Èvia, to è na mi.”

⁶⁴Yesù ɖoeŋuti na ɛ̀ be: “Wò gblɔ̃ ɛ̀, eye, mù le to na mì be, so ekèa yomèa, mì la kpɔ Àgbètɔ be Èvia la nɔ̀ ànyi lè Ŋusɛ̃kpatatɔa be ɖùsi mè, gbãnà lè jiŋùkusi be lilikpowo mè.”

⁶⁵Ekè mawunɔ gãa sè ènyà kèa, e zɛ̃ àwù kè be do a, gblɔ̃ be: “E gblɔ̃ bùsu-nya, ɖase kɛwo ye mi gbà hiã ò. Mìa ŋutɔwo mì sè àlekè ye be gblɔ̃ bùsu-nya ɖo Mawu ŋuti ɖo fifìa.

⁶⁶Nukɛ ye mì bù so e ŋuti ò?” Wo ɖoeŋuti na ɛ̀ be: “E jè na èku!”

⁶⁷Wàlɛbɛ ŋua, wo tu ètã kɔ̀ ɖo ŋùmè na ɛ̀, wo tù èkɔ̃ ɛ̀, eye àmè buwo pò èto mè na ɛ̀,

⁶⁸gblɔ̃ be: “Kristò, gblɔ̃ àmè kè pò wò fifìa na mi!”

⁶⁹Wàlɛbɛ ŋua, Petrò nɔ̀ ànyi lè àxuea mè, lè xixenu, mawunɔ gãa be sumɔ̃vi nyɔ̃nù ɖèka va e gbɔ, gblɔ̃ na ɛ̀ be: “Èwò cã wò nɔ̀ Yesù Galileatɔa ŋuti kpɔ.”

⁷⁰Vɔ̀a Petrò gbe lè àmè kèwo lè funua kpata be ŋùmè be: “Nyè mu mɔnu jè ènyà kè wò le gblɔ̃a ŋuti ò.”

⁷¹Eye ekè Petrò zɔ̃ le yì àxuea be àgboa jia, sumɔ̃vi nyɔ̃nù bu kpɔ ɛ̀, gblɔ̃ na àmè kèwo lè funua be: “Àmè kèa nɔ̀ ku Yesù Nazarɛttɔ̀a kpɔ.”

⁷²Eye, Petrò gbà gbe kaka kã àtãŋu ɖo e ji be: “Nyè mu jèsi ŋusù ŋua ò.”

⁷³E yomè, zè ɖèkaa, àmè kèwo nɔ̀tè lè funua, wo va Petrò gbɔ, gblɔ̃ na ɛ̀ be: “Nyàwo ye, woa dòmètɔ ɖèka ye wò cã wò nyi, ɖo àpo nupo pòpo cã ɖè è fiɔ.”

⁷⁴Wàlɛbɛ ŋua, e tɔ ènu tàta ku kpɛ̃sɛ̃ na ye ɖokoe gblɔ̃ be: “Nyè mu jèsi ŋusù kèa ò.” Gà ŋua mè tututua, kòklo ku àtɔ.

⁷⁵Eye Petrò ɖoŋù ènyà kè Yesù gblɔ̃ na ɛ̀ sãa be: “Gbɔ̀xue kòklo la ku àtɔa, wò la gbe mù zè ètɔ̃.” Petrò to jè àgboanu, fã àvi veve ɖe.