Read gen Màteo 27 Bible Online

Màteo 27 - gen bible

Màteo 27

¹Ekè èŋù kèa, * mawunɔ gãwo kpata ku èdùmèmègãwo bɔ, pò nupo, ɖo èkpe e ji ɖo Yesù ŋuti be, yèwo la gblehùɛ do è na èku.

²Eye ekè wo bla Yesù vɔ̀a, wo kplɔ̀ ɛ̀ to, sɔ ɛ̀ yì do àsi na dùjiɖùtɔ Pilatò.

³Kè Yudà, àmè kè do Yesù àsia, kpɔ be wo gblehùɛ do èa, ènu kè be wɔ̀a ve è. E sɔ klòsalò-ga ègbãawo yì na * mawunɔ gãawo ku dùmèmègãawo,

⁴gblɔ̃ be: “Mù jè àgɔ̀, mù do èhũ mà-nyãɖe àsi.” Vɔ̀ a, wo to na ɛ̀ be: “Fikɛ eŋuã kã mi ɖo ò? Èwò ye be kã.”

⁵Eye Yudà sɔ klòsalò-ga a dãŋùgbe ɖo kɔ̀kɔ̀ɛpe a gbɔ, eye be jo. E yomè a, e yì do èkà ève[43].

⁶Mawunɔ gãawo yì cã klòsalò-gaawo, gblɔ̃ be: “Miabe *èse mu ɖè èmɔ̃ na mi be mi a sɔ ègà kè a do ènujɔ̀ɖakà a mè ò, ɖo èhlɔ̃ dãdã be ègà ye be nyi.”

⁷Eye, ekè wo jrò ènyà a mè kpɔ nyuɛ̃ ɖe a, wo ɖo ègbè du, sɔ ègà a plè èze-mètɔ ɖe be àgblè. Wo sɔ àgblè ŋua wɔ̀ àmèjrowo be ɖìpe.

⁸Ènu kè a ŋuti ye wo yɔna àgblè ŋua be: “Èhũ be àgblè” kaka va na egbè.

⁹Wàlɛbɛ ŋua, Mawu be gblɔ̃ɖɛtɔ Yeremìa be ènyà, kè be gblɔ̃ ɖɛ a, zɔ̃ sù be: “Wo sɔ klòsalò-ga ègbã, àmè kè ta wo do àsì ɖoa be èci, àmè kè ta ye Izràɛlviwo do àsì ɖoa.

¹⁰Wo sɔ ɛ̀ plè èzemètɔ be àgblè, sìgbè àlekè Tɔhonɔ̀ ɖè ègbè na mùa nène.”

¹¹Kè Yesù va dùjiɖùtɔ Pilatò be ŋùkɔ̀a, dùjiɖùtɔa biɔ ɛ̀ be: “Èwò ye nyi Yudàviwo be èfìɔa?” Yesù ɖoeŋuti be: “Èwò ye le gblɔ̃ ɛ̀.”

¹²Vɔ̀a, wàlɛbɛ kè mawunɔ gãawo ku dùmèmègãawo le dohùɛ do èa, mu kè ènu ò.

¹³Eye Pilatò gblɔ̃ na ɛ̀ be, “Wò mu le sè ènyà gbogbo kè wo le gblɔ̃ so ŋuti wòa?”

¹⁴Vɔ̀a, Yesù mu ɖo ènyà ɖekpe ŋuti ò, eye, e kpaca dùjiɖùtɔa ŋutɔ.

¹⁵Lè àzã ɖùɖu hùenua, Romà be dùjiɖùtɔa, ɖènà gàmènɔ̀tɔ kè àmèhaa biɔa ɖèka to lè ègàkpa mè.

¹⁶Lè gà ŋua mèa, wo ɖo gàmènɔ̀tɔ ɖèka kè àmèwo keŋu jèsi, wo yɔna ɛ̀ be Yesù Barabas.

¹⁷Kè dùkɔ̃a va bɔ̀a, Pilatò biɔ wo be: “Àmè kɛ ye mì jro be ma ɖè to lè ègàkpa mè na mì ò? Yesù Barabas ye loo, àlo Yesù kè wo yɔna be Kristò?”

¹⁸Đo e nya nyuɛ̃ ɖe be ŋuhuã ŋuti ye wo do è àsi na yè ɖo.

¹⁹Wàlɛbɛ kè e nɔ̀ ànyi lè kòjoɖo-zìkpea jia, èsrɔ̃a dɔ̃ àmè ɖoɖa ɛ̀ be: “Mù gbà ɖo ènu ɖekpe ku àmèjɔ̀jɔɛ ŋua ò, ɖo, egbè, èzã mè, lè èdrɔ̃ mèa, mù kpe èfũ sùgbɔ ɖo e ŋuti.”

²⁰Vɔ̀a, mawunɔ gãawo ku dùmèmègãawo, zĩ àmèhaa ji, ne woa biɔ Pilatò be, bèa ɖè Barabas to lè ègàkpa mè ne bèa wù Yesù.

²¹Dùjiɖùtɔa gbà biɔ wo be: “Àmè kɛ ye mì jro be ma ɖè to lè ègàkpa mè na mì lè àmè èvè kèawo dòmè ò?” Wo ɖoeŋuti na ɛ̀ be: “Barabas mi le ji.”

²²Pilatò biɔ wo be: “Nukɛ ye mù la wɔ̀ na Yesù kè wo yɔna be Kristò ò?” Woa kpata wo ɖoeŋuti na ɛ̀ be: “Ka ɛ̀ ɖo àtisòga ŋuti!”

²³Pilatò gbà biɔ wo be: “Àgɔ̀ kɛ ye be jè ò?” Vɔ̀a, wo do àpa sɛ̃sɛ̃ ɖe be: “Ka ɛ̀ ɖo àtisòga ŋuti!”

²⁴Eye ekè Pilatò kpɔ be, wɔ̀na ɖekpe mu gbà lè ò, vɔ̀ bòhũ èzĩ ji la tɔ̀a, e sɔ èsì klɔ àlɔ̀ lè àmèhaa be ŋùmè, gblɔ̃ be: “Nyè mu nya èɖe lè èhũ kèa be kɔ̀kɔ̀ ɖɛ mè ò. Mìa ŋutɔwo mìabe ènyà ye!”

²⁵Eye dùkɔ̃a kpata ɖoeŋuti be: “Yebe èhũ ne nɔ̀ mia ku miabe èviwo ji.”

²⁶Wàlɛbɛ ŋua, Pilatò ɖè Barabas to lè ègàkpa mè na wo. E na wo pò Yesù ku àtãŋù[44]. E yomèa, e do è àsi na gbãdãgbãwo, ne woa ka ɛ̀ ɖo àtisòga ŋuti.

²⁷Wàlɛbɛ ŋua Pilatò be gbãdãgbãwo kplɔ̀ Yesù yì dùjiɖùtɔa be èfìɔsaa mè, eye wo bɔ̀ gbãdãgbãwo be èhaa kpata ɖo e ŋuti.

²⁸Wo ɖè àwù kèwo lè e ŋutiawo, eye wo sɔ àwù jɛ̃ vlàyà ɖe do na ɛ̀.

²⁹Wo sɔ àŋùja lɔ̃ jègbà[45], sɔ cɔ̃ èta na ɛ̀. Wo ji àpla [46] do ɖùsi-lɔ mè na ɛ̀, eye wo jè èklò ɖo ŋùkɔ̀ na ɛ̀, le kò è be: “Mi do ègbè na wò, Yudàviwo be èfìɔ.”

³⁰Wo tu ètã kɔ̀ ɖo e ŋuti, eye wo xɔ̀ àplaa lè e si, sɔ pò èta na ɛ̀.

³¹Kè wo ɖè àlɔ̀mè lè e ŋuti vɔ̀a, wo ɖè àwù jɛ̃ vlàyàa lè èkɔ̀ na ɛ̀. Wo gbìgbɔ̀ sɔ ye ŋutɔ be àwùwo do na ɛ̀. E yomèa, wo kplɔ̀ ɛ̀ yì, ne woa ka ɛ̀ ɖo àtisòga ŋuti.

³²Kè wo to lè funu va le yìa, wo dogò Kirenè ŋusù ɖe, ekè wo yɔna be Simɔ̀n. Gbãdãgbãwo zĩ e ji, be bèa dro Yesù be àtisògaa.

³³Kè wo va tèpe kè wo yɔna be Golgatàa, ekè be gɔ̃mèɖèɖe ye nyi “Àmètatèpea”,

³⁴wo sɔ vɛ̃ kè wo caka ku ègbe veve ɖe a na Yesù ne bèa nù. Vɔ̀a, ekè e ɖɔ vɛ̃a kpɔa, e gbe be yè mu la nù ì ò.

³⁵Wàlɛbɛ kè wo ka ɛ̀ vɔ̀a, wo dà àkɔ̀ sɔ ma yebe àwùwo.

³⁶E yomèa, wo nɔ̀ ànyi, lè ɖia ɛ̀.

³⁷Lè yebe èta gbea, wo ŋlɔ̀ àgɔ̀ kè be jè a be: “Àmè kèa ye nyi Yesù, Yudàviwo be èfìɔa.”

³⁸Eye wo ka fĩãfìtɔ èvè bɔ̀ ɖo e ŋuti, ɖèka ɖo ɖùsi mè, èvègɔ̃a ɖo èmìɔ̃ mè.

³⁹Àmè kèwo le to funu, va le yìawo le hũhũ èta, le zũ ì,

⁴⁰le gblɔ̃ be: “Èwò kè be yèa gbã kɔ̀kɔ̀ɛpea, la gbìgbɔ̀ tù ì lè ŋùkèkè ètɔ̃ mèa yeŋuã? Hlùɛ̃ ɖokoe wò gã. Ne Mawu be Èvi ye wò nyi nyàwo a, ɖì lè àtisògaa ŋuti.”

⁴¹Mawunɔ gãwo ku èsefiɔtɔwo kudo èdùmèmègãwo cã le ɖè àlɔmè lè ŋuti. Wo gblɔ̃ na ɛ̀ be:

⁴²“E hlùɛ̃ àmè buwo gã, vɔ̀a mu teŋu hlùɛ̃ ye ɖokoe gã ò. Mu nyi Izràɛl be èfìɔ ye be gblɔ̃ be yè nyia? Ne ɖì le àtisògaa ŋuti fifì, eŋuãa, mi la xɔ̀ e ji sè.

⁴³E be yè dojì ɖo Mawu ŋuti; ne Mawu lɔ̃ ɛ̀ nyàwo a, ne hlùɛ̃ ɛ̀ gã fifì; ɖo e gblɔ̃ be: 'Mù nyi Mawu be Èvi.'”

⁴⁴Eye fĩãfìtɔ kèwo wo ka bɔ̀ ɖo e ŋutiawo cã le zũ ì.

⁴⁵So gà woèvè mè kaka va yì gà ètɔ̃ mèa, vìvìti do lè èdùa kpata mè.

⁴⁶Lè gà ètɔ̃ mè lɔ̀gea, Yesù do àpa sɛ̃sɛ̃ ɖe gblɔ̃ be: “Eli, Eli, Lama sàbatanì?” E gɔ̃mè ye nyi: “Mawu nyè, Mawu nyè, nukɛ ŋuti ye wò gble mù ɖɛ ɖo ò?”

⁴⁷Àmè kèwo nɔ̀tè lè funu a dòmètɔ ɖewo sè ènu kè be gblɔ̃ a, eye wo gblɔ̃ be: “E le yɔ Eli!”

⁴⁸Eye àmè ɖèka lè woa dòmè pu dù yì sɔ àpùmè-kùsa nyrɔ̃ ɖo vɛ̃ vesì mè, sɔ ɛ̀ ɖo àpla dìdi ɖe nu. E drɛ̃ àpla kè a ɖoɖa Yesù, ne bè a nù.

⁴⁹Vɔ̀ a, àmè kpɔ̀tɛawo gblɔ̃ be: “Tɔtè ne mi a kpɔ be Eli la va hlùɛ̃ ɛ̀ gã màa?”

⁵⁰Vɔ̀ a, kè Yesù gbà do àpa sɛ̃sɛ̃ ɖe a, e jo yebe gbɔ̃gbɔ̃ a na.

⁵¹Eye, kpɔɖa, xɔ̀mèsòvɔ kè lè Kɔ̀kɔ̀ɛpe a zɛ̃ ɖo èvè, so èji va gɔ̃mè; ànyigbã a hũhũ, eye àkpãwo fɛ̃.

⁵²Èyɔ̀dowo hũ, eye Mawu be àɖèsãme kèwo ku va yìa, sùgbɔ fɔ̃ so èku.

⁵³Wo to lè woabe èyɔ̀dowo mè. Ekè Yesù fɔ̃ yomèa, wo ɖo Yèruzàlɛm, èdù kɔ̀kɔ̀ɛa mè, eye àmè sùgbɔ kpɔ wo.

⁵⁴Kè àhùagaa ku àmè kèwo bɔ̀ ɖo e ŋuti le ɖia Yesùa, wo kpɔ àlekè ànyigbãa hũhũ ɖoa, ku àlekè ènuwo yì ɖoa, vɔ̃vɔ̃ gã ɖe jè woa ji, eye wo gblɔ̃ be: “Mawu be Èvi ye àmè kèa nyi nyàwo.”

⁵⁵Nyɔ̃nù kèwo kpàsànà Yesù do, kpena ɖo e ŋutiawo sùgbɔ kplɔ̀ ɛ̀ do so Galilea va funua. Wo lètè lè àzɔ̀ge le kpɔ ènu kèwo le jɔ̀ a ɖoɖa.

⁵⁶Mari Magdalà tɔ̀a, ku Mari kè nyi Yakobò ku Yozɛ̀f be ènɔa, kudo Zebedeo be viwo be ènɔ̀ lè woa dòmè.

⁵⁷Keŋu gbɔ̀xue èzã la do a, ŋusù àdɔ̀kùnɔ̀ Arimatètɔ̀ ɖe va, wo yɔna ɛ̀ be Yozɛ̀f. Yesù be *nukplavi ye e cã nyi.

⁵⁸Ŋusù kèa yì Pilatò gbɔ, biɔ Yesù be àmètia. Pilatò na ègbè gbãdãgbãwo be woa sɔ ɛ̀ na ɛ̀.

⁵⁹Yozɛ̀f ɖè Yesù be àmètia jo lè àtisòga ŋuti, sɔ ɛ̀ bla ɖo kploba xɔ̀asì yeye ɖe mè,

⁶⁰sɔ ɛ̀ yì mlɔ̃ èyɔ̀do yeye kè wo kù ɖo àkpã mè na ye ŋutɔa mè. Yozɛ̀f mlì èkpe gã ɖe ɖo èyɔ̀doa nu, eye be jo.

⁶¹Mari Magdalà tɔ̀a ku Mari ɖètɔawo nɔ̀ ànyi lè funu, jè ŋùkɔ̀ èyɔ̀doa.

⁶²Lè ŋùkèkè kè jè jàjràɖo be àzãa yomèa, mawunɔ gãwo ku Farizìwo zɔ̃ ɖodu yì Pilatò gbɔ. Wo gblɔ̃ na ɛ̀ be:

⁶³“Àpetɔ, mì ɖoŋù be wàlɛbɛ kè àmèflùtɔ ŋua kpɔ̀tɔ̀ lè àgbè a, e gblɔ̃ be: 'Mawu la fɔ̃ mù so èku lè ŋùkèkè ètɔ̃gɔ̃a gbè.'

⁶⁴Ye ŋutia, na ne gbãdãgbãwo ne yì ɖia èyɔ̀doa nyuɛ̃ ɖe, kaka na ŋùkèkè ètɔ̃gɔ̃a gbè. Ne mu nyi nène òa, yebe nukplaviwo teŋu fĩ yebe àmètia, la gblɔ̃ be: 'E fɔ̃ so èku vɔ̀.' Àmèfùflu kèa la nyrã wu cucugbã tɔ̀a.”

⁶⁵Eye Pilatò gblɔ̃ na wo be: “Gbãdãgbãwo yeŋuã. Mì kplɔ̀ wo, ne woa yì ɖia èyɔ̀doa, sìgbè àlekè mì jro a nène.”

⁶⁶Wo yì tu èyɔ̀doa nyuɛ̃ ɖe, do e jèsìdo. Wo sɔ gbãdãgbãwo ɖo funua.