Read gen Màteo 28 Bible Online

Màteo 28 - gen bible

Màteo 28

¹Lè Kuasiɖa be ŋùkèkè cucugbãa gbe, lè jɛ̃gbɔ̃zã yomèa, Mari Magdalà tɔ̀a ku Mari ɖètɔawo fɔ̃ zã la yì kpɔ Yesù be èyɔ̀doa.

²Eye kpɔɖa, ànyigbã hũhũ ku hɔ̃hlɔ̃, eye Tɔhonɔ̀ be àtikplɔtɔ ɖe so jiŋùkusi va mlì èkpe kè wo sɔ tu èyɔ̀doa nua jo, eye be nɔ̀ ànyi ɖo e ji.

³*Àtikplɔtɔa be nɔ̀nɔmè lè sìgbè èjikèzò nène, eye yebe àwù ɣe peŋu-peŋu.

⁴Ekè gbãdãgbã kèwo le ɖia Yesù be èyɔ̀doawo kpɔ ɛ̀a, vɔ̃vɔ̃ ɖo wo eye wo le hũhũ tìtìtì. Wo jè ànyi, lè sìgbè àmè kukuwo nène.

⁵Vɔ̀a, àtikplɔtɔa gblɔ̃ na nyɔ̃nùawo be: “Mìawo yaa, mì mu gbà vɔ̃ ò, ɖo mù nya be Yesù kè wo ka ɖo àtisòga ŋutia ye mì le ji.

⁶Mu lè fikèa ò, ɖo e fɔ̃ so èku sìgbè àlekè ye ŋutɔ gblɔ̃ na mì sãa nène. Mì va kpɔ àfi kè wo sɔ ɛ̀ mlɔ̃ a ɖa.

⁷Mì ɖè bla yì to na yebe nukplaviwo be: 'E fɔ̃ so àmè kukuwo dòmè vɔ̀. E jè ŋùkɔ̀ na mì le yì Galilea, funu ye mì la kpɔ ɛ̀ lè.' Kpɔɖa mù gblɔ̃ ɛ̀ na mì.”

⁸Nyɔ̃nùawo ɖèbla jo lè èyɔ̀doa to. Wo le vɔ̃, gãke èjì gbà le jɔ̀ wo ŋutɔ. Wo pu dù va yì do àŋɛ̀a na Yesù be nukplaviawo.

⁹Eye kpɔɖa, Yesù va dogò wo, eye be gblɔ̃ na wo be: “Mù do ègbè na mì.” Wo tètè gogo è, le yebe àfɔ̀wo, eye wo sumɔ ɛ̀.

¹⁰Wàlɛbɛ ŋua, Yesù to na wo be: “Mì mu gbà vɔ̃ ò, mì yì, ne mìa to na nɔ̀vi nyèwo be woa yì Galilea; funu ye wo la kpɔ mù lè.”

¹¹Eye wàlɛbɛ kè nyɔ̃nùawo lè èmɔ ji le yìa, gbãdãgbã kèwo le ɖia Yesù be èyɔ̀doa dòmètɔ ɖewo va Yèruzàlɛm. Wo gblɔ̃ ènu kèwo keŋu jɔ̀awo na * mawunɔ gãwo.

¹²*Mawunɔ gãwo ku èdùmèmègãwo bɔ̀, bù èta mè so ènyà kè gbãdãgbãwo va gblɔ̃ na woa ŋuti. Wo na ègà sùgbɔ gbãdãgbã kèawo,

¹³bla èse ku wo be: “Mì to na àmèwo be: 'Yesù be nukplaviwo zɔ̃ èzã va fĩ yebe àmètia, wàlɛbɛ kè mi le dɔ̃ àlɔ̃a.'

¹⁴Eye ne dùjiɖùtɔa gbà sè cã a, mi la fa ɛ̀, eye wo mu la do nupo na mì ò.”

¹⁵Gbãdãgbãwo xɔ̀ ègàa, wɔ̀ ɖo ènu kè wo fìɔ woa ji. Eye ènyà kèa kãkã ɖo Yudàviwo dòmè kaka va na egbè.

¹⁶*Nukplavi woeɖèkaawo yì Galilea, lè èto kè Yesù fiɔ àsi na wo sãa ji.

¹⁷Wo kpɔ Yesù lè funu, sumɔ ɛ̀; vɔ̀a woa dòmètɔ ɖewo do àɖìkà.

¹⁸Yesù tètè gogo wo, gblɔ̃ ènyà kèawo na wo be: “Wo sɔ ŋusɛ̃ kè lè jiŋùkusi ku ànyigbã jia kpata do àsi na mù.

¹⁹Mì yì ne mìa fiɔ ènu dùkɔ̃wo keŋu, ne woa trɔ zũ àpe nukplaviwo. Mì lè mawusi na wo, lè Àta ku Èvia kudo Gbɔ̃gbɔ̃ Kɔ̀kɔ̀ɛ a be nyikɔ mè.

²⁰Mì fìɔ wo ènu, ne woa wɔ̀ ɖo ènu kèwo keŋu mù fiɔ mìa ji. Kpɔɖa, mù lè ku mì kaka sɔ na xixea be vɔ̀vɔnu.”