Read gen Màteo 3 Bible Online

Màteo 3 - gen bible

Màteo 3

¹Wàlɛbɛ ŋua, Yòhanɛ̀s Mawusilènamètɔa va, le do Mawu be àŋɛ̀ lè Yudeà be zògbè ji[5].

²E le gblɔ̃ be: “Mì ɖɔ̀lì èdɛ̃, ɖo Mawu be èfìɔɖùɖua lili.”

³Yòhanɛ̀s ŋuti ye Mawu be gblɔ̃ɖɛtɔ Ezayà pò nupo so wàlɛbɛ kè be gblɔ̃ be: “Wo sè àmè ɖe le do àpa lè zògbè ji be: mì jrà Tɔhonɔ̀ be èmɔa ɖo. Mì jɔ̀ yebe àfɔ̀mɔwo nyuɛ̃ ɖe.”

⁴Yòhanɛ̀s dona àwù kè wo sɔ èsɔ-kpotɔnɔ̀ be fu wɔ̀a, eye e blana e ji ku èlãgbàze gojibla-kà. E ɖùnà hùesuviwo, nùnà ègbemè be ànyisì.

⁵Yèruzàlɛmtɔwo ku Yudeatɔwo kpata kudo àmè kèwo lè Yɔrdàn be àgowo jiawo kpata vana Yòhanɛ̀s gbɔ.

⁶Wo hũnà woabe ènuvuɛ̃wo mè na ɛ̀, eye e lènà mawusi na wo lè ètɔ̀ sàsra kè wo yɔna be Yɔrdàn mè.

⁷Ekè bè kpɔ be Farizìwo ku Sadusìwo sùgbɔ va e gbɔ ne bèa lè mawusi na woa, e gblɔ̃ na wo be: “Mìa jàkpàtà be xòmèviwo! Àmè kɛ ye fiɔ mì be mì teŋu si lè Mawu be àdɔ̀mèze kè gbãnà a nu ò?

⁸Mì nɔ wɔ̀ ènu kèwo la ɖè è fiɔ be mì ɖɔ̀lì èdɛ̃a.

⁹Mì mu gbà nɔ bù be ne mì gblɔ̃ lè mìa ɖokoewo mè be: 'Abràham ye nyi mia tɔgbe kpòa e sù vɔ̀ ò.' Đo nyàwo mù le to na mì be Mawu teŋu sɔ èkpe kèwo mì le kpɔ ŋuawo trɔ zũ èviwo na Abràham!

¹⁰Èfiɔ lè àtiwo be èkènu vɔ̀. Àti kè ma sɛ̃ èku nyuɛ̃ òa, wo la sò è, la lɔ ɛ̀ kɔ̀ ɖo èzò mè.

¹¹Ènyè yaa, èsì ye mù sɔ le lè mawusi na mì, sɔ le ɖè è fiɔ be mì ɖɔ̀lì èdɛ̃; vɔ̀a, àmè kè gbãnà, lè yo nyè mèa, wu gã mù, eye nyè mu jè la ɖè yebe àfɔ̀kpawo tètè ò. E yaa, Gbɔ̃gbɔ̃ Kɔ̀kɔ̀ɛ ku èzò ye be la sɔ lè è na mì.

¹²E le yebe fàfà[6] ɖo àlɔ̀ mè. E la fu *èlùawo, la lɔ wo kɔ̀ ɖo yebe àvà ji, vɔ̀a, e la tɔ èzò fòfloawo lè èzò kè mu cina gbèɖe òa mè.”

¹³Wàlɛbɛ ŋua, Yesù so Galilea nyigbã ji va Yòhanɛ̀s gbɔ lè Yɔrdàn ètɔ̀ sàsraa to, ne Yòhanɛ̀s bèa lè mawusi na ɛ̀.

¹⁴Vɔ̀a, Yòhanɛ̀s mu lɔ̃ ɖo e ji ò. E gblɔ̃ be: “Ènyè ye hiã be wòa lè mawusi na, eye wò yaa, wò gbà va gbɔ nyèa?”

¹⁵Eye Yesù ɖoeŋuti na ɛ̀ be: “Na ne bèa nyi nènea fifì jro, ɖo e jè be mia wɔ̀ ɖo Mawu be èjro ji.” Wàlɛbɛ ŋua ye Yòhanɛ̀s lɔ̃ na ɛ̀.

¹⁶Kè wo lè mawusi na Yesù vɔ̀a, e to lè ètɔ̀a mè. Gà ŋua mè kea, jiŋùkusi hũ, eye Yòhanɛ̀s kpɔ Mawu be Gbɔ̃gbɔ̃ a lè sìgbè àhɔ̃nɛ nène, ɖì va Yesù ji.

¹⁷Kpɔɖa, ègbè ɖe ɖì so jiŋùkusi gblɔ̃ be: “Àmè kèa ye nyi èvi nyè ɖève, ekè e jro mù be ma cã a.”