Read gen Màteo 4 Bible Online

Màteo 4 - gen bible

Màteo 4

¹E yomèa, Gbɔ̃gbɔ̃ a kplɔ̀ Yesù yì zògbè ji ne Àbòsam bèa tè è kpɔ.

²Ekè Yesù blanu ŋùkèkè èkà[7], èzã èkà yomèa, àdɔ̀ wù ì.

³Àbòsam va e gbɔ, gblɔ̃ na ɛ̀ be: “Ne Mawu be Èvi ye wò nyi nyàwo a, ɖè ègbè na èkpe kèawo ne woa trɔ zũ ènu ɖùɖu[8].”

⁴Vɔ̀a, Yesù ɖoeŋuti na ɛ̀ be: “Wo ŋlɔ̀ ɛ̀ ɖɛ be: 'Mu nyi ènu ɖùɖu ɖèɖe kpò àgbètɔ la ɖù sɔ nɔ̀ àgbè ò, vɔ̀a, e hiã ènyà ɖè sia ɖè kè Mawu gblɔ̃a.'”

⁵E yomèa, Àbòsam kplɔ̀ Yesù yì èdù kɔ̀kɔ̀ɛa mè, sɔ ɛ̀ ɖo mawuxɔa tamè lè èji boo,

⁶gblɔ̃ na ɛ̀ be: “Ne Mawu be Èvi ye wò nyi nyàwo a, tìkpo so fikèa jè ànyigbã, ɖo wo ŋlɔ̀ ɖɛ be: 'Mawu la ɖè ègbè na yebe àtikplɔtɔwo eye wo la sɔ̀gbè ɖo ŋuti wò. Wo la kɔ wò ɖo àlɔ̀mè ne àpo àfɔ̀wo mu gbà klɛ̃ èkpe ò.'”

⁷Yesù ɖoeŋuti na ɛ̀ be: “Wo gbà ŋlɔ̀ ɖɛ cã be: 'Mù gbà tè Tɔhonɔ̀, Mawu wò kpɔ ò.'”

⁸Àbòsam gbà kplɔ̀ ɛ̀ yì èto kè yìji hũia ji, sɔ èfìɔdu kèwo lè xixea mèawo ku woabe àdɔ̀kùnuwo fiɔ ɛ̀,

⁹gblɔ̃ na ɛ̀ be: “Mù la sɔ ènu kèawo kpata na wò, ne wò do èta gũ eye wo sɛ̃ mùa.”

¹⁰Wàlɛbɛ ŋua, Yesù gblɔ̃ na ɛ̀ be: “Satànà, bu lè gbɔ nyè! Đo wo ŋlɔ̀ ɛ̀ ɖɛ be: 'Tɔhonɔ̀ Mawu ye wò la jè *èɖɛ̀ na, ye ɖèka kpò ye wò la sumɔ.'”

¹¹Gà ŋua mè ye Àbòsam tàsi ì ɖɛ, eye Mawu be àtikplɔtɔwo va e gbɔ, va sumɔ ɛ̀.

¹²Kè Yesù sè be wo le Yòhanɛ̀s do-gàa, e jo yì nɔ̀ Galilea.

¹³E jo lè Nazarɛ̀t, va yì nɔ̀ Kapɛrnaum, èdù kè lè Galilea be ètɔ̀ to, lè Zabulɔ̀n ku Nɛftalì be àgowo jia mè,

¹⁴ne ènyà kè Mawu be gblɔ̃ɖɛtɔ Ezayà gblɔ̃a bèa zɔ̃ sù be:

¹⁵“Zabulɔ̀n-nyigbã, Nɛftalì-nyigbã, èmɔ kè tùtà ètɔ̀ to, lè Yɔrdàn godoa, àgbàlèwo[9] be Galilea,

¹⁶àmè kèwo nɔ̀ vìvìti mèawo, kpɔ kɔ̀kɔ̀ɛ gãɖe, eye àmè kèwo nɔ̀ èku be ànyigbã do vìvìti jia, kɔ̀kɔ̀ɛ klɛ̃ ɖo woa ji.”

¹⁷So gà ŋua mèa, Yesù tɔ àŋɛ̀nyuɛ̃ a dodo, le gblɔ̃ na àmèwo be: “Mì ɖɔ̀lì èdɛ̃ ɖo Mawu be èfìɔɖùɖua lili!”

¹⁸Ekè Yesù le zɔ̃ to Galilea be ètɔ̀a to gbè ɖèkaa, e kpɔ nɔ̀vi ŋusù èvè, Simɔ̀n, kè wo yɔna be Petròa ku Ãdre, nɔ̀viaa. Wo le dà èɖɔ, ɖo èɖɔkplɔ̀tɔ ye wo nyi.

¹⁹Yesù to na wo be: “Mì jè yo nyè mè, mù la na mì la trɔ zũ àgbètɔ kplɔ̀tɔwo.”

²⁰Wo gble woabe èɖɔwo ɖɛ, eye wo kpàsà ɛ̀ do zè ɖèka.

²¹Kè e jo lè funu yì ŋùkɔ̀ vi ɖe a, e kpɔ nɔ̀vi ŋusù èvè buwo, Yakobò ku nɔ̀via Yòhanɛ̀s, Zebedeo be èviwo. Wo ku woa tɔ Zebedeo lè ètɔ̀jihũ ɖe mè, le jrà woabe èɖɔwo ɖo. Eye Yesù yɔ wo.

²²Zè ɖèkaa, wo gble ètɔ̀jihũa ku woa tɔa ɖɛ, eye wo kpàsà ɛ̀ do.

²³E yomèa, Yesù to Galilea be àgowo keŋu ji. E fiɔna ènu àmèwo lè bɔ̀bɔ̀pewo, dona Mawu be èfìɔɖùɖua be àŋɛ̀nyuɛ̃ a, eye be dànà èdɔ̀wo ku lãmègblewo keŋu lè dùkɔ̃a mè.

²⁴Yesù be nyikɔ gbãkpe Sirìa be èdùa keŋu mè, eye, àmèwo kplɔ̀nà èdɔ̀nɔ̀ kèwo jè èdɔ̀ hamè hamèawo vana na ɛ̀. Àmè kèwo gbɔ̃gbɔ̃ vuɛ̃wo le ɖè èfũ na a, àmè kèwo jè àɖàhùaa, ku dɔ̀nɔ̀kplibɔwo vana e gbɔ eye be dànà èdɔ̀ na wo.

²⁵Àmèha gã ɖe jè Yesù yomè. Àmè ɖewo so Galilea, àmè ɖewo so Èdù Èwoawo[10] mè, àmè ɖewo so Yèruzàlɛm, àmè ɖewo cã so Yudeà eye àmè ɖewo so èdù kèwo lè Yɔrdàn be ètɔ̀a godoawo mè.