Read gen Màteo 5 Bible Online

Màteo 5 - gen bible

Màteo 5

¹Kè Yesù kpɔ àmèhaa, e lia èto ɖe ji, nɔ̀ ànyi. Yebe nukplaviwo va e gbɔ,

²eye be fiɔ ènu wo, gblɔ̃ be:

³“Sìtu ɖèɖe ye e nyi na àmè kèwo ci àgba lè gbɔ̃gbɔ̃ mèa, ɖo woa tɔ̀ ye nyi Mawu be fìɔdua.

⁴Sìtu ɖèɖe ye e nyi na hòmèfanɔ̀wo, ɖo wo la ɖù ànyigbãa be ècrɔ̃[11].

⁵Sìtu ɖèɖe ye e nyi na àmè kèwo le lòfũa, ɖo wo la ɖo àsi àkɔ na wo.

⁶Sìtu ɖèɖe ye e nyi na àmè kèwo ye jɔ̀jɔɛ wɔ̀wɔ be àdɔ̀ le wù ku sìkɔ le tìa, ɖo wo la ɖɔpò.

⁷Sìtu ɖèɖe ye e nyi na ŋuzĩzĩɖèɖemewo, ɖo wo la nɔ ku ŋuzĩzĩ na wo.

⁸Sìtu ɖèɖe ye e nyi na àmè kèwo ɖo èjì mè kɔ̀kɔ̀ɛa, ɖo wo la kpɔ Mawu.

⁹Sìtu ɖèɖe ye e nyi na àvũɖatɔwo, ɖo wo la nɔ̀ yɔ wo be Mawu be èviwo.

¹⁰Sìtu ɖèɖe ye e nyi na àmè kèwo yomè wo tĩ ɖo jɔ̀jɔɛwɔ̀wɔ taa, ɖo woa tɔ̀ ye nyi Mawu be fìɔdua.

¹¹Sìtu ɖèɖe ye e la nyi na mì, ne wo zũ mì, wo tĩ mìa yomè, eye wo hɛ̃ mìabe nyikɔ gble kunù tɔ̀ ɖo ŋuti nyèa.

¹²Mì jɔ̀jì, nɛ mìa sò àyo, ɖo mìabe àjɔ̀ lè jiŋùkusi lòlò, ɖo nènea ye wo tĩ Mawu be gblɔ̃ɖɛtɔ kèwo jè ŋùkɔ̀ na mìa yomèa yeŋu.”

¹³“Mìawo ye le nyi ànyigbã be èjè. Vɔ̀a, ne èjè bu yebe vevea, nukɛ ye wo la wɔ̀ ne bèa gbà ɖo è ò? Mu gbà nyɔ na ènu ɖekpe wu be woa sɔ ɛ̀ kɔ̃ŋùgbe, ne woa zɔ̃ e ji ò.”

¹⁴“Mìawo ye le nyi kɔ̀kɔ̀ɛ na xixea. Èdù kè wo tù ɖo èto jia, mu teŋu bè ò.

¹⁵Wo mu sũnà kãligbɛ̃ sɔna tɔ̀ka cɔ̃na ɛ̀ ò. Kãligbɛ̃ti ji ye wo sɔna ɛ̀ ɖo, eye bè nana kɔ̀kɔ̀ɛ àmè kèwo kpata lè àxuea mèa.

¹⁶Nènea ye, mìabe kɔ̀kɔ̀ɛ ɖo la kɔ̀ lè àgbètɔwo kpata be ŋùmè, eye, wo la kpɔ èdɔ nyuɛ̃ kè mì le wɔ̀a, sɔ na gogo mìa Tɔ kè lè jiŋùkusia.”

¹⁷“Mì mu gbà susu be, mù va la gũ Mosè be Èsewo àlo ènu kèwo wo ŋlɔ̀ ɖo Mawu be gblɔ̃ɖɛtɔwo be xomawo mè ò. Nyè mu va ne ma ɖè wo jo ò, vɔ̀a, ne ma ɖè woa gɔ̃mè tututu.

¹⁸Nyàwo mù le to na mì be kaka na gà kè mè jiŋùkusi ku ànyigbã la nɔ̀ ànyia, wo mu la ɖè ŋɔ̀ŋlɔ̃ kui kè hùe wu ŋɔ̀ŋlɔ̃ kuiwo kpataa àlo Èseawo be àkpa vi tukui ɖe jo keŋu gbɔ̀xue ènuwo kpata la zɔ̃ sù ò.

¹⁹Ye ŋutia, àmè ɖekpekpe kè la dà èse kèawo be dòmètɔ vi ɖèka ji, eye be la fiɔ àmèwo be woa wɔ̀ nènea, wo la yɔ ɛ̀ be àmè vitukui lè Mawu be fìɔdua mè. Vɔ̀a àmè ɖekpekpe kè la wɔ̀ ɖo e ji, eye be la fiɔ àmèwo, be woa wɔ̀ ɖo e jia, wo la yɔ àmè ŋua be àmègã lè Mawu be fìɔdua mè.

²⁰Ye ŋutia, mù le to na mì be, ne mì mu wɔ̀nà ɖo Mawu be Èsewo ji, wu Èsefiɔtɔwo ku Farizìwo òa, mì mu la teŋu ɖo Mawu be fìɔdua mè ò.”

²¹“Mì sè be wo do *èse na mìa tɔgbewo be: 'Mù gbà wù àmè ò. Ne àmè ɖe wù àmèa, wo la ɖo kòjo na ɛ̀.'

²²Vɔ̀a ènyè yaa, mù le gblɔ̃ na mì be, àmè kè la bijì do nɔ̀viaa, wo la ɖo kòjo na ɛ̀. Àmè kè la zũ nɔ̀via be: 'Yɛ̀yìnɔ̀a', wo la kplɔ̀ ɛ̀ yì kòjoɖope gãa, ne woa ɖo kòjo na ɛ̀; eye àmè kè la zũ nɔ̀via be: 'Àɖàhùatɔa', e jè be woa sɔ ɛ̀ dà ɖo èzò màvɔ mè.

²³Ye ŋutia, ne wò va *vɔsakpe be ŋùkɔ̀, le ji la na ènu Mawu, eye lè funua, wò ɖoŋù be ènyà ɖe lè èwò ku nɔ̀vi wò dòmèa,

²⁴tàsi vɔsa wòa ɖo funu, ne wòa yì jrà èwò ku nɔ̀vi wòa dòmè ɖo gbɔ̀xue. E yomèa, trɔva sɔ vɔsa wòa na Mawu.”

²⁵“Ne wò jè àgɔ̀ do nɔ̀vi wò, eye be kplɔ̀ wò le yì kòjoɖopea, jè àgbàgba ne wòa ɖèbla jrà wò ku ì dòmè ɖo lè èmɔa ji. Ne mu nyi nène òa, e la sɔ wò do àsi na kòjoɖotɔ, eye kòjoɖotɔa la sɔ wò do àsi na èkpòvitɔ, eye èkpòvitɔa la sɔ wò do-gà.

²⁶Nyàwo mù le to na wò, wò la tu àgɔ̀ kè wò jè a be èfɛ̃a kpata, ɖekpe ma to le e mè keŋu gbɔ̀xue wo la ɖè wò to ò.”

²⁷“Mì sè, wo gblɔ̃ be: 'Mù gbà wɔ̀ *àhasì ò.'

²⁸Vɔ̀a, ènyè yaa mù le to na mì be, àmè ɖekpekpe kè la kpɔ nyɔ̃nù eye be la jro[12] èa, wɔ̀ *àhasì ku ì lè èjì mè xoxo.

²⁹Ye ŋutia, ne àpo ɖùsi mè be ŋùkuvi la kplɔ̀ wò yì ènu vuɛ̃ mèa, hɔ̃ ɛ̀ to ne wòa sɔ ɛ̀ dãŋùgbe, ɖo, e la nyɔ na wò be wòa bu àpo ŋutinu ɖèka, wu be ènuwo kpata ne sɔ̀gbè lè ŋuti wò vɔ̀a, ne woa sɔ èwò ŋutɔ àmètia kpata dà ɖo èzò màvɔ mè.

³⁰Ne àpo ɖùsi-lɔ ye dɔ̃nà wò ɖo ènuvuɛ̃ mèa, sò è, ne wòa sɔ ɛ̀ dãŋùgbe, ɖo e la nyɔ na wò be wòa bu àpo ŋutinu ɖèka, wu be, ènuwo kpata ne sɔ̀gbè lè ŋuti wò, vɔ̀a, woa sɔ àpo àmèti bliboa dà ɖo èzò màvɔ mè.”

³¹“Wo gbà gblɔ̃ be: 'Ne àmè ɖe gbe èsrɔ̃aa, ne ŋlɔ̀ xoma do àsi na ɛ̀, be yè gbe è.'

³²Vɔ̀a, ènyè yaa, mù le to na mì be ne àmè ɖe gbe èsrɔ̃aa, eye mu nyi be àhasì ye nyɔ̃nùa wɔ̀ òa, àmè kè gbe nyɔ̃nùa, ye dɔ̃ ɛ̀ bè wɔ̀ àhasì, eye àmè kè ɖè nyɔ̃nù kè wo gbea cã wɔ̀ àhasì.”

³³“Mì gbà sè, wo gblɔ̃ na mìa tɔgbewo be: 'Mù gbà kã àtãŋu be yèa wɔ̀ ènu ɖe vɔ̀a, wòa dokpò ènua wɔ̀wɔ ò. Wɔ̀ ènu kè wò tà Mawu be yèa wɔ̀a kpata.'

³⁴Vɔ̀a, ènyè yaa mù le to na mì be, mì mu gbà tà ènu klua ò. Mì mu gbà tà jiŋùkusi ò, ɖo Mawu be fìɔzìkpe ye be nyi.

³⁵Mì mu gbà tà ànyigbã ò, ɖo Mawu be àfɔ̀ɖope ye be nyi; mì mu gbà tà Yèruzàlɛm ò, ɖo èfìɔ gãa be èdù ye be nyi.

³⁶Mù gbà tà èta wò ŋutɔ cã ò, ɖo wò mu la teŋu wɔ̀, èɖà kè le èta na wòa be kui ɖèka bèa ɣe, àlo bèa nyrɔ̃ ò.

³⁷Mìabe 'Ɛ̃ɛ', ne nyi 'Ɛ̃ɛ', mìabe 'Ào' ne nyi 'Ào.' Ènyà bu kè kpata kplɔ̀nà ɛ̀ do a, àmè flùtɔa gbɔ ye be sona.”

³⁸“Mì sè wo gblɔ̃ be: 'Ŋùkuvi ɖo ŋùkuvi tèpe, àɖu ɖo àɖu tèpe.'

³⁹Vɔ̀a, ènyè yaa mù le to na mì be, mì mu gbà sitè ɖo àmè vuɛ̃ ŋuti ò, vɔ̀ bòhũa, ne àmè ɖe pò ɖùsi be èto mè na wòa, trɔ èmìɔ̃ tɔ̀a cã na ɛ̀.

⁴⁰Ne àmè ɖe ji la sãma wò, la xɔ̀ àpo àwùa, ɖè àpo àwù gãa cã na ɛ̀.

⁴¹Ne àmè ɖe zĩ ji wò be wòa zɔ̃ èmɔ ku yè, kpeti ɖèkaa, zɔ̃ èmɔ ku ì kpeti èvè.

⁴²Na ènu àmè kè biɔ wòa. Ne àmè ɖe ji la wue ènu lè àsi wòa, mù gbà ɖèkɔ̀ le e ŋuti ò.”

⁴³“Mì sè wo gblɔ̃ be: 'Wò la lɔ̃ èha wòvi, eye wò la crì àpo kɛ̃tɔ.'

⁴⁴Vɔ̀a, ènyè yaa, mù le gblɔ̃ na mì be, mì lɔ̃ mìabe kɛ̃tɔwo; mì fãkue ɖo àmè kèwo le tĩ mìa yomèa ta.

⁴⁵Nènea ye mì la ɖè è fiɔ be mì nyi mìa Tɔ kè lè jiŋùkusia be èviwoa yeŋu; ɖo e nana dɔ̃ŋùkusu hũnà ɖo àmè nyuɛ̃wo ku àmè vuɛ̃wo ji, gbà nana èji jànà ɖo àmè jɔ̀jɔɛwo ku àmè màjɔ̀ màjɔwo ji.

⁴⁶Đo ne àmè kèwo lɔ̃ mìawo ɖèɖe kpò mì lɔ̃nàa, àjɔ̀ kɛ ye Mawu la na mì ò? Èdɛ̃jɔ̀tɔwo cã mu wɔ̀nà nènea?

⁴⁷Ne mìa nɔ̀viwo kpò ye mì dona ègbè na a, nukɛ ye mì wɔ̀ wu àgbàlèwo ò? Àmè kèwo mu sɛ̃nà Mawu òa cã wo mu wɔ̀nà nènea?

⁴⁸Ye ŋutia, mì ɖù blibo sìgbè àlekè mìa Tɔ kè lè jiŋùkusia ɖù bliboa nène.”