Read gen Màteo 7 Bible Online

Màteo 7 - gen bible

Màteo 7

¹“Mì mu gbà ɖo kòjo na àmè ɖe ò; Mawu cã mu la ɖo kòjo na mì ò.

²Đo àlekè mì le ɖo kòjo na àmè buwo ɖoa, nènea ke ye wo la ɖo kòjo na mìa cã. Jijenu kè mì sɔ jije ènu na àmèa ke ye Mawu la sɔ jije è na mì.

³Nukɛ ŋuti wò le kpɔ bèyɔɛ kè lè nɔ̀vi wò be ŋùkuvi ji, vɔ̀a, wò mu le kpɔ àtikpo kè lè wò ŋutɔ àpo ŋùkuvi jia ò?

⁴Àleke wɔ̀, èwò kè àtikpo lè ŋùkuvi ji na a, wò teŋu gblɔ̃ na nɔ̀vi wò be: 'Tàflacɛ, na ne ma ɖè bèyɔɛ lè ŋùkuvi ji na wò' ɖo ò?

⁵Àyèmènuwɔ̀tɔ! Đè àtikpo kè lè wò ŋutɔ àpo ŋùkuvi jia keŋu gbɔ̀xue; eŋuã, wò la teŋu kpɔ ènu nyuɛ̃ ɖe sɔ ɖè bèyɔɛa jo lè nɔ̀vi wò be ŋùkuvi ji.”

⁶“Mì mu gbà sɔ ènu kè lè kɔ̀kɔ̀ɛa na àvũwo ò, mì mu gbà sɔ mìabe jònuwo dà ɖo èhãwo be ŋùkɔ̀, ne wo mu gbà tu àfɔ̀ woa ji vɔ̀, ne woa trɔva trɛ̃ mì ò.”

⁷“Mì biɔ, wo la na mì; mì ji ènu, eye mì la kpɔ ɛ̀; mì pò èhɔ̃a, wo la hũ ì na mì.

⁸Đo àmè ɖekpekpe àmè kè biɔa, wo la na ɛ̀; àmè kè le ji ènua, la kpɔ ɛ̀, eye wo hũnà èhɔ̃ na àmè kè le pò èa.

⁹Àmè kɛ ye lè mìa dòmè, kè ne èvia biɔ ɛ̀ kpɔ̃nɔa, e la sɔ èkpe na ɛ̀ ò?

¹⁰Àlo ne èvia biɔ ɛ̀ èlãa, e la sɔ èdã do àsi mè na ɛ̀ ò?

¹¹Mìawo ya, àmè vuɛ̃ ye mì nyi, gãke, mì nana ènu nyuɛ̃ mìabe èviwo. Mìa Tɔ kè lè jiŋùkusia mu la na ènu nyuɛ̃wo àmè kèwo biɔna ɛ̀a wua?”

¹²“Ye ŋutia, ènu ɖekpekpe ènu kè mì ji be àmèwo ne wɔ̀ na mìa, mìawo cã mì wɔ̀ ɛ̀ na wo; ɖo ènu kè Mosè be èsea ku Mawu be gblɔ̃ɖɛtɔwo gblɔ̃a yeŋu.”

¹³“Mì to àgbo xixaa nu. Đo, àgbo kè kplɔ̀nà àmè yìnà cɔ̃crɔ̃ mèa lòlò, eye èmɔa cã kèkè. Àmè sùgbɔ ye tona funua.

¹⁴Vɔ̀a, àgbo kè hũ ɖo èmɔ kè kplɔ̀nà àmè yìnà àgbè màvɔ mèa xùe, eye èmɔa cã xixa. Àmè ɖewo kpò ye kènà ɖo e ŋuti.”

¹⁵“Mì jè àyè na àjè-gblɔ̃ɖɛtɔ kèwo vana mìa gbɔ lè àlɛ̃wo be àgbàze mè, vɔ̀a, lè woabe èjìwo mèa, wo nyrãku wu gbète hɛ̃nu-trɛ̃wo.

¹⁶Mì la jèsi wo to woabe wɔ̀nawo mè; ɖo àŋùjati ma teŋu sɛ̃ vɛ̃ku ò; nènea kea, àklãti ma teŋu sɛ̃ èvò ò.

¹⁷Àti nyuɛ̃a, èku nyuɛ̃ ye be sɛ̃na; eye àti vuɛ̃ a sɛ̃na èku vuɛ̃.

¹⁸Àti nyuɛ̃ mu teŋu sɛ̃ èku vuɛ̃ ò. Nènea ke ye àti vuɛ̃ ma teŋu sɛ̃ èku nyuɛ̃ ò.

¹⁹Àti sia àti kè mu sɛ̃na èku nyuɛ̃ òa, wo sònà ɛ̀, sɔna ɛ̀ dànà ɖo èzò mè.

²⁰Ye ŋutia mì la jèsi wo to woabe èkusɛ̃sɛ̃wo mè.”

²¹“Mu nyi àmè kèwo yɔna mù be: “Àpetɔ, Àpetɔa” kpata ye la ɖo Mawu be fìɔdua mè ò; vɔ̀a, àmè kèwo wɔ̀nà Ètɔ nyè kè lè jiŋùkusia be jroawo, kpò ye la ɖo e mè.

²²Đo gbè kè gbè Mawu la ɖo kòjo na àgbètɔwoa, àmè sùgbɔ la gblɔ̃ na mù be: 'Tɔhonɔ̀, mi gblɔ̃ ènyà ɖɛ lè àpo nyikɔ mè, mi nyà gbɔ̃gbɔ̃ vuɛ̃wo to lè àpo nyikɔ mè eye mi wɔ̀ ŋùdãnu sùgbɔ lè àpo nyikɔ mè.'

²³Eye wàlɛbɛ ŋua, mù la ɖoeŋuti na wo be: 'Nyè mu jè si mì ò, mì bu lè ŋùmè na mù, mìa ènuvuɛ̃wɔ̀tɔwo!'”

²⁴“Ye ŋutia, àmè kè sè ènyà kèwo mù gblɔ̃ fifìa, eye be wɔ̀ ɖo woa jia, lè sìgbè ènunyatɔ kè tù yebe èxɔ̀ ɖo àkpã jia nène.

²⁵Èji jà, èsì ɖɔ, eye àyà pò do èxɔ̀a sɛ̃sɛ̃ɖe, vɔ̀a, mu mù ò, ɖo wo tù ì ɖo àkpã ji.

²⁶Vɔ̀a, àmè kè sè ènyà nyèwo, eye mu wɔ̀ ɖo woa ji òa, lè sìgbè àmè kè àyè hùe do, eye, be tù yebe èxɔ̀ ɖo èkɔ sawɛ jia nène.

²⁷Èji jà, èsì ɖɔ, eye àya pò do èxɔ̀a sɛ̃sɛ̃ɖe, eye èxɔ̀a mù, gbã keŋu-keŋu.”

²⁸Kè Yesù wu ènyà kèwo be le gblɔ̃a nua, àmèhaa kãyà ɖo yebe ènufiɔfiɔa ŋuti,

²⁹ɖo mu fiɔna ènu sìgbè àlekè woabe èsefiɔtɔwo wɔ̀nà ɛ̀ nène ò. Vɔ̀a, e fiɔna ènu ku àcɛ̀.