Read gen Markò 10 Bible Online

Markò 10 - gen bible

Markò 10

¹Yesù jo lè funu yì Yudeà be àgowo ji, yì ètɔ̀ kè wo yɔna be Yɔrdàn godo. Àmèwo gbà va bɔ̀ do è eye, be gbà fiɔ wo ènu, sìgbè àlekè e ma do è, eye be wɔ̀nà ɛ̀a nène.

²Farizì ɖewo va e gbɔ, le ji la tè è kpɔ. Wo biɔ ɛ̀ be: “Lè miabe èsea mèa, ŋusù teŋu gbe èsrɔ̃aa?”

³Yesù biɔ wo be: “Èse kɛ ye Mosè do na mì ò?”

⁴Eye wo gblɔ̃ be: “Mosè na èmɔ be, woa na ɛ̀ gbegbe xoma ne woa ɖè àsi lè e ŋuti.”

⁵Vɔ̀a Yesù gblɔ̃ na wo be: “Mìabe èjì tìtri ŋuti ye Mosè ŋlɔ̀ *èse kèa na mì ɖo.

⁶Vɔ̀a, so xixea be gɔ̃mèjèje a, Mawu ɖo wo àsu ku àsì.

⁷'Đo ekèa ŋuti, ŋusù la tàsi ètɔa ku ènɔa ɖɛ, la tɛ ɖo èsrɔ̃a ŋuti,

⁸eye wo àmè èvèawo la nyi ŋutilã ɖèka.' Nène a wo mu gbà le nyi àmè èvè ke ò, vɔ̀a ŋutilã ɖèka.

⁹Ye ŋutia, àgbètɔ mu gbà klã ènu kè Mawu caa ò.”

¹⁰Kè wo va àxomèa, nukplaviawo gbà biɔ ɛ̀ ènyà so ènyà ŋuaa ŋuti ke.

¹¹E gblɔ̃ na wo be: “Ne ŋusù ɖe gbe èsrɔ̃a, eye be ɖè nyɔ̃nù bua, e wɔ̀ *àhasì, eye be jè àgɔ̀ do nyɔ̃nù cucugbãa.

¹²Nène a ke, ne nyɔ̃nù ɖe gbe èsrɔ̃a, eye be ɖè ŋusù bua, ye cã wɔ̀ *àhasì.”

¹³Àmè ɖewo kplɔ̀ ɖèvi ɖewo va Yesù gbɔ ne bèa ɖo àlɔ̀ woa ji, vɔ̀a, yebe nukplaviwo wɔ̀ àdã do àmèawo.

¹⁴Kè Yesù kpɔ ènu kè jɔ̀ a, e bijì do yebe nukplaviawo. E gblɔ̃ na wo be: “Mì na èmɔ ɖèviwo ne woa va gbɔ nyè; mì mu gbà xe èmɔ na wo ò. Ɖoa, àmè kèwo lè sìgbè woawo nènea tɔ̀ ye nyi Mawu be fìɔdua.

¹⁵Nyàwo ye mù le to na mì be: àmè kè mu la xɔ̀ Mawu be fìɔdua sìgbè ɖèvi nène òa, mu la teŋu ɖo e mè ò.”

¹⁶E yomè a, e xɔ̀ ɖèviawo ɖo àlɔ̀ mè, ɖo àlɔ̀ èta ji na wo, tusì na wo.

¹⁷Ekè Yesù jè èmɔ le yìa, ɖèkajɛ ɖe pu dù va kpɔ ɛ̀. E jè èklò na ɛ̀, biɔ ɛ̀ be: “Ènufiɔtɔ nyuɛ̃, nukɛ ye mù ɖo la wɔ̀ ne Mawu bèa na mù àgbè màvɔa ò?”

¹⁸Yesù ɖo e ŋuti na ɛ̀ be: “Nukɛ ŋuti wò le yɔ mù be àmè nyuɛ̃ ò? Àmè nyuɛ̃ ɖe mu lè, tovò lè Mawu ŋuti ò.

¹⁹Wò jèsi èseawo: 'Mù gbà wù àmè ò, mù gbà wɔ̀ àhasì ò, mù gbà fìfĩ ò, mù gbà ɖù àjè ɖase ɖo àmè ɖe ŋuti ò, mù gbà tafu àmè ò, bù ètɔ wò ku ènɔ̀ wò.'”

²⁰Đèkajɛ a ɖo e ŋuti na ɛ̀ be: “Ènufiɔtɔ, mù wɔ̀nà ènu kèawo keŋu so àpe ɖèvi mè ke.”

²¹Yesù kpɔ ɛ̀ dũu eye yebe ènu jɔ̀jì na ɛ̀. E gblɔ̃ na ɛ̀ be: “Ènu ɖèka kpò ye hùe do wò. Yì sà ènu kèwo keŋu lè àsi woawo, ne wòa ma ègà kè wò la kpɔa na wɔ̀amènɔ̀wo. Ne wò wɔ̀ nènea, wò la ɖo àdɔ̀kùnu lè Mawu be fìɔdua mè. E yomè a, va ne wòa kplɔ̀ mù do.”

²²Kè ɖèkajɛ a sè ènyà ŋuawoa, àkpɔ̃ ɖɔ ɛ̀, eye be jo ku ŋuzĩzĩ ɖoa, e ɖo àdɔ̀kùnu sùgbɔ.

²³Yesù ɖè ŋùkuvi kpɔ yebe *nukplavi kèwo pòxla ɛ̀a, eye be gblɔ̃ na wo be: “Mawu be fìɔdua mè ɖoɖo la sɛ̃ŋu na àdɔ̀kùnɔ̀wo.”

²⁴Ènyà kè Yesù gblɔ̃ ŋua kpaca yebe nukplaviwo ŋutɔ, vɔ̀a, e gbà gblɔ̃ na wo be: “Èvi nyèwo, e sɛ̃ŋu ŋutɔ ne woa ɖo Mawu be fìɔdua mè.

²⁵E lè bɔ̀bɔɛ ɖe na èsɔ-kponɔ̀ ne bèa to àbùi be èdo mè, wu ne àdɔ̀kùnɔ̀ bèa ɖota Mawu be fìɔdua mè.”

²⁶Kè nukplaviawo sè ènyà kèawoa, e gbà wɔ̀ ŋùdã do wo, eye wo le biɔ woa nɔ̀nɔwo be: “Ne nène ye à, àmè kɛ ye teŋu gã ò?”

²⁷Yesù kpɔ wo dũu eye be gblɔ̃ na wo be: “Àgbètɔwo ye ènu kèa glo, vɔ̀a, mu glo Mawu ò, ɖo Mawu ya teŋu wɔ̀ ènu sia ènu.”

²⁸Wàlɛbɛ ŋua ye Petrò gblɔ̃ na ɛ̀ be: “Kpɔɖa, mi gble ènu sia ènu ɖɛ, eye mi kplɔ̀ wò do.”

²⁹Yesù gblɔ̃ na ɛ̀ be: “Nyàwo mù le to na mì. Àmè kè la tàsi yebe àxue ɖɛ, àlo nɔ̀via ŋusùwo ɖɛ, àlo nɔ̀via nyɔ̃nùwo ɖɛ, àlo ènɔa, àlo ètɔa, àlo èviawo, àlo yebe àgblèwo ɖɛ ɖo ènyè ku àŋɛ̀nyuɛ̃ a ŋutia,

³⁰àmèa la ɖo àxuewo, nɔ̀vi ŋusùwo, nɔ̀vi nyɔ̃nùwo; ènɔ̀, èviwo ku àgblèwo. E la ɖo ènu kèawo zè èkà èvè takpo wu ekè be tàsi ɖɛ fifìawo, lè ga kèa mè. E la gbà sè veve cã. Vɔ̀a, ne gàmè sùa, e la ɖo àgbè mà-vɔ.

³¹Eye àmè fuu kèwo nyi ŋùkɔ̀gbetɔwoa la nyi ŋùgbesiwo, eye ŋùgbesiwo la nyi ŋùkɔ̀gbetɔwo.”

³²Yesù ku yebe nukplaviwo lè èmɔ ji le yì Yèruzàlɛm. Yesù le zɔ̃ lè ŋùkɔ̀ na wo. Nukplaviawo ku àmè kèwo kpàsà wo doawo cã le vɔ̃. Yesù gbà yɔ *nukplavi woèvèawo ɖovò, tɔ ènu kèwo la va jɔ̀ ɖo e jiawo gbɔ̃gblɔ̃ na wo.

³³E gblɔ̃ na wo be: “Mì ɖo èto ne mìa sè! Mi le yì Yèruzàlɛm, àfi kè wo la do *Àgbètɔ be Èvia àsi na *mawunɔ gãwo ku ènuŋlɔ̀tɔwo lèa. Wo la gblehùɛ do è, la ɖè è do àsi na àgbàlèwo.

³⁴Woawo yaa, wo la kò è, wo la tu ètã kɔ̀ ɖo e ŋuti, wo la pò è ku àtãŋù, eye wo la wù ì. E yomè a, e la fɔ̃ so èku lè ŋùkèkè ètɔ̃gɔ̃a gbe.”

³⁵Lè ekèa yomè a, Yakobò ku Yòhanɛ̀s kèwo nyi Zebedeo be èviwoa, va Yesù gbɔ, gblɔ̃ na ɛ̀ be: “Ènufiɔtɔ, mi jro be woa wɔ̀ ènu kè mi la biɔ wòa na mi.”

³⁶Yesù biɔ wo be: “Nukɛ ye mì jro be ma wɔ̀ na mì ò?”

³⁷Eye wo ɖo e ŋuti na ɛ̀ be: “Na ne mia dòmètɔ ɖèka ne nɔ̀ àpo ɖùsi mè, ne èvègɔ̃a ne nɔ̀ àpo èmìɔ̃ mè lè àpo gogoa mè.”

³⁸Vɔ̀a, Yesù gblɔ̃ na wo be: “Mì mu nya ènu kè mì le biɔa ò. Mì la teŋu nù vevesèse be kogò kè mù la nùa? Mì la teŋu lè vevesèse be mawusi kè wo la lè na mùa?”

³⁹Wo ɖo e ŋuti na ɛ̀ be: “Mi la teŋu.” Yesù gblɔ̃ na wo be: “Mì la nù vevesèse be kogò kè mù la nùa, la gbà lè mawusi kè mù la lèa nyàwo.

⁴⁰Vɔ̀a, mu nyi ènyè ye la gblɔ̃ àmè kè la nɔ̀ ànyi lè àpe ɖùsi mè, àlo àpe èmìɔ̃ mèa ò. Tèpe ŋuawo lè na àmè kèwo Mawu jrà wo ɖo ɖɛ na a.”

⁴¹Kè *nukplavi èwo kpɔ̀tɛawo sè ènu kè Yakobò ku Yòhanɛ̀s biɔa, wo bijì do wo.

⁴²Eye Yesù yɔ wo va yeɖokoe gbɔ, gblɔ̃ na wo be: “Mì nya be àmè kèwo wo kpɔna be dùkɔ̃wo be kplɔ̀tɔwoa, ɖènà ègbè ɖo dùkɔ̃awo ji, eye èdùmèmègãwo zãna woabe àcɛ̀a ku ŋusɛ̃.

⁴³Vɔ̀a, mìawo yaa, mu gbà nyi nène lè mìa dòmè ò. Ne àmè ɖe lè mìa dòmè ji be yèa nyi àmègãa, ne nyi mìabe sumɔ̃vi.

⁴⁴Eye, ne àmè ɖe le ji la nyi ŋùkɔ̀nɔ̀tɔ lè mìa dòmèa, ne nyi àmè sia àmè be kluvi.

⁴⁵Đo *Àgbètɔ be Èvia mu va ne woa sumɔ ɛ̀ ò; vɔ̀a ne bèa sumɔ àgbètɔwo, eye bèa sɔ yebe àgbè sɔ hlùɛ̃ àmè sùgbɔ gã.”

⁴⁶Wo va ɖo èdù kè wo yɔna be Yerikòa mè. Wàlɛbɛ kè Yesù ku yebe nukplaviwo kudo àmèha gãa ɖe le to lè èdùa mèa, ŋùvìnɔ̀ ɖe kè wo yɔna be Bartimeo, ekè nyi Timeo be èvia nɔ̀ ànyi lè èmɔ to, le biɔ ènu.

⁴⁷E sè be, Yesù Nazarɛttɔ̀a va le yì eye e tɔ àpa dodo be: “Yesù, *David be èvi, ku ŋuzĩzĩ na mù!”

⁴⁸Àmè sùgbɔ le gbe na ɛ̀ be ne bɔ̀nu, vɔ̀a, e gbà le do àpa kpe è: “*David be èvi, ku ŋuzĩzĩ na mù!”

⁴⁹Yesù nɔ̀tè, gblɔ̃ be: “Mì yɔ ɛ̀ va na mù.” Wo yɔ ŋùvìnɔ̀a eye wo gblɔ̃ na ɛ̀ be: “Sitè, àgbɔ̃ ne jèpò na wò; Yesù le yɔ wò.”

⁵⁰Kè ŋùvìnɔ̀a sè ènyà kèawoa, e ɖè yebe àwù gãa dãŋùgbe, pu dù yì Yesù gbɔ.

⁵¹Yesù biɔ ɛ̀ be: “Nukɛ wò ji be ma wɔ̀ na wò ò?” E ɖo e ŋuti na ɛ̀ be: “Rabunì[6] na ne ma gbà kpɔ ènu.”

⁵²Eye Yesù gblɔ̃ na ɛ̀ be: “Yì, xɔ̀sè wòa hlùɛ̃ wò gã.” Eye troloa yebe ŋùkuviwo hũ, eye e kplɔ̀ Yesù do lè èmɔa ji.