Read gen Markò 11 Bible Online

Markò 11 - gen bible

Markò 11

¹Eye wàlɛbɛ kè wo le gogo Yèruzàlɛm, le lili Bɛtfagè ku Betanìa lè èto kè wo yɔna be àmìti-toa gbɔa, Yesù dɔ̃ yebe *nukplavi èvè,

²gblɔ̃ na wo be: “Mì yì kɔpe kè lè ŋùkɔ̀ na mì ŋua mè. Ne mì ɖo e mèa, mì la kpɔ èsɔ-àkɛtɛvi ɖèka kè ji àmè ɖe mu lia kpɔ òa, lè èkà mè. Mì tu èkà na ɛ̀ ne mìa kplɔ̀ ɛ̀ va fikè.

³Ne àmè ɖe biɔ mì be: 'Nukɛ ŋuti mì le wɔ̀ ekè a ɖo màa?' Mì ɖo e ŋuti na ɛ̀ be: 'Tɔhonɔ̀ ye hiã ɛ̀; e la gbà trɔ ɛ̀ ɖoɖa fifì jɛ̃.'”

⁴*Nukplavi èvèawo yì eye wo kpɔ èsɔ-àkɛtɛvi ɖèka lè èkà mè lè àxue ɖe be àgbonu, lè èmɔ to. Wo tu èkà na ɛ̀.

⁵Àmè ɖewo lè funu, kpɔ wo, eye wo gblɔ̃ na wo be: “Hee! Nukɛ mì le wɔ̀ ò? Nukɛ ŋuti ye mì le tu èkà na èsɔ-àkɛtɛvia ɖo ò?”

⁶Wo ɖo e ŋuti na wo sìgbè àlekè Yesù gblɔ̃ na woa nène, eye àmèawo tàsi wo, eye wo jo.

⁷Wo kplɔ̀ èsɔ-àkɛtɛvia va na Yesù; wo sɔ woabe àwùgãwo ɖo èsɔ-àkɛtɛvia ji, eye Yesù nɔ̀ ànyi ɖo e ji.

⁸Àmè sùgbɔ ɖo woabe àwùgãwo ɖo èmɔa ji eye àmè ɖewo cã sò àti be àlɔ̀zɛ̃ fɛ̃fɛ̃wo so àgblèwo mè va kãkã ɖo èmɔa ji.

⁹Àmè kèwo lè ŋùkɔ̀ na Yesùa, ku àmè kèwo lè ŋùgbedòmè na ɛ̀a, wo le do àpa be: “Hozanà! Mawu tusì na àmè kè gbãnà lè Tɔhonɔ̀ be nyikɔ mèa.

¹⁰Mawu tusì na mia tɔgbe David be fìɔɖùɖu kè gbãnà a. Hozanà na Mawu lè jiŋùkusi.”

¹¹Yesù yì Yèruzàlɛm, ɖo mawuxɔa mè. Kè be kpɔ àlekè ènuwo le zɔ̃ ɖo lè mawuxɔa mèa, ye ku yebe nukplaviwo yì Betanìa, ɖo gàmè yì vɔ̀.

¹²Yebe ŋùkè gbèa, wàlɛbɛ kè wo le jo lè Betanìaa, àdɔ̀ wù Yesù.

¹³E kpɔ vòti ɖe kè to àmà sùgbɔa, lè àzɔ̀ge boo. E yì àtia gbɔ be èta mu nyɔ òa, yè la kpɔ èkusɛ̃sɛ̃ ɖe lè e ji. Vɔ̀a, ekè e gogo àtia, mu kpɔ ènu ɖe lè e ji wu àmàkpawo ò, ɖo gà kè mè àtia la sɛ̃ èkua mu kpɔ sù hàɖe ò.

¹⁴Yesù sɛ̃kpɛ̃ na àtia gblɔ̃ be: “Àmè ɖe mu la gbà ɖù àpo èkusɛ̃sɛ̃ kpɔ gbèɖe ò!” Yebe nukplaviwo sè ènu kè be gblɔ̃a.

¹⁵Yesù ku yebe nukplaviwo gbà trɔva Yèruzàlɛm. Yesù ɖo mawuxɔa mè, tɔ àmè kèwo le sà ènu ku àmè kèwo le plè ènu lè funuawo nyànya. E mù ègà ɖɔ̀lìtɔwo be èkplɔ̃wo ku àhɔ̃ne sàtɔwo be àzìkpewo pu ànyi.

¹⁶Mu lɔ̃ na woa dòmètɔ ɖe be ne dro àjɔ̀nu ɖe to mawuxɔa mè ò.

¹⁷E fiɔ ènu wo be: “Wo ŋlɔ̀ ɖɛ be: 'Wo la yɔ àxue nyèa be kuefã-pe na dùkɔ̃wo kpata', vɔ̀a mìawo ya, mì sɔ ɛ̀ wɔ̀ fìãfìwo be èdo.”

¹⁸Mawunɔ gãwo ku èsefiɔtɔwo sè ènu kè Yesù wɔ̀a eye, wo le ji lekè wo la wɔ̀ la wù ìa; vɔ̀a wo le vɔ̃, ɖo àmèwo kpata ye Yesù be ènufiɔfiɔa wɔ̀nà ŋùdã na.

¹⁹Ekè fìɛ̃si ɖoa, Yesù ku yebe nukplaviwo to lè èdùa mè.

²⁰Kè èŋù kè, eye Yesù ku yebe nukplaviwo va le yì ŋùdekɛ̃nyɛ mèa, wo kpɔ àti kè Yesù sɛ̃kpɛ̃ na a. Àtia ku keŋu-keŋu so èji kaka va jè yebe èkèwo ji.

²¹Petrò ɖoŋù ènu kè jɔ̀a eye e gblɔ̃ na Yesù be: “Ènufiɔtɔ, kpɔ àti kè wo sɛ̃kpɛ̃ na a pu keŋu-keŋu ɖa!”

²²Eye Yesù ɖo e ŋuti na wo be: “Mì xɔ̀ Mawu ji sè.

²³Nyàwo mù le to na mì, ne àmè ɖe to na èto kèa be: 'Hɔ̃ jo lè fikè yì jè àpù mèa', ne àmèa mu do àɖìka lè yebe èjì mè òa, vɔ̀ xɔ̀sè be ènu kè yè gblɔ̃a la jɔ̀ a, e la kpɔ ɛ̀ ɖo nènea ji.

²⁴Ye ŋuti ye mù le to na mì be, ènu ɖekpekpe ènu kè mì la biɔ Mawu lè kuefã mèa, mì kã ɖo e ji be mì xɔ̀ ɛ̀ vɔ̀, eye wo la sɔ ɛ̀ na mì.

²⁵Eye wàlɛbɛ kè mì le fãkuea, ne mì ɖo ènu ɖe ɖo àmè ɖe ŋutia, mì sɔ ɛ̀ kè è ne mìa Tɔ kè lè jiŋùkusia cã ne sɔ mìabe nuvuɛ̃wo kè mì. [

²⁶Vɔ̀a, ne mì mu sɔna nuvuɛ̃ kènà àmè òa, mìa Tɔ kè lè jiŋùkusia cã mu la sɔ kè mì ò[7].]”

²⁷Wo gbà trɔ yì Yèruzàlɛm. Eye, wàlɛbɛ kè Yesù zɔ̃ lè mawuxɔa mèa, * mawunɔ gãwo ku ènu ŋlɔ̀tɔwo kudo èdùmèmègãwo va e gbɔ,

²⁸biɔ ɛ̀ sè be: “Àcɛ̀ kɛ ye wò ɖo sɔ le wɔ̀ ènu kèawo keŋu ò, àlo Àmè kɛ ye na wò ŋusɛ̃ kè wò sɔ le wɔ̀ ènu kèawo ò?”

²⁹Yesù gblɔ̃ na wo be: “Ènyà ɖèka kpò ye mù la biɔ mì. Ne mì ɖo e ŋuti na mùa, eŋuãa mù la gblɔ̃ àcɛ̀ kè mù sɔ le wɔ̀ ènu kèawoa na mì.

³⁰Yòhanɛ̀s be mawusilèlea ɖe, jiŋùkusi be soa, àlo àgbètɔwo gbɔ ye? Mì ɖo e ŋuti na mù.”

³¹Wo tɔ ènyà dɔ̃dɔ̃ lè woa nɔ̀nɔwo dòmè be: “Ne mi gblɔ̃ be: 'Jiŋùkusi be soa', e la gblɔ̃ na mi be: 'Nukɛ ŋuti ye mi mu xɔ̀ Yòhanɛ̀s be àŋɛ̀a ji sè ò?'

³²Vɔ̀a ne mi gblɔ̃ be: 'Àgbètɔwo gbɔ ye à…'” Wo le vɔ̃ dùkɔ̃a, ɖo àmèwo keŋu sɔ Yòhanɛ̀s be e nyi gblɔ̃ɖɛtɔ nyàwo.

³³Wo ɖo e ŋuti na Yesù be: “Mi mu nya ò.” Eye Yesù gblɔ̃ na wo be: “Nyè cã nyè mu la gblɔ̃ àmè kè na mù àcɛ̀ kè mù sɔ le wɔ̀ ènu kèawo ò.”