Read gen Markò 12 Bible Online

Markò 12 - gen bible

Markò 12

¹E yomè a, Yesù tɔ nupo pòpo na wo to èlododo mè. E do èlo gblɔ̃ na wo be: “Ŋusù ɖe dà vɛ̃-gble ɖèka. E do àti sɔ tɔ̃ èkpa trɔ do è. E kù èdo kè mè wo fiɔ̃na vɛ̃kuwo lèa ɖo e mè, gbà tù àgblè-jikpɔxɔ ɖèka ɖo e mè. E sɔ vɛ̃-gblea do àsi na vɛ̃gblè-jikpɔtɔ ɖewo eye ye ŋutɔ yì èdù màsɔɛ ɖe mè.

²Kè vɛ̃ku yàya be hùenu ɖoa, ŋusùa dɔ̃ yebe sumɔ̃vi ɖèka ɖoɖa vɛ̃gblè-jikpɔtɔawo gbɔ ne bèa yì xɔ̀ àkpa kè nyi e tɔ̀ lè ènuku yàya mèa va.

³Vɔ̀a, vɛ̃gblè-jikpɔtɔawo le sumɔ̃via; wo pò è, eye wo trɔ ɛ̀ ɖoɖa àsigba àlɔ̀gba.

⁴Ŋusùa gbà dɔ̃ yebe sumɔ̃vi bu ɖoɖa wo. Vɛ̃gblè-jikpɔtɔawo pò sumɔ̃vi ŋua kaka zɛ̃ èta na ɛ̀, gbà zũ ì.

⁵Ŋusùa gbà dɔ̃ yebe sumɔ̃vi bu ɖoɖa eye vɛ̃gblè-jikpɔtɔawo wù e ya. Nène a ke ye wo wɔ̀ ku ŋusùa be sumɔ̃vi buwo cã a yeŋu. Wo pò èɖewo, wù èbuwo.

⁶Àmè ɖèka kè kpɔ̀tɔ̀ na vɛ̃gblètɔa, ye nyi èvia ŋusù kè be ɖève a. E dɔ̃ ɛ̀ ɖoɖa wo ŋùgbesi ku sùsu be: 'Wo la do bùbu èvi nyèa ŋuti.'

⁷Vɔ̀a, vɛ̃gblè-jikpɔtɔ ŋuawo gblɔ̃ lè woa nɔ̀nɔwo dòmè be: 'Àmè kè la ɖù ècrɔ̃a ye nyi ekèa. Mì va ne mia wù ì, ne ècrɔ̃nua bèa trɔ zũ mia tɔ̀.'

⁸Eye wo jè e ji, wù ì. Wo sɔ yebe àmètia dãŋùgbe ɖo vɛ̃-gblea godo.”

⁹Yesù biɔ wo sè be: “Nukɛ mì bù be vɛ̃gblètɔa la wɔ̀ ò? E ŋutɔ la yì vɛ̃-gblea mè. E la wù vɛ̃gblè-jikpɔtɔ ŋuawo eye, be la sɔ vɛ̃-gblea do àsi na àmè buwo.

¹⁰Mì mu hlɛ̃ ŋɔ̀ŋlɔ̃ kèa kpɔ lè mawunyaa mè be: 'Èkpe kè èxɔ̀tùtɔwo gble ɖɛa, e ye va trɔ zũ koŋùjikpea?

¹¹Ekèa nyi Tɔhonɔ̀ be ènuwɔ̀wɔ, eye e wɔ̀ ŋùdã lè mìabe ŋùmè.'”

¹²Yudàviwo be àmègãwo nya be yèwo ŋuti ye Yesù do èlo kèa ɖo, eye wo le ji la le è; vɔ̀a, wo jo le vɔ̃ àmèha a; eye wo tàsi ì ɖɛ, jo.

¹³Wo dɔ̃ Farizì dòmètɔ ɖewo ku Herod be yomè jètɔ ɖewo ɖoɖa Yesù gbɔ be woa yì biɔ ɛ̀ ènyà sè, ne woa le è lè yebe nupo pòpo mè.

¹⁴Kè wo va e gbɔa, wo gblɔ̃ na ɛ̀ be: “Ènufiɔtɔ, mi nya be nyàwototɔ ye wò nyi, eye wò mu vɔ̃na àmè ɖe ò, ɖo wò mu kpɔna àmè be ŋùmè pònà nupo ò, vɔ̀a, wò fiɔna lekè Mawu ji be mia zɔ̃ ɖoa lè nyàwo mè. Èmɔ ɖèɖe lè be mia tu taci na Romà fìɔgãa? Mi ɖo la tu ì, àlo mi mu ɖo la tu ì ò?”

¹⁵Vɔ̀a, ekè Yesù nya be àyèmènu ye wo le wɔ̀ ku yèa, e gblɔ̃ na wo be: “Nukɛ ŋuti ye mì le tè mù kpɔ ɖo ò? Mì sɔ klòsalò gà ɖèka va na mù ne ma kpɔ.”

¹⁶Wo sɔ klòsalò gà ɖèka va na ɛ̀; eye Yesù biɔ wo sè be: “Àmè kɛ be nɔ̀nɔmè tata ye wo ɖè ɖo e ji ò? Àmè kɛ be nyikɔ ye wo ŋlɔ̀ ɖo e ji ò?” Wo ɖo e ŋuti na ɛ̀ be: “Romà fìɔgã Kayizarò tɔ̀ ye.”

¹⁷Yesù gblɔ̃ na wo be: “Mì sɔ ènu kè nyi Kayizarò tɔ̀a na Kayizarò, eye, ènu kè nyi Mawu tɔ̀a, mì sɔ ɛ̀ na Mawu.” Yesù be ènyà ŋuti ɖoɖo ŋua wɔ̀ ŋùdã na wo ŋutɔ.

¹⁸Sadusì ɖewo va Yesù gbɔ. — Woawo ye gblɔ̃nà be fɔ̃fɔ̃ so èku ɖe mu lè ò. — Wo biɔ ɛ̀ sè be:

¹⁹“Ènufiɔtɔ, Mosè ŋlɔ̀ *èse kèa ɖɛ na mi be: 'Ne ŋusù ɖe ɖè èsrɔ̃ eye mu jì èvi òa, vɔ̀ ku gble èsrɔ̃a ɖɛa, ne e ɖo nɔ̀vi ŋusù ɖèkaa, nɔ̀via ne ɖè àhòsìa ne bèa do xòmè na àmè kè kua.'

²⁰E va jɔ̀ be nɔ̀vi ŋusù adrɛ̃ ɖewo nɔ̀ ànyi. Àmègãxotɔa ɖè èsrɔ̃, vɔ̀a mu jì èvi gbɔ̀xue ku ò.

²¹Àmè kè jè e yomè a ɖè àhòsìa eye e cã ku èvi mà jì. Ènu kèa jɔ̀ ɖo àmè ètɔ̃gɔ̃a ji;

²²gbà jɔ̀ ɖo wo àmè adrɛ̃awo kpata ji. Wo ɖè nyɔ̃nùa, àmè ɖe jè àmè ɖe yomè, eye wo ku èvi mà jì. Mɛmlɛ̃a, nyɔ̃nùa cã va ku.

²³Lè fɔ̃fɔ̃ so èku zã gbèa, àmè kɛ be èsrɔ̃ ye nyɔ̃nù kèa la nyi lè woa dòmè ò? Đo, wo àmè adrɛ̃awo kpata ye ɖè nyɔ̃nùa kpɔ.”

²⁴Yesù ɖo e ŋuti be: “Mì mu kpɔ be mì le trã èmɔ òa? Đo mì mu nya ŋɔ̀ŋlɔ̃awo ò; nènea ke ye mì mu nya Mawu be ŋusɛ̃ cã ò.

²⁵Đo wàlɛbɛ kè àmèkukuwo la fɔ̃ so èkua, nyɔ̃nù ɖèɖe àlo àsu nana ɖe mu la nɔ̀ ànyi ò. Àmè sia àmè la nɔ̀ sìgbè Mawu be àtikplɔtɔ kèwo lè jiŋùkusiawo nène.

²⁶Vɔ̀a, sɔ kù ɖo àmè kukuwo be fɔ̃fɔ̃ so èku ŋutia, mì mu hlɛ̃ àfi kè wo pò nupo so àve mumu kè le bìzòa ŋuti lè Mosè be xoma mèa kpɔ gbèɖe òa? Wo ŋlɔ̀ ɖo funu be Mawu gblɔ̃ na Mosè be 'Ènyè ye nyi Abràham be Mawu, ku Izàk be Mawu kudo Yakɔb be Mawu.'

²⁷Yesù gbà yì e ji gblɔ̃ na wo be, Mawu mu nyi àmè kukuwo be Mawu ò, vɔ̀a, àmè àgbè-àgbèwo be Mawu ye be nyi. Mì trã èmɔ ŋutɔ.”

²⁸Ènuŋlɔ̀tɔ ɖèka lè funu, sè ènu kè wo le gblɔ̃a. Kè be kpɔ be Yesù ɖo ènyà ŋuti na Sadusìwo nyuɛ̃ ɖe a, e gogo è biɔ ɛ̀ sè be: “Èse kɛ ye lè ŋùkɔ̀ na èsewo kpata ò?”

²⁹Yesù ɖo e ŋuti na ɛ̀ be: “Èse kè lè ŋùkɔ̀ na èsewo kpataa ye nyi ekèa: 'Đo èto Izràɛl, Tɔhonɔ̀ miabe Mawu ye nyi Tɔhonɔ̀ ɖèka.

³⁰Ye ŋutia, wò ɖo la lɔ̃ Tɔhonɔ̀ Mawu wò ku àpo èjì kpata, kudo àpo èkla kpata, gbàkudo àpo sùsu kpata ku àpo ŋusɛ̃ kpata.'

³¹Èse kè bɔ̀ ɖo e ŋutia ye nyi ekèa: 'Lɔ̃ èhavi wò sìgbè wo ŋutɔ ke nène.' Èse ɖe mu gbà lè wu gã èvè ŋuawo ò.”

³²Ènuŋlɔ̀tɔa gblɔ̃ na ɛ̀ be: “Ènufiɔtɔ, nyàwo ye wò to. Tɔhonɔ̀ ɖèka ye nyi Mawu, eye Mawu bu mu gbà lè, to e ŋuti ò.

³³Ye ŋutia, àgbètɔ ɖo la lɔ̃ Mawu ku yebe èjì kpata, kudo yebe èkla kpata gbàkudo yebe ŋusɛ̃ kpata; eye e ɖo la gbà lɔ̃ yebe èhavi sìgbè ye ŋutɔ ke nène. Ekèa nyɔ wu vɔsa kè wo tɔna èzòa, eye be gbà nyɔ wu vɔ̀sawo kpata.”

³⁴Kè Yesù kpɔ be ènunyatɔ be ènyà ye ŋusùa gblɔ̃ na yèa, e gblɔ̃ na ɛ̀ be: “Wò mu dìdì lè Mawu be fìɔdua gbɔ ò.” Ekèa yomè a, àmè ɖe mu gbà dojì biɔ ɛ̀ ènyà ɖe sè ò.

³⁵Wàlɛbɛ kè Yesù le fiɔ ènu àmèwo lè mawuxɔ mèa, e biɔ wo sè be: “Àleke wɔ̀ ye Ènuŋlɔ̀tɔwo gblɔ̃ be Mɛ̀sia nyi *David be èvi ɖo ò?

³⁶Gbɔ̃gbɔ̃ Kɔ̀kɔ̀ɛ mu na ye David ŋutɔ gblɔ̃ be: 'Tɔhonɔ̀ gblɔ̃ na Tɔhonɔ̀ nyè be, va nɔ̀ ànyi lè àpe ɖùsi mè, kaka na gà kè mè mù la sɔ kɛ̃tɔ wòwo ɖo àpo àfɔ̀wo gɔ̃mèaa?'

³⁷Ne David ŋutɔ yɔ ɛ̀ be: 'Tɔhonɔ̀a', leke ye Kristò teŋu nyi *David be èvi ɖo ò?” Àmè sùgbɔ lè tèpea; eye wo le ɖo èto ènu kè Yesù le gblɔ̃a.

³⁸Yesù gblɔ̃ na àmè kèwo be le fiɔ ènuawo be: “Mì jè àyè na ènuŋlɔ̀tɔwo, ɖo ènu kè jɔ̀nàjì na woa ye nyi be woa nɔ do àwù gãwo, la nɔ ɖìsà, ne àmèwo ne nɔ do ègbè na wo lè bɔ̀bɔ̀pewo.

³⁹Woa nɔ̀ àfi kè àmè sia àmè la teŋu kpɔ wo lèa, lè bɔ̀bɔ̀pewo ku tèpe gãgãwo lè ènuɖùpewo.

⁴⁰Wo hlànà ènu kèwo lè àhòsìwo sia kpata, eye, ne woa sɔ ɖèfiɔ be yèwo nyi àmè nyuɛ̃woa, wo wɔ̀nà kuefã dìdìwo. Èto kè Mawu la dɔ̃ na woa la sɛ̃ŋu ŋutɔ.”

⁴¹Yesù nɔ̀ ànyi jè ŋùkɔ̀ ènujɔ̀ɖaka, le kpɔ àlekè àmèwo le sɔ ègà do àɖakà a mè ɖoa. Àdɔ̀kùnɔ̀ sùgbɔ le sɔ èci gãgãwo do àɖakà a mè.

⁴²Àhòsì wɔ̀amènɔ̀ ɖe cã va, sɔ taŋugavi èvè do àɖakà a mè. Tàŋuga, ekè mu sù biyè ɖèka cã ò.

⁴³Yesù yɔ yebe nukplaviwo bɔ̀, gblɔ̃ na wo be: “Nyàwo mù le to na mì; ègà kè àhòsì wɔ̀amènɔ̀ ŋua sɔ do àɖakà a mèa wu ekè àmè kpɔ̀tɛawo sɔ do e mèa.

⁴⁴Đo woa keŋuã, sùgbɔ kè lè woa sia, ye wo sɔ va do e mè. Vɔ̀ e yaa, lè yebe èhiã mè ye be sɔ, ekè kpata lè e si na yebe àgbènɔ̀nɔa, do e mè.”