Read gen Markò 13 Bible Online

Markò 13 - gen bible

Markò 13

¹Wàlɛbɛ kè Yesù to le mawuxɔa mèa, yebe *nukplavi ɖèka gblɔ̃ na ɛ̀ be: “Ènufiɔtɔ, kpɔ èkpe kèawo ɖa! Kpɔ leke èxɔ̀a nyɔ ɖa!”

²Yesù ɖo e ŋuti na ɛ̀ gblɔ̃ be: “Wò kpɔ èxɔ̀ gã ŋuawoa, èkpe ɖèka ŋutɔ mu la kpɔ̀tɔ̀ lè èɖe ji kè wo mu la kãkã ò.”

³Yesù nɔ̀ ànyi lè àmìti-toa ji, jè ŋùkɔ̀ mawuxɔa. Petrò, Yakobò, Yòhanɛ̀s ku Ãdre yì kpɔ ɛ̀ lè àsàmè, biɔ ɛ̀ sè be:

⁴“Àzã kɛ gbè ye ènu kèawo la jɔ̀ ò? To è na mi. Nukɛ ye la nyi jèsì kè la ɖèfiɔ be ènu kèawo la jɔ̀ ò?”

⁵Yesù tɔ gbɔ̃gblɔ̃ na wo be: “Mì kpɔ nyuɛ̃ ɖe ne àmè ɖe mu gbà flù mì ò.

⁶Đo àmè sùgbɔ la va lè àpe nyikɔ mè, la gblɔ̃ be: 'Ènyè ye nyi Kristò', Eye wo la flù àmè sùgbɔ.

⁷Ne mì sè be, wo le gblɔ̃ àhùa be ènyà lè àfi ɖe, àlo wo le wɔ̀ àhùa lè àfi ɖe a, àdìka mu gbà sò mì ò, ɖo ènu kèawo ɖo la jɔ̀, vɔ̀a mu la kpɔ nyi xixea be vɔ̀vɔnu hàɖe ò.

⁸Dùkɔ̃ ɖe la wɔ̀ àhùa ku dùkɔ̃ bu. Fìɔdu ɖe la sitè ɖo fìɔdu bu ŋuti. Ànyigbã la hũhũ lè àfi vòvòwo; àdɔ̀ cã la to, vɔ̀a, ekèawo ye la nyi vevesèsewo be gɔ̃mè jèje.

⁹Vɔ̀a mìawo yaa, mì kpɔ mìa ɖokoe ji nyuɛ̃ ɖe; ɖo wo la ɖèfũ na mì. Àmèwo la kplɔ̀ mì yì kòjoɖopewo; wo la pò mì lè bɔ̀bɔ̀pewo. Wo la kplɔ̀ mì yì èfìɔwo ku èdùmèmègãwo gbɔ ɖo ŋuti nyè; eye, mì la ɖù ɖase na mù lè woabe ŋùkɔ̀.

¹⁰Đo, e jè be woa do àŋɛ̀nyuɛ̃ a lè dùkɔ̃wo kpata mè.

¹¹Ne wo le mì, kplɔ̀ mì yì kòjoɖopea, mì mu gbà nɔ gbã èta, la nɔ ji ènyà kè mì la gblɔ̃a ò. Ènu kè Mawu la sɔ do àyè mè na mì gà ŋua mèa, ye mì la gblɔ̃; ɖo mu nyi mìawo ŋutɔ ye la pò nupo ò, vɔ̀a Gbɔ̃gbɔ̃ Kɔ̀kɔ̀ɛ a ye.

¹²Nɔ̀vi la do nɔ̀via àsi be woa wù ì. Ètɔ la do èvia àsi. Èviwo la jè àgla ɖo woabe àjìtɔwo ŋuti, la do wo àsi na èku.

¹³Àmè sia àmè la crì mì ɖo ŋuti nyè, vɔ̀a àmè kè la do èjì lè àyàɖùɖuwo nu kaka yì vɔ̀vɔnua, wo la hlùɛ̃ ɛ̀ gã.”

¹⁴“Gà kè mè mì la kpɔ Àhlùanu jiŋɔa lè àfi kè mu ɖo la nɔ̀ òa, — Àmè kè hlɛ̃ ènu kèa ne ŋɔjè e mè — àmè kèwo lè Yudeà nyigbã jiawo ne si yì ètowo ji.

¹⁵Àmè kè lè èxɔ̀taa mu gbà ɖì be yèa yì sɔ ènu ɖekpe lè èxɔ̀ mè ò.

¹⁶Àmè kè lè àgblè mèa mu gbà trɔva sɔ yebe àwùgãa lè àxomè ò.

¹⁷Àzã bàɖà ye àzã ŋuawo la nyi na nyɔ̃nù kèwo si èfu lèa ku nyɔ̃nù kèwo la nɔ na ànɔ èvi gà ŋua mèawo.

¹⁸Mì fãkue na Mawu ne ènu kèawo mu gbà jɔ̀ lè àvìvɔ hùenu ò.

¹⁹Đo lè àzã ŋuawo jia, àyàɖùɖu la va, àyàɖùɖu kè hati mu jɔ̀ kpɔ, so wàlɛbɛ kè Mawu ɖo xixea, kaka va na fifì ò. Eye àyàɖùɖu kèa hati mu la gbà jɔ̀ kpɔ gbèɖe ò.

²⁰Ne Tɔhonɔ̀ mu kè ɖè àzã ŋuawo kpɔ̀tɔ̀ òa, àmè ɖe mu la gã ò. Vɔ̀a, e ɖè wo kpɔ̀tɔ̀ ɖo àmè kèwo be cã be woa nyi yè tɔ̀awo ŋuti.

²¹Ne àmè ɖe va to na mì be, '*Mɛ̀sia lè fikè', àlo 'E lè funua', mì mu gbà xɔ̀ e ji sè ò.

²²Đo àmè kèwo gblɔ̃nà be yèwo ye nyi Mɛ̀siaa ku àmè kèwo gblɔ̃nà be yèwo ye nyi Mawu be gblɔ̃ɖɛtɔwoa, sùgbɔ la va. Wo la nɔ wɔ̀ ŋùdãdɔwo ku nùkunuwo ne woa sɔ flù àmè kèwo Mawu cãawo, ne wo teŋuã.

²³Ye ŋutia, mì jè àyè; mù ɖo àfɔ̀ àfɔ̀ ji na mì vɔ̀.”

²⁴“Vɔ̀a, lè àzã ŋuawo gbèa, lè àyàɖùɖu ŋuawo yomè a, èwè la do vìvìti, wètri mu la gbà kɔ̀ ò.

²⁵Wètriviwo la gɛ̃ so jiŋùkusi; ŋusɛ̃ kèwo lè jiŋùkusiawo la hũhũ.

²⁶Eye wo la kpɔ *Àgbètɔ be Èvia la nɔ̀ ɖì gbãnà lè lilikpowo mè ku ŋusɛ̃ gã ɖe, lè gogo mè.

²⁷E la dɔ̃ yebe àtikplɔtɔwo ɖoɖa xixea kpata mè, ne woa bɔ̀ àmè kèwo be cã so ànyigbãa be koŋù ènèawo kaka va yì jiŋùkusi be nukpòpeawo ɖodu.”

²⁸“Mì kpla ènu so vòti ŋuti. Ne yebe àlɔ̀zɛ̃wo tɔ àmàkpa totoa, mì nyana be zòzo be gàmè gogo, àlo gà kè mè wo la do ènua sù.

²⁹Nène a ke ye ne mì kpɔ ènu kèawo le jɔ̀ a, mì nya be, *Àgbètɔ be Èvia be vava gogo vɔ̀, e lè mìabe àgbowo ji.

³⁰Nyàwo mù le to na mì be, àmè kèwo lè àgbèawo mu la ku gbɔ̀xue ènu kèawo kpata la jɔ̀ ò.

³¹Jiŋùkusi ku ànyigbã la klo va yì; vɔ̀a, ènyà nyèwo mu la va yì gbèɖe ò.”

³²“Vɔ̀a, àmè ɖe mu nya ŋùkèkè ŋua ò; àmè ɖe mu nya gàpòpoa cã ò. Mawu be àtikplɔtɔwo mu nya ɛ̀ ò. Èvia cã mu nya ɛ̀ ò. Ètɔa kpò ye.

³³Mì kpɔ mìa ɖokoewo ji nyuɛ̃ ɖe ne mìa nɔ̀ ŋùzɔ̃, ɖo mì mu nya gà kè mè ènu kèawo la jɔ̀ ò.

³⁴E lè sìgbè ŋusù ɖe kè yì èmɔ jia nène. E gble yebe àxue ɖɛ, eye e na ŋusɛ̃ yebe sumɔ̃viawo, gbà na àmè sia àmè yebe èdɔ. E do ègbè àsi na èhɔ̃ji-nɔ̀tɔa ne bèa ɖia àxuea.

³⁵Ye ŋutia, mì nɔ̀ ŋùzɔ̃, ɖo mì mu nya gà kè mè àxuetɔa la gbɔ̀ ò. E teŋu gbɔ̀ lè fìɛ̃si mè, àlo lè èzã dòmè, àlo gà kè mè kòklo kuna àtɔa, àlo ŋùdekɛ̃nyɛ fùtùu.

³⁶Mì mu gbà lɔ̃ ne bèa va kpɔ mì lè àlɔ̃ mè ò.

³⁷Ènu kè mù le gblɔ̃a, mìa kpata ye mù le gblɔ̃ ɛ̀ na. Mì nɔ̀ ŋùzɔ̃.”