Read gen Markò 14 Bible Online

Markò 14 - gen bible

Markò 14

¹E kpɔ̀tɔ̀ ŋùkèkè èvè ne woa ɖù Toŋutivayì ku kpɔ̃nɔ àkpiti be àzã. Mawunɔ gãwo ku ènu ŋlɔ̀tɔwo le ji àlekè wo la wɔ̀ àyè sɔ le Yesù, ne woa wù ìa.

²Vɔ̀a, wo le gblɔ̃ lè woa nɔ̀nɔwo dòmè be: “Mi mu gbà le è lè àzãa hùenu ò; ne mu nyi nène òa, dùkɔ̃a teŋu tɔ̀zĩ.”

³Yesù va èdù kè wo yɔna be Betanìaa mè, lè Simɔ̀n kè nyi èkpònɔ̀ sãa be àxomè. Wàlɛbɛ kè be lè ànyi nɔ̀nɔ le ɖù ènua, nyɔ̃nù ɖe ɖo àxuea mè, hɛ̃ àlùbatrò-kpe be ègò ɖo àlɔ̀ mè. Ègòa ɖɔ ku àmì huɛ̃ tititi xɔ̀ àsì ɖe kè wo sɔ ègbe kè wo yɔna be Na a be èku sɔ wɔ̀a. Nyɔ̃nùa hũ ègòa, kɔ̀ àmì huɛ̃ titia ɖo èta na Yesù.

⁴Ènu kè nyɔ̃nùa wɔ̀a ve àdɔ̀mè na àmè kèwo lè funua dòmètɔ ɖewo eye wo lè gblɔ̃ lè woa nɔ̀nɔwo dòmè be: “Nukɛ ŋuti ye wo la gũ àmì kèa ɖo ò?

⁵Wo la teŋu sà àmì kèa wu klòsalò gà èkà adrɛ̃ takpo, la sɔ yebe ègàa ma na wɔ̀amènɔ̀wo.” Eye wo tɔ ŋùmè kãkã na nyɔ̃nùa.

⁶Vɔ̀a, Yesù gblɔ̃ na wo be: “Mì tàsi ì ɖɛ kpoo; nukɛ ŋuti ye mì le do nupo na ɛ̀ ɖo ò? Ènu nyuɛ̃ ɖe ye be wɔ̀ na mù.

⁷Đo wɔ̀amènɔ̀wo lè mìa dòmè tɛ̀gbɛ̀, eye ne mì jro gà ɖekpekpe gàmèa, mì teŋu wɔ̀ nyuɛ̃ na wo; vɔ̀a, ènyè yaa, nyè mu la nɔ̀ ku mì kaka yì ò.

⁸Ènu kè ji be sùa ye be wɔ̀ na mù. E jèŋùkɔ̀ sì àmì na ŋutilã nyè, jrà ɛ̀ ɖo na yebe ɖìɖi.

⁹Nyàwo ye mù le to na mì. Àfi sia àfi kè wo la do àŋɛ̀nyuɛ̃ a lè, lè xixea kpata mèa, wo la gblɔ̃ ènu kè nyɔ̃nù kèa wɔ̀a cã la sɔ ɖo ŋùku e ji.”

¹⁰Yudà Iskariɔt, Yesù be *nukplavi woèvèawo dòmètɔ ɖèka, yì kpɔ * mawunɔ gãwo ne bèa do Yesù àsi na wo.

¹¹Kè * mawunɔ gãwo ɖo èto è vɔ̀a, èjì jɔ̀ wo ŋutɔ eye wo fìã na ɛ̀ be yèwo la na ɛ̀ ègà. So gà ŋua mèa, Yudà le ji àlekè be la wɔ̀, la sɔ Yesù do àsi na woa.

¹²Wàlɛbɛ kè wo ɖùnà kpɔ̃nɔ àkpiti be ŋùkèkè cucugbãa, kè nyi àzã kè gbè wo wùnà àlɛ̃wo na Toŋutivayì be ènu ɖùɖua, Yesù be nukplaviwo biɔ ɛ̀ sè be: “Ènufiɔtɔ, fikɛ ye wò ji be mia yì jràɖo na Toŋutivayì be ènu ɖùɖua ò?”

¹³Eye troloa Yesù dɔ̃ yebe *nukplavi èvè, gblɔ̃ na wo be: “Mì ɖo èdùa mè; mì la dogò ŋusù ɖe kè hɛ̃ tɔ̀mèyìzea. Mì kplɔ̀ ɛ̀ do.

¹⁴Mì ɖo àxue kè mè be la ɖoa mè. Mì gblɔ̃ na àxuetɔa be: 'Ènufiɔtɔa be mia biɔ wò sè be èxɔ̀ kɛ mè yè ku yèbe nukplaviwo yèwo la ɖù Toŋutivayì be ènu ɖùɖua lè ò?'

¹⁵E la fiɔ mì èxɔ̀ gãa ɖe ekè mè ènu sia ènu sɔ̀gbè lèa, lè àsãŋu ɖe ji. Mì jrà funu ɖo ɖɛ na mi.”

¹⁶Kè nukplaviawo yì èdùa mèa, wo kpɔ ènuawo kpata sìgbè lekè Yesù gblɔ̃ na woa nène, eye wo ɖà Toŋutivayì be ènu ɖùɖua lè funu.

¹⁷Ekè fìɛ̃si ɖoa, Yesù ku yebe nukplavi woèvèawo va tèpea.

¹⁸Ekè wo le ɖù ènua, Yesù gblɔ̃ be: “Nyàwo ye mù le to na mì: àmè ɖèka lè mì, àmè kèwo le ɖù ènu ku mù fifìa dòmè, kè la do mù àsia.”

¹⁹Kè nukplaviawo sè nènea, àkpɔ̃ ɖɔ wo, eye woa dòmètɔ ɖè sia ɖè biɔ ɛ̀ sè be: “Ènyè ye à?”

²⁰Yesù ɖo e ŋuti na wo be: “Mì àmè woèvèawo dòmètɔ ɖèka kè lè do àsi àgbã mè ku mùa ye.

²¹Nyàwo a, *Àgbètɔ be Èvia ɖo la ku sìgbè lekè wo ŋlɔ̀ so e ŋutia nène. Vɔ̀a, hèlu na àmè kè la xɔ̀kpli na ɛ̀a. Ne wo mu jì àmè ŋua òa, e la nyɔ na ɛ̀ wu.”

²²Kè wo le ɖù ènua, Yesù sɔ kpɔ̃nɔa eye, ekè e do àkpe na Mawu vɔ̀a, e kã ɛ̀, sɔ ɛ̀ na nukplaviawo, gblɔ̃ be: “Mì xɔ̀ ɛ̀ ne mìa ɖù, ekèa ye le nyi àpe ŋutilã.”

²³E yomè a, e sɔ kogòa, ekè e do àkpe na Mawu vɔ̀a, e sɔ ɛ̀ na wo, eye woa kpata nù ì.

²⁴Yesù gblɔ̃ na wo be: “Ekèa ye nyi àpe èhũ, zòɖùɖu be èhũ kè wo kɔ̀ ɖɛ ɖo àmè sùgbɔ taa.

²⁵Nyàwo ye mù le to na mì, nyè mu la gbà nù vɛ̃ kèa kaka na gà kè mè mù la nù vɛ̃ yeye bu lè Mawu be fìɔdua mè ò.”

²⁶E yomè a, wo jì àkpedodo be èhàwo eye wo jo yì àmìtiwo be ètoa ji.

²⁷Yesù gblɔ̃ na yebe nukplaviwo be: “Mìa kpata mì la gble mù ɖɛ, ɖo wo ŋlɔ̀ ɖɛ be: 'Mù la wù àlɛ̃kplɔ̀tɔa eye àlɛ̃awo la kã hlɛ̃.'

²⁸Vɔ̀a, ne Mawu fɔ̃ mù so èkua, mù la yì tɔtè kpɔ mì lè Galilea.”

²⁹Petrò gblɔ̃ na ɛ̀ be: “Ne àmèwo kpata gble wò ɖɛ cã a, nyè yaa, nyè mu la gble wò ɖɛ ò.”

³⁰Yesù ɖo e ŋuti na ɛ̀ be: “Nyàwo mù le to na wò: lè èzã kèa mèa, keŋu gbɔ̀xue kòklo la ku àtɔ zè èvèa, wò la gbe zè ètɔ̃ be yè mu jèsi mù ò.”

³¹Vɔ̀a, Petrò gbà gblɔ̃ sɛ̃sɛ̃ ɖe be: “Ne e hiã be ma ku ku wò cã a, nyè mu la gblɔ̃ gbèɖe be nyè mu jèsi wò ò.” Nukplavi kpɔ̀tɛawo cã gblɔ̃ ènyà kèa tututu.

³²E yomè a, wo va tèpe ɖe kè wo yɔna be Gecemanì, eye Yesù gblɔ̃ na yebe nukplaviawo be: “Mì nɔ̀ ànyi lè fikèa ne ma yì fãkue ma va.”

³³Eye e kplɔ̀ Petrò ku Yakobò kudo Yòhanɛ̀s bɔ̀ ɖo ye ɖokoe ŋuti. Àdìka tɔ ɛ̀ sòso, eye e ci siayi.

³⁴Eye e to na wo be: “Èkla nyè ɖɔ ku àkpɔ̃ kaka mù ji be ma ku. Mì nɔ̀ fikèa ne mìa nɔ̀ ŋùzɔ̃.”

³⁵Eye e zɔ̃ yì ŋùkɔ̀ vi ɖe, eye e sɔ ŋùmè cɔ̃ ànyi, eye e fãkue be, ne e teŋu nyi wɔ̀wɔa, gà pòpo kèa ne to ye ŋuti va yì.

³⁶E le gblɔ̃ be: “Abà, Àta, ènu ɖekpekpe mu glo wò ò. Đè vevesèse be kogò kèa jo lè gbɔ nyè; gãkea, mu gbà nyi àpe jro ò, vɔ̀a ne nyi àpo jro bòhũ.”

³⁷Kè Yesù trɔva yebe nukplaviawo gbɔa, e kpɔ be wo le dɔ̃ àlɔ̃, eye e gblɔ̃ na Petrò be: “Simɔ̀n, wò jo le dɔ̃ àlɔ̃a? Wò mu teŋu nɔ̀ ŋùtè gà pòpo ɖèka tètè òa?

³⁸Mì nɔ̀ ŋùtè eye mì nɔ fãkue, ne mì mu gbà jè tètèkpɔ mè ò, ɖo àgbètɔ ɖo jro nyuɛ̃ vɔ̀a yebe ŋutilã mu ɖo hɔ̃hlɔ̃ ɖe ò.”

³⁹E gbà fãkue lè àzɔ̀ge, gblɔ̃ ènyà ŋua ke.

⁴⁰Eye e gbà trɔva yebe nukplaviawo gbɔ, kpɔ wo lè àlɔ̃ mè. Woabe ŋùkuviwo ci kàɖì, eye wo mu gbà nya ènu kè wo la gblɔ̃ na ɛ̀a ò.

⁴¹Kè Yesù trɔva zè ètɔ̃gɔ̃a, e gblɔ̃ na yebe nukplaviwo be: “Mì gbà le dɔ̃ àlɔ̃, le gbɔ̃ jɛ̃a! E sù nène! Gàmè sù ne woa sɔ *Àgbètɔ be Èvia do àsi na nuvuɛ̃wɔ̀tɔwo.

⁴²Ye ŋutia, mì sitè ne mia jo, ɖo àmè kè xɔ̀kpli na mùa va vɔ̀.”

⁴³Wàlɛbɛ kè Yesù kpɔ̀tɔ̀ le pò nupoa, Yudà kè nyi nukplavi woèvèawo dòmètɔ ɖèkaa, va ɖo. Àmè sùgbɔ ɖewo kpàsà ɛ̀ do, wo hɛ̃ èwui ku èkpò. Mawunɔ gãwo ku ènuŋlɔ̀tɔwo kudo èdùmèmègãwo ye dɔ̃ wo ɖoɖa be woa le Yesù.

⁴⁴Yudà àmè kè le do Yesù àsia, na wo jèsìdo ɖe be: “Àmè kè mù la kisì na a ye. Mì le è, ne mìa kplɔ̀ ɛ̀ yì.”

⁴⁵Kè Yudà ɖo funu zè ɖèkaa, e gogo Yesù, gblɔ̃ be: “Àpetɔ.” Eye be kisì na ɛ̀.

⁴⁶Eye, àmè kèwo kpàsà Yudà doawo jè Yesù ji, le è.

⁴⁷Àmè kèwo le zɔ̃ ku Yesù gà ŋua mèa, dòmètɔ ɖèka ɖè yebe èwui to lè àku mè, dà mawunɔ gãa be sumɔ̃vi ɖèka, kpà èto na ɛ̀.

⁴⁸Vɔ̀a Yesù gblɔ̃ na àmè kèwo va la lea be: “Fìãfìtɔ ye mù nyi, ye ŋuti mì hɛ̃ èwui ku èkpò sɔ va le mùa?

⁴⁹Gbè sia gbèa mù nɔ̀nà mìa dòmè, fiɔna ènu àmèwo lè mawuxɔa mè, gãke mì mu le mù ò. Vɔ̀a, ènu kèa jɔ̀ ne ŋɔ̀ŋlɔ̃awo ne zɔ̃ sù.”

⁵⁰Kè wo le Yesùa, yebe nukplaviwo kpata si jo, gble è ɖɛ.

⁵¹Đèkajɛ ɖe, kè tà àvɔ kpòa, kpàsà Yesù do. Wo le è;

⁵²vɔ̀a, e gble àvɔa ɖɛ, si jo àma àma.

⁵³Wo kplɔ̀ Yesù yì mawunɔ gã Kayafà be àxomè. Mawunɔ gãwo ku èdùmèmègãwo kudo ènuŋlɔ̀tɔwo bɔ̀ lè funu.

⁵⁴Petrò jè Yesù yomè, vɔ̀a mu gogo e ò. E nɔ̀ àzɔ̀ge na ɛ̀, kplɔ̀ ɛ̀ do kaka yì mawunɔ gã Kayafà be àxomè. E yì nɔ̀ ànyi lè mawunɔ gãa be sumɔ̃viwo dòmè le pu èzò.

⁵⁵Dùnyagblɔ̃ha keŋu le ji ènu kè wo la teŋu sɔ gblehùɛ do Yesùa, vɔ̀a, wo mu kpɔ ènu ɖe ò.

⁵⁶Àmè sùgbɔ ɖù àjè ɖase so Yesù ŋuti, vɔ̀a, ne àmè ɖe va gblɔ̃ ènu ɖe a, àmè bu la gblɔ̃ ènu bu.

⁵⁷Eye àmè ɖewo sitè, ɖù àjè ɖase kèa so e ŋuti be:

⁵⁸“Mi sè be gblɔ̃ be: 'Mù la gbã mawuxɔ kèa kè àgbètɔwo tùa, eye lè ŋùkèkè ètɔ̃ mèa, mù la tù èbu ekè àgbètɔwo be àlɔ̀ mu la tù òa.'”

⁵⁹Vɔ̀a, lè èmɔ ŋua cã nua, ɖase kè wo ɖù so e ŋutia, èɖe tovò na èɖe.

⁶⁰Eye, mawunɔ gãa sitè lè àmèwo dòmè, biɔ Yesù sè be: “Ènu kè àmè ŋuawo gblɔ̃ so ŋuti wòa yeŋu. Wò ɖo ènu ɖe la ɖo e ŋuti na woa?”

⁶¹Vɔ̀a, Yesù bɔ̀nu, mu ɖo e ŋuti na ɛ̀ ò. Mawunɔ gãa gbà biɔ ɛ̀ ènyà sè be: “Èwò ye nyi *Mɛ̀sia, *sìtu be Mawu a be Èvia?”

⁶²Yesù ɖo e ŋuti na ɛ̀ be: “Ènyè ye. Mì la va kpɔ Àgbètɔ be Èvia nɔ̀ ànyi lè Mawu ŋusɛ̃kpatatɔa be ɖùsi mè. Mì la gbà kpɔ ɛ̀ gbãnà lè lilikpowo mè so jiŋùkusi.”

⁶³Kè mawunɔ gãa sè ènyà kè Yesù gblɔ̃a, e zɛ̃ àwù lè èkɔ̀, eye e gblɔ̃ be: “Đase kɛ ye mi gbà hiã ò?

⁶⁴Đo mìa ŋutɔ mì sè fifì, e gblɔ̃ bùsunya. Nukɛ ye mì susu so e ŋuti ò?” Woa kpata gblehùɛ do e gblɔ̃ be e jè na èku.

⁶⁵Eye àmè ɖewo tɔ ètã tutu kɔ̀ ɖo e ŋuti, eye wo sɔ ènu cɔ̃ ŋùmè na ɛ̀, eye wo tù èkɔ̃ ɛ̀ le gblɔ̃ na ɛ̀ be: “Gblɔ̃ àmè kè pò wòa.” Eye sumɔ̃viawo pò èto mè na ɛ̀.

⁶⁶Petrò kpɔ̀tɔ̀ lè àfi kè be le pu èzò lèa eye mawunɔ gãa be sumɔ̃vi nyɔ̃nù ɖe va funua.

⁶⁷Kè be kpɔ Petrò le pu èzòa, e le ŋùkuvi ɖo e ŋuti dũu; e gblɔ̃ na ɛ̀ be: “Wò cã wò kpàsànà Yesù, ŋusù Nazarɛttɔ̀ ŋua do.”

⁶⁸Vɔ̀a, Petrò gbe be: “Nyè mu nya ɛ̀ ò. Nyè mu ŋɔjè ènu kè wò le gblɔ̃a mè ò.” E yomè a, Petrò tùtà àxuea be àgbo ji lɔ̀ge[8].

⁶⁹Sumɔvi nyɔ̃nùa gbà kpɔ Petrò lè àgboa ji, eye be gbà gblɔ̃ na àmè kèwo lètè lè funuawo be: “Yesù be àmè ɖèka kè ye è.”

⁷⁰Vɔ̀a, Petrò gbà mɔnu ke. E yomè, èzã ɖe kpòa, àmè kèwo lè funuawo gbà gblɔ̃ na Petrò be: “Nyàwo ye! Woa dòmètɔ ɖèka ye wò nyi, ɖo Galileatɔ ye wò cã wò nyi.”

⁷¹Vɔ̀a, Petrò tɔ ènu tàta ku kpɛ̃sɛ̃ be: “Nyè mu jèsi ŋusù kè be ènyà mì le gblɔ̃ na mùa ò.”

⁷²Wàlɛbɛ ŋua tututua, kòklo-su ɖe ku àtɔ zè èvègɔ̃a, eye Petrò ɖoŋù ènyà kè Yesù gblɔ̃ na ɛ̀ sãa be: “Gbɔ̀xue kòklo-su la ku àtɔ zè èvèa, wò la gbe mù zè ètɔ̃ be yè mu jèsi mù ò.” E to zè ɖèka eye e wo àvi.