Read gen Markò 15 Bible Online

Markò 15 - gen bible

Markò 15

¹Eye ekè èŋù kèa, * mawunɔ gãwo ku èdùmèmègãwo kudo ènuŋlɔ̀tɔwo gbàkudo kòjoɖotɔwo bɔ̀ ŋùdekɛ̃nyɛ fùtù; wo bù ètamè so ènu kè wo la wɔ̀a ŋuti. Wo bla Yesù, kplɔ̀ ɛ̀ yì do àsi na Pilatò.

²Pilatò biɔ ɛ̀ ènyà sè be: “Èwò ye nyi Yudàviwo be èfìɔa?” Eye Yesù ɖo e ŋuti na ɛ̀ be: “Èwò ye gblɔ̃ ɛ̀.”

³Mawunɔ gãwo dohùɛ sùgbɔ do Yesù,

⁴ye ŋutia, Pilatò gbà gblɔ̃ na Yesù be: “Wò sè ènyà gbogbo kè wo gblɔ̃ so ŋuti wòa? Wò mu ɖo ènyà ɖekpe la sɔ ɖo e ŋuti na woa?”

⁵Yesù mu gbà ɖo ènyà ɖekpe ŋuti na ɛ̀ ò, eye e kpaca Pilatò.

⁶Lè *Toŋutivayì be àzã ɖùɖu ɖe sia ɖe be gàmèa, Pilatò ɖènà ègà gàmènɔ̀tɔ ɖèka na Yudàviwo. Gàmènɔ̀tɔ kè woa ŋutɔwo biɔa.

⁷Vɔ̀a, ŋusù kè wo yɔna be Barabas-a lè ègàkpa mè ku àglajèɖodùtatɔ ɖewo. Wo le wo, ɖo wo wù àmè lè èzĩ tɔ̀tɔ ɖe be hùenu.

⁸Àmèha a yì Pilatò gbɔ, biɔ ɛ̀ be ne ɖè ègàmènɔ̀tɔ ɖèka to na yèwo, sìgbè àlekè be wɔ̀nà ɛ̀ sãa lè èpè sia èpè hùenua nène.

⁹Pilatò biɔ wo sè be: “Mì jro be ma ɖè Yudàviwo be èfìɔa to na mìa?”

¹⁰E biɔ wo ènyà kèa sè, ɖo e kpɔ be * mawunɔ gãwo be ŋuhuã ŋuti ye wo kplɔ̀ Yesù va na yè ɖo.

¹¹Mawunɔ gãwo do èzò lãmè na àmèha a ne bèa biɔ be Pilatò ne ɖè ègà Barabas bòhũ.

¹²Kè be gbà xɔ̀ ènyàa, Pilatò to na wo be: “Nukɛ ye mì le ji be ma wɔ̀ na àmè kè mì yɔna be Yudàviwo be èfìɔa ò?”

¹³Wo do àpa, ɖo e ŋuti na ɛ̀ be: “Ka ɛ̀ ɖo àtisòga ŋuti.”

¹⁴Pilatò biɔ wo sè be: “Èvuɛ̃ kɛ ŋutɔ ye be wɔ̀ ò?” Vɔ̀a, àmèha a gbà do àpa sɛ̃sɛ̃ ɖe gblɔ̃ be: “Ka ɛ̀ ɖo àtisòga ŋuti.”

¹⁵Vɔ̀a, kè Pilatò le ji be yèa nyɔ lè àmèha a gbɔa, e ɖè Barabas to lè ègà mè na wo. E yomè a, e na wo pò Yesù ku àtãŋù eye e sɔ ɛ̀ do àsi na wo be woa yì ka ɛ̀ ɖo àtisòga ŋuti.

¹⁶Gbãdãgbãwo kplɔ̀ Yesù yì Pilatò be èfìɔsaa be àwamè, eye wo yɔ gbãdãgbãha bliboa bɔ̀ lè funu.

¹⁷Wo do àwù dìdi jɛ̃ɛ ɖe na Yesù eye wo sɔ àŋùja lɔ̃ fìɔkuku ɖe sɔ cɔ̃ èta na ɛ̀.

¹⁸Wo tɔ ègbè dodo na ɛ̀ le gblɔ̃ be: “Mi le do ègbè na wò Yudàviwo be èfìɔ.”

¹⁹Wo sɔ àpla pò èta na ɛ̀, gbà tu ètã kɔ̀ ɖo e ŋuti. Wo jè èklò lè ŋùkɔ̀ na ɛ̀ sɔ le jè *èɖɛ̀ na ɛ̀.

²⁰Ekè wo ɖè àlɔmè lè e ŋuti eye be sù woa, wo va ɖè àwù jɛ̃a lè èkɔ̀ na ɛ̀, sɔ ye ŋutɔ be àwùwo do na ɛ̀. E yomè a, wo kplɔ̀ ɛ̀ to lè àxuea mè ne woa yì ka ɛ̀ ɖo àtisòga ŋuti.

²¹Ŋusù Kirenètɔ ɖe tɔ̀ Simɔ̀n. E ye jì Àlɛ̀ksãdrò ku Rufò. Ŋusù kèa so àgblè mè va le yì àxomè eye, gbãdãgbãwo sò è, zĩ e ji be bèa dro Yesù be àtisògaa.

²²Wo kplɔ̀ Yesù yì àfi kè wo yɔna be Golgatàa, kè gɔ̃mè ye nyi “Àmèta tèpea”.

²³Wo caka vɛ̃ ku àbɛyɛ ɖodu be bèa nù, vɔ̀a, Yesù mu nù ì ò.

²⁴Ekè wo ka ɛ̀ ɖo àtisòga ŋuti vɔ̀a, wo dà àkɔ̀ sɔ ma yebe àwùwo; ne woa sɔ nya ekè àmè sia àmè la xɔ̀a.

²⁵Ŋùdekɛ̃nyɛ, gà àsiɖèkɛ mè ye wo ka ɛ̀ ɖo àtisòga ŋuti.

²⁶Eye wo ŋlɔ̀ àgɔ̀ kè be jè a ɖo yebe ètagbe be: “Yudàviwo be èfìɔ.”

²⁷Wo ka fìãfìtɔ èvè cã bɔ̀ ɖo e ŋuti. Wo ka ɖèka ɖo yebe ɖùsi mè, eye wo ka èvègɔ̃a ɖo yebe èmìɔ̃ mè. [

²⁸Nène a ye ŋɔ̀ŋlɔ̃ a be ènyàa zɔ̃ sù be: “Wo hlɛ̃ ɛ̀ ɖo èvuɛ̃wɔ̀tɔwo dòmè.”]

²⁹Àmè kèwo to funu va le yìawo hũhũna èta, zũnà ɛ̀, gblɔ̃nà na ɛ̀ be: “Hoo na wò. Èwò kè be yè la gbã mawuxɔa, la gbìgbɔ̀ tù èbu lè ŋùkèkè ètɔ̃ mèa ye ŋuaa?

³⁰Hlùɛ̃ ɖokoe wò gã. Đì so àtisogaa ŋuti.”

³¹Mawunɔ gãwo ku ènu ŋlɔ̀tɔwo cã le ɖè àlɔmè lè Yesù ŋuti. Wo le gblɔ̃ lè woa nɔ̀nɔwo dòmè be: “E hlùɛ̃ àmè buwo gã, vɔ̀ mu teŋu hlùɛ̃ ye ɖokoe gã ò.

³²Kristò, Izràɛl be èfìɔa ne ɖì so àtisògaa ŋuti fifì ne mia kpɔ. Ne e ɖì so àtisògaa ŋutia, eŋuã, mi la xɔ̀ e ji sè.” Àmè kèwo wo ka ɖo àtisògaa ŋuti lè yebe àxàda mèawo cã le zũ ì.

³³Kè gà woèvè pòa, vìvìti do ɖo èdùa kpata ji kaka va na wètrɔ gà ètɔ̃ mè.

³⁴Kè gà ètɔ̃ pòa, Yesù do àpa sɛ̃sɛ̃ ɖe gblɔ̃ be: “Eli! Eli! Lama sàbatanì?” — E gɔ̃mè ye nyi be: “Mawu nyè! Mawu nyè! Nukɛ ŋuti ye wò gble mù ɖɛ ɖo ò?” —

³⁵Àmè kèwo lè funuawo dòmètɔ ɖewo sè ènu kè Yesù gblɔ̃a, eye wo be: “Mì le sè a? E le yɔ Èli.”

³⁶Woa dòmètɔ ɖèka pu dù, nyrɔ̃ àpùmèkùsa ɖèka ɖo vɛ̃ vesì-vesì mè, e sɔ àpùmèkùsaa ɖo àpla ɖe ŋuti, drɛ̃ ɖo ènu gbɔ na Yesù be bèa nù, le gblɔ̃ be: “Mì tɔtè ne mìa kpɔ be Èli la va ɖè è lè àtisògaa ŋuti màa.”

³⁷Vɔ̀a, Yesù do àpa sɛ̃sɛ̃ ɖe, eye be miɔ ènu.

³⁸Àvɔ gãa kè wo sɔ sò mawuxɔa mèa, zɛ̃ ɖo èvè, so èji kaka va gɔ̃mè.

³⁹Romàtɔwo be àhùaga kè jè ŋùkɔ̀ Yesùa, kpɔ àlekè ènuwo yì ɖoa, eye e gblɔ̃ be: “Mawu be Èvi ye ŋusù kèa nyi nyàwo.”

⁴⁰Nyɔ̃nù ɖewo cã lè funu, le kpɔ ènu kè le jɔ̀ a ɖoɖa lè àzɔ̀ge. Lè nyɔ̃nù kèawo dòmèa, mi la kpɔ Mari kè so Magdalàa, ku Mari kè jì Yakobò-vi kudo Joze, gbàkudo Salomea.

⁴¹Nyɔ̃nù ŋuawo ye kpàsà Yesù do, kpe ɖo e ŋuti lè yebe èhiãwo mè wàlɛbɛ kè be nɔ̀ Galileaa. Nyɔ̃nù sùgbɔ buwo cã lè funu ekèwo kpàsà Yesù do va Yèruzàlɛm-a.

⁴²Kè fìɛ̃si ɖoa, ekè gbè ŋua gbè nyi jàjràɖo zã kè jè ŋùkɔ̀ na jɛ̃gbɔ̃zã ŋutia,

⁴³Yozɛ̀f AriMàt ètɔ̀, àsàfɔ̀cɛ̀ ɖìnyi ɖe, àmè kè ŋutɔ cã le ɖo ŋùkuvi Mawu be èfìɔɖùɖua va, eye e do èjì yì Pilatò gbɔ, eye e biɔ Yesù be àmètia.

⁴⁴Vɔ̀a, kè Pilatò sè be Yesù ku vɔ̀a, e kpaca ɛ̀, eye e yɔ àhùagaa biɔ ɛ̀ sè be e dìdì kè Yesù ku màa?

⁴⁵Ekè àhùagaa ɖo e ŋuti na ɛ̀ be nyàwo ye à, e na ègbè Yozɛ̀f be bèa yì sɔ Yesù be àmètia.

⁴⁶Yozɛ̀f plè kploba eye, ekè be ɖè Yesù be àmètia lè àtisògaa ŋutia, e bla ɛ̀ ɖo kplobaa mè, sɔ ɛ̀ yì mlɔ̃ èyɔ̀do kè wo kù ɖo àkpã ɖe mèa mè. E yomè a, e mlì èkpe gã ɖe sɔ tu èyɔ̀doa nu.

⁴⁷Mari kè so Magdalàa, ku Mari kè nyi Joze be ènɔa kpɔ àfi kè wo ɖì Yesù ɖoa.