Read gen Markò 2 Bible Online

Markò 2 - gen bible

Markò 2

¹Ŋùkèkè ɖewo yomè a, Yesù gbà trɔva Kapɛrnaum ke. Eye àmèwo sè be e lè àxomè.

²Àmè sùgbɔ va bɔ̀ lè funua, àleke be tèpe mu gbà lè àxuea mè ò. Tèpe mu lè àgboa nu cã ò. Wàlɛbɛ kè Yesù le do Mawu be àŋɛ̀a na woa,

³àmè ènè kɔkɔ èdɔ̀nɔ̀kplibɔ ɖe va e gbɔ.

⁴Kè wo kpɔ be yèwo mu la teŋu kɔ ɛ̀ kaka yì Yesù gbɔ ò, ɖo àmèha a ŋutia, wo lia èxɔ̀ kè mè be lèa ta, eye wo ko èxɔ̀a be àkpa ɖèka lè àfi kè Yesù lèa. Wo ɖiɖi èdɔ̀nɔ̀kplibɔa ku àba kè ji be lèa to funu.

⁵Kè Yesù kpɔ àlekè wo xɔ̀sè ɖoa, e to na èdɔ̀nɔ̀kplibɔa be: “Èvi nyè, wo sɔ àpo nuvuɛ̃wo kè wò.”

⁶Ènuŋlɔ̀tɔ ɖewo nɔ̀ ànyi lè funua, eye wo le bù èta mè so ènu kè Yesù gblɔ̃ ŋua ŋuti be:

⁷“Bùsu-nya kɛ ye ŋusù kèa le gblɔ̃ ɖo Mawu ŋuti leke ò? Àmè kɛ ye teŋu sɔ nuvuɛ̃ kè àmè to Mawu ɖèka ŋuti ò?”

⁸Ekè Yesù nya be wo le susu nène be ènua, e biɔ wo be: “Nukɛ ŋuti ye mì le susu ènu kèawo ɖo ò?

⁹Ekɛ ye lè bɔ̀bɔɛ ɖe wu, be woa gblɔ̃ na èdɔ̀nɔ̀kplibɔa ò? 'Wo sɔ èvuɛ̃ wòwo kè wò', àlo 'Sitè, ŋlɔ̀ àba wòa, ne wòa zɔ̃' ò?

¹⁰Vɔ̀a, mù jro be mìa nya be Àgbètɔ be Èvia ɖo ŋusɛ̃ la sɔ nuvuɛ̃ kè àmè lè ànyigbã ji.” Kè be gblɔ̃ nène vɔ̀a, e to na èdɔ̀nɔ̀a be:

¹¹“Mù le ɖè ègbè na wò, sitè, ŋlɔ àpo àba ne wòa yì àxomè!”

¹²Troloa, ŋusùa sitè le àmè sia àmè be ŋùmè, e ŋlɔ yebe àba a, eye be to. Woa kpata wo kãyàa, eye wo na gogo Mawu be: “Mi mu kpɔ ènu kèa hati kpɔ gbèɖe ò.”

¹³Yesù gbà yì ètɔ̀a to kè. Àmè sùgbɔ yì e gbɔ lè funua, eye e fiɔ ènu wo.

¹⁴Ekè Yesù jo lè funu va le yìa, e kpɔ Levì, Alfeò be èvia nɔ̀ ànyi lè èdɛ̃ jɔ̀pe. Yesù gblɔ̃ na ɛ̀ be: “Jè yo nyè mè.” Eye Levì sitè, jè e yomè.

¹⁵E yomè a, Yesù ku yebe nukplaviwo le ɖù ènu lè Levì be àxomè. Èdɛ̃jɔ̀tɔwo ku nuvuɛ̃wɔ̀tɔ buwo cã le ɖù ènu ku wo, ɖo nèneme sùgbɔ kplɔ̀ ɛ̀ do.

¹⁶Ekè Farizìwo be ènuŋlɔ̀tɔwo kpɔ be Yesù le ɖù ènu ku àmè ŋuawoa, wo gblɔ̃ na yebe nukplaviwo be: “Nukɛ ŋuti ye be le ɖù ènu ku nuvuɛ̃wɔ̀tɔwo kudo èdɛ̃jɔ̀tɔwo ɖo ò?”

¹⁷Yesù sè ènu kè wo gblɔ̃a eye e to na wo be: “Mu nyi àmè kèwo lè sɛ̃sɛ̃ ɖe a, wo ye hiã èdɔ̀dàtɔ ò; vɔ̀a èdɔ̀nɔ̀wo bòhũ ye. Nyè mu va be ma yɔ àmèjɔ̀jɔɛwo ò; vɔ̀a nuvuɛ̃wɔ̀tɔwo ŋuti ye mù va ɖo.”

¹⁸Yòhanɛ̀s be nukplaviwo ku Farizìwo le bla ènu. Wo va gblɔ̃ na Yesù be: “Nukɛ ŋuti ye Yòhanɛ̀s be nukplaviwo ku Farizìwo be nukplaviwo le bla ènu, vɔ̀a tɔ̀ wòwo ya mu le bla ɛ̀ ò?”

¹⁹Yesù ɖo e ŋuti na wo be: “Nyɔ̃nùkpetɔa be èxlɔ̃wo teŋu bla ènu wàlɛbɛ kè nyɔ̃nùkpetɔa lè woa gbɔa? Gbèɖe! Wàlɛbɛ kè nyɔ̃nùkpetɔa la gbe nɔ̀ ku wo kpòa, wo mu la teŋu bla ènu ò.

²⁰Vɔ̀a, èŋù ɖewo la va kè, ekè wo la sɔ nyɔ̃nùkpetɔa jo lè woa gbɔ. Àzã ŋuawo ji ye wo la bla ènu.”

²¹“Àmè ɖe mu sɔna àvɔnuɖèɖe yeye tana àwù xoxo ò; ɖo ne e wɔ̀ nènea, àvɔnuɖèɖe yeyea, la zɛ̃ àwù xoxoa, eye zɛ̃zɛ̃ yeyea la nyrã wu zɛ̃zɛ̃ xoxoa.

²²Àmè ɖe mu kɔ̀nà vɛ̃ yeye ɖo *èlãgbàzegò xoxo mè ò; ɖo ne e wɔ̀ nènea, vɛ̃a la wo *èlãgbàzegòa, eye vɛ̃a la gũ, èlãgbàzegòa cã la gũ. Vɛ̃ yeyea, èlãgbàzegò yeye mè ye wo kɔ̀nà ɛ̀ ɖo.”

²³Jɛ̃gbɔ̃zã ɖe gbèa, Yesù ku yebe nukplaviwo le to èlùgblèwo mè. Yesù be nukplaviwo tɔ *èlùawo ŋɛ̃ŋɛ̃, le ɖù.

²⁴Eye Farizìwo gblɔ̃ na ɛ̀ be: “Kpɔɖa, nukɛ ŋuti wo le wɔ̀ ènu kè mu sɔ̀gbè òa, le jɛ̃gbɔ̃zã gbè ɖo ò?”

²⁵E ɖo e ŋuti na wo be: “Mì mu hlɛ̃ ènu kè David wɔ̀ wàlɛbɛ kè àdɔ̀ wù ye ku yebe ŋutimewo kpɔ ò a?

²⁶Lè mawunɔ gã Àbiatà hùenua, e ɖo mawuxɔa mè, ɖù ènu ɖùɖu kè wo sɔ savɔ na Mawu a, na àmè kèwo bɔ̀ ɖo e ŋutiawo, eye woawo cã wo ɖù ì. Vɔ̀a lè miabe *èse mèa, mawunɔwo kpò ye teŋu ɖù ènu ɖùɖu ŋua.”

²⁷E gbà to na wo be: “Àgbètɔwo ŋuti ye wo ɖo jɛ̃gbɔ̃zãa ɖo; mu nyi jɛ̃gbɔ̃zãa ŋuti ye wo ɖo àgbètɔ ɖo ò.

²⁸Ye ŋutia, Àgbètɔ be Èvia, kpà àcɛ̀ na jɛ̃gbɔ̃zãa cã.”