Read gen Markò 3 Bible Online

Markò 3 - gen bible

Markò 3

¹Yesù gbà trɔ yì Yudàviwo be bɔ̀bɔ̀pe ke. Ŋusù ɖe kè be àlɔ̀ kua lè funua.

²Àmèwo le ɖia Yesù, la kpɔ be e la dà èdɔ̀ na ŋusùa le jɛ̃gbɔ̃zã gbè màa, ne woa teŋu kpɔ èmɔ la dohùɛ do è.

³Yesù gblɔ̃ na ŋusù kè be àlɔ̀ kua be: “Sitè, va nɔ̀tè le àmèawo be dòdòmè.”

⁴E yomè a, e biɔ àmèawo be: “Ènu kɛ ye jè be woa wɔ̀ le jɛ̃gbɔ̃zã gbè ò. Woa wɔ̀ ènyuɛ̃ loo, àlo woa wɔ̀ èvuɛ̃? Woa hlùɛ̃ àmè ɖo àgbè loo, àlo woa wù àmè?” Vɔ̀a woa kpata wo bɔ̀nu.

⁵Àkpɔ̃ ɖɔ Yesù ɖo woabe ŋuzĩzĩ ma ku na àmè ŋuti, eye e sã ŋùku gòdò lè woa ji ku àdɔ̀mèze. E to na ŋusù kè be àlɔ̀ kua be: “Drɛ̃ àlɔ̀.” Ŋusùa drɛ̃ àlɔ̀ a, eye àlɔ̀ a gbɔ̀ àgbè.

⁶Eye ekè Farizìwo toa, wo bla èse zè ɖèka ku Herod Ãtipà be yomèjètɔwo ɖo àlekè wo la wɔ̀ la wù ìa ŋuti.

⁷Yesù ku yebe nukplaviwo jo lè funua yì ètɔ̀a to, eye àmèha gã ɖe so Galilea ku Yudeà jè e yomè.

⁸Eye ekè wo sè ènu gã kèwo be wɔ̀a, àmèha gã ɖe so Yèruzàlɛm ku Idumèa, so Yɔrdàn be ètɔ̀a godo, so Tirò ku Sidɔ̀n be àgowo ji va e gbɔ.

⁹Yesù gblɔ̃ na yebe nukplaviwo be wo ne sɔ ètɔ̀jihũ ɖèka ɖotè na yè, ne àmèha a mu gbà va dri yè ò.

¹⁰Đo, èdɔ̀ kè be le dà na àmè sùgbɔa na be, èdɔ̀nɔ̀wo kpata drina ɖo e ji, jina be yèwoa tɔ ɛ̀ àsi.

¹¹Ne gbɔ̃gbɔ̃ vuɛ̃wo kpɔ ɛ̀, gà ɖekpekpe gàmèa, wo blìbɔ̀nà lè ŋùkɔ̀ na ɛ̀ eye wo dona àpa gblɔ̃nà be: “Èwò ye nyi Mawu be Èvia.”

¹²Eye e gbena na wo sɛ̃sɛ̃ ɖe be wo mu gbà ɖè yè sia ò.

¹³E yomè a, Yesù lia èto ɖe ji. E yɔ àmè kèwo be jro a, eye wo va e gbɔ.

¹⁴Eye e ɖè woèvè ɖo vò, ne woa nɔ̀ e ŋuti, ne bèa nɔ̀ dɔ̃ wo, ne woa nɔ̀ do àŋɛ̀a.

¹⁵E gbà na wo ŋusɛ̃ ne woa nɔ̀ nyà gbɔ̃gbɔ̃ vuɛ̃wo.

¹⁶*Àmèdɔ̃dɔ̃ woèvèawo be nyikɔwo ye nyi: Simɔ̀n, ekè be ɖo nyikɔ na be Petròa,

¹⁷Yakobò, Zebedeo be èvia ku Yòhanɛ̀s, Yakobò be nɔ̀via, eye e ɖo nyikɔ na wo be Boanergɛ̀s, ekè be gɔ̃mè ye nyi: “Àmè kèwo lè sìgbè èji be ègbè ɖèɖe nène.”

¹⁸Ãdre ku Filipò, kudo Bartelemeo gbàkudo Màteo, ku Tomà kudo Yakobò kè nyi Alfeò be èvia, gbàkudo Tade ku Simɔ̀n, àvũ drɛ̃tɔ ɖo yebe èdù ta,

¹⁹kudo Yudà Iskariɔt àmè kè va xɔ̀kpli na ɛ̀a.

²⁰E yomè a, Yesù gbà trɔva àxomè. Àmè sùgbɔ gbà va bɔ̀ lè funu, àleke be Yesù ku yebe nukplaviwo mu gbà teŋu ɖù ènu ŋutɔ cã ò.

²¹Kè Yesù be xòmètɔwo sè a, wo va be yèwoa kplɔ̀ ɛ̀. Đo, wo le gblɔ̃ be: “Ètagbɔ gble na ɛ̀.”

²²Eye ènuŋlɔ̀tɔ kèwo so Yèruzàlɛm vaa, wo gblɔ̃ be: “Bɛlzebul lè lãmè na ɛ̀, gbɔ̃gbɔ̃ vuɛ̃wo be èfìɔa be nyikɔ mè ye be le nyà gbɔ̃gbɔ̃ vuɛ̃wo to lè.”

²³Vɔ̀a, Yesù yɔ wo va ye ɖokoe gbɔ, do èlo na wo be: “Leke ye Satana la nyà ye ɖokoe ɖo ò?

²⁴Ne fìɔdu ɖe sitè ɖo ye ɖokoe ŋutia, fìɔdu ŋua mu la teŋu nɔ̀tè ò.

²⁵Nène a ke ye ne àxue ɖe mètɔwo ma, eye woabe ègbè mu lè du òa, àxue ŋua mu la teŋu nɔ̀tè ò.

²⁶Ne Satana sitè ɖo ye ɖokoe ŋutia, ne yebe fìɔdua klãa, mu la teŋu nɔ̀tè ò, yebe vɔ̀vɔnu ɖo.”

²⁷“Àmè ɖe mu teŋu yì ŋusù glo ɖe be àxomè, la hlà yebe ènuwo, ne mu bla ɛ̀ ɖo èkà mè gbɔ̀xue ò. Ne e bla ɛ̀ vɔ̀a, eŋuãa, e la teŋu lɔ ènu kèwo lè àxuea mèa keŋu-keŋu.

²⁸Nyàwo ye mù le to na mì: wo la sɔ àgbètɔ be èviwo be àgɔ̀jèje ku bùsu-nya kèwo keŋu la to so woabe ènu mèa kè wo.

²⁹Vɔ̀a, àmè kè la gblɔ̃ bùsu-nya ɖo Gbɔ̃gbɔ̃ Kɔ̀kɔ̀ɛ a ŋutia, wo mu la sɔ kè è kpɔ gbèɖe ò, ɖo àgɔ̀ kè wo mu sɔ kènà àmè gbèɖe òa ye be jè.”

³⁰Yesù gblɔ̃ ènyà kèa na wo, ɖo wo to na ɛ̀ be: “Gbɔ̃gbɔ̃ vuɛ̃ ye lè e mè.”

³¹Yesù be ènɔ̀ ku nɔ̀viawo va àfi kè be lèa. Wo nɔ̀tè lè àxue kè mè be lèa be àgbonu, dɔ̃ àmè ɖoɖa be woa yì yɔ ɛ̀ va.

³²Àmèha a nɔ̀ ànyi pòxla do Yesù. Wo va to na ɛ̀ be: “Kpɔɖa, ènɔ̀ wò ku nɔ̀vi wòwo lè àgbonu le ji wò.”

³³Vɔ̀a, e ɖo e ŋuti na wo be: “Àmè kɛwo ye nyi ènɔ̀ nyè, ku nɔ̀vi nyèwo ò?”

³⁴E sã ŋùku gòdò lè àmè kèwo nɔ̀ ànyi trɔ do èawo ji, eye be gblɔ̃ be: “Ènɔ̀ nyè ku nɔ̀vi nyèwo ye nyi ekèawo.

³⁵Đo àmè ɖekpekpe àmè kè le wɔ̀ Mawu be jro a, àmè ŋua ye nyi nɔ̀vi nyè ŋusù, nɔ̀vi nyè nyɔ̃nù, àlo ènɔ̀ nyè.”