Read gen Markò 5 Bible Online

Markò 5 - gen bible

Markò 5

¹Yesù ku yebe nukplaviwo va jè ètɔ̀a be àgo ɖe a ji, lè Gadara nyigbã ji[2].

²Eye ekè be le to lè èhũa mè troloa, ŋusù ɖe, kè mè gbɔ̃gbɔ̃ màkɔ̀ màkɔ ɖe lèa, to lè èyɔ̀dowo mè va dogò è.

³Èyɔ̀dowo mè ye ŋusùa nɔ̀nà. Àmè ɖe mu gbà teŋu blana ɛ̀ ɖo èkà mè ò. Kɔ̀sɔ̀kɔsɔwo ŋutɔ cã a, mu wɔ̀nà ènu ɖe na ɛ̀ ò.

⁴Đo wo blana ɛ̀ ku kɔ̀sɔ̀kɔsɔwo gbà dona ègà àfɔ̀ na ɛ̀, vɔ̀ gãke e sònà kɔ̀sɔ̀kɔsɔawo gbà ŋɛ̃na àfɔ̀gawo eye àmè ɖekpekpe mu teŋu kpena e ji ò.

⁵Wè sia wè, lè èzã ku ŋùkèkèa, e dona àpa, tona èyɔ̀dowo dòmè, tona ètowo ji. E sɔna èkpe dona àbì ye ɖokoe ŋuti.

⁶Vɔ̀a, kè be kpɔ Yesù ɖoɖa lè àzɔ̀gea, e pu dù va jè èklò lè yebe àkɔ mè

⁷eye e do àpa lelele gblɔ̃ na ɛ̀ be: “Yesù, Mawu kè lè èji hũia be Èvi! Nukɛ ye lè ènyè ku èwò dòmè ò. Mù sɔ Mawu le àfɔ̀ na wò, mù gbà do àyà na mù ò!”

⁸— E gblɔ̃ nène, ɖo Yesù ɖè ègbè ɖo e ji be: “Gbɔ̃gbɔ̃ màkɔ̀ màkɔ, to lè ŋusù kèa mè.” —

⁹Eye e biɔ ɛ̀ be: “Nyikɔ wò ɖe?” Eye e ɖo e ŋuti gblɔ̃ be: “Nyikɔ nyè ye nyi àkpe àkpe[3]”

¹⁰E tɔ kuku ɖèɖe na Yesù veve ɖe be mu gbà nyà yèwo jo lè èdù ŋua mè ò.

¹¹Èhãwo be èha gã ɖe le ɖù ènu lè èto ɖe ji lè funu.

¹²Gbɔ̃gbɔ̃ vuɛ̃awo ɖè kuku na Yesù, biɔ ɛ̀ be: “Đè èmɔ na mi ne mia yì ɖo èhãawo mè!”

¹³Yesù na wo ègbè eye troloa, wo to lè ŋusùa mè va yì ɖo èhãawo mè. Èhãawo pòagblì[4] so ètoa ji, jè ètɔ̀ mè, eye woa kpat, wo ku. Èhã kèawo la sù èhã hotu èvè.

¹⁴Àmè kèwo le nyì èhãawoawo, si yì gblɔ̃ ènu kè jɔ̀ a lè èdùa ku yebe kɔpewo mè. Àmèwo to va kpɔ ènu kè jɔ̀ a.

¹⁵Kè wo va Yesù gbɔ, kpɔ ŋusù kè be lãmè gbɔ̃gbɔ̃ vuɛ̃wo nɔ̀ sãa, lè ànyi nɔ̀nɔ, do àwù eye yebe àyè sɔ̀gbèa, vɔ̃vɔ̃ ɖo wo.

¹⁶Àmè kèwo kpɔ ènu kèawo tèpeawo gblɔ̃ ènu kè jɔ̀ ɖo ŋusùa ku èhãawo jia na àmè kèwo va funuawo.

¹⁷Èdùamètɔwo tɔ kukuɖèɖe na Yesù be ne to lè yèwo be èdùa mè.

¹⁸Eye wàlɛbɛ kè Yesù gbìgbɔ̀ le ɖo ètɔ̀jihũa mèa, ŋusù kè be lãmè be nyà gbɔ̃gbɔ̃ vuɛ̃wo to lèa, fãkue na ɛ̀ be yèa jo nɔ̀ e gbɔ kpò.

¹⁹Vɔ̀a, Yesù gbe, eye be gblɔ̃ na ɛ̀ be: “Yì àxomè, lè àpo àmèwo gbɔ ne wòa gblɔ̃ ènu gãgã kèwo Tɔhonɔ̀ wɔ̀ na wòa ku lekè be ku ŋuzĩzĩ na wò ɖoa na wo.”

²⁰Eye ŋusùa jo. E tɔ ènu kè Yesù wɔ̀ na ɛ̀a jajra lè èdù èwoawo mè eye àmèwo kpata kã yàa.

²¹Yesù nɔ̀ ètɔ̀jihũa mè, sò ètɔ̀a va àgo ɖe a ji. E lè ètɔ̀a to eye àmèha gã ɖe va bɔ̀ do è.

²²Yudàviwo be bɔ̀bɔ̀pe be èga ɖèka va àfi kè Yesù lèa; yebe nyikɔ nyi Jayirò. Kè be kpɔ ɛ̀a, e jè èklò ɖo yebe àfɔ̀nu,

²³le blìbɔ̀ na ɛ̀ veve ɖe le gblɔ̃ be: “Èvi nyè nyɔ̃nùvia lè èkudonu. Mù le blìbɔ̀ na wò, va ne wòa sɔ àpo àlɔ̀ ɖo e ji ne bèa gã, eye bèa nɔ̀ àgbè.”

²⁴Yesù kpàsà Jayirò do. Àmèha gã ɖe jè e yomè le mimi ì.

²⁵Nyɔ̃nù ɖe lè funu kè ŋuti èhũ ŋɛ̃ŋɛ̃ be èdɔ̀ lè so èpè woèvè.

²⁶Nyɔ̃nù kèa kpefũ sùgbɔ lè àmàdàtɔ fuu si mè eye e zã yebe ègà kpata, eye èdɔ̀a mu jè e mè ò, vɔ̀ bòhũ, e jè àgla kpe è.

²⁷Nyɔ̃nùa sè Yesù be ènyà eye e ɖo àmèha a mè. E ji èmɔ to àmèwo dòmè, to Yesù be ŋùgbedòmè, tɔ àsi yebe àwù.

²⁸E wɔ̀ ekèa ɖo e le gblɔ̃ lè ye ɖokoe mè be: “Ne mù teŋu tɔ àsi yebe àwù kpòa, mù la gã.”

²⁹Nyɔ̃nùa be èhũ ŋɛ̃ŋɛ̃a tɔtè trolo, eye e kpɔ lè ye ɖokoe mè be yebe èdɔ̀a vɔ̀.

³⁰Zè ɖèkaa, Yesù sè lè ye ɖokoe mè be ŋusɛ̃ ɖe to lè yè mè. E trɔ gòdò lè àmèha a dòmè biɔ sè be: “Àmè kɛ ye tɔ àsi àwù nyè ŋuti ò?”

³¹Yebe nukplaviwo ɖo e ŋuti na ɛ̀ be: “Wò kpɔ be àmèha a le mimi wò eye, wo gbà le biɔ sè be: 'Àmè kɛ ye tɔ àsi mùa?'”

³²Eye e sã ŋùku gòdò la kpɔ àmè kè wɔ̀ ènu kèa.

³³Vɔ̃vɔ̃ ɖo nyɔ̃nùa eye be le hũhũ, ɖo e nya ènu kè jɔ̀ ɖo e jia. Ye ŋutia, e va jè èklò ɖo Yesù be ŋùkɔ̀ to nyàwo na ɛ̀.

³⁴Yesù gblɔ̃ na ɛ̀ be: “Èvi nyè, xɔ̀sè wòa hlùɛ̃ wò gã. Yì lè fàfa mè, ne èdɔ̀ wòa ne vɔ̀ na wò.”

³⁵Wàlɛbɛ kè e kpɔ̀tɔ̀ le pò nupoa, àmè ɖewo so bɔ̀bɔ̀pe be ègaa be àxomè va gblɔ̃ be: “Èvi wò nyɔ̃nùa ku vɔ̀, nukɛ be nupo ye wò gbà le do na Àpetɔa ò?”

³⁶Yesù sè ènyà kèawo gãke, e gblɔ̃ na bɔ̀bɔ̀pe be ègaa be: “Mù gbà vɔ̃ ò; gbe xɔ̀sè kpò.”

³⁷Eye, Yesù mu na èmɔ àmè ɖe be kplɔ̀ ɛ̀ do wu Petrò ku Yakobò kudo Yòhanɛ̀s, Yakobò be nɔ̀via ò.

³⁸Wo va ɖo bɔ̀bɔ̀pe be ègaa be àxomè. Yesù kpɔ be èzĩ tɔ̀ lè funu, ɖo àmè sùgbɔ le fã àvi, le do àpa.

³⁹Yesù ɖo àxuea mè gblɔ̃ na àmè kèwo lè funua be: “Nukɛ be zigìdi ku àvi ye nyi ekèa ò? Tùgbɛ̀jɛa mu ku ò, vɔ̀a àlɔ̃ ye be le dɔ̃.”

⁴⁰Eye àmèwo le kò è. Vɔ̀a, e ɖè ègbè eye wo ɖè àmè sia àmè to lè àxuea mè. Yesù kplɔ̀ ɖèvia be ètɔ ku ènɔa kudo yebe *nukplavi ètɔ̃awo ɖo ŋuti eye wo ɖo èxɔ̀ kè mè wo sɔ ɖèvia mlɔ̃ a mè.

⁴¹Yesù le ɖèvia be àlɔ̀, gblɔ̃ na ɛ̀ be: “Tàlità kum!” — Ye gɔ̃mè ye nyi be: “Tùgbɛ̀jɛvi, mù le ɖè ègbè na wò, sitè!” —

⁴²Troloa, tùgbɛ̀jɛvia sitè, tɔ zɔ̃zɔ̃; e la nɔ̀ ɖo sìgbè èpè woèvè nène. Ènu kè jɔ̀ a, wɔ̀ ŋùdã na àmè kèwo lè funua ŋutɔ.

⁴³Vɔ̀a, Yesù do *èse na wo sɛ̃sɛ̃ ɖe be wo mu gbà na ne àmè ɖe bèa sè ò. E gbà to na wo be woa na ènu ɖùɖu tùgbɛ̀jɛvia ne bèa ɖù.