Read gen Markò 6 Bible Online

Markò 6 - gen bible

Markò 6

¹Yesù jo lè funu va yì ye ŋutɔ be èdù mè; yebe nukplaviwo kpàsà ɛ̀ do.

²Eye wàlɛbɛ kè Jɛ̃gbɔ̃zã gbè ɖoa, e tɔ ènufiɔfiɔ lè bɔ̀bɔ̀pea, eye àmè sùgbɔ kèwo sè a, wo jo kã yà le gblɔ̃ be: “Fikɛ ye àmè kèa kpɔ ènu kèawo so ò? Eye ènunya kɛ ŋùkumè ye wo na ɛ̀, kaka ye èdɔ jiŋɔ kèawo ŋutɔ cã le so yebe àlɔ̀wo mè ò?

³Mu nyi e ye nyi àtikpàtɔa òa? Mu nyi e ye nyi Maria be Èvia òa? Mu nyi e ye nyi Yakobò ku Yozɛ̀f kudo Yudà gbàkudo Simɔ̀n be nɔ̀via? Nɔ̀via nyɔ̃nùwo cã mu lè mia dòmè òa?” Eye ènu kèawo na be wo mu xɔ̀ e ji sè ò.

⁴Vɔ̀a, Yesù gblɔ̃ na wo be: “Gblɔ̃ɖɛtɔa, ye ŋutɔ be èdù mè, ye ŋutɔ be xòmètɔwo dòmè kpò ye bùbu mu nɔ̀nà e ŋuti lè ò.”

⁵Eye Yesù mu teŋu wɔ̀ ŋùdãnu ɖe lè funu sɔ wu èdɔ̀nɔ̀ ɖewo kèwo ji be dà àsi ɖo sɔ dà èdɔ̀ naawo.

⁶Nazarɛttɔwo be màxɔ̀sè kpaca Yesù ŋutɔ. Yesù jo lè funu yì fiɔ ènu àmèwo lè kɔpe kèwo gogo funuawo mè.

⁷Yesù yɔ yebe nukplaviwo, eye e tɔ wo dɔ̃dɔ̃ èvè èvè. E na wo ŋusɛ̃ ne woa ɖù gbɔ̃gbɔ̃ màkɔ̀màkɔwo ji.

⁸E do *èse na wo be: “Mì mu gbà hɛ̃ ènu ɖekpe sɔ zɔ̃ èmɔ, wu èkpò ɖèka ò. Mì mu gbà hɛ̃ ènu ɖùɖu ò. Mì mu gbà hɛ̃ àkpɛtɛ ò. Mì mu gbà hɛ̃ ègà ɖo ègo mè ò.

⁹Mì do àfɔ̀kpa, vɔ̀a, mì mu gbà hɛ̃ àwù bu wu ekè lè èkɔ̀ na mìa ò.”

¹⁰E gbà to na wo be: “Ne mì ɖo èdù ɖe mèa, mì nɔ̀ àxue kè mè wo la xɔ̀ mì àmèjro lèa mè, kaka na gà kè mè mì la jo lè funua.

¹¹Ne mì ɖo èdù ɖe mè, eye èdùamètɔwo mu xɔ̀ mì, àlo mu ɖo èto mì òa, ne mì le jo lè funua, mì hũhũ èkɔ kè lè mìabe àfɔ̀ gɔ̃mèa ɖɛ, ne bèa nyi ɖase ɖo woa ŋuti.”

¹²Nukplaviawo yì do Mawu be àŋɛ̀a na àmèwo be woa ɖɔ̀lì èdɛ̃.

¹³Wo nyà gbɔ̃gbɔ̃ vuɛ̃ sùgbɔ. Wo sì àmì na èdɔ̀nɔ̀ sùgbɔ, dà èdɔ̀ na wo.

¹⁴Èfìɔ Herod sè ŋùdãdɔ kèwo Yesù le wɔ̀a, ɖo yebe nyikɔ gbãkpe àfi sia àfi. Wo le gblɔ̃ be: “Yòhanɛ̀s Mawusilènamètɔa ye fɔ̃ so èku; ènu kè ŋuti ye be ɖo ŋusɛ̃ le wɔ̀ ŋùdãdɔwoa yeŋu.”

¹⁵Vɔ̀a, àmè ɖewo le gblɔ̃ be: “Èli ye.” Àmè buwo gblɔ̃ be: “Mawu be gblɔ̃ɖɛtɔ sìgbè gblɔ̃ɖɛtɔ xoxoawo dòmètɔ ɖèka nène ye.”

¹⁶Kè Herod sè ènyà kèa woa, e gblɔ̃ be: “Yòhanɛ̀s Mawusilènamètɔa ekè mù na wo sò èta na a, ye fɔ̃ so èku.”

¹⁷Nyàwo a, Herod ŋua ye ɖè ègbè be woa le Yòhanɛ̀s eye e na wo do è kɔ̀sɔ̀ kɔsɔ lè ègà mè. Herod wɔ̀ ekèa ɖo e xɔ̀ Herodia, nɔ̀via Filipò be èsrɔ̃ sɔ ɖè.

¹⁸Đo Yòhanɛ̀s gblɔ̃ na Herod be: “Mu sɔ̀gbè be wòa xɔ̀ nɔ̀vi wò be èsrɔ̃ sɔ ɖè ò.”

¹⁹Herodia le Yòhanɛ̀s ɖo àdɔ̀mè eye, e le ji be yèa wù ì. Vɔ̀a mu teŋu ì ò.

²⁰Đo Herod vɔ̃na Yòhanɛ̀s ɖo, e nya be àmè nyuɛ̃, àmè jɔ̀jɔɛ, àmè kɔ̀kɔ̀ɛ ye be nyi, eye, e kpɔna e ji. Yòhanɛ̀s be nupo pòpowo nana tamè bùbu sùgbɔ Herod, gãke e lɔ̃nà ɖona èto è.

²¹Ènu kè Herodia le jia, va jɔ̀ gbè ɖèka. Gbè ŋua gbèa, Herod le ɖù yebe jìgbèzã. E yɔ yebe cãmìwo ku yebe àhùagawo kudo Galilea be èdùmèmègãwo be wo ne va ɖù àzã ku yè.

²²Herodia be èvi-nyɔ̃nùvi ɖo ènuɖùpea, tɔ èwè ɖùɖu. Yebe ènu jɔ̀jì na Herod ku àmè kèwo be kpeawo. Èfìɔ Herod gblɔ̃ na nyɔ̃nùvia be: “Biɔ mù ènu ɖekpekpe kè wò jro a, mù la sɔ ɛ̀ na wò.”

²³E gbà kã àtãŋu ɖo e ji na ɛ̀ be: “Ènu ɖekpekpe kè wò la biɔ mùa, ne e gbà nyi fìɔdu nyèa be màma mè cã a, mù la sɔ ɛ̀ na wò.”

²⁴Nyɔ̃nùvia yì biɔ ènɔa be: “Nukɛ ye mù la biɔ ò?” Ènɔa ɖo e ŋuti na ɛ̀ be: “Biɔ Yòhanɛ̀s Mawusilènamètɔa be èta.”

²⁵Nyɔ̃nùvia ɖèbla yì èfìɔa gbɔ, to na ɛ̀ be: “Mù jro be wòa na mù Yòhanɛ̀s Mawusilènamètɔa be èta ɖo àgbã gbɛjɛ mè lè fikèa, fifì jɛ̃.”

²⁶Kè èfìɔa sè ènyà kèa, e ɖɔ ku àkpɔ̃, vɔ̀a mu teŋu gbe ò, ɖo, àtãŋu kè be kãa ku àjɔ̀gbè kè be fìã na nyɔ̃nùvia lè àmè kèwo be kpeawo be ŋùmè a ŋuti.

²⁷Troloa, èfìɔa yɔ yebe gbãdãgbã ɖèka, ɖè ègbè na ɛ̀ be bèa yì sò Yòhanɛ̀s be èta va. Gbãdãgbãa yì ègàkpaa mè, sò Yòhanɛ̀s be èta.

²⁸E sɔ ètaa ɖo àgbã gbɛjɛ mè. E sɔ ɛ̀ yì na tùgbɛ̀jɛvia eye tùgbɛ̀jɛvia sɔ ɛ̀ yì na ènɔa.

²⁹Kè Yòhanɛ̀s be nukplaviwo sè ènu kè jɔ̀ a, wo sɔ yebe àmèkpòtia yì ɖì.

³⁰*Àmèdɔ̃dɔ̃awo trɔva Yesù gbɔ, va gblɔ̃ ènu kèwo keŋu wo wɔ̀a, ku ènu kèwo keŋu wo fiɔ àmè woa na ɛ̀.

³¹Vɔ̀a, Yesù to na wo be: “Mì va mi yì àfi kè àmè ɖe mu lè òa, ne mìa gbɔ̃jɛ̃ vi ɖe.” E gblɔ̃ ènyà kèa, ɖo àmè kèwo le ji woa sùgbɔ, eye ne àmè ɖewo le joa, àmè buwo vana, kaka, Yesù ku yebe nukplaviwo mu gbà kpɔ èmɔ la ɖù ènu ŋutɔ cã ò.

³²Wo ɖo ètɔ̀jihũ ɖe mè yì àzɔ̀ge, àfi kè àmè ɖe mu lè òa.

³³Vɔ̀a àmèawo kpɔ woabe jojo mè, jèsi wo; àmè sùgbɔ nya àfi kè wo le yìa, eye wo sidù to àfɔ̀ so èdùwo keŋu mè jè ŋùkɔ̀ na wo.

³⁴Kè Yesù to lè ètɔ̀jihũa mèa, e kpɔ àmèha gã ɖe. Woabe ènu wɔ̀ ŋuzĩzĩ na ɛ̀, ɖo wo lè sìgbè àlɛ̃ kèwo mu ɖo kplɔ̀tɔ ò a nène. Yesù tɔ ènu sùgbɔ fiɔfiɔ wo.

³⁵Kè hùenua yì wu nua, Yesù be nukplaviwo va e gbɔ, gblɔ̃ na ɛ̀ be: “Gàmèa yì vɔ̀; eye ènu ɖùɖu ɖe mu lè àfi kè mi lèa cã ò.

³⁶Đo àmèawo ne woa yì àgblèwo ta ku kɔpe kèwo gogo fikèawo mè ne woa yì ji ènu ɖe plè ɖù.”

³⁷Yesù ɖo e ŋuti na wo be: “Mìa ŋutɔ mì na wo ènu ɖùɖu ne woa ɖù.” Yebe nukplaviwo biɔ ɛ̀ be: “Wò ji be mia yì plè kpɔ̃nɔ klòsalò-ga èkà àtɔ̃ va na woa?”

³⁸Yesù biɔ wo be: “Kpɔ̃nɔ nenè ye lè mìa si ò? Mì yì kpɔ ɖa.” Ekè wo nya nenè kè ye a, wo va gblɔ̃ na ɛ̀ be: “Kpɔ̃nɔ àtɔ̃ ku tɔ̀mèlã èvè ye lè mia si.”

³⁹Eŋuã yomè a, Yesù gblɔ̃ na yebe nukplaviawo be woa to na àmèwo be woa nɔ̀ ànyi lè èhasòso vòvò mè ɖo ègbe mumuwo ji.

⁴⁰Yesù be nukplaviawo ma àmèawo ɖo èhasòsowo mè eye wo nɔ̀ ànyi. Èhasòso ɖewo ɖo àmè èkà èvè takpo èɖewo ɖo àmè èkà ci èwo.

⁴¹Yesù sɔ kpɔ̃nɔ àtɔ̃awo ku tɔ̀mèlã èvèawo eye, ekè e kɔ ŋùmè yìji, pòɖɛ̀ ɖo woa jia, e kã kpɔ̃nɔawo, sɔ wo na yebe nukplaviawo ne woa ma wo na àmèawo. Nène a ke ye be ma tɔ̀mèlã èvèawo cã na wo.

⁴²Àmè sia àmè ɖù ènu, ɖɔpò.

⁴³Wo cã kpɔ̃nɔ ku tɔ̀mèlã kèwo àmèawo ɖù kpɔ̀tɔ̀a eye wo ɖɔ àjàfi woèvè.

⁴⁴Vɔ̀a, àmè kèwo ɖù ènu lè funuawo la sù àmè hotu èvè èkà èwì vɔ àtɔ̃.

⁴⁵E yomè troloa, Yesù gblɔ̃ na yebe nukplaviwo be woa ɖo ètɔ̀jihũa mè, jèŋukɔ̀ na yè, yì Bɛtsaida lè àgo ɖe a ji, wàlɛbɛ kè ye ŋutɔ lè ɖo àmèha a.

⁴⁶Kè be ɖo àmèha a yomè a, e yì fãkue lè èto ɖe ji.

⁴⁷Ekè èzã do eye nukplaviawo lè ètɔ̀jihũa mè, lè ètɔ̀a dòmèa, Yesù ɖèka kpɔ̀tɔ̀ ci àgo.

⁴⁸E kpɔ be èhũ kùkua le sɛ̃ŋu na yèbe nukplaviawo, ɖo wo le kpe àyaa. Lè èzã dòmèa, e zɔ̃ ètɔ̀a ji tùtà woa gbɔ. E ji la to woa ŋuti va yì.

⁴⁹Ekè nukplaviawo kpɔ ɛ̀ eye be le zɔ̃ le ètɔ̀a jia, wo bù be ŋùãlì ye yèwo le kpɔ eye, wo tɔ àpadodo.

⁵⁰Kè woa kpata wo kpɔ ɛ̀a, àdìka sò wo. E pò nupo, gblɔ̃ na wo be: “Àgbɔ̃ ne jèpò na mì, mì mu gbà vɔ̃ ò, ènyè ye.”

⁵¹E yomè a, e ɖo ètɔ̀jihũ kè mè nukplaviawo lèa mè eye àyaa tɔtè. Ènu kèa kpaca nukplaviawo ŋutɔ,

⁵²ɖo wo mu ŋɔjè ŋùdãnu kè Yesù wɔ̀ ku kpɔ̃nɔ àtɔ̃awo mè ò, ɖo woabe èjì trì.

⁵³Yesù ku yebe nukplaviwo sò ètɔ̀a va jè àgo ku woabe èhũa ɖo Genezarɛtè be ànyigbã ji.

⁵⁴Wàlɛbɛ kè wo to lè èhũa mèa, àmèwo kpɔ Yesù eye wo jèsi ì zè ɖèka.

⁵⁵Wo pu dù yì gblɔ̃ lè àgo ŋua kpata ji kpedo be Yesù va. Eye so àfi sia àfia, àmèwo sɔna woabe èdɔ̀nɔ̀wo ɖo àbawo ji sɔna wo vana na Yesù.

⁵⁶Eye àfi sia àfi kè be yìa, kɔpewo mè ò, èdùwo mè, àlo àgblètawo ò, wo sɔna èdɔ̀nɔ̀wo ɖo èmɔwo to, blìbɔ̀nà na ɛ̀ be bèa na èmɔ ne woa tɔ àsi yebe àwù be èto mè kpò; eye àmè nenè kèwo tɔ ɛ̀ àsiawo kpata gãna.