Read gen Markò 8 Bible Online

Markò 8 - gen bible

Markò 8

¹Lè àzã ŋuawo jia, àmè sùgbɔ ɖewo gbà va bɔ̀ ke. Ekè wo mu ɖo ènu ɖe la ɖù òa, Yesù yɔ yebe nukplaviwo, gblɔ̃ na wo be:

²“Àmè kèawo be ènu wɔ̀ ŋuzĩzĩ na mù, ɖo, so ŋùkèkè ètɔ̃ sɔ̃ŋu ye wo lè ku mù; vɔ̀a, wo mu ɖo ènu ɖe la ɖù ò.

³Ne wo mu ɖù ènu ò, eye mù ɖo wo ɖoɖa woabe àxuewo mèa, wo la gbɔjɔ lè èmɔ ji, ɖo àmè sùgbɔ lè woa dòmè so àfi dìdi.”

⁴Yebe nukplaviwo ɖo e ŋuti na ɛ̀ be: “Fikɛ mi la kpɔ ènu ɖùɖu so lè zògbè kèa ji na àmè gbogbo kèawo ò?”

⁵Yesù biɔ wo be: “Kpɔ̃nɔ nenè ye lè mìa si ò.” Wo ɖo e ŋuti na ɛ̀ be: “Adrɛ̃.”

⁶Yesù ɖè ègbè na àmèawo be woa nɔ̀ ànyi. E sɔ kpɔ̃nɔ adrɛ̃awo, do àkpe na Mawu. E ma wo, sɔ wo na yebe nukplaviwo be woa ma na àmèha a; eye yebe nukplaviawo ma kpɔ̃nɔawo.

⁷Èlãvi wuiwli ɖewo cã lè woa si. Yesù do àkpe na Mawu ɖo èlãviawo ta, gblɔ̃ na yebe nukplaviwo be woa ma woa cã.

⁸Eye wo ɖù ènu, eye wo ɖɔpò, eye wo cã kãkã kèwo kpɔ̀tɔ̀awo ɖɔ àjàfi adrɛ̃.

⁹Àmè kèwo ɖù ènuawo sù àgbètɔ hotu èvè. Yesù ɖo wo.

¹⁰E yomè troloa, ye ku yebe nukplaviwo ɖo ètɔ̀jihũ ɖe mè, yì Dalmanutà be àgowo ji.

¹¹Farizìwo va Yesù gbɔ, le ji la tè è kpɔ. Wo tɔ ènyà dɔ̃dɔ̃ ku ì be bèa wɔ̀ ŋùdãdɔ ɖe sɔ ɖèfiɔ be Mawu gbɔ ye yèbe ŋusɛ̃a so.

¹²Yesù gbɔ̃ fùu, gblɔ̃ na wo be: “Nukɛ ŋuti jìjimè kèa le ji ŋùdãnu ɖo ò? Nyàwo ye mù le to na mì. Wo mu la wɔ̀ ŋùdãnu ɖèka ŋutɔ cã na wo ò.”

¹³E yomè a, e jo lè woa gbɔ, gbà ɖo ètɔ̀jihũa mè, yì ètɔ̀a be àgo ɖèa ji.

¹⁴Yesù be nukplaviwo mu gbà ɖoŋù hɛ̃ ènu ɖùɖu ɖo àsi ò. Kpɔ̃nɔ ɖèka kpò ye lè woa si lè ètɔ̀jihũa mè.

¹⁵Vɔ̀a, Yesù do *èse na wo be: “Mì kpɔ mìa ɖokoe ji nyuɛ̃ ɖe ne mìa jè àyè ɖo Farizìwo ku Herod be *mawɛhuãnua ŋuti.”

¹⁶Yebe nukplaviwo tɔ gbɔ̃gblɔ̃ lè woa ɖokoewo dòmè be: “Kpɔ̃nɔ kè mi mu hɛ̃ ɖo àsi òa ŋuti ye be le gblɔ̃ ènyà kèa ɖo.”

¹⁷Eye ekè Yesù nya ɛ̀a, e gblɔ̃ na wo be: “Nukɛ ŋuti mì le gblɔ̃ lè mìa nɔ̀nɔwo dòmè be: 'Kpɔ̃nɔ kè mu lè mia si òa, ye ŋuti ye ò?' Mì mu kpɔ nya ènu, àlo ŋɔjè ènu mè hàɖe òa? Mìabe èjì gbà trì kpò ye à?

¹⁸Ŋùkuviwo lè mìa si, co mì mu le kpɔ ènu ò; ètowo lè mìa si, co mì mu le sè ènu ò. Mì mu gbà ɖoŋù

¹⁹wàlɛbɛ kè mù kã kpɔ̃nɔ àtɔ̃awo, ma ɖo àgbètɔ hotu èvè èkà èwì vɔ àtɔ̃awo si mèa, àjàfi nenè ye ɖɔ, ekè mì cã ɖùkpɔ̀tɔ̀awo ò?” — Wo gblɔ̃ na ɛ̀ be: “Woèvè.”

²⁰“Eye, wàlɛbɛ kè mù sɔ kpɔ̃nɔ adrɛ̃ na ènu ɖùɖu àgbètɔ hotu èvèa ɖe, àjàfi nenè mè ye mì lɔ ɖùkpɔ̀tɔ̀awo ɖo jo ò?” — Wo ɖo e ŋuti na ɛ̀ be: “Àjàfi adrɛ̃ mè ye.”

²¹Eye Yesù ɖo e ŋuti na wo be: “Eŋuãa, mì mu kpɔ ŋɔjè e mè hàɖe òa?”

²²Yesù ku yebe nukplaviwo yì kɔpe kè wo yɔna be Bɛtsaidaa mè. Èdùamètɔwo kplɔ̀ ŋùvìnɔ̀ ɖe va e gbɔ, ɖè kuku na ɛ̀ be bèa ɖo àlɔ̀ e ji.

²³Yesù le ŋùvìnɔ̀a be àlɔ̀, kplɔ̀ ɛ̀ to jo lè kɔpea mè. E ɖo ètã ŋùvìnɔ̀a be ŋùkuviwo ji, sɔ yebe àlɔ̀wo ɖo e ji, biɔ ɛ̀ be: “Wò le kpɔ ènu ɖe a?”

²⁴Ŋùvìnɔ̀a hũ ŋùku, gblɔ̃ be: “Mù le kpɔ àmèwo; wo lè sìgbè àtiwo nène, vɔ̀a wo le zɔ̃.”

²⁵Yesù gbà ɖo àlɔ̀ ŋusùa be ŋùkuviwo ji, zè èvègɔ̃a, eye ŋusùa be èdɔ̀a vɔ̀. E kpɔ àzɔ̀ge ɖoɖa, kpɔ ènu sia ènu nyuɛ̃ ɖe.

²⁶Yesù gblɔ̃ na ɛ̀ be: “Yì àpo àxomè; mù gbà trɔyì èdùa mè hàɖe ò.”

²⁷Yesù ku yebe nukplaviwo yì kɔpe kèwo pòxla èdù kè wo yɔna be Kayizarèa, eye be nyi Filipò tɔ̀a mè. Kè wo zɔ̃ èmɔ le yìa, e biɔ yebe nukplaviwo be: “Àmè kɛ ye àmèwo gblɔ̃nà be mù nyi ò?”

²⁸Wo ɖo e ŋuti na ɛ̀ be: “Àmè ɖewo gblɔ̃nà be, èwò ye nyi Yohanɛ̀s Mawusilènamètɔa; àmè ɖewo cã gblɔ̃nà be èwò ye nyi Èli, eye àmè buwo gblɔ̃nà be, Mawu be gblɔ̃ɖɛtɔwo dòmètɔ ɖèka ye wò nyi.”

²⁹Vɔ̀a, Yesù biɔ wo be: “Mìawo ya ɖe, àmè kɛ ye mì gblɔ̃nà be mù nyi ò?” Petrò ɖo e ŋuti na ɛ̀ be: “Èwò ye nyi Mɛ̀siaa.”

³⁰Yesù do *èse na wo veve ɖe be wo mu gbà gblɔ̃ ɛ̀ na àmè ɖe ò.

³¹E yomè a, Yesù gbà tɔ ènufiɔfiɔ yebe nukplaviwo. E gblɔ̃ na wo be: “E jè be *Àgbètɔ be Èvia bèa kpe èfũ sùgbɔ; èdùmèmègãwo ku * mawunɔ gãwo, kudo ènuŋlɔ̀tɔwo la gbe ɛ̀; wo la wù ì; vɔ̀a, lè ŋùkèkè ètɔ̃ yomè a, e la fɔ̃ so èku.”

³²Yesù gblɔ̃ ènyà kèawo na wo fàa. Vɔ̀a Petrò kplɔ̀ ɛ̀ yì àzɔ̀ge, le gbe ènyà na ɛ̀.

³³Yesù trɔ kpɔ ŋùgbe, kpo yebe nukplaviwo ɖoɖa. E jègo do Petrò sɛ̃sɛ̃ ɖe be: “Èwò Satana, bu lè àfi kèa, ɖo wo mu bùnà ènu sìgbè Mawu nène ò; vɔ̀a, sìgbè àgbètɔwo nène.”

³⁴Eye, Yesù yɔ àmèha a ku yebe nukplaviwo, gblɔ̃ na wo be: “Ne àmè ɖe le ji la jè yo nyè mèa, àmèa ne gbe ye ɖokoe, ne sɔ yebe àtisòga, ne bèa kpàsà mù do.

³⁵Đo àmè ɖekpekpe kè jro la hlùɛ̃ yebe àgbè gãa, la bu ì. Vɔ̀a, àmè ɖekpekpe kè la bu yebe àgbè ɖo èta nyè ku àŋɛ̀nyuɛ̃ a taa, la hlùɛ̃ ɛ̀ gã.

³⁶Đo àlè kɛ ye e la ɖè na àgbètɔ, ne xixe kplògòdòa nyi ye tɔ̀ vɔ̀a, e bu yebe àgbè a ò?

³⁷Àlo nukɛ ye àgbètɔ la teŋu sɔ plè ye ŋutɔ be àgbè ò?

³⁸Đo àmè ɖekpekpe kè la kpɛ̃ŋù ɖo ènyè ku ènyà nyèwo ŋuti lè jìjimè vuɛ̃, gbòlòwɔ̀tɔ kèa be ŋùmè a, *Àgbètɔ be Èvia cã la kpɛ̃ŋù ɖo e ŋuti wàlɛbɛ kè be la va lè Ètɔa be gogo mè ku àtikplɔtɔ kɔ̀kɔ̀ɛawo.”