Read gen Lukà 11 Bible Online

Lukà 11 - gen bible

Lukà 11

¹Gbè ɖèkaa, Yesù lè fãkue lè tèpe ɖe. Ekè e ɖo ènutèa, yebe nukplaviwo dòmètɔ ɖèka gblɔ̃ na ɛ̀ be: “Tɔhonɔ̀ fiɔ mi kuefã sìgbè àlekè Yòhanɛ̀s fiɔ yebe nukplaviwo nène.”

²Yesù gblɔ̃ na wo be: “Ne mì le fãkuea, mì gblɔ̃ be: 'Mia Tɔ kè lè jiŋùkusia, àpo nyikɔ ŋuti ne kɔ̀, àpo fìɔɖùɖu ne va.

³Na mi, miabe gbè sia gbè be ènu ɖùɖu.

⁴Sɔ miabe èvuɛ̃wo kè mi, ɖo miawo cã mi sɔ kènà àmè kèwo dà lè mìa jiawo. Mù gbà na mia jè tètèkpɔ mè ò.'”

⁵Yesù yì e ji gblɔ̃ na yebe nukplaviawo be: “Ne mìa dòmètɔ ɖe yì èxlɔ̃a gbɔ, lè èzã dòmè, to na ɛ̀ be: 'Èxlɔ̃ nyè, do kpɔ̃nɔ ètɔ̃ na mù,

⁶ɖo èxlɔ̃ nyè ɖe lè èmɔ ji, va tù mù, eye ènu ɖekpe mu lè àsi nyè ne ma na ɛ̀ bèa ɖù ò a',

⁷eye èxlɔ̃a la nɔ̀ èxɔ̀ mè la ɖo e ŋuti ɖoɖa be: 'Mù gbà ɖè èfũ na mù ò. Mù tu èhɔ̃ vɔ̀, eye mia kudo èvi nyèwo mi mlɔ̃ ànyi, eye nyè mu gbà la teŋu fɔ̃, la sɔ kpɔ̃nɔ na wò ò a',

⁸mù le to na mì be, ne mu sitè sɔ ɛ̀ na ɛ̀, ɖo èxlɔ̃a kè be nyia ŋuti òa; ɖo èŋù kè mu lè kpɛ̃ àmè ɖetɔa ŋuti òa, e la fɔ̃, eye be la sɔ ènu sia ènu kè èxlɔ̃a hiãa na ɛ̀.

⁹“Ye ŋutia, mù le to na mì be: mì biɔ, ne woa na mì; mì ji ne mìa kpɔ; mì pò èhɔ̃, ne woa hũ ì na mì.

¹⁰Đo àmè sia àmè kè biɔ ènua, wo la na ɛ̀; àmè sia àmè kè ji ènua, e la kpɔ ɛ̀, eye àmè sia àmè kè pò èhɔ̃a, wo la hũ ì na ɛ̀.

¹¹Ètɔ kɛ ye lè mìa dòmè, kè ne èvia biɔ ɛ̀ ètɔ̀mèlãa, la sɔ èdã na ɛ̀ ò?

¹²Àlo ne e biɔ ɛ̀ kòklo-zĩa, e la sɔ àkekle na ɛ̀ ò?

¹³Ne mì, àmè kèwo nyi àmè vuɛ̃wo ŋutɔ cã a, mì nya àlekè mì la na ènu nyuɛ̃wo mìabe èviwoa, àleke mìa Tɔ kè lè jiŋùkusia, mu la na Gbɔ̃gbɔ̃ Kɔ̀kɔ̀ɛ àmè kèwo biɔ ɛ̀a wu ò?”

¹⁴E le nyà gbɔ̃gbɔ̃ vuɛ̃ àmumui ɖe to lè àmè ɖe mè gbè ɖèka. Ekè gbɔ̃gbɔ̃ vuɛ̃ a toa, àmèa tɔ nupo pòpo eye àmèhawo kã yàa.

¹⁵Vɔ̀a, woa dòmètɔ ɖewo gblɔ̃ be: “Bɛlzebul, gbɔ̃gbɔ̃ vuɛ̃wo be èfìɔa be ŋusɛ̃ be sɔ le nyà gbɔ̃gbɔ̃ vuɛ̃awo.”

¹⁶Ne woa sɔ tè è kpɔa, àmè buwo cã, le biɔ ɛ̀ be ne wɔ̀ jèsì ɖe sɔ fiɔ be yè so Mawu gbɔ.

¹⁷Ekè Yesù nya woabe susua, e gblɔ̃ na wo be: “Fìɔdu ɖè sia ɖè kè mè màma lèa, gbãnà, eye yebe àxuedowo crɔ̃na.

¹⁸Ne màma lè Satana be fìɔɖùɖua mèa, leke yebe fìɔdua la teŋu likè ɖo ò? Đo mì lè gblɔ̃ be Bɛlzebul be nyikɔ mè mù le nyà gbɔ̃gbɔ̃ vuɛ̃wo to lè.

¹⁹Ne gbɔ̃gbɔ̃ vuɛ̃wo be èfìɔa ji mù to, nyà gbɔ̃gbɔ̃ vuɛ̃woa, eŋuã mìabe èviwo ya ɖe, àmè kɛ ji ye wo tona, nyànà wo ò? Woawo ŋutɔ ye le nyi mìabe kòjoɖotɔ.

²⁰Vɔ̀a ne e nyi Mawu be ŋusɛ̃ ye mù sɔ le nyà woa, eŋuã Mawu be fìɔɖùɖua va ɖo mìa dòmè.”

²¹“Ne ŋusù glo ɖe bla àkpà, le ɖia yebe èfìɔsaa, yebe ènunɔ̀amèsiwo nɔ̀nà ànyi gãgã ɖe.

²²Vɔ̀ ne ŋusù bu kè sɛ̃ŋu wu ìa va wɔ̀ àvũ kudo è, ɖù e jia, e xɔ̀nà yebe àhùawɔ̀nu kèwo ŋuti be donajì ɖoa jo lè e si, eye e mana ènu kèwo be xɔ̀ lè e siawo.”

²³“Àmè kè mu lè èji nyè òa, sitè ɖo ŋuti nyè, eye àmè kè mu le cã ènu bɔ̀ kudo mù òa, le kãkã ɛ̀ hlɛ̃.”

²⁴“Ne gbɔ̃gbɔ̃ màkɔ̀ màkɔ to lè àmè ɖe mèa, e yì dãna to tèpe pupuwo, jina jɛ̃gbɔ̃pe. Vɔ̀ ne mu kpɔ tèpe ɖekpe òa, e gblɔ̃nà be: 'Mù la gbìgbɔ̀ yì àxue nyè kè mè mù to lèa mè.'

²⁵Ne e trɔvaa, eye be kpɔ be wo kplɔ̀ àxuea mè, jrà ènuwo ɖo nyuɛ̃ ɖe a,

²⁶gà ŋua mèa, e yì kplɔ̀nà gbɔ̃gbɔ̃ vuɛ̃ adrɛ̃ bu kèwo nyràku wu ye ŋutɔa, bɔ̀nà ɖo ye ɖokoe ŋuti vana. Wo ɖona àmèa mè eye wo nɔ̀nà funua. Àmèa be àgbè kè be va nɔ̀nà lè e yomè a va nyrànà wu ekè be nɔ̀ sãa.”

²⁷Vɔ̀a, ekè Yesù le gblɔ̃ ènyà kèawoa, nyɔ̃nù ɖe kɔ ègbè yìji so àmèha a dòmè gblɔ̃ na ɛ̀ be: “Mawu tusì na nyɔ̃nù kè be àdɔ̀mè wò nɔ̀ eye wò nɔ yebe ànɔa!”

²⁸Vɔ̀ Yesù ɖo e ŋuti na ɛ̀ be: “Ɛ̃, vɔ̀a, àmè kèwo lè sè Mawu be ènyàa, eye wo le wɔ̀ ɖo e jiawo bòhũ ye wo tusì na.”

²⁹Fifìa, kè àmèhawo va bɔ̀ do Yesùa, e gblɔ̃ na wo be: “Jìjimè kèa jɔ̀ vuɛ̃ loò! Wo le ji jèsì, vɔ̀a wo mu la na wo ɖekpe, wu Yonà be jèsìa ò.

³⁰Đo sìgbè àlekè Yonà nyi jèsì na Ninivètɔwoa, nènea ke *Àgbètɔ be Èvia cã la nyi jèsì na jìjimè kèa yeŋu.

³¹Lè kòjoɖoɖo be àzã gbèa, àpùgo be èfìɔ nyɔ̃nùa la sitè ɖo jìjimè kèa ŋuti, eye e la dohùɛ do mì àgbãŋùgbà, ɖo e so ànyigbã be nukpòpewo va be yèa sè Salomɔ̀n be ènyà kèwo mè ènunya lè; vɔ̀ kpɔɖa, àmè ɖe lè fikè, wu Salomɔ̀n.

³²Ninivètɔwo la sitè, lè kòjoɖoɖo-zã gbè ɖo mì, jìjimè kèa ŋuti, eye wo la dohùɛ do mì àgbãŋùgbà, ɖo wo ɖɔ̀lì èdɛ̃, wàlɛbɛ kè Yonà gblɔ̃ mawunya na woa. Kpɔɖa àmè ɖe lè fikèa kè wu Yonàa.”

³³“Àmè ɖekpe mu sũnà kãligbɛ̃, ɖona wawlape, àlo cɔ̃na ènu e ji ò, vɔ̀ e sɔ dànà ɖo kãligbɛ̃ti ji bòhũ, ne bèa klɛ̃ na àmè kèwo le va àxuea mèawo.

³⁴Àpo ŋùkuvi lè sìgbè kãligbɛ̃ nène na àpo àmèti bliboa. Ne àpo ŋùkuvi lè nyuɛ̃ ɖe a, àpo àmèti bliboa mè la kɔ̀. Vɔ̀ ne àpo ŋùkuvi mu lè nyuɛ̃ ɖe òa, àpo àmèti bliboa mè la do vìvìti.

³⁵Ye ŋutia, kpɔ ɖokoe wò ji nyuɛ̃ ɖe be kɔ̀kɔ̀ɛ kè lè èwò mèa, mu gbà trɔ zũ vìvìti ò.

³⁶Ne àpo àmèti bliboa mè kɔ̀, eye ne àkpa ɖèti mu do vìvìti òa, àpo àmèti bliboa mè la kɔ̀ keŋu, sìgbè àlekè ne kɔ̀kɔ̀ɛ le klɛ̃ ɖo èwò mèa nène.”

³⁷Ekè Yesù le pò nupoa, Farizì ɖe kpe è be ne va ɖù ènu kudo yè. Nène a, e yì nɔ̀ ànyi, lè ɖù ènu.

³⁸E wɔ̀ ŋùdã na Farizìa be Yesù mu klɔ àsi ɖo Yudàviwo be ɖoɖo nu gbɔ̀xue lè ɖù ènu ò.

³⁹Tɔhonɔ̀ gblɔ̃ na ɛ̀ be: “Mìa Farizìwo, mì klɔna mìabe kogò ku àgbãwo ŋuti, vɔ̀ mìabe èjì ɖɔ fuu ku èfĩ fìfi, kudo èvuɛ̃ wɔ̀wɔ.

⁴⁰Yɛ̀yìnɔ̀wo! Mu nyi àmè kè wɔ̀ ŋutia, ye ke wɔ̀ e mè cã òa?

⁴¹Mì sɔ ènu kè lè e mèa na wɔ̀amènɔ̀wo, eŋuã ènu sia ènu ŋuti la kɔ̀ na mì.”

⁴²“Bàbà na mì, Farizìwo, ɖo mì nana ègbe huɛ̃ titi ku gbekui bu ɖè sia ɖè be màma èwogɔ̃a, vɔ̀ mì gbena ènu jɔ̀jɔɛwɔ̀wɔ ku Mawu lɔ̃lɔ̃ ya! Ènu kèawo ye e jè be mìa wɔ̀ cucugbã, eye mì mu la ɖè èkɔ̀ lè kpɔ̀tɛawo ŋuti ò.”

⁴³“Bàbà na mì, Farizìwo, ɖo mì lɔ̃nà bùbu be àzìkpe ji nɔ̀nɔ lè bɔ̀bɔ̀pewo, eye mì jina be woa do ègbè na mì ku bùbu lè àgbowo nu!

⁴⁴Bàbà na mì! Mì lè sìgbè èyɔ̀do kèwo mu zena ò, eye àmèwo tona woa ji lè mà nya mèa nène.”

⁴⁵Eye èsefiɔtɔwo dòmètɔ ɖèka gblɔ̃ na Yesù be: “Ènufiɔtɔ, wò le zũ miawo cã le ènyà kè wò le gblɔ̃a mè.”

⁴⁶Yesù ɖo e ŋuti be: “Bàbà na mì, èsefiɔtɔwo cã, ɖo mì drona àgbã kpɛ̃kpɛ̃, na àmèwo, eye mìa ŋutɔwo mì mu dona àlɔ̀vi ɖèka tigɔ̃ cã ɖoɖa be yèwoa kpe ɖo e drotɔwo ŋuti ò.

⁴⁷Bàbà na mì! Đo mì jrànà Mawu be gblɔ̃ɖɛtɔwo be èyɔ̀dowo ɖo, sĩ vɔ̀a mìa tɔgbewo ye wù wo.

⁴⁸Nène a, mì zũ ɖàsèfowo, dà àsi ɖo mìa tɔgbewo be ènu kèwo wo wɔ̀awo ji, ɖo woawo ye wù Mawu be gblɔ̃ɖɛtɔwo, eye mìawo yaa mì jrà woabe èyɔ̀dowo ɖo.

⁴⁹Ekèa ŋuti ye Mawu be Ènunya gblɔ̃ be: 'Mù la dɔ̃ gblɔ̃ɖɛtɔwo kudo *àmèdɔ̃dɔ̃wo ɖoɖa wo; wo la wù èɖewo, eye wo la tĩ èbuwo yomè.'

⁵⁰Nène a, Mawu la dɔ̃ èto na mìa jìjimè kèa ɖo yebe gblɔ̃ɖɛtɔ kèwo wo wù so kaka xixea be dòa ŋuti.

⁵¹So Abɛ̀l be èku ji, kaka va Zakarìa kè wo wù lè vɔsakpea kudo kɔ̀kɔ̀ɛpea be dòmèa ji. Ɛ̃, mù le to na mì be, wo la dɔ̃ èto na jìjimè kèa, ɖo wɔ̀na kèawo keŋu ta.”

⁵²“Bàbà na mì èsefiɔtɔwo! Mì ɖè ènunya be sãfea jo; mìa ŋutɔwo, mì mu hũ ì ɖo e mè ò, eye mì xe èmɔ na àmè kèwo jro be yèwoa ɖo e mèawo cã.”

⁵³Ekè Yesù jo lè funua, èsefiɔtɔwo kudo Farizìwo do àdɔ̀mèze ɖo e ŋuti ŋutɔ. Wo biɔ ɛ̀ ènyà so ènu sùgbɔ ŋuti,

⁵⁴eye wo nɔ̀ èxa mè na ɛ̀ be bèa gblɔ̃ ènyà ɖe kè mè wo la le è lèa.